Matupi ah meiseh in a chuakmi khuvai ruangah hngakchia 8 sizung an phan!!
====================
Caan hman tein electric mei a ngahlonak Chin ramkulh Matupi khua ah, meiseh an hmanmi khuvai ruangah Sunday School a cawng liomi ngakchia minung 8 cu lakhruak in thlopbul dingah sizung an phan tiah tualchung mi nih DNA ah an chim tiah theih a si. Matupi khuami DBC khrihfabu hna cu zarh fatin pumhnak an ngei tawn i nizaan September 11 zarhpi ni pumhnak ah hmanding in an hman mi Meiseh khuvai ruangah Sunday School cawngmi hngakchia hna cu lakhruak in thlopbul an ton hi a si tiah theih a si.
Biakinn chung pumh caan hman dingah mei a ratlo caah inntang ah meiseh an hon, cu meiseh chiahnak hmun cu tawh hrenh a si ko nain meiseh in a chuakmi meikhu kha Biakinn chunglei ah a hung kai. Cu meikhu cu Sunday School an cawnnak khaan chung tiang a luh caah hngakchia nih meiseh in a chuakmi khuvai cu an i dawp/hak i lungmit le thaw zatlo in an um hi a si tiah theih a si.
“Caan tlawmpal tlai uhsih law thil sining ṭihnung ngai a si hnga, caan tlai lo tein kan dawmhtlaih manh hna caah kan van a ṭha. Hngakchia minung 5 cu sizung phakpi an si le cangka in oxygen an pek colh hna” tiah DBC khrihfabu chungtel pakhat nih a chim. Emergency in thlopbul a tongmi hngakchia an dihlak in an ngandamnak a ṭha ko tiah sibawi te nih an ti caah a rauh hlan ah sizung in chuah khawh an si ko lai tiah a chimchap.
Meiseh in a chuakmi meikhu ruangah lungmih, thaw zatlo tibantuk hi a tu le tu a cang tawn i, lakhruak i zohkhenhnak tlai deuh sual ruangah khua cheukhat ahcun nunnak liammi zong an um bal cang tiah theih a si.
Relchap, AA le SAC Ralkap Kar Kahdohnak Ruangah, Paletwa Peng Khuami Facang Tuan Kho Loin An Um!, Chin ramkulh, Paletwa peng ah, Arakan Army (AA) le SAC ralkap kar kahdohnak ruangah, kahdohnak pawng hrawng ah a ummi khua cheukhat hna facang tuannak kongah harsatnak an tong tiah theih a si.
2022 August thla thokin Paletwa peng chung kahdohnak ruangah Abawngthar(အဘောင်သား), Yeemawah(ရဲမ၀), Kyiatyatkaing(ကြက်ယက်ကိုင်း), Leikkung, (လိပ်ကုန်း), Namada,(နမဒါ), Singsan(စိမ့်စန်း) khua hna telhin Khua 10 hrawng i a um mi mipi hna cu ralzaam dirhmun in an um tiah theih asi.
KaukOo (ကောက်ဦး) timi facang hi September thla thok cun, tuan an cu cang, asinain ralzaam dirhmun kan phak tikah facang tuan khawh a si ti lo. Facang tuan caan i kan tuan lo ahcun facang hi a rawk dih khomi an si. Cun kan nih khua lei cu lo tuahin a paw a cawmmi kan si fawn caah eiding kong ah lungrethei in kan um ko, zeidah kan eidin te lai ti ruah ah lung a dong ko” tiah Namada khuami pakhat nih cun a chim.
A luancia September 9 lio ah khan kum 23 hrawng a simi U Thein Aung cu facang zuun dingin lo ah a kal pah ah bomb aa lamh sual caah a ke a rak bul. “Atubantukin facang tuan caan ah tuan khawh a si lo tikah phaisa lut a um ti lo, cu nih a van hrin mi cu fale ca cawnnak le ngandamnak kongkau ah a chialei kan panh ko lai, kahdohnak a um chung paoh cu facang cu kan tuan ngam/kho bal lai lo” tiah ralzaam bawmhnak tuanvo ngeitu pakhat nih a chim.
KyaukHtu Ah Umhmun Khuarmi PDF Sakhan Cu SAC Ralkap Nih An Khangh, Magway ramṭhen, Kyaukhtu peng ah umhmun khuarmi The Youth Force -Saw & Kyaukhtu sakhan cu September 10 ah SAC ralkap nih an khangh, tiah theih a si. Kyaukhtu ah umhmun khuarmi miakpi kaptu phu in SAC ralkap 90 hrawng nih zaanlei sml 3:00 hrawng ah an khangh, tiah The Youth Force -Saw & Kyaukhtu phu in ṭuanvo ngeitu nih a chim.
