Hakha Township People’s Conference Kong Thawngthanhnak!
==================================
Ralhrang Min Aung Hlaing nih uknak chuh a kan timh ni 2021 February 1 thok in Pau Dothlennak thok a si i Hakha peng zong ah nihin tiang ni 589 chung ngol loin kan tuah. Pau Dothlennak cu a thawn chin nakhnga 2022 September 9 ah palai 300 tluk he Conference tlamtling tein kan tuah i Hakha peng dothlennak cu Conference nawlpeknak he pehzulh in kalpi a si lai, tiah a tanglei bantukin thawng kan in thanh hna.
Conference biachahnak biapimi hna, 1. Hramhram uknak le mi tam namneh uknak in Chin miphun le ram kan luat hlan lo pehzulh in dothlennak tuah ding le CNF/A he naihniam tein riantuanti ding. 2. CDF-Hakha Council cu Mie peng, Senthang peng, Zokhua peng, Hakha khuapi tiin dothlennak caah aa funtommi bu a si bantukin Hakha peng chung dothlennak caah CDF-Hakha Council lawnglawng dotlami a si. Cucaah Pau Dothlennak a dih hlan chung cu Hakha peng chungah (hriamtlai/uknak) phu dang tuah lo ding.
3. Hakha peng chungah Conference hlan i a rak ummi phu vialte cu Conference tuah ni 2022 September 9 thok in hrawh le CDF-Hakha Council he aa pehtlaimi lawng nunter a si. Cucaah hmun dang in dothlennak phu dang hna nih Hakha peng chung dothlennak kong ah CDF-Hakha Council dah ti lo a dang pehtlaihnak tuah lo ding. 4. Conference hnu cun Presidential System in thithruainak kalpi ding, Hakha peng runvennak le humhimnak siseh, phungsernak, uknak le biaceihnak siseh, CDF-Hakha Council nih tuanvo lak ding.
5. CDF-Hakha Council nih dothlennak caah a fehtermi phung ning in tuahmi paohpaoh cu dothlen lio ah siseh, dothlennak a dih hnuah siseh, tazacuai dantat khawh a si lai lo i CDF-Hakha Council nih phung ning in a tuahmi vialte cu dothlennak a dih hnu mizapi cozah nih pehzulh in tuanvo a lak lai.
Hakha peng dothlennak tuanbia tawi; 1. 2021 February 7 ni thok in May thla tiang lamzawhnak kan ngei i minung 30,000 tluk kan rak si. 2. 2021 February zarh khatnak in cozah riantuan hna nih CDM tuah hram an thok i Hakha i department zung 74 in minung 4,000 (95%) tluk nih CDM an tuah. 3. 2021 March 21 Hakha peng chung pengtlang dihlak aiawh meeting ah hriamtlai dothlennak tuah ve ding in CDF-Hakha dirh a si. Ral voi (103) kan tu cang, ralhrang uico (419) kan thah i uico (192) kan hliam hna. Kawlram ah khuapi kahdohnak a tuah bik kan si i voi (50) renglo kan tuah cang.
4. Hakha peng chungah ralhrang tlaihkhih a tongmi minung (337) an si, minung (309) an chuak than i (28) hi an taang rih, ralhrang kut in mizapi minung (6) nunnak a liam, inn (27) an khangh, ralhrang bomb nih inn (3) a hrawh. 5. Hakha peng cu a vawlei in zatuak 90% leng kan control khawh cang. Ramchung ramleng in dothlennak a dirkamhtu mizapi nan cungah kan i lawm. Ram le miphun caah, Chinland Defense Force – Hakha Council.
Relchap; (Crd-The Chin Post) National People Defence Force – NPDF Cu Hriamthil An Ngeih Lo Caah Dohthlennak In I Din Cang! Sagaing ramṭhen ah umhmun khuarmi National People Defence Force – NPDF cu SAC ralkap dohnak dingah hriamngan kan ngeih lo caah dohthlennak ah kan i din cang, tiah fianternak an tuah tiah theih a si. National People Defence Force – NPDF cu SAC nih nawlngeihnak a lak hnu in SAC ralkap le NPDF karah voi 5 lawng kahdohnak a chuak, tiah theih a si. NPDF hruaitu bawino Thu Rein nih, “Dohthlennak chungah hriamnam le minung thazaang kan chambau tuk ruangah ralkap hna hi kahdohnak hmun ah ka thlah ti hna lo. A ruang cu hriamnam loin ralram ah thih ding ka siang hna lo,” tiah a chim.
