Russia nih nithum te lawng ah ka lak a timi cu thlakhat a tling ve cang i Ukraine hmun biapi mi pakhat hmanh a la kho naisai ti lo. Kan hnu lei ahkhan zaam le tlik lawngte an rian deuh i a tha biatak tein a vun i hrimthan, asinain nizaan cu Kyiv khua la dingin a vun ra mi Russia ralkap ceilak le hriamnam thatha cu Marakiv khua a hung phan mi cu phirphahliklo in an rak dawi diam hawi hna. Mariupol belte cu Russia ralkap an chah ngainak asi caah an cawl kho deuh nain Ukraine ralkap pawl nih i surrender ding cu an duh naisai ve lo.
Monday ah Ukraine nitlak leiah hypersonic missiles tih nung taktak Kh-47M2 Kinzhal cu a hman tiah US official pawl nih an confirmed taktak ve. Russia nih hi a hmanmi hi a aw nakin a let 10 (Mach 10) in a rang deuhmi asi i zeibantuk missile defense system hmanh nih a kham manh lo, an timi cu US official pawl nihcun a aw nakin a let 5 tluk lawngin a rangmi asi an ti diam. A ngai tak lo ahcun US missile defense systems tha pawl THAAD khi mach 8.2 asi i MIM-104 Patriot khi mach 5 asi ve i, Aegis zong khi mach 5 cu asi diam ve.
Hi kongah Biden nihcun Russia nih hi bantuk hriamnam tihnung a hman lo ahcun a tei ti hna lo teh a ti. CBS News nih Secretary of Defense Lloyd Austin an komhnak ahcun, hi bantuk hriamnam hmannak a sullam cu kan ral kan tei ti hna lo tikah hmanhmi hriamnam asi ati ve. Nuclear cu kan ca hrangah tihnung tuk le a himlo dirhmun kan phak tidahlo ahcun kan hmang lai lo, tiah Kremlin spokesman Dmitry Peskov nih cun nizaan ah a chim ve phawt.
EU le NATO ram tampi nihcun Russia zinan hi an phit taktak ngam ruam rih lo nain zeidang in sanctions 6,000 tluk dengin Russia cu hren khumh asi cang. China nih Russia na bawmh citcet ahcun kan in hrem ve lai tiah US nih a hrocer mi cu China nih kan nih cu remdaihnak a duhmi kan si tiah an ti.
CBS nih Sunday ah Ambassador to the United States Qin Gang an komhnak ah”Kan nih China nih cun raldoh hi kan duh lo, hriamnam in Russia bawmh a timh timi cu thawngdiklo (misinformation) asi. Humanitarian aid tu kan si i food, medicine, sleeping bags le baby formula tu kan kuat hna. Hriamnam le thil tihnung cu kuat kan i tim lo zei lei kap hmanh ah kan dir lo i raldoh hi kan duhlo” tiah Qin nih cun a chim.
Economy lei thiam sang taktakmi Daleep Singh cu nizaan CBS nih Russia economy kongah an komhnak ah Putin economy cu amah lawng in khua a sa mi asi te lai (He’s self-isolating his economy) ati. A chim thanmi cu kum 1980 lio i Soviet living standard dirhmun kha an phan colh lai ti diam.
India, China, Saudi Arabia le UAE sinin bawmhnak a hmuh lo tikah vawleicung GDP hmanh tahpiak awk a tha set loin a si fak i North Korea he sipuaizi kongah biaruahnak Russian Deputy Foreign Minister Igor Morgulov nih North Korea’s ambassador to Russia cu a va ton i biaruahnak ngeiin riantuanti tumhnak kong an chim, tiah Reuters nih cun a ti.
Russia ramah raltuk kan duhlo tiah daitein a au ko mi minung 15,000 tluk bak an tlaih cang hna tiah OVD-info nih cun a langhter. President Putin hi North Korea he an ziaza an i dannak a um lo, tiah Defense Intelligence Agency a rak si balmi Rebekah Koffler nih cun a ti.
Russia cu a ralkap pawl lawng nih an temtuar lo a biapi deuh cu an ram sipuaizi nih faktuk in a tuar chin lengmang ding khi asi. Russia GDP cu 7 tluk a tla cang i kum dongh ahcun 35 tluk cu a tla te lai, thilman kainak (inflation) 14 tluk a kai te lai tiah J.P. Morgan nih cun a zumh.
Soviet Union a rak tlukchiat lai le tlukchiat hnu 1986 in 1996 kar ahkhan Russia cu a GDP 40 tluk a rak tla i mangtam tampi an tong ti a si. Kha lio dirhmun kha phanh khawh dirhmun ah an dir caah Putin cu zeidah a lawh te lai timi cu ruahdamh piak awk a vun tha pah mi a lo ko. Crd-Chelsea Bawi
Ukraine Ram Donbas Ah Hngakchia Minung 2000 Leng Russia Ralkap Hna Nih An I Kal Pi Hna
Donbas ah hngakchia pawl cu Russia ralkap hna nih an tlaih hna tiah Ukraine nih March hla ni 22 ah a chim. Ukraine Ramkhel vuanci zung i langhter ning ah cun Donbas ah hngakchia minung 2389 cu phungning loin Russia ralkap hna nih Russia ram ah an kuat hna tiah theih a si.
2014 Russia le Ukraine kahdohnak a chuah hnu ah Ukraine ram ah a um mi Donbas cu Russia nih a herh mi Ukraine in chuah a duh mi an si. Cun Donetsk and Luhanz hna zong luannak a hmu mi an si nak kong cu Putin nih a chim hnu ah mah hna khua hna cu a tu ah bitak tein buaipi mi an si.
Mah ka hmun cu Russia uknak tangah an um mi Putin nih sakhan sernak nawl zong a pek hna tiah theih a si. Russia nih Ukraine kahdohnak chungah Russia ahmutinh cu hngakchia pawl hi an ti tiah theih a si. A luancia mi chung ah khan hngakchia pawl an i dor nak hmun Theater zung cu Russia nih hriamnam ngan in a kah tiah Ukraine nih a rak chim. Nain Russia nih Ukraine hi ka doh mi si loin Special Operations ka tuah mi a si tiah a chim i,
Russia nih Khuami le rammi pawl hmuitinh in ka do hna lo tiah a chim. A sinain Kyiv khuapi ah a um mi thilcawknak centre pakhat ah hriamnam an thuh caah Dungci in ka kah tiah a rak ti. Mariupol khuapi cu nan thlah a si ah cun mah khuapi ah a um mi khuami pawl cu an himnak hmun ah thialnak nawl kan pek hna lai tiah a ti ko nain Ukraine nih a duh lo tiah theih a si.
Leave a Reply