“Kanmah lei in a thimi le aa hliammi cu kan um lo. Thilri kan sunghmi zat tu cu fiang in kan hngal ri lo, meithal le hriamnam thilri zong kan chuahpi khawh dih,” tiah a chim chap. PDF lei in hriamnam, zen-kuan le anmah an him ko nain an sakhan caah an hmanmi thlam(inn) pathum cutu SAC ralkap nih an khangh piak dih tiah theih a si.
SAC ralkap le Pyosawhti nih Tamu Pengkomh Jangnom Pastor le Khuami An Hrem Hna !! Sagaing ramthen, Tamu pengkomh, Myothit ah umhmun a khuarmi SAC ralkap hna le Phyosawhti hna nih Myothit khua nitlaklei ah a ummi Jangnom khuachungah September 11 zaanlei sml 2 hrawng ah an lut i Pastor le khuami cheukhat cu a ruang um loin an tlaih hna hnu ah an hrem hna tiah theih a si. Pastor pa cu kuak mei in voi tampi a cal ah an duah, khua upa pakhat cu a liangah meithal an khin i, cu a liang khin mi ichirhchan in meithal in voi 4 hrawng an kaah tiah khuami hna sinin theih a si.
Myanmar Ramchung Ah Covid-19 Zawtnak A Karh Than, Myanmar ram chungah Covid-19 zawtnak a thar in a karh ṭhan i nizaan September 11 ni, nikhat chung ah Covid zawtnak minung 189 an hmuh than tiah SAC ralkap kuttang um ngandamnak lei vuanci zung nih a thanh. SAC tangum Ngandamnak lei vuanci zung nih September 11, zaan suimilam 8:00 tiang cathanh an langhter ning ah chekhlatnak tuahmi 9,378 chung ah Covid-19 zawtnak a ngei tiah zawtnak hrik hmuhmi zatuak 2.01 an si tiah an langhter.
Covid -19 zawtnak aa chawnhmi minung 189 chung ah minung 173 hi ramchung in aa chawnhmi an si i, minung 16 hi ramleng in aa chawnhmi an si tiah ngandamnak zunglei nih an thanhmi ah cun an langhter. ” A tutan Covid zawtnak hi, raikhamsii aa chun mi hna cung zongah hmuh a si caah mah tein leng chuahlo in i runven a hau. Covid zawtnak ruangah nunnak liammi an tlawm tilo caah mah tein i runven a herh. Leng chuahtik zongah mask hruk philhlo ding le, mask aa huplo mi kan hmuh hna zongah mask i huh ding in kan theihter ṭhan hna a hau” tiah Yangon khuachung ummi pakhat nih a chim.
Mipi ngandamnak kong he pehtlai in lakhruak i zohkhenh a herh caan ah, mi bawmchanhnak a tuahtu Yangon um volunteers hna zong nih Covid-19 zawtnak kong he pehtlai in zulhphung hna cu felfai tein mipi lei nih zulh ding ah theihternak an tuah ṭhan. Myanmar ram pumpi huap Covid-19 zawtnak ai thok kum, 2020 kum in 2022 September tiang ah Covid zawtnak aa chawnhmi 616,663 an si i, minung 19,442 cu Covid zawtnak in an nunnak a liam tiah SAC ralkap kuttang um ngandamnak lei vuanci zung nih an cathanh chuahmi ah an langhter.
Rakhine ramkulh chung kahdohnak ruangah Maungdaw khuachung ah ralzaam 800 leng an karh, Rakhine ramkulh, Maungdaw peng chaklei ah SAC ralkap le AA kar kahdohnak a fah caah, tualchung mipi 800 renglo cu Maungdaw khuachung ah an i dor tiah mi bawmchantu phu hna nih media ah an chim. Hkamaungsait(ခမောင်းဆိပ်), Yanaungpin(ရန်အောင်ပြင်), Mitait(မီးတိုက်) telh in khua 10 leng in khuami hna cu ralzaam dirhmun an phan i, Maungdaw khuachung phungki sianginn hna le ralzaam sakhan ah dorter an si tiah an chim chap.
