Min Aung Hlaing Nih Chawleh Tinak Sawmnak A Tuah!
=========================
Myanmar ramah Vawlei chungchuak serchuah riantuan nak ah chawlehnak rak tuah cio ding in SAC ralhrang lutlai Min Aung Hlaing nih sawmnak a tuah. Russia ram ah tuah mi (The 7th Eastern Economic Forum-2022) ah a rak kai kho mi chawleh riantuantu hna cu Myanmar ram ah serchuah a si rih lo mi vawlei tang thil chuak,
Zinan le Natural gas reserves tampi a tan rih pinah copper, iron, ခဲမဖြူ (Tin) tibantuk in Metals tampi hna zong vawleicung pi thilman lei ah kuat khawh hnga ding mi serchuah riantuantu pawl an um ruangah Kawlram he chawlehnak tuahti a duh mi nan um a si ah cun chawlehnak tuahti dingin kan sawm hna tiah SAC ralhrang lutlai Min Aung Hlaing nih a chim.
Cu bantuk thiamthiam in Zinan le Natural gas kong he pehtlai in Myanmar ram chungah rian hmun Zinan 51 ham cia mi a um i riantuan hmun pa 8 ah Natural gas pawl cu serchuah in ram chung le ramleng ah kuat le zuar phozar a si bantukin a tu ah Bangala tikulh (Bay) chungah Natural gas 2 trillion cubic feet hmuh a si i, a rauh hlan ah chawlehnak in lak a si lai pinah cu nak in a ngan deuh mi Natural gas pawl cu laak-chuah khawhnak ding ala ala zong hmuh khawh a si ti zong in a chim.
Cu pinah Myanmar ram cu nichuak lei ASEAN ram ah cinthlak lei in a thatnak bik ram pakhat a si raungah vawleicung eidin ti le rawl runvennak (Food Security) caah Myanmar cinthlak riantuannak hna ah rak rat in chawlehnak tuahti ding in kan sawm hna tiah SAC Ralhrang lutlai Min Aung Hlaing nih sawmnak a tuah chap.
Hi sawmnak kong he pehtlai in Kawlram chungah ramdang nih chawlehnak an tuah cio dih a si ah cun, Kawlram chungah ramdang phaisa le dollar tampi a luh lai caah Kawlram mipi caah chawlehnak, thilman a ning cang deuh lai timi ruahchannak he sawmnak a tuah mi a si tiah kan theih.
Relchap, Myinchain Peng Ah PDF Nih SAC Mawtaw Bomb An Puahhnawh I, Ralkap 3 An Thi: Mandalay ramṭhen, Myinchain peng Htisaung(ထီဆောင်း) le Kanpya(ကံပြား) khua kar ah SAC ralkap mawṭaw pakhat cu nihin september 8 zaanlei suimilam 2 le cheu hrawng ah tualchung hriamtlai phu nih bomb an puah hnawh hna i SAC ralkap 3 an thi, tiah ZERO pah-kah-phah phu nih cathanh an chuah. Cu kahdohnak cu Myinchain ZERO pah-kah-phah phu le ZERO POWER tualchung hriamtlai phufonh hna nih an tuahmi si, tiah theih a si.
CDF Paletwa Kut Ah A Ummi SAC Ralkap Sin Thawngpetu Pakhat Cu A Nunnak A Liam!, SAC ralkap sin thawngpetu pakhat cu tlaih a ton lio ah damlonak/zawtfahnak in a nunnak a liam caah a chungkhar he biaruahnnak kan ngei lai, tiah CDF-Paletwa nih cathanh an chuah. Paletwa peng Wading(ဝါဒိန်) khuakomh, Wading(ဝါဒိန်) khua in SAC ralkap sin thawngpetu Pu Aa Khai(kum 65) cu CDF-Paletwa nih an tlaih i an hren lio, August 19 ah a thi, tiah theih a si. Pu Aa Khai cu thabat/thawvamh zawtnak a rak ngeicia mi a si, tiah an ṭial. Tlaih a ton hnu i a thih caah Pu Aa Khai a chungkhar he i caihhmainak le biaruahnak kan ngei lai, tiah CDF-Paletwa nih nihin September 8 ah cathanh an chuah.
Pu Aa Khai cu CDF-Paletwa nih cawlcanghnak a tuahmi kong ah SAC ralkap sin thawngpeknak a tuah caah, 2021 June thla chung ah voikhat, 2022 January thla chung ah a voi hnihnak tiin ralrinnak pek a rak si cang nain, SAC ralkap sin thawngpek a ngol hlei lo, tiah an chim. July 13 ah CDF-Paletwa nih an tlaih nain July 16 zaan ah a zaam, July 17 ah an tlaih ṭhan i, a ngandamnak ding caah felfai tein zohkhenh a si ko nain, July 19 zinglei ah a thi, tiah CDF-Paletwa nih fianhnak an tuah. Pu Aa Khai a chungkhar sin ah pehtlaihnak tuah kan i zuam nain, Paletwa pengchung ah SAC ralkap nih phone line an thah caah pehtlaihnak kan tuah kho lo, tiah CDF-Paletwa nih an langhter.