Ni 15 Chungah Sagaing Peng Tualchung Mi 7 Nak Tlawm Lo Thah An Tong, Sagaing ramṭhen, Sagaing peng khuate ah September 1-17 tiang ah tualchung mi 7 nak tlawm lo thah an tong. A thimi hna chungah khuabawi zong an i tel, tiah mi bawmchantu phu sinin theih a si. “Nizan September 16 ni zinglei sml 2:00 hrawng ah Sagaing peng Sinmay(ဆင်မြေ) khuami Nan Aung Thu(50) le Phyo Min Thu(35) hna cu an inn ah hriamtlai phu khat nih an thah hna,” tiah mi bawmchantu pakhat nih a chim.
September 14 zan sml 11:00 hrawng ah Sagaing peng Aungsipin(အောင်စည်ပင်) khua i, inn zaa uktu Win Khine cu a inn ah a um lioah hngalh lomi hriamtlai phukhat nih an thah, tiah theih a si. September 12 zanlei sml 4:00 hrawng ah Sagaing khua Nilar sang No.3 Sagaing-Shwe Bo pengkomh kalnak lam ah kum 20 tluk nu pakhat le kum 30 tluk nu pakhat cu an hmai hup buin thah an tong. An ruak pawng ah kum 2 tluk ngakchia pakhat zong an hmuh, tiah theih a si.
September 8 zanlei sml 1:00 hrawng ah Sagaing peng Htantaw(ထန်းတော) khuami Zaw Ye Aung cu a inn ah hngalh lomi hriamtlai phu nih nam in an sawh i a thi. September 1 zinglei sml 6:00 ah Sagaing khua Seti(စည်တီး) sang ummi Kyaw Naing zong minung 2 nih an rak kah thah. Bukalay Khua Ah Rohingya 58 Cu Thong Kum 2 Cio Thlak Ding In Bia An Kiahpiak Hna, Ayeyarwaddy ramṭhen, Bukalay pengah rammi sinak a ngei lomi Rohingya 58 cu, thong kum 2 cio thlak ding in biaceih zung nih September zarhhnihnak ah bia an khiahpiak hna tiah theih a si.
“An dihlak minung 58 an si, cu chungah kum tlinglo nu 15 le pa 9 an I tel. Mino chiahnak sakhan lei ah an kuat hna,” tiah palik pakhat nih a chim. Rohingya 58 cu an umnak Rakhine ramkulh in Yangon lei an kal lio a luancia August 28 ah an kalnak tilawng a rawh caah an rak tlaih hna hnu zarhhnihnak ah kum 2 cio thong thlak ding in biaceih zung nih bia khiahpiak an si hi a si.
MyitNge Khua Tlanglanwg Sehzung Uktu Nu Kahthah A Tong, Mandalay ramṭhen, MyitNge(မြစ်ငယ်) tlanglawng sehzung general manager zung uktu nu pakhat cu meithal in kahthah a tong tiah theih a si. Amarapura(အမရပူရ) peng Satu Setkwe(စာတိုး စက်ကွေ့) sangah a ummi zung uktu Kyi Kyi San cu nizaan September 16 ni zung a lawi pahah hngalh lomi phu nih meithal in an kah i, a hmun ah a thi colh, tiah theih a si. SAC nih nawlngeihnak an lak hnu in CDM tuahtu tlanglawng rianṭuan hna cu an tlaihkhih hna i, an umnak inn in an rak chuah hna.
PDF Bantuk In Aa Umtermi Pyusawhti Phu Cu PDF Nih An Kah Hna Caah Minung 7 An Thi, Tawpu(တောပု) khua pawngah PDF bantuk in aa umtermi Pyusawhti hna nih tualchung mi hna checkhlatnak an tuah len hna caah kan kah hna, tiah People’s Defence Force – South Monywa nih cathanh an chuah. Nizan September 16 zaanlei sml 1:25 ah Tawpu khua pawng Sepauktwe(ဆယ်ပေါက် တွဲ) hmun ah Pyusawhti nih PDF bantuk in an i umter i, mi chawkvai an checkhlat len hna, tiah theih a si.
Pyusawhti nih chekhlatnak an tuah tik hna ah cycle, phone le tangka tibantuk nan fir lai lo, ralkap thawngpang mi nan pe hna lai lo, cuti nan tuah ahcun kan in thah hna lai, tiah an tlerhnak hna, cucaah khuami nih PDF an chimh hna i PDF nih an kah hna hi a si, tiah theih a si. Pyusawhti pawl cu 40 mm lung 4 in kan kah hna caah 7 an thi. An hawile bawmtu dingah an rat caah an hriamnam kan la hmanh lo, tiah PDF- South Monywa nih cathanh an chuah.