“Tukar hrawng cu SAC ralkap le AA kar i kahdohnak cu a fak ngai, SAC ralkap lei nih hriamngan an hman leng ah raltuknak vanlawng hmang in kahdohnak an tuah caah atu bantuk ralzaam dirhmun kan phanh hi a si” tiah tualchung mi pakhat nih a chim. “A liamcia thla chung ah khan a zaam mi cu an um pah cang hna, tukar hrawng cu kahdohnak a fak i SAC ralkap nih hriamngan le raltuknak vanlawng hna an hman caah khua kiangkap ah hriamngan an tla, khuachung ah kan um ngam ti lo caah Maungdaw khuachung ah kan i dornak hi a si. Hmundang ah a zaam mi zong an um ṭhiam, Maungdaw khuachung ah ralzaam dirhmun in a ummi 800 renglo kan si cang” tiah a chim chap tiah theih a si.
Maungdaw peng chaklei ah a luancia July 18 thok in SAC ralkap le AA kar fakngai in kahdohnak a chuak. September 10 ah, Maungdaw peng thlanglei ah ummi SAC ralkap khah-mah-yiah 352 sakhan pakhat cu lakpiak an tong i, ralkap 4 le hriamthil tampi kan lakkhawh tiah AA nih cathanh an rak chuah.
Takaung peng ah SAC ralkap motor 2 bomb puahhnawh in doh an tong, pahnih an thi, Mandalay ramṭhen, Takaung(တကောင်း) peng ah SAC ralkap motor 2 cu bomb puahhnawh le kahdoh an ton caah SAC ralkap 2 an thi tiah Takaung PDF nih an chim. “Takaung in SAC ralkap motor pakhat in ralkap 10 hrawng le hriamthil a phortu motor pakhat cu September 11 chun suimilam 12:30 hrawngah Takaung in meng 4 hrawng ai hlatnak SinHngiatkone (ဆင်ညှပ်ကုန်း) khua luhnak ah pa-de-ta bomb lung 6 an hmanh mi in kan doh hna tiah” Takaung PDF lei nih an chim.
Bomb cu timhcia tein hmanh a si, kan hmanhnak hmun SAC ralkap motor 2 an phak lio belte ah an kar ah tualchung mi nih an i citmi motor pakhat karlak thlak in a kal caah, motor pakhat lawng bomb kan puahhnawh khawh hna, cu caah SAC ralkap lei a thimi le hlianhma tuar an tlawmnak hi a si tiah tuanvo ngeitu nih an chim chap.
Mizapi nih SAC ralkap hna he neihniam in um le, an motor he neih tein kal tibantuk tuahlo dingin le tualchung hriamtlai phu hna nih cathanh chuahmi zulhawk thil hna kha felfai tein zulhding, rikhiahmi caan a lonh hnu ah motor lampi hman tibantuk tuahlo ding in theihternak an langhter chih.
Sagaing Peng Nyaungpinwon (ညောင်ပင်ဝန်း) Palik Sakhan Drone in Bomb Thlah Hnawh An Tong, Pathum An Thi, Pahnih Hliam An Tuar, Sagaing ramṭhen Sagaing peng Nyaungpinwon khua palik sakhan cu tualchung hriamtlaiphu hna nih drone in bomb an thlak hnawh hna i sakhan hmai thingkung tang i aa dormi SAC ralkap pakhat le palik 2 nih hliam an tuar tiah kan theih.
Hliamtuarmi hna Sii-inn kalpi dingin mawtaw cungah an hawi le palik 2 nih an khin hna lio ah bomb puah hnawh an tongṭhan i hliamtuar ṭhingmi SAC ralkap pakhat le palik 2 cu a hmunah an thi i sii-inn kalpi dingin a bawmtu palik 2 zong hliam an tuar ve tiah tualchung hriamtlaiphu pakhat si mi Knight Commanders in BeThanKyi (ဘယ်သန်ကြီး) nih a chim. Nyaungpinwon palik sakhan ah hin SAC ralkap le palik 20 hrawng an um i khua luhchuahnak in mipi khualtlawngmi hna cu phaisa an hal tawn hna tiah tualchungmi hna sin in theih a si. Tutan kahdohnak cu Knight Commanders , Black Dragon (Special Tesk Force) le tualchung PDF phufonh hna i bawm in an tuahmi si tiah theih a si.
Mandalay Ah SAC Ralkap Nih Tlaihmi Minung 4 Cu SAC Kuttang Thwaythauk phu (သွေးသောက်အဖွဲ့) Nih An Thah Hna Hnuah An Ruak An Hlonh Hna, Mandalay khuachung ah SAC nih an tlaihmi mino 4 cu SAC kuttang rianṭuantu phu pakhat simi Thwaytauk phu nih an kalpi hna i an hngawng an ah hna hnu ah an thah hna, cun an ruak ah Thwaytauk logo (သွေးသောက်တံဆိပ်) an benh hna hnuah an hlonh hna tiah SAC lei thawngpang petu le tualchungmi hna sin in kan theih.
