BREAKING NEWS: PDF an mah le mah meithal in an i kahthah!

HoPyin PDF Phu An Mah Le An Mah Meithal In an I Kahthah
=================================
Kachin ram, Mohnyin pengkulh,HoPyin khuapi, Kyargyikwin khuate ah a um mi PDF phu chungtel pakhat cu titsa a phoh tiah an ti i, PDF phu hna nih tuni zaan lei suimilam 2:30 ah an inn ah an rat hnawh i, meithal in an kahthah tiah tualchung mi pakhat nih a chim. Kahthah a tong mi PDF phu chungtel a si mi cu kum 50 U Ba Mg a si i, ramlak ah a um mi PDF pawl caah bomhnak a pee tu a si tiah kan theih.

Facang, Chiti, Cite, tangkaa tibantuk ning cang loin a hman caah a tu bantuk in meithal in kathah a ton hi a si tiah tualchung mi pakhat nih a chim tiin EPN thawngzamh nih a tial. ” Cu pa cu Kyargyikwin ( ကြာကြီးကွင်း) khua ah a um mi a si. Zapi nih theih cia a si bantuk in PDF phu chungtel pakhat a si. Bomhnak leiin tuanvo a lami a si.

An i khawmmi Facang, Chiti, Cite, tangkaa a za piin a kua dih hna lo caah an mah phu chung lila lei nih tuni ah a tubantuk in thah a ton hi a si.” tiah a chim. Kyargyikwin ( ကြာကြီးကွင်း) khua ah a um mi U Ba Mg cu HoPyin PDF phu in cycle pa (2) he minuing pa (4) in an rakrat hnawh i, meithal in an kah caah a hmun ah a thi colh tiah theih a si i, A sinain EPN thawngzamh nih PDF bomtu a si taktak le si taktak lo cu biafang a langhter lo.

Monywa Peng Nyaunghpyupin Palik Sakhan Cu MRDA Nih An Kah I, Ralkap 5 An Thi! Sagaing ramṭhen, Monywa peng Nyaunghpyupin(ညောင်ဖြူပင်) palik sakhan cu a naih tein kan kahdoh i, SAC ralkap 5 nak tlawm lo an thi, tiah Myanmar Royal Dragon Army(MRDA) nih cathanh an chuah. Nihin August 21, chunhnu suimilam 11:48 hrawng ah Monywa peng Nyaunghpyupin (ညောင်ဖြူပင်) palik sakhan cu MRDA Salingyi(ဆားလင်းကြီး) le Aung San Force phufonh nih an kahdoh hna, tiah theih a si. Motor in sakhan hmai tiang kan kal i, naih tein kan kah hna. Cu kahdohnak ah cun SAC ralkap le palik 5 kan thah hna, tiah an thanhmi ah cun an langhter.

Kahdohnak ah cun Salingyi hrambunh MRDA in ralkap 2 hliamhma an tuar nain an hliamhma kong ah thinphan ding a um lo. Kuan bawm 3 zong kan thlau, tiah MRDA nih an langhter. Monywa Khuachung Ah SAC Ralkap Bomb Puahhnawh An Tong I, Ralkap 6 An Thi: Sagaing ramṭhen, Monywa khuachung Bu Tae Zah( ဗိုလ်တေဇ) le Nguwa (ငုဝါ) lamtonnak ah an hmanhmi bomb thianh ding in a ra mi SAC ralkap pawl cu bomb puahhnawh an ton caah ralkap 6 an thi, tiah theih a si. Cu bomb puahnak cu August 20 zaanlei sumilam 5 hrawng ah Monywa Nat Soe phu, Monywa pah kah phah phu le MPDF hna fonh in an tuahmi si, tiah theih a si.

