BREAKING NEWS, Putin Nih Vawleicungpi Ram Dihlak Sinah Ralring A Pek

Zei bantuk Ram Nan Si Zong Ah Kan Lehrulh Hna Lai Tiah Putin Nih Vawleicung Ram Sinah Ralring A pek

Ukraine kahdohnak chungah luh dingin aa zuam mi paoh poah cu zei bantuk ram nan si zong ah dawhcah loin kan lehrulh hna lai tiah Russia President Putin Vawleicung ram hna sinah ralring a pek.  ” Kan mah sinah hohmanh nih an ngeih rih lo mi, an i uahpi ngam rih lomi, an chuah kho rih lo mi hriamnam cu kan mah Russia nih kan ngeih.

Mah pawl hna hi a herh ah cun kan chuah lai i, kan hman ko lai” ti zongin Putin nih a chim. Mah hna chungah Intercontinental ballistic missiles le Nuclear hriamnam pawl an si lai tiah an ruah damh ruangah Putin nih a tu bantuk in a chim phuan nak hi a si.

Russia ram cu nitlak lei ram hna nih phung ning loin phihkham dantatnak pawl cu Russia ram nih a in tuarnak kong, Bank system, thilkuatnak kong, serchuahnak kong le Chawleh phihkhman nak kongah siseh Russia nih lunthawng ngai in a in tuarnak kong zong Putin nih a chim.

Ukraine nichuahlei lawng si ti lo in, a zinan le tlanglawng pawl an sernak sehzung hmunhma tingin zongin Russia nih a kah cang hna. “Nanmah Ukraine ruangah Ralpi Pathumnak a chuak taktak cang lai hih” tiin Russia nih Ukraine ai hrocer len. Lampi kip, ti awk in ni tamlak chung an kah cang hna hnu cun Ukraine khuapi pakhat a si mi Luhansk peng chungum Kreminna khua pakhat te cu Russia nih a lak cang, tiah Tuesday ah khan British Defense Ministry nih a chim.

“Sloviansk le Kramatorsk cu nichuah le thlanglei in Russia ralkap nih heh tiah an vun kah i lak an duh caah, a tu hi Kreminna khuapi tiangin an kut chung a phan ruangmang cang. Kyiv in meng 355 hlatnak ah a ummi khuapi zeiti i Russia kut a phak ning belte cu kan thei lo,” tiah a chim. Hi kongah Ukraine cozah nih zeibia hmanh an chim rih lo. Ukraine i khuapi nganbik pahnihnak Kharkiv zong Russia nih bomb in heh chun he zaan he an kah i, Donetsk le Luhansk peng hi lak an i tim.

Hi hna hi Ukraine i sehzung a tamnak bik hmun a si mi Donbas ah a ummi an si. Cun Crimea lei tiang ai hlanmi hmunhma a si.

Russia nih an ukmi Kherson peng kulh chung a ummi Velyka Oleksandrivka ah Ukraine ralkap nih Russia hriamnaam chiahnak an hrawh dih i, Russia ralkap 70 renglo an thah hna, tiah Ukraine General Staff nih a chim. Popasna, Lysychansk le Girske ko ah hin mipi an temtuar a fak khun i, suimilam 24 chung lawng bakah voi 17 tiang bak kan mipi umnak Russia nih bomb in a kah, tiah Luhansk mayor Serhiy Haidai nih a chim.

Monday i Russia nih Donetsk bomb in a kah ruangah mipi 4 an thi, 9 hma an pu. A thimi lakah kum 9 hngakchianu le kum 14 thleirawlpa an i tel, tiah penguk Pavlo Kyrylenko nih Telegram ah a tial. Ukraine lei ah US nih hriamnaam tamdeuh in a kuat i, thla 2 chung raltuknak ah kan Western ramhawi pawl bomhchahnak nih thathnemnak tampi a tuah, tiah US nih a chim. “Russia hi a sung cuahmah cang. Ukraine hi a hlawh a tling cuahmah cang,” tiah Kyiv i President Zalensky an ton lio ah US Secretary of State Blinken nih a chim.

