Moemauk Peng Ah SAC Ralkap Jet Fighter Nih Bomb Thlak Aa Palh Caah Anmah Ralkap Lila A Thimi Le Aa Hliammi An Tam+LKahdohnak Thawngpang Tha Fonh!
===========================
Kachin ramkulh, Moemauk peng ah KIA, PDF le SAC ralkap kar kahdohnak a chuak i, SAC ralkap nih Jet Fighter in bomb an thlak caah anmah ralkap lila an umnak ah bomb a tla i, ralkap tam tuk hliamhma an pu, tiah theih a si.
Nizan October 23 ah Moemauk peng Wawan tlang nichuah lei ah SAC ralkap le KIA, PDF kar kahdohnak a zual ngai caah SAC ralkap nih Jet Fighter in bomb an thlak i, anmah lei ralkap lila pawng ah a tlak caah SAC ralkap tam tuk hliamhma an pu, tiah tualchung mi hna nih an chim.
“SAC Jet Fighter in bomb an thlak caah an mah lei ralkap lila tam tuk hliamhma an pu. Motor 4 in hliamhma pumi ralkap cu Moemauk sii-inn lei ah an kalpi hna. SAC ralkap nih timh ciammam tein Moemauk khua chungah bomb an thlak i, dum cheukhat a rawh pinah vok pakhat a thi,” tiah Kachin ram um SAC ralkap he naihniam in a ummi sinin theih a si. Kachin ramkulh ah SAC ralkap le KIA, PDF kar kahdohnak a zual tuk caah SAC ralkap a thimi le aa hliammi an tam, tiah theih a si.
Mandalay ramṭhen, Mahlaing peng Tayet Kaungpin(သရက်ကောင်းပင်) khua ah umhmun a khuarmi SAC ralkap pawl cu, drone in bomb kan thlakhnawh hna caah ralkap 2 an thi, tiah Myingyan No. 4 Battalion Natogyi People Defence Force(NPDF) ṭuanvo ngeitu nih a chim.
October 21 zanlei sml 4:00 hrawngah Mahlaing peng Tayet Kaungpin khua ah umhmun a khuarmi SAC ralkap cu, NPDF nih drone in bomb kan thlakhnawh hna caah SAC ralkap 2 cu a hmun ah an thi colh. Ralkap a thi chapmi le aa hliammi an um rih ko nain, fiang in kan thei kho rih lo, tiah Natogyi PDF in ṭuanvo ngeitu nih cun a chim tiah theih a si.
“Cheukhat ralkap cu an phei zong tan a haumi an um. SAC ralkap nih Tayet Kaungpin khua pawng ummi khuate cu khual cazin an check hna. Mithar nan hmuh hna ahcun nan kan chimh lai an ti hna pinah CDM a tuahtu le NLD party chungtel hna zong tangka an hal hna,” tiah a chim chap.
Magway ramṭhen, Pakokku peng check gate ah khualtlawng mi a checktu SAC ralkap pawl cu, bomb puahhnawh an ton caah ralkap 2 an thi, tiah theih a si. Nizan October 23 zing sml 10:30 ah Pakokku khuahelnak lam le khuathar lam tonnak ah checkhlatnak a tuahtu SAC ralkap pawl cu, PDF nih bomb lung 2 in an puahhnawh hna caah SAC ralkap 2 an thi, tiah theih a si.
Nizan October 23 zanlei sml 4:55 ah Karen ramkulh, Kawkareik pengkomh palik sakhan le Khah Lah Yah 97 SAC ralkap pawl cu drone in bomb kan thlakhnawh hna caah SAC ralkap 3 an thi, tiah Lion Battalion Commando Special Force nih cathanh an chuah tiah theih a si.
A luancia October 13 ah Kalaymyo le Taingen khua karlak SAC ralkap sakhan, khur cawhmi hmun ah umhmun hmunhma kan la i zing sml 8:00 hrawngah SAC ralkap nih khualtlawng mi hna cu tangka hal ding an rak chuak, cu lioah pe 10 hlat in bomb in kan puahhnawh hna, tiah CDF CDM Siyin nih cathanh an chuah tiah theih a si.
Hmai a kalmi SAC ralkap pathum cu an titsa aa ṭhenṭhek dih. Cuka ahcun minutes 10 tluk hrawng kaphnih kar kahdohnak a chuak, CDF CDM Siyin lei in a thimi le aa hliammi an um lo, tiah theih a si. Cu hnuah Taingen khua um SAC ralkap sakhan in bawmh dingah a kalmi ralkap motor 3 cu Heinzing khua le Leisan Mual karah October 14 zing sml 4:48 ah minutes 8 tluk kan kah ṭhan hna, tiah CDF CDM Siyin nih an langhter. Cu motor 1 chungah SAC ralkap 20 leng an i cit i, Taingen khua an phanh ahcun SAC ralkap 30 leng hrawng lawng an taang cang, tiah CDF CDM Siyin nih an langhter tiah theih a si.
