Breaking News; Mipi kan caah thawngpang chia kho taktak theih a si e!

Ralhrang Minung 400 Hrawng Nih Hriamngan He An Kah Hna Caah Tamu PDF Nih Sakhan 7nak An Chuahtak Ṭhan
========================================
Sagaing ramthen Tamu peng tan in hriamnam phorh aa timmi ralhrang hna nih hriamnam le minung thazaang tampi hmang in mipi ralkap hna sakhan cu an kah hna caah sakhan 7 chuahtak a si cang tiah Tamu mipi ralkap sin in theih a si.

May be an image of 4 people and outdoors

Ke 12 ngei mawtaw 13 hrawng nih Kawlram chungah hriamnam phorh an duh caah ralhrang ralkap 700 chung in 400 hrawng cu an i țhen hna i rallam sial in Mipi Ralkap umnak sakhan hna cu sikpar 15,16 ah an kah hna tiah theih a si.

May be an image of 4 people and outdoors

“Hriamnam Tamu a phan i phorh ding in an i zuam. Plan(tuk ding in suaisam) an i suai i si men lai. Meng 4 in an i thok i ABSDF sakhan tiang an lak cang. Kanmah lei in zei hmanh timhtuahnak caan kan ngei manh lo” tiah Tamu PDF ralkap pakhat nih a chim.

May be an image of 4 people and outdoors

Hriamngan in kah pah in an ra i sikpar 15 ah ABSDF, PDF-Tamu battalion(4), ပကဖ, BSO(Burma Student Organization), FRT, CDM Police Fighter sakhan hna chuahtak an si i nihin sikpar 16 ah PDF-Tamu battalion(2) zong chuahtak ṭhan a si tiah PDF-Tamu sin in theih a si. “An tamtuk i zei ti hmanh in kan kham kho hna lo.

May be an image of 4 people and outdoors

Hriamnam pawl hi Tamu in kan lanhter sual ahcun Ram pumpi huap ca ah a poingai ding a si caah a biapi tuk. Mah hriamnam kan thlah sual ah cun PDF lawng si lo in mipi zong nih tuar dingmi a si. Kanmah zong zero ah kan phan cang e” tiah a chin chih.
Mah kahdohnak he pehtlai in Ralhrang lei in zei thawngthanhnak hmanh a tuah rih lo.

May be an image of 4 people and outdoors

Kahdohnak a um lo nain ralhrang hna nih Rakhine ramṭhen khuate hna cu hriamngan in a kah hna i nihin(Sikpar 16) lawng ah tualchung mi 15 an thi tiah People’s Spring nih a langhtet. Rakhine ramṭhen Maungdaw(မောင်တောမြို့နယ်)peng Kyaitchaung khua ah chun sml 12:30 hrawng ah ralhrang hriamngan kahmi voithum a tla i khuami minung(12) an thi i minung (24) hliam an tuar tiah khuami pakhat nih a chim.

“Kahdohnak zong a um lo nain khuachung ah an van kah len. Maungdaw peng Kyaitchawng, Khami(ခမီ) Tainyinta(တိုင်းရင်းသား) khua hna ah an kah. Tualchung mi minung(12) an thi i minung(24) hliam an tuar” tiah Rakhine mi pakhat nih a chim. Hliam a tuarmi hna cu Maungdaw sii-inn ah thlop an si tiah khuami pakhat nih a chim.

“Ralhrang hna an ra i kan mah kahmi si lo AA kahmi a si. Ho nih an in hal hna zong ah kanmah kahmi si lo AA kahmi a si tiah an chimter hna” tiah Rakhine mi pakhat sin in theih a si. Nihin chun sml 12:30 hrawng ah Kyauktaw hrambunh ralhrang hna nih hriamngan an kah i khuami minung (3) an thi tiah khuami pakhat nih a chim.

Ralhrang hriamngan kahnak in a tlawmlei ah minung 11 an thi i minung 27 hrawng hliam an tuar i thi hlutu an herh ngai ko tiah Wester News nih a langhter. Rakhine, Maungdaw(မောင်တောမြို့နယ်) peng Kyaihchaung khua cu nihin(sikpar 16) chun hrawng ah ralhrang nih an kahmi hriamngan kuan a tla i minung(11) an thi. Hliam a tuar mi minung 27 an si i minung 5 cu lungrethei an si.