US zenkuan si lo in, $165 million man Soviet lio i hriamnaam pawl Ukriane sinah zuar dingin Washington nih a namhneh cang i, a dang hriamnaam an i damh khawhnak dingah a hlei in $300 million kan bomh rih hna lai, tiah Blinken nih a chim. Ukraine ram i a nawlngeihnak hi a sinah hmun seh, democratic ram si peng ko seh, ti hi hmuh kan duhmi a si. Asinain, Ukraine ram la kho lo lakin Russia a derthawm hi hmuh kan duhmi a si, tiin US defense secretary Lloyd Austin nih cun a chim ve.

American nih hriamnaam thazaang in bomhnak kan peknak a ruang cu, Ukraine nih hi ralpi hi vun tei sehlaw, a raminnpa a simi NATO ram pawl hi Russia thatlonak kut chungin van runven hna hi a si, tiah tuan ah khan Washington nih ai tinhmi a rak langter bangin khan, Austin nih a tubantuk in a chim hi a si. “Ukraine nih hin Russia fakpiin vun tu sehlaw, Russia le a ralkap thazaangpi hi derthawnter seh, ti hi Western ram pawl an duhnak cu a si. Asinain cucu mang manh he ai lo,” tiin Austin bia lehpah khin Russia Foreign Minister Sergei Lavrov nih a chim.

Ukraine nih tutan raltuknak ah NATO pawl i tel dingin a sawmmi nih Russia a thin a hunter chinchin, tiah Lavrov nih a chim. Western ram nih hriamnaam an bomhmi hi phungning tein doh (sazacuai) an si te lai, tiin ai hrocer len. “A zei a si khom ah Ralpi Pathumnak kan thok nakhnga lo a mikip thla nan cam cio hna, ti kan theih,” tiah Russia TV interview ah a chim. Biaka in nuclear ralpi thawh dingin heh tiah chim le ceih a si mi hi a tak in hmuh cu ka duh ruam ve lo, tiin a chim. Nuclear ral zeitluk tihnung a si hi a fiang ko. Zei sawpa ah rello ding a si ruam lo, tiin a chim.

Lavrov biachim nih hin Western ram pawl an bomhnak kan herhmi hi zei ah a rello bia a si. Kanmah bawm lo dingin Russia nih vawleipi hi a thlauh kho ti lo. Cucaah Ralpi Pathumnak thawhter nak kong a aupi. Cu ti a chimmi ko nih cun Ukraine ah sungh zatlak a tong, ti a langhter, tiah Ukraine Foreign minister Dmytro Kuleba nih Tweitter ah a chim. Russia nih Ukraine a luhhnawh ah khan Kyiv vun lak colh ai tim. Asinain, Western hriamnaam he Ukraine nih Putin ralkap pawl cu ningzak taktak in an rak dawi hna.

A tu ah cun Russia cu ningzah phen ah Donbas lei ah an i mer than cang. Cuka cu Russia holh a hmangmi an umnak a si i, tutan ral ruangah a tu hi dinti caah vanruahhang lawng an or cang i, raltuk dih zokzok cang seh, ti lawng an duh ko cang, ti asi. “Plastic tithawl a chin na on i a thawng ai theih bak ah cun na thin a tur colh lai (bomb ah na ruah caah) zeicah tiah cu bantuk tithawl hmanh cu bomb an rak si dih ngawt. Kan innpa nih an innka an tengh thawng, hei ti bantuk thawngpang a si mi paoh nih an lauhter lai,” tiin Kramatorsk pengkulh chungum Toretsk khuatemi Andriy Cheromushkin nih a chim.

“Kan dirhmun a chiakha i, a chiakha hringhran ko. Ruahchahnak a umlo. Bochan ding na ngeih lo tuk ah khin zei dah ka tuah lai, zeidah ka tuah lai lo, ti hmanh na thei kho lai lo. Thil pakhat khat tuah na duh tikah, phaisa na herh. Asinain a tu ah cu phaisa cu a um lo,” tiin a chim. Donbas lawng si ti lo in, Monday in khan cun Ukraine pawl tirawl an i chanhnak hrawhpiak dingin lamhlapi tiang Russia nih Ukraine cu bomb in heh tiah an kah cang hna.

Vynnytsia peng ah Russia vanlawng nih minung 5 an thah hna, tiah Ukraine cozah nih a chim.