Tanintharyi ramṭhen, Yephyo peng Gyiakha Tarpin In(ကျခတ္တာပင်အင်း) khua ah October 23 zinglei ah sianglairun sianginn uktu nu pakhat telh in minung 5 cu meithal in an kah hna caah 4 an thi tiah theih a si. Sianglairun uktu nu Aye Moe Shwe inn le a pawngkam inn pakhat ah hriamtlai phu khat nih atubantuk in an kah hna hi a si, tiah tualchung mi pakhat nih a chim.
“Zanṭim ah hriamtlai phu khat nih meithal in an kah hna. An fanu le cu an tlaih hna i, an hrem hna. A thimi nu hi Non CDM a si i, a vapa cu sianginn cachim rian in pension a la cangmi a si. An fanu le zong siang cachimtu an si,” tiah a chim chap. A thimi hna cu Aye Moe Shwe(kum 44), a vapa Pho Khine(kum 43), Win Thein(kum 54) le a nupi Aung San Me(Kum 54) hna an si. Win Oo(kum 56) cu a ke a bul, tiah theih a si.
Yangon ramthen, Shwepyita peng Pyidawta sang khuabawi hna nupa cu meithal kah an ton caah a nupi a thi tiah tualchung hriamtlai pah-kah-phah nih an chim. October 24, chunhnu suimilam 3:45 ah Pyidawta sang khuabawi zung ah khuabawi Myo Min Tan le a nupi Mala Maw le zung riantuantu pakhat tiin minung pathum an um lio ah chaklei pengkomh tualchung hriamtlai phu le Yangon Urban Guerrilla Army(YUGA MO 7 Egale) phufonh nih an kah hna i Daw Mala Maw cu hmakhat te ah a thi tiah theih a si.
Cu khuabawi zung nih cun zung ah theihpinak ca a la mi hna le khualtlung cazin min petu hna cu bo ngai in an chawnhbiak hna leng ah phaisa kholhnak zong an tuah tiah tualchung mi pakhat nih a chim. Crd-The Chin Post
Relchap, SAC Ralkap Nih Mei An Hrawh Caah Hakha Khua Chungah Nithum Chung Mei A Mit, Chin ramkulh, Hakha khua chungah a luancia October 21 zingka sml 6:30 hrawng in mei a mit i, nithum chung a mih hnu ah a ra than, tiah theih a si. Tualchung mi pakhat nih, “October 21 zingka te ah Cawbuk sang um SAC ralkap check gate cu CDF Hakha Battalion 2 nih an kah hna caah SAC ralkap nih hriamngan in an kah i, meihri(Mahar dataa line) a cah caah Hakha khua chung mei a mit dih,” tiah a chim.
Loklung khuami pakhat zong nih, “SAC ralkap nih hriamngan an kahmi cu kan khua chung ummi meihri a tlak caah a rawk dih ve” tiah a chim. October 21 zingka sml 6:30 hrawng in Hakha khua chungah mei a mit i, nihnih chung an remh hnu October 23 zan sml 6:00 hrawng ah a ra ṭhan, tiah theih a si. SAC ralkap nih Hakha khua, Dawrthar sang cu mei pek caan ri an khiahpiak hna caah caan tling in mei an pek hna lonak a sau ngai cang. Hakha sii-inn sang le dawrhlun sang lei tu cu mei a mit bal lo, tiah Hakha ummi pakhat nih The Chin Post ah a chim.
SAC Ralkap Le CDF CDM Siyin Kar Kahdohnak Ah SAC Ralkap 3 An Thi, A luancia October 13 ah Kalaymyo le Taingen khua karlak SAC ralkap sakhan, khur cawhmi hmun ah umhmun hmunhma kan la i zing sml 8:00 hrawngah SAC ralkap nih khualtlawng mi hna cu tangka hal ding an rak chuak, cu lioah pe 10 hlat in bomb in kan puahhnawh hna, tiah CDF CDM Siyin nih cathanh an chuah tiah theih a si.
Hmai a kalmi SAC ralkap pathum cu an titsa aa ṭhenṭhek dih. Cuka ahcun minutes 10 tluk hrawng kaphnih kar kahdohnak a chuak, CDF CDM Siyin lei in a thimi le aa hliammi an um lo, tiah theih a si. Cu hnuah Taingen khua um SAC ralkap sakhan in bawmh dingah a kalmi ralkap motor 3 cu Heinzing khua le Leisan Mual karah October 14 zing sml 4:48 ah minutes 8 tluk kan kah ṭhan hna, tiah CDF CDM Siyin nih an langhter. Cu motor 1 chungah SAC ralkap 20 leng an i cit i, Taingen khua an phanh ahcun SAC ralkap 30 leng hrawng lawng an taang cang, tiah CDF CDM Siyin nih an langhter tiah theih a si.
Kayin Hriamtlai Phu I Fonh Ding In Kawthoolei Army Nih Thanhca Chuah, Kayin ramkulh chung ummi hriamtlai phu dihlak ifonh lawng ah SAC ralkap hi ṭha tein kan dohkhawh hna lai caah, hmunkhat ah ifonh cio ding in Kawthoolei ralkap hruaitu Saw Nay Daa Miah nih cathanh an chuah tiah theih a si. Kawthoolei ralkap nih khuapi laknak ding a hram thawk a si cang caah Kayin hriamtlai phu dihlak ifuntom caan a si cang tiah a chim.