Thah a tongmi mino 4 ruak cu nizaan september ni 11 zinglei ah hmuh an si i Mandalay sii-inn ah kalpi an si tiah mibawmchantu phu nih an chim. Thah a tongmi tualchungmi 4 hna cu SAC ralkap nih raktlaimi hna an si i a minung bel a hote an si ti theih a si lo tiah theih a si. Cu ban tuk ṭhiam in Sagaing ramṭhen Monywa khua Myawaddy sangah SAC hriamngan kahnak in tualchungmi pakhat hriamngan khennak in a nunnak liam tiah tualchungmi hna sin in theih a si.
Myawaddy Mytel zung pawng puahkehnak a chuah hnu in SAC ralkap nih Mytel zunghmai um mi mipi inn cu duhpaoh in an kah caah aa hngilh lio mi nu pahnih cu kuan nih a khen hna i pakhat cu a hmun ah a nunnak a liam tiah theih a si. A nunnak liammi nu hi Depeyin ah um mi a si i ramdang kalding in passport tuah ah a ra mi si tiah tualchungmi hna nih an chim.
Myinmu peng kahdohnak ah SAC ralkap 15 an thi, Sagaing ramṭhen Myinmu peng ah rallam sialah a kalmi SAC ralkap cu Myinmu tualchung hriamtlaiphu hna nih an kah hna caah SAC ralkap 15 hrawng an thi lai tiah tualchung hriamtlaiphu hna nih cathanh an chuah tiah theih a si.nMyinmu peng Alahkapah (အလ္လကပ္ပ) khua ah rallam sialmi SAC ralkap 38 hna cu nihin September 12 ni, chun laiah kan kah hna i SAC ralkap 15 hrawng cu a hmun ah an thi, kan zenkuan a dih caah hnu kan kir ṭhan, hliamhma a tuarmi zong an tam ngai lai tiah kahdohnak i aa telmi Myinmu Lyinzonenat(မြင်းမူလင်းယုန် နက်) in mi pakhat nih a chim.
Cu kahdohnak ahcun SAC ralkap lei in an kah ve ko nain in tualchung hriamtlaiphu leiin hliam tuar um lo tein hnu an tolh kho tiah theih a si. Cu kahdohnak cu Myaungmya tualchung hriamtlaiphu ,Myinmu Lyinzonenat hriamtlaiphu, Myinmu PDF, Myinmu Civil Revolution Force le Sagaing pengkomh battalion 2 hna i bawm in an tuahmi a si tiah theih a si.
Nganzun peng ah pyosawhṭhi ton biaruahnak an ngeih lio ah kahdoh an tong, minung 4 an thi, Mandalay ramṭhen, Nganzun(ငါန်းဇွန်) peng Phaungkadaw(ဖောင်းကတော) khua ah SAC ralkap kuttang um pyosawhṭhi phu tonpumh biaruahnak an ngeih lio ah tualchung hriamtlai phufonh nih an kah hna, cu kahdohnak ah cun pyosawhṭhi minung 4 an thi i hliamhma tuarmi pakhat a um tiah theih a si.
Phaungkadaw(ဖောင်းကတော) khua in pyosawhṭhi hruaitu Nga Moe cu September 11 zaan suimilam 8:00 hrawngah a umnak inn ah fimhlawm dingin an luhhnawh, cuti an luhhnawh lio caan te cu a inn ah pyosawhṭi phu tonpumh biaruahnak an ngeihlio a rak si caah kahdohnak kan tuah colh hi a si tiah Naung Yoe pah-kah-phah NYSGF nih nihin September 12 ah cathanh an chuah.
Pyosawhṭhi hruaitu Nga Moe cu a zaam manh nain, midang pyosawhṭhi minung 4 cu kahthah an si i hliamhma a tuar mi pakhat a um tiah NYSGF nih an cathanh ah cun an langhter. Pyosawhṭi phu kahdohnak cu NYSGF, Zarmani MMU, Myaung ṭat-khuai Minaga(မြောင်တပ်ခွဲ မီးနဂါး), NZN Revolution Force, Mansuaigya(မာန်စွယ်ကျား) tualchung hriamtlai phufonh nih an tuah mi a si tiah theih a si.
NYSGF phu le tualchung hriamtlai phufonh hna nih n a luancia September 10 lio ah Myinchain pengchung phaisa in lentecelhnak a tuahtu SAC ralkap hna cu an kir lei ah an rak kah hna caah ralbawi pakhat le a hnu zul ralkap pakhat kahthah an rak tong tiah theih a si.
Leave a Reply