Breaking News; Matupi kan unau hna sinin a ra mi thawngpang!!

East Lairam In A Rak Zaammi Salai Zawng Man A Nunnak Liam
===========
Central Lairam, Lawngtlai, 2022 Dipa 09 : Zahan zaan suimilaam 8:30 PM hrawngah East Lairam in Central Lairam Lawngtlai ah a rak i dormi Salai Zawng Man kum 15 cu Lairam sii-inn ah Kal lei dam lo nak in a nunnak a liam.

Salai Zawng Man hi Lawngtlai Bethel Refugees Camp ah a ummi a si, East Lairam a khua cu, Matupi Peng (Thai Boi) khua a si.
Salai Zawng Man i hringtu a nu hi Kawl ralhraang bomb aa lamh sual caah a ke a bul i Delhi ah Salai Zawng Man a pa nih a umpi lio a si.

Yangon khua ah ralkap bawi hlun pakhat le sanguk bawi pakhat nan thah hna tiah Dagon siahngakchia 7 telh in minung 12 cu Insein biaceih zung nih November 30 ah thih ding in dan an tat hna hnu ni 2 a rauh hnu December 2 ah Tamu khua lamcung ah nu pakhat cu PDF nih an kahthahnak muicawl cu Social Media cung ah a karh.

RFA nih an hlathlai ning ah cu muicawl hi SAC a pom i hramhram uknak a dohtu vialte tlaih an si dih lai tiah a ṭialtu Han Nyein Oo Telegram Channel in December 2 thok in a karh. Nute hi 2022 kum lai hrawng ah an thah mi a si tiah Social media cahmai ah an ṭial nain a muicawl cu December thla hramthok hrawng lawng ah a lang.

Karenni ram, Hpruso khuachung kahdohnak ah hliam a tuar mi J Rain cu a nunnak a liam tiah KNDF battalion 4 nih December 8 ah a thanh.

“Hmunhma zohfelnak kan ngeih lio i kahdohnak ah bom aa lam sual i hma a fak tuk in a tuar hnu ah a nunnak a liam” tiah KNDF hriamtlai 1 nih People’s Spring ah a chim.

Cun SAC dohnak caan chung vialte chung sh KNDF battalion 4 in a hmasa bik nunnak a liam mi a si tiah a chim fawn. Hriamtlai J Rain hliam a tuar ni hi December 4 Hpruso kahdohnak ah a si. Kahdohnak a fak i SAC ralkap lei in a thi mi zong an umnak Demoso kahdohnak zong ah hriamtlai pakhat a nunnak a liam tiah KNDF battalion 6 nih an thanh ve.

November 15 ah SAC ralkap nih Tamu peng hrambunh PDF phu pawl a si mi BSO, ABSDF Company sakhaan, TSG, FRT Fighter Police CDM – Tamu phu sakhaan pawl a luh hnawh hna lio ah mah muicawl kha ralkap lei nih an ngah khawh mi a si tiah Tamu PDF nih an ruahdamh. Hi mi thahnak hi Tamu PDF battalion 4 nih an buar tiah Han Nyein Oo nih a Telegram channel ah a puh ruang ah Tamu PDF battalion 4 cu RFA nih bia a hal ko nain kan let kho rih lo tiah a rak leh.

Mandalay ramṭhen, Myingyan khua ah PDF pawl nih meithal zuun 4 an lak piak mi SAC kuttang khuabawi cu SAC lila nih an tlaih i bia an hal tiah Natogyi Regional Defense Force – NRDF nih December 7 ah a thanh. November 30 chun sml 12:00pm hrawng ah SAC kuttang khuabawi Kyaw Swe inn ah NRDF nih palek bantuk in an i thuam i MA 3 zuun 1, Rifle zuun 3 le kuan cheukhat an lak tiah theih a si.

Khuabawi pa cu NRDF sin ah meithal pawl a pek caah SAC nih Myingyan biahalnak ah an kalpi, an velh i bia an hal tiah theih a si.
SAC nih Palung khua caah khuabawi pakhat thim ṭhan an i timh leng ah Kyaw Swe zong a tlawm bik thong kum 40-50 tiang a tla kho tiah NRDF nih an thanh.

SAC nih hramhram in uknak a lak caan thla 22 chung ah SAC ralkap pawl ruang ah Chinmi 350 leng an thi cang tiah Institute of Chin Affairs – ICA nih December 1 ah a rak thanh. ICA nih a thanh ning ah 2021 February 1 in 2022 November 3 0 tiang thla 22 chung ah SAC ralkap pawl ruang ah Chinmi 355 an thi, Chin ramkulh chung mipi inn 1500 leng a kaang tiah a langhter.

ICA nih cazin a khawmh ning ah a thi mi 355 chung in mipi sawhsawh pa 132, nu 35 an i tel leng ah kum 18 tang hngakchia 24 tiang an i tel. Cun Pastor 4 zong an nunnak a liam tiah a langhter. A thi mi chung in SAC ralkap he aa doh mi Chin mipi hriamtlai 186 an i tel tiah ICA nih a chim.

SAC he kahdohnak a fah khunnak hmun a si mi Chin ramkulh ah ralzaam 40,000 leng an um i India ram ah 50,000 deng an i dor tiah ICA report ah hmuh khawh a si.

Kalay Myo Ah SAC Ralhrang Nih Mipi Inn An Khangh Lio Ah PDF-Kalay Nih Mine Bomb Pa 4 In An Doh Hna I Minung 15 Nak Tam An Thi, Kalay Myo, Indai sang ah SAC ralhrang hna nih December 7 chun ah mipi inn an khangh lio ah PDF-Kalay nih mine bomb 4 in an doh hna i ralhrang 15 nak tlawm lo an thi tiah PDF-Kalay nih cathanh an chuah.

Mine in an doh hna lio ah ralhrang lei minung 15 leng an thih leeng ah hliamhma tuarmi zong an tam tiah theih a si. Hliamtuarmi hna hi mizaw motor (Ambulance) pa 2 in an rak laak hna tiah theih a si.

Ralhrang hna nih bomb a puahnak pawngkam ah minutes 10 hrawng an kah hnu ah khuahelnak lam in an kir i an riak tiah theih a si.
”Mine puahnak pawngkam ah a um ve mi mipi pa 3 hliamhma an tuar ti thawng kan theih i kan lung a ṭha hrim lo. Nan kan ngaihthiamnak lai zaangfah kan in nawl ko hna,” tiah PDF-Kalay nih nawlnak ca an chuah.

Be the first to comment

Leave a Reply

Your email address will not be published.


*