Tulio ramkhel sining ah SAC ralkap hna nih mizapi cungah phungninglo in an tuahmi vialte cu khuapi chung lawng silo in khuate lei tiang an tuah caah mizapi cu ṭih launak an tong, cucaah hmunkhat ah ifuntom in ralkap uknak a hramchanh a herh tiah an thanhmi ah cun an langhter chih. A luancia 2022, January thla in Bochoh Saw Nay Daa Miah cu KNO Commander in Chief ṭuanvo in KNU nih a dinhter hnu ah July 16 in Kawthoolay ralkap a dirh i, cu a dirhmi cu kan theipilo tiah KNU nih an rak thanh ve.
Dohthlennak Ah Ramchung Ramleng Kan Ṭuanvo Thleidan Thiam A Herh, Tutan khuapau dohthlennak ah ramchung ramleng in mipi kan tho dih. Phundang cun dohthlennak ah aa tel lomi kan um lo ti khawh a si. Kan i telnak zawn tu aa dang cio. Tutan dohthlennak ah ramchung ramleng kan ṭuanvo hi thleidan thiam a herh tuk tiah ka ruah. Ṭuanvo cu kan ngei dih, asinain kei ka ṭuanvo zeidah a si ti thleidan thiam lo ahcun a poi tuk lai. A tlangpi in ramleng kan ṭuanvo hi pali a um.
Pakhatnak: Tangka thawh, tangka hawl! Nifatin in meithal le bomb puak lakah tangka kawlhawl awk a ṭha lo. Cucaah ramleng nih tangka kan thawh, kan kawlhawl a herh. Asinain tangka a thawhtu kan si ruangah duhpaoh in a aukhuang ding kan si lo. Duhmi paoh chim i aukhuan len kha kan ṭuanvo a si lo.
Pahnihnak: Fimthiamnak in bawmh! Ramleng nih kan tangka lawng thawh a za lo. Kan fimthiamnak zong kan thawh rih a herh. IT chan a si bantukin tutan dohthlennak ah IT fimthiamnak hi hmual a ngei tuk. Seh lei thiamnak (mechanic) zong a herh tuk fawn. Ramleng ah mifimthiam tampi kan ngei cang hna. Cu hna nih an fimthiamnak kha dohthlennak ah an hman ve hrimhrim a hau, tampi an hman cangmi zong a um.
SAC nih Russia le China in IT thiamnak tampi aa lak caah Drone zong duh ningin kan hmang kho rih lo. Phone ah kan hlonh (deleted) cangmi zong an hmuh khawh caah tlaih a tongmi an tlawm ti lo. Cucaah IT lei, hriamnam sernak le seh lei fimthiamnak ah ramleng nih biatak tein kan i tel a biapi.
Pathumnak: Thazang pek! Ramchung cu thinphang le thlalau in nifatin caan an hmang. Khatlei ah lungretheih le vansannak aa phua! Hriam a tlaimi si hna seh a tlai lomi si hna seh an taksa le thinlung a ba. Cu caah ramleng lei thazang peknak an herh tuk. Cu ee, kha ee tiah kan vuivai tawnmi khi cu an lungretheihnak a zualtertu an si. Ramchung a ummi hna, a bik in hriam a tlaimi hna caah thazang pek khawh tu i zuam cio a herh.
Palinak: Khuakhan lairelnak ah bawmh! Dohthlennak ah ramchung lei khuakhan lairelnak lawngin tlamtlin a har caah ramleng in biaknak le zatlangbu hruaitu, mifimthiam kan pa/nu le hna nih khuakhan lairelnak ah a si khawh chungin bawmh an herh. Amahbelte a bawmtu kan si ti kha theih peng a hau, bia a khiaktu ah kan i ruah sual lo ding a biapi! Tangka a thawhtu pei kan si cu tiin nawlngeih i timh hi China lungput a si. China nih cun ram sifak hna kha tangka tampi a pek/cawih a hna i a hnuah sal bantukin a duhmi paoh a tuahter tawn hna. Cu lungput cu kan hrial a herh.
Ramchung lei ṭuanvo hna cu chim len hmanh a hau lem lo. A biapi tuk tiah ka ruahmi pahnih bel a um. Pakhatnak cu ramleng in thawhmi tangka hna hi a herhnak zawn ah felfai tein hman ding! Atu tiangah ramleng lei thawhmi tangka a vaivuanmi le a zawn a si lomi ah hmanmi a um len.
A zawn teah hmualngei tein kan hman ahcun ramleng lei zong an tha a bat ko hmanh ah an i hne kho lai. Pahnihnak cu ram le miphun caah nunthap in aa thawhmi le retheih a tuarmi na si ruangah upatnak le thangṭhatnak bia na hmuhmi kha i porhlawtnak le uahnak ah hman hrimhrim lo ding. Zuam chinchin nak tu ah hman ding a si. Crd-The Chin Post
Leave a Reply