Karenni Ramkulh In September thla zarhkhatnak Chung Kahdohnak Ah SAC Ralkap 18 An Thi, Karenni ramkulh in September thla zarhkhatnak chung kahdohnak ah SAC ralkap 18 an thi, tiah KNDF nih nihin September 8 ah cathanh an chuah. September thla zarhkhatnak chung ah SAC ralkap hna cu Demoso le Hparuso ah minung thazaang chap in rallam an sial i, motor run in riahcaw thiar khawh an i zuam, tiah KNDF nih an langhter.
Pekhon(ဖယ်ခုံ) pengchung zong ah Pinlaung(ပင်လောင်း) in SAC ralkap motor 40 cu Pekhon hrambunh battalion ah thazaang an chap i, atu cathanh chuah tiang ah Moebye(မိုးဗြ) ah fak ngai in kahdohnak a chuak, tiah an langhter chih.
Demoso peng in Hparuso peng ah riahcaw a phortu SAC ralkap motor 5 cu September 3 zinglei suimilam 4:30 hrawng ah KNDF B-15 nih a thlithip in an kah hna i SAC ralkap motor pakhat a rawk, ralkap 3 an thi, motor dang hna cu hnu an tolh tiah theih a si. Cu ni zaan lei ah cun Hparuso peng Htitawku(းသော်ကူး) khua pawng umhmun khuarmi SAC ralkap hna cu KNDF-B15 nih a kah ṭhan hna caah SAC ralkap 2 an thi ṭhan.
September 4, chunhnu ah Hparuso peng Htipawso(းပေါ်ဆို) le Dawngekho(ဒေါညေးခူ) khua ah umhmun a khuarmi SAC ralkap hna cu Karenni ralkap KA, KNDF/B-4, B-5 le B-15 phufonh nih an kahdoh hna caah SAC ralkap 6 an thi. Cun KNDF B-15 nih Hparuso peng, Kadala(ကဒါးလား) khua pawng umhmun khuarmi SAC ralkap cu an kah ṭhan hna caah ralkap 2 an thi ṭhan, tiah theih a si.
Demoso peng Ngwaytaung(ငွေတောင်) khuathar pawng ah rallam sialtu SAC ralkap hna cu KA le KNDF B-10 phufonh nih an kahdoh hna caah kaphnih kar kahdohnak suimilam 4:00 hrawng a chuak i, cu kahdohnak ah cun SAC ralkap pakhat a thih lengah hliamhma tuar an tam, tiah theih a si. Kahdohnak ah cun SAC ralkap hriamnam zeimawzat kan lak, tiah KNDF nih an langhter.
September 7, Bawlakhe(ဘောလခဲ) le Yuatit khua kar lampi cung, SAC ralkap meng 12 sakhan pawng ah Rua saam ding in a chuakmi SAC ralkap hna cu KA, KNDF B-21 nih an kahdoh hna i SAC ralkap 3 an thi, 2 cu fak ngai in hliamhma an tuar leng ah hriamnam zeimawzat an lakpiak hna, tiah theih a si.
Pekhon(ဖယ်ခုံ) pengchung ah September 3 ah khan Kungsone(ကုန်းဆုံ) khuakomh phungki biakinn tlang cung ah umhmun a khuarmi SAC ralkap hna cu KA, KNDF B-3, B-9, B-11 phufonh nih an kahdoh hna caah SAC ralkap pakhat a rak thi. Karenni tuanbia chung ah le khuapau dohthlennak caan chung ah Karenni ramkulh chung in nunnak a liammi ralkap dihlak cu nihin September 8 Martyr’s Day ah upatnak sang bik kan in pek hna, tiah KNDF nih an cathanh chung ah an langhter.
Kalay in Yangon Lei A Zuangmi Vanlawng Ticket Man Cu Ks. 20,000 Leng In A Kai, SAC ralkap le tualchung hriamtlai phu kar kahdohnak a fah lengmang chin ruang ah vanlawng lam cu khualtlawng mi tam deuh nih hman a si caah, a hlan nakin Kalay in Yangon a zuang mi vanlawng ticket man cu Ks. 20,000 a kai. Sinain, Yangon in Kalay vanlawng cuan man cu an kai lo, tiah theih a si.
Kalay in Yangon kalnak vanlawng ticket man cu cuhlan ah a sangbik Ks. 163,000 hrawng a si tawn nain, nizaan September 7 in cun singhnih (200,000ks) tiang a phan. Yangon in Kalay kalnak vanlawng ticket man tu cu Ks. 138,200 in an zuar, tiah theih a si. Kalay in Yangon, KBZ vanlawng ticket hi cuhlan i a man fak bik lio ah Ks 165,000 a rak si nain, atu ah cun Ks. 185,000 a phan cang. Yangon in Kalay lei cu a hlan ah a sangbik Ks. 172,000ks a si i, atu ah cun Ks. 197,000 a phan, tiah theih a si.
Atu bantuk in vanlawng ticket man a kainak kong he pehtlai in vanlawng ticket zuartu pakhat nih cun dollar man a kai tuk caah vanlawng oil man zong a kai i, ticket man a kainak a si, tiah a chim. Thanlwin airlines cu September 10 in aa din cang lai tiah theih a si. Kalay in Yangon vanlawng ticket leng ah Monywa-Homalin vanlawng ticket man zong cu hlan ah cun Ks. 118,000 a rak si nain atu ah cun Ks. 138,000 ah an kai, tiah theih a si.
Leave a Reply