“Bu Tae Zah lam le Nguwa lamtonnak ah PDF nih an hmanhmi bomb thianh ding in mawtaw pathum he a rami palik le SAC ralkap pawl cu bomb kan puahhnawh hna i ralkap 6 an thih lengah tam ngai hliamhma an tuar. Bomb puah hnu ah an kan kah ve nain hliamtuar um lo tein hnu kan tolh ṭhan,” tiah Monywa Nat Soe phu in ṭuanvo ngeitu pakhat nih a chim.

Bilin Peng Ah PDF Mincazin Lak Ding In SAC Nih Khuabawi An Fial Hna: Mon ramkulh, Bilin(ဘီးလင်း) peng ah PDF ralkap hna mincazin lak ding in SAC ralkap nih palik le khuabawi hna cu an fial hna, tiah ralkap he naihniam mi hna sin in theih a si.A luancia caan ah Bilin peng palik le khuabawi hna cu SAC ralkap nih an auh hna i PDF chungtel mincazin lak ding le khuachung an luh caan hna thawng thanh ding in an chimh hna, tiah theih a si.

Mindat Ah SAC Ralkap Nih Aug 17 I Khualtlawng An Tlaih Mi Hna Cu An Thlah Rih Hna Lo, Chin ramkulh, Mindat ah SAC ralkap nih Mindat-Pakokko lam Shwe Ngyaung Aye (ရွှေညောင်အေး) minung phortu khualtlawng motor pakhat cu a chung cuangmi minung he August 17 ah an rak tlaih hna i, nihin August 21 tiang ah an thlah rih hna lo, tiah tualchung mi nih an chim.

Cu khualtlawng motor cu an tlaih hnu ah motor khaltu le a zultu cu an thlah ṭhan hna nain, motor chung cuang khualtlawng mi hna cu ni 5 a rauh tiang ah thlah rih lo in, Mindat khuachung SAC 274 battalion ah an hren hna, tiah theih a si.

SAC ralkap nih khualtlawng motor pakhat ah khualtlawng mi minung 7 an tlin lawng ah motor chuahnak nawl an pek hna i, SAC nih rikhiahnak an tuahmi zat minung an tlin lo a si ahcun Mindat in motor chuahnak nawl an pe hna lo, tiah theih a si. Cu pin ah Tualchung hriamtlai phu CDF-Mindat hna cu SAC ralkap nih an sin ah lut ding in atu le tu an lem hna, tiah theih a si.

“SAC ralkap nih khualtlawng motor an tlaih mi ah cun minung zeizat dah tlaih an ton fiang tein theih a si rih lo. Motor khaltu zong nih thil sining a chim duh lo. Mindat um SAC ralkap nih CDF hna cu anmah lei ah ṭang ding in an lemsoi hna,” tiah khuami pakhat nih a chim. SAC ralkap tuahsernak ruang ah Mindat in hmundang ah a zaam mi minung 9500 hrawng cu kum khat leng a rauh tiang anmah umnak hmunhma ah an kir kho rih lo, tiah theih a si.

Chin Ramkulh, Falam Peng Ah CNO Nih Ihkhun 50 Tlum Siizung An Hon! Chin ramkulh, Falam peng ah Chin National Organization (CNO) nih ihkhun 50 tlum siizung cu August 20 zinglei ah a honnak an tuah, tiah theih a si. Siizung cu 2021 (CNO/CNDF dirh kum) in thawk a si, 2021 October thla khan siizungpi dirhmun in rak thlen a si. PDF -Kalay siibawi hna he i fonh in hliamhma tuar, mipi ralkap hna thlopbulnak, nau ngeihternak le mizapi zohkhenhnak ca ah tuah a si, tiah CNO nih cathanh an chuah.

SAC Nih Regional Command, Commander 5 Hna Cu Umnak An Thlen Hna, Nawlngeihnak latu SAC nih Regional Command i Commander (စစ်တိုင်းမှူး) 5 hna cu August 19 ah an umnak an thlen hna tiah theih a si. Northern Command (မြောက်ပိုင်းတိုင်းစစ်ဌာနချုပ်) i Commander Major General Myat Thet U cu South Eastern Command (အရှေ့တောင်တိုင်း စစ်ဌာနချုပ်) ah an ṭhial i South Eastern Command i Commander Major General Ko Ko Maung cu Northern Command ah an ṭhial.

