Breaking News; Lai rawn kan unau hna caah thlacaam bom ko hna usih!!

Kalay Peng Ah SAC Ralkap Nih Lamkam Thingkung An Hau Tiah Tualchung Mi Nih An Chim!
=======================================
Kalay-Tamu motor lampi telh in Kalaymyo pengchung hmun tampi ah a ummi thingkung hna cu SAC ralkap nih tuthla chung ah nitin ngawt in thingkung an hau kan hmuh, tiah tualchung mi hna nih an chim. Kalaymyo pengchung lamkam ah cinmi thingkung hna SAC ralkap nih an haunak a ruang hi khuapau a si cang caah vanlei kahdohnak ding timhtuahnak an ngeih caah a si kho, tiah tualchung mi hna le PDF nih an zumh.

“Thinkung a nganmi pawl cu a luancia thla hnih hrawng in an hau cang hna, PDF cawlcanghnak hmunhma lawng siloin hmun tampi ah thingkung cu an hau. Van lei kahdohnak tuah a timh caah a si lai tiah an lunghrinh cio. Ruahchanmi ngei tein tuahmi thil a si,” tiah Kalaymyo khuami pakhat nih a chim.

Tualchung hriamtlai phu hna nih lamkam ah a ummi thingkung cung ah bomb hmanh in kahdohnak an rak tuah caah SAC ralkap hna nih lamkam thingkung an haunak a si tiah thawngpang a rak leng bal cang. Asinain atu ah PDF thazaang a ṭhawnnak hmun lawng ah siloin pengkulh chung hmun tampi ah SAC ralkap nih thingkung an hau, tiah tualchung mi hna nih cun an chim.

“SAC ralkap nih thingkung an hau kan hmuh, vanlei kahdohnak tuah a timh tiah thawngpang zong a leng, kanmah lei zong nih a hlankan in timhtuahnak kan ngei ko,” tiah Kalaymyo peng tualchung hriamtlai phu chungtel pakhat nih a chim. SAC ralkap hna nih cun anmah pumpak in thingkung cu hau lo in Department of Construction cu an hauter hna. Cucaah Construction zung rianṭuantu hna cu SAC ralkap fialmi ṭuan lo ding in tualchung hriamtlai phu hna nih ralrinnak an pek hna.

Mizoram Quarry