Breaking News; Mipi kan caah thawngpang tha kho taktak a si hoi ko hih!!

Indaw peng ni 3 chung kahdohnak ah SAC ralkap 40 leng an th, 2022 December 20 – Sagaing ramṭhen, Katha pengkomh, Indaw peng ah a cang mi nithum chung kahdohnak ah SAC ralkap 40 leng an thi i sii ṭha lo a ri mi ralkap pakhat an tlaih tiah Indaw Revolution- IR Team sin in thawng theih a si.

A luancia December 16-18 tiang Indaw peng Nyaungkone, Kyunkyunkya le Pingin khua pawng ah SAC ralkap le KIA, KPDF, Indaw PDF phufonh hna karlak ah nithum chung kahdohnak a chuak tiah IR-Team nih December 19 ah a thanh.

Cu kahdohnak chung ah SAC ralkap 70 leng an i tel i 30 hrawng lawng an tan caah Tigyaing lei in ralkap 150 thazang an rak chap tiah IR Team sin in thawng theih a si. Nithum chung kahdohnak ah KIA, KPDF, Indaw PDF phufonh lei in kum 18 hngakchia hriamtlai a ṭang ah kuan nih a khen i aa thlop lio a si tiah theih a si.

Karenni ram, Demoso peng, Bathalin khua pawng December 13 ah SAC ralkap 80 hrawng le KNDF B09 hna karlak ah kahdohnak voi 3 a chuak i SAC ralkap 30 hrawng an i hliam tiah KNDF nih a thanh.

Kahdohnak a chuah hnu in SAC ralkap pawl Bathalin khua le Wanlahtua khua chung ah an lut i mipi inn an khangh tiah a thanh.
Cun SAC ralkap nih hriamngan an kah thlorh mi lung 3 Dawse khuachung ah a tla i a puah caah khuami 1 a nunnak a liam tiah theih a si.

Sagaing ramthen, Salingyi peng ah SAC kuttang palek pawl an kah hna i palek bawi chang telh in 4 an thi, Uzi hriam zuun 3 an lak khawh tiah theih a si. Palek 5 nih an rak i cit mi mawtaw cu PDF phu nih an kah i 4 an thi, 1 cu a zaam manh tiah Chindwin Galone YAzar Guerrilla phu nih an thanh.

Magway ramṭhen, Pakokku khua chuahnak ah a um mi SAC ralkap gate cu PDF nih an kah i SAC ralkap 3 an thi, hriam pawl an lak khawh tiah Earthquake People’s Defense Force nih a thanh.

December 18 chun sml 1:00pm luan hrawng ah Pakokku-Myaing lam ah hmunhma a khuar mi SAC ralkap pawl an umnak gate cu Earthquake People’s Defense Force nih an kah hna hi a si.

Kahdohnak chung ah SAC ralkap 4 an thi i a hmun ah 3 an thi colh, 1 cu fak tuk in aa hliam tiah Earthquake PDF rianngeitu nih The Irrawaddy ah a chim.

Kahdohnak chung in MA3 zuun 1, Uzi zuun 1, G3 kuan 500, G3 kuanbawm 2, mawṭaw 1, kut khihnak, cauk, tangka sing 3 le phone 2 an lak khawh tiah Earthquake People’s Defense Force nih a thanh.

2022 December 20 – Sagaing ramṭhen, Ye-U peng, Zuami khua pawng December 14 ah thazang 100 leng SAC ralkap le pyusawhtee pawl cu ADF nih an kah hna i 15 hrawng an thi, 15 hrawng fak pi in an i hliam tiah Anyar Defense Force – ADF nih a thanh.

Cun SAC ralkap le pyusawhtee pawl sin in MA 1 zuun 2, kuanbawm 12, 5.56 kuan 210, Grenade 2, luchin 2 an lak khawh tiah an thanh.
Kahdohnak chung in ADF hriamtlai him tein an kir kho tiah thawng an thanh.

Mandalay ramṭhen, Madaya peng ah SAC ralkap pawl caah thil a phor mi mawṭaw 1 cu December 16 ah an tlaih i kuan tampi le raltuknak thilri cheukhat an lak khawh tiah Madaya PDF nih an thanh.