Central Eastern Command (အရှေ့အလယ်ပိုင်းတိုင်းမှူ) Commander Major General Hla Moe cu Triangle Region Command (တြိဂံတိုင်း) ah an ṭhial i Triangle Region Command, Commander Major General cu Eastern Command (အရှေ့ပိုင်းတိုင်းစစ်ဌာနချုပ်) ah an ṭhial ve. Eastern Command, Commander Major General Ni Lin Aung cu Central Eastern Command ah an ṭhial.

Atu bantukin Regional Command i Commander pawl an umnak an ṭhialmi hna kong he pehtlai in min langhter a duh lomi ralbawi hlun pakhat nih “Hihi cu an tuah tawnmi a si ko. Asinain atu dirhmun ah cun Regional Command, Commander pawl hi an nawlngeihnak an sang ngai. A herh ahcun raltuknak vanlawng le Helicopter hmannak nawl an ngei cang, a hlan ah cun an rak ngei lo” tiah a chim.

Cu pin ah Kaya ramkulh kahdohnak a tuah cuahmahmi No. 13 Military Operations Command (အမှတ် (၁၃) စစ်ဆင်ရေးကွပ်ကဲမှူ ဌာနချုပ်) hruaitu Brigadier Kyaw Zeya cu hmundang ah an ṭhial i amah hmunhma ah Pago ramṭhen Inma hrambunh Brigade 66 hruaitu an chiah tiah thawng a leng. Cuti i an thlen hnanak cu No. 13 Military Operations Command (MOC) tang i ralkap hna cu Kaya ramkulh ah tam tuk an thih caah a si tiah SAC ralkap he aa naihniammi nih an chim.

CDM ralbawi Lin Htet Aung nih “Kahdohnak hmunhma ah a thimi an tam cang i an thazaang a der deuhdeuh, cucaah atu bantukin thlennawnnak an tuahmi a si. Atu cu an hrang deuhdeuh cang lai. Dohthlennak tuahtu hriamtlai hna hi an thazaang a der khawhnak dingah mipi he an kan buaiter lai, pehtlaihnak an chah lai.

Hmunkip ah fak deuh in kahdohnak an tuah lai. Voikhat ah mitampi thah khawhnak hriamngan zong an hman lai” tiah a chim ve. Chin ramkulh Chief Minister Pu Ngun San Aung an dinhter i a aiawhtu ah ralbawi hlun Lt. Col. Dr. Vung Suan Thang an chiahmi zong hi Chin ramkulh ah ah fak deuh in kahdohnak tuah an timh caah a si tiah zumh a si.

Mi Ramdang cu alamkip in an ṭhancho nain, MAH nih uknak an kanchut caah Kawlram cu alam kip in a rawk dih cikcek ko. 2021 February 1 ah Hlutdaw thar cu kawh asi. Cu ni thengmang ah MAH nih rampi uknak cu an kan chut. Uknak, Upadi sernak le Biaceihnak Nawl pathum cu MAH nih anmah tein aa lak I Kawlram a uk hi thla 18 asicang. Democracy kan tep mi kum 10 chung he tahchun tikah, Kawlram Ramkhel dirhmun cu zualhma tukin an rawk dih cang.