Hpapon Pengkomh Ah Kahdohnak Voi 60 Leng A Chuak I, SAC Ralkap 50 Leng An Thi, Hpapon pengkomh ah KawthuLay No.(5) Brigade le SAC ralkap karah zarhhnih renglo chung kahdohnak voi 60 leng a chuak i, SAC ralkap lei in 51 an thi, tiah Mutraw News nih an langhter. September 1 in 15 tiang Mutraw pengkomh, Kawthu Lay No.(5) Brigade hmunram ah Brigade 5 kuttang ralkap hna le SAC ralkap karah voi 68 kahdohnak a chuak i SAC ralkap 51 an thi, 31 hliamhma an pu, tiah theih a si. SAC ralkap a thimi chungah ralbawi 3 an i tel i, hliamhma pumi chungah Deputy Battalion Commander 2 ai tel. Kawthu Lay ralkap lei in ralkap 1 a nunnak a liam i, 11 hliamhma an pu, tiah Mutraw News nih a langhter.
Kalaymyo Peng SAC Sinah PDF Chungtel An I Ap Tiah Timi Cu Anmah SAC Ralkap Lila Nih An Tlaihmi Hna An Si, Kalaymyo peng PDF chungtel minung 4 cu phungning tein SAC ralkap sinah an i ap i September 15 zinglei ah biahrennak minsen kan thutter hna hnu ah kan thlah hna, tiah SAC nih a dik lo ningin thawng an rak thanh.
SAC sinah an i ap tiah timi Nu 4 hna cu PDF chungtel an si lo pinah pehtlaihnak a ngeimi hmanhh an si lo tiah theih a si. A luancia September 4 ni lioah Mawleik peng SAC ralkap nih, Kaungkwe(ကောင်းကွေ) khuami nu 2, Hmanngwe(မှန်နွဲ) khuami nu 2 hna cu an rak tlaih hna i Kalaymyo ah kan in thlah te hna lai tiin an rak timi hnatu an si, tiah tualchung mi hna sinin theih a si.
SAC Ralkap Hriamngan Kahmi Bangladesh Ram Ah A Tla Ngakchia Pakhat A Thi! Nizaan september 16 ni ah, SAC ralkap nih Bangladesh ramri thluangthluan hriamngan in an kah i an kahmi hriamngan kuan Bangladesh ramchung ah a tlak caah Rohingya ralzam kum 17 ngakchia pakhat a thi i minung paruk hliam an tuar tiah, tuanvo ngeitu hna nih cun an chim.
SAC ralkap le AA kar kahdohnak hi ramri hmun tampi ah a cang i kan nih lei zong nih ramri vengtu ralkap thazang kan chap len ve tiah, Bangladesh Bandarban District Deputy Commissioner(DC) nih a chim. SAC Ralkap hriamngan kuan hi Bangladesh ramchung ah atu le tu a tlak tawn caah, SAC khinhmi Ambassador zong kan kawh i kan lungtlin lonak zong kan chim len cang tiah, a chim chap.
SAC ralkap nih hin Rohingya ralzam mi Myanmar ramchung kir than dingmi timhtuahnak hi a hlawhtling hlah seh tiah, Rohingya ralzam umnak cu hriamngan in a rak kah tawn tiah Rohingya ralzam hna nih cun an chim ve.
AA Nih An Tlaih Hna Hnuah An Thlah Thanmi SAC Ralkap Nih Thong A Thlak Chap Hna, Rakhine hriamtlai AA nih an tlaih hna hnu ah dam tein an thlah thanmi paoh cu SAC ralkap nih thong an thlak chap ve hna tiah theih a si. Kaphnih kar ikahdohnak chungin AA nih an tlaihmi hna SAC ralkap pawl cu tha tein zohkhenh le fimtawl an si hnu ah AA nih an thlah than ko hna nain SAC ralkap nih an zumhraih ti hna lo caah Rakhine ramkulh Sittwe khua thonginn ah thong an thlak chap hna hi a si.
AA nih tlaihmi lawng siloin SAC ralkap sinak in a zaam mi hna zong thongthlak chih an si i Sittwe thonginn ah a um mi hi minung 90 hrawng an si tiah theih a si. SAC ralkap chungah khat le khat i hmuhthiam lonak le i entainak a karh chin lengmang i an hruaitu le cungah mawhchiatnak a faak chin lengmang tiah SAC ralkap chunglei theitu pakhat nih a chim.
Leave a Reply