Hliam tuarmi hna cu Maungdaw khua sii-inn ah thlop an si. Hliam tuarmi hna chung ah a ceihma deuhmi an um caah rianrang in thi hlutu an herh ko tiah theih a si. Nihin zingka zong ah Kyaukdaw(ကျောက်တော်မြို့နယ်) peng Chaungtoo (ချောင်းတူ)khua cu SAC kuttang um Kansoh(ကန်စောက်) 539 battalion in hriamngan in an kah ruangah pa 4 an thi i nu 2 hliam an tuar. Rakhine ah nihin nikhat chung lawngah ralhrang hriamngan kah ruangah minung 15 an thi i minung 29 hliam an tuar tiah theih a si.

Magway ramṭhen, Saw peng Letpan(လက်ပန်း) khua le Pasoh( ပဆုတ်)khua hna cu nizan(sikpar 15) ah ralhrang nih mei in an khangh i a tlizam kho lo mi tar pawl cu inn he a kanghchih hna tiah Ayeyarwaddy Times nih a langhter. Ralhrang hna cu Letpan khua ah an lut i phungki pakhat telh in khuami (5) an tlaih hna hnu ah inn an khangh tiah khuami pakhat nih a chim.

“Nizan zinglei sml 10:30 hrawng ah Letpan khua ah ralhrang an rak lut i phungki pakhat telh in khuami 5 an tlaih hna. Inn zong an khangh. A tlizam kho lomi tar pawl cu mei nih a kangh chih hna. Khuami zong tlikzam cio si i mei nih a kanghmi minung zeizat an si kan hngalh kho rih lo” tiah khuami pakhat nih a chim.

Letpan khua an khangh dih zanlei sml 3:00 hrawng ah Pasoh khua ah an lut i khuami inn 140 nak tam an khangh chap. Mipi in a khangtu ralhrang hna cu an kir lei ah YDF, Saw-PDF hna he fakngai in an i kah caah Kyaukhtu (ကျောက်ထု) khua in hriamngan in an van bawmh hna tiah khuami pakhat nih a chim.

Demoso peng ah SAC ralkap nih hriamngan an kah i, inn pakhat cungah a tlak caah kum 5 tluk ngakchia pakhat a nunnak a liam, minung 8 hliamhma an pu, tiah Demoso PDF nih cathanh an chuah. Zeihmanh kahdohnak um loin Demoso peng Ngwetaung ah umhmun a khuarmi SAC ralkap Battalion 102 nih, 120mm hriamngan in voi 9 nak tlawm lo an kah caah nizan November 15 zanlei sml 6:00 hrawngah Demoso peng nitlaklei ah hriamngan kuan lung 5 a tla i, chungkhar minung 9 an umnak a khen caah an inn cu a rawk dih, tiah an langhter.

Kum 5 ngakchia nu pakhat cu a hmun ah a thi colh. Hliamhma pumi hna cu an thlopbul cuahmah hna. Cu chungah bawhte pakhat zong aa tel, tiah theih a si. Cu pinah SAC ralkap nih ralhrialmi an umnak khua pakhat zong hriamngan in an kah caah biaknak lei he aa pehtlaimi inn telh in khuami inn cheukhat zong an rawk, tiah Demoso PDF nih cun an langhter.

SAC ralkap nih kahdohnak zeihmanh um loin hriamngan atu le tu an kah caah biaknak he aa pehtlaimi inn, ralhrial an umnak le tualchung mi inn le lo a khen hna caah an rawk ngaingai, tiah theih a si. A luancia November 13 lio zong ah Loikaw peng Konesut(ကုန်းဆွတ်) khua chungah SAC ralkap nih hriamngan an kah caah naupawi lio nu pakhat le tualchung mi pakhat hliamhma an rak pu cang. November thla chungah SAC ralkap hriamngan kuan in Karenni rammi 20 leng hliamhma an pu cang, tiah theih a si.

US President hlun Donald Trump nih 2024 US President thimnak ah kaa cuh lai tiah tuni, November 15 (Tuesday) ah a thanh cang. Trump nih cun Florida i amah inn Mar-a-Lago ah “America cu a rak kir ṭhan cang, atu ah thok usih (America’s comeback starts right now)” tiah a chim. Cu lawng si loin “Mah hi a donghnak a si lo ti kan theih. American mi hna chunmang tlamtlin nakdingah kan i zuamnak a thok lawng a si rih. America ram ṭhawnter ṭhan dingin tuzan ah US President thimnak ah kaa cuh lai ti hi ka phuan” tiah a chim.

Be the first to comment

Leave a Reply

Your email address will not be published.


*