Ningcang loin vote pek mi 11 million le nuai 3 ka hmuh tiah MAH nih 2020 thimhnnak a hrawk. Cucaah Mipi Dohthlennak in tu dirhmun tiang kan phan nak hi asi. Ramkhel in Biktaling in MAH nih thil a tuah caah, zeizong te Biktaling an si dih. Kum 1 le thla 6 an uk chung ah, Kawlram dindaihnak pelte hmanh aum khawh rihlo. Ni fatin raldohnak lawng te ansi. 2010 le 2015 Democracy Innka an hun caan lio nakin, let tamtuk in a rawk cang. Kawlram hi a ṭha khawh ti hnga maw an ti cio. 2023 August ah Thimhnak a thar in tuah aa timh. PR phunglam kan hmang lai tiah MAH nih asi.

Uknak ka lak lo, 2008 phunghrampi ning in, Uknak ka kilven chung asi an ti. Uknak an lak Ni ah DASSK, Tamada Win Myint le NLD Party luban tampi, Ramkhel tu hna tampi le CDMers tampi cu Rallokap nih an tlai colh hna. Mipi nih CDM in dai tein duhnak kan langhter mi cu: Meithal in kahthat asi, an kan tlaih, an kan hremh caah, May 2021 ah Hriamnam Dohthlennak aa thawk colh ve.

CHIN, Karen, Kaya, Makui, Sakai, Rangoon le Mandalay tiang in Bomb puak na, Ralthli in a doh na, tiah an rak si. Hriamnam in kan doh hna Kumkhat le cheu ah: Pine (Ramkulh) le Ramkomh tam deuh cu Mipi ralkap nih hmunhma an hip khawh. U Naing Htoo Aung NUG Defense Deputy Minister nih ati.

Hmunhma hip cang mi hna cu Sakai, Makui chak lei: CHINLAND: Karen le Karenni ansi. Paucan Dohthlennak a ṭhawnbik nak hmun an si. Rallokap nih an tei khawh lo nak hmunram ansi. Dohthlennak cu kan TEI khawh rih lo nain, Kum khat le cheu chung hmun tampi le voi tampi Raldoh mi kan si caah, rianrang tukin kan ṭhancho ko. Sakai cu Kan hip cang, kan uk cang tiah NUG (U Aye Hlaing) nih an ti mi cu Zaw Me Lung nih a cohlan duh ve lo. Mipi kha hramhram in an thah hna I, an ṭhihphaih hna caah an uk khawh mi asi lai tiah Zaw Me Lung nih a leh hna.

Ralhrang nih thla 18 an uk chung ah Phungki, Non CDMers Cozah rian ṭuanmi le Khuabawi le Bawitlang 3483 thah an si tiah 1 August 2022 ah MAH nih TV in a biachimh nak ah a tel chih. AAPP cazin ah cun Rallokap nih Sualnak ngei lo Mipi 2157 an thah cang, 11894 cu hramhram in an tlaih hna tiah 4 August ah an thanh. Hramhram in thongthlak, saram bangin hremhnak le a bu pi in Thahnawn nak, tbk nuhrin covo buarnak hi a zual hma tuk, ram chiakha bak ah aa chuak cang tiah U Aung Myo Win, Minister, Nuhrin Covo Vuanci, NUG nih ati.

Mi pakhat hnih an thah mi hna hi an tam tuk cang, a bu pi in mithah Lainawng nak, ningcang loin hremnak, khuapi le innlo vialte meiduah nak, Mipi thilri le hlawnthil an fir nak, tbk vialte hi, tuksapur in ni fatin a si zungzal. Ralhrang Rallokap nih mipi cung ah an sual nak hi Nuhrin Covo buar lawng asi ti lo, War Crimes, Crimes Against Humanity asi cang caah dantat le azizut nak um loin an luat khawh lai lo. 2021 December 24 ah Kaya Faruso ah mipi 49 cu an nung buin mei an khangh hna, nu le ngakchia zong an I tel. Media zalon nak an tlau. An khar piak mi Media an tam tuk cang.