Mawṭaw hi mipi pakhat nih a ngeih mi a si i a mawngtu zong mipi sawhsawh a si caah mawṭaw cung thilri pawl an lak hnu in mawṭaw le a mawngtu cu an thlah ṭhan tiah an thanh. Cu mawṭaw cung in kuan tampi, Camera 1, phone 9, Power Bank 2, namte tawi le a sau mi 3 an lak khawh tiah an langhter.

Myanmar ram ah zauk phung a len than khawh nak hnga aa zuam cuahmah mi phu chung ah nu pawl an i tel chin a herh tiah US Institute of Peace nih an report ah a langhter.

Atulio caan hi hramhram in uknak a latu pawl an tha a der thluahmah i dothlennak phu pawl an tha a thawn chin thluahmah bantuk in zauk phung a len than khawh nak hnga a biapi tuk. Myanmar ram zauk phung caah a cawlcang mi phu pawl lak ah nu pawl an dirhmun hi kan thancho ter chin a herh tiah an report ah an langhter. Crd-The Chinland Post

Thailand ram, Prakat Khiri Khan pengkomh Thailand rili ah ti ralkap 100 leng an i citmi tilawng pakhat cu, December 18 zanlei ah a pil i ralkap 28 cu ti cungah an vuan rih ko, tiah theih a si.

Thailand ti ralkap tilawng cu December 18 zan sml 11:00 hrawngah Prakat Khiri Khan pengkomh Bansaphan rili in tilam meng 20 hrawng aa hlatnak ah thlichia a hran ruangah a pil, tiah ramkip thawngzamhnak nih an thanh.

Thailand ralkap 78 an khamh khawh hna i cu chungah ralkap 3 cu an hliamhma a fak ngaingai, tiah theih a si. Thailand ti ralkap tilawng Suko chungah ralkap 106 nih rili ah ralven dingin an i thawh i, thlichia a hran ruangah tilawng a pilnak hi a si, tiah theih a si.

Thlichia nih tilawng a den i electric khan chungah ti tam tuk a luh caah mei a mit dih. Seh zong rian an ṭuan khawh ti lo caah tilawng cu khattelei ah a tlu i a pil beh, tiah an langhter.

Tilawng a pilmi cu Thailand ti ralkap hna nih ralkap tilawng 3, Helicopter 2 le mi khamhnak tilawng in zan khuadei kan chanhchuah hna, tiah Thailand ti ralkap nih cathanh an chuah. American ser kum 38 a si cangmi Thailand ti ralkap tilawng cu pe 76.82 meter a sau i, 9.55 meter a kaumi a si, tiah theih a si.

Mon ramkulh, Mudone(မုဒုံ) peng Kamawet(ကမာဝက်) khua cu nihin December 20 zinglei ah mei kanghnak a chuak i inn 13 a ciam, tiah tualchung mi hna sinin theih a si.

Zinglei sml 1:00 hrawngah Kamawet khua nitlaklei Shan Suh sang ah inn a kaang i, meithat phu, mi bawmchantu phu le tualchung mi hna i bawm in inn kaang cu an phalh i sml 2:30 hrawngah an phalh khawh, tiah theih a si.

Zei ruang ah dah inn a kangh ti cu hngalh a si lo i hliamhma pumi le a thimi an um le um lo an hlathlai cuahmah. A kaang mi zat zong fiang deuh in an hlatlai cuahmah, tiah theih a si.

TNLA an umnak Namhsan peng Konetha khua ah SAC nih vawlei lei, vanlei he fak pi in kahdohnak a tuah i cu kahdohnak hi NUG, PDF, CRPH hna he lawng aa pehtlai i TNLA he a cang mi kahdohnak hi a chuak sual mi a si tiah SAC nih a thanh.

Helicopter, Jet vanlawng 10 leng hmang in vanlei kahdohnak voi 50 nak tlawm lo a tuah ko nain a sung deuh mi SAC ralkap pawl nih Konetha kahdohnak chung in hriam kan lak khawh tiah a thanh chap.

Khuami hna nih a thli te in thawng an kan pek caah hriam a rak phor mi PDF pawl cu Namhsan peng Konetha khua pawng ah SAC ralkap nih an kham manh hna tiah SAC nih a thanh hi a si.