Thawng laa tu an tlaih hna I an thah mi a tamtuk cang tiah U Myint Kyaw, Tadinca Saya pa nih a ti. Media, News, thawnglaa tu, Reporters tbk vialte cu Vawleipi level an tluk ve nak hnga, sersiam awk le khumzual awk asi nain, tlaih, hrem, that mi tu an si cang hna. Media le news 11 an khar piak hna. Tadintama 140 an tlaih hna, 3 an thi tiah Detained Journalists Information Myanmar nih cazin an chuak.

Sipuazi kong: Ramdang bawmhnak a cat cang. Ramdang investment an chuak, an tlawm tuk, Dollar control ruangah Ramdang kuat mi le Ramdang lutpi mi an um ti lo; Co. Ltd nganpi vialte kawlram in an chuak caah, Sipuazi an tla timi nain, Sipuazi aum ti lo ti usih law, a dik deuh men lai.

Hmai lei zong ah hi nak in an zual dueh rih lai. Kuli le rianṭuan in aa cawmmi: Nelthuan mi le lothlawh mi hna, kut rian in paw aa cawm mi hna, tbk vialte hi Harnak a tawn bik mi kan si. Thilman an kai tuk fawn. Thil man hi an ṭum khawh ti lo. Phaisalut atlawm mi hna Sipuazi cu an tla cikcek cang ko.

Hitin kan kal lengmang ahcun ei awk a ngeih lomi kan tampi te lai. Kawlram Milurel 40 % asimi 24 million hi Ralhrang uknak ruangah rian a tlau mi kan si. Sifah Retheih nak timi hitihin Kawlram ah aasem nak cu asi. MAH uk ruang ah 30 million cu mi sifah tiah ti kan si cang.

10 million hi Under Poverty Line ah an um. Sifah timi nakin sifah deuh mi tinak asi. MAH nih Kaalung Meeting ah lih a chim. Ramdang kuat mi thil man cu USD 16.37 Billion, Ramdang in a lutmi Thilman cu USD 15.37 billion asi. American Dollar 1 billion a miak kan hmuh tiah, 31 July Kaalung Meeting ah lih bia a chim. Alamkip in kan ṭhancho, ASEAN biakamnak 5 zong tlinter kaa zuam lai tiah, 1 August 2022 ah. TV biachimhnak ah, MAH nih a chim.

ASEAN hnatlak nak ah aa tel mi: Ralhrang sinak ngawl ding: DASSK he bia ruah ding; Aa tel ding vialte sawm in, DASSK telin biaruah ding: timi vialte cu MAH nih pelte hmanh a zulh mi a um lo. Democracy hruaitu Ko Jimmy te pa li cu thihdan in an thah rih hna. Cu caah, ASEAN le Vawleipi nih MAH an soisel I an mawhchiat lio pi asi. Alamkip in a tla cikcek I, a rawk cikcek mi ram asi cang tiah U Than Soe Naing nih ati ve.

MAH nih mipi cu thawchuah nak hnar ngeih lo in an kan tuah. Peace le tonbiaruahnak timi zong mipi an hnabei a sei lem ti lo. 2023 thimhnak cu mipi nih an cohlan khawh lo. Kawlram cu pumpi rawk in rawk awk ah kutdong zungkhat lawng a tang cang kan ti ko lai. Kanmah le kanmah Raldoh cuahmah, I that cuahmah asi mi nih, zeizong te rawkral nak ah a kal pi caah Mirang holh in FAIL STATE kan ti ko lai. 31 July 2022 ah thla 6 uknak aa chap.

1 February 2022 ah thla 6 uknak aa chap bal cang. Kawlram hrawk dih cikcek a duh caah, mipi kut ah uknak an kan pek duh bak ve lo tu MAH asi. Thla 6 uknak adih in thimhnak kan tuah piak hna lai a ti nain, NLD, NUG le Mipi nih an cohlan ti lo. EAO le hriamnam in MAH le Ralhrang a doh tu vialte nih 2023 thimhnak si khawh lo ding in alamkip in kan I zuam lai tiah thanh ca an chuak cio cang. Crd-Zingtincuai Cinzah