Shan ram, Hopong peng, Sawtaw khua pawng ah Type -81 phun hriam zuun 499, kuanbawm 498 le adang thilri pawl kan tlaih tiah SAC nih a thanh.

Pinlon khua Sanin khuate in Lawksawk khua lei ah a kal mi ke 6 ngei mawṭaw pakhat cu an zumh lo ruang ah an dirter nain a zaam caah SAC chungtel pawl nih an dawi i an tlaih tiah a thanh.

An mawṭaw cu Sawtaw khua pawng ah an chiah tak i an minung cu an zaam manh tiah a thanh. Atu an tlaih mi hriam pawl hi PDF caah an phorh mi a si tiah a thanh.

Atu an tlaihnak hi SAC kuttang Pa-O mipi ralkap (ပြည်သူ့စစ်) pawl nih an tlaihnak hmunhma a si i atu le atu hriam an tlaih tawnnak hmunhma a si.

Cuka hmunhma i tlangcung hriamtlai phu pawl he aa naihniam mi pakhat nih an tlaih mi hriam pawl hi MNDAA sin in a ra mi a si lai tiah a ruahdamh. Hopong peng ah hriam zuun 500 hrawng kan tlaih tiah SAC nih a thanh.

Chin ramkulh, Paletwa peng ah December 10 thawk in Paletwa-Kyaukdaw ti lam cu SAC nih a awn ko nain thil phorhnak nawl ri a khiah tiah theih a si. SAC ralkap le AA karlak ah kahdohnak a chuah ṭhan hnu July thawk in Rakhine in Paletwa kalnak ti lam, vawlei lam cu an rak phih.

“Atu cu ti lam an kan awn piak cang ko nain facang, chiti phorhnak nawl ri a khiah. A check zong an kan check. Facang zong tun 10, tun 20 hrawng phorh a ngah lo. Minung 1 nih tun 1 lawng phorh a ngah ” tiah Paletwa khuami pakhat nih Mizzima ah a chim.

Paletwa-Kyaukdaw ti lam an kan awn piak ko nain check le lam thluan a rauh caah vawlei lam an kan awn piak a hau, vawlei lam cun sml 1 hrawng lawng kan rau i ti lam cun sml 8 hrawng kan rau tiah a chim chap. Kyaukdaw-Paletwa ti lam awn piak a si caah thil man a ṭum ngai tiah thawng theih a si.

Sagaing ramthen, Kalay peng chung ah American ralkap Trainers pawl he Special Force cawnnak an tuah tiah CNDF Vakok nih December 12 ah a thanh. Trainers pawl caan an ngaih lo tuk ruang le CNDF Vakok budgets ruang ah a cawngtu tlawmte le caan tawite chung lawng an tuah khawh tiah theih a si.

SAC nih vanlei in kahdohnak a tuah ruang ah Sagaing ramṭhen, Yinmapin peng, Yinbaungdai khua December 16 zinglei ah a puak rih lo mi hriamngan an tongh ruang ah hngakchia 2 an nunnak a liam tiah khuami hna nih RFA ah an chim.

A nunnak a liam mi hna hi kum 5 hngakchia Mg Htet Bone Naing le thla 7 lawng a si rih mi Mg Hein Thura Kyaw hna an si tiah a chim.
Vanlei in kahdohnak an tuah lio ah a taang i a puak rih lo mi hriamngan an tongh i a puah caah an nunnak a liam hi a si tiah khuami 1 nih RFA ah a chim.

Yinbaungdai khua cu SAC ralkap nih August 11-14 tiang vanlei le vawlei lei in fonh in fak pi in kahdohnak a tuah i cu lio ah kum 10-85 kar mipi 19 an nunnak a liam.

RFA nih a khawmhsuat mi cazin ning ah October 1 in November 30 tiang thla 2 chung ah SAC i vanlei, vawlei lei, hriamngan kah ruang le Bomrap buah ruang ah mipi 105 an nunnak a liam cang i 263 an i hliam. A nunnak chung ah hngakchia 15 an i tel i hliam a tuar mi hngakchia 47 an i tel.

Be the first to comment

Leave a Reply

Your email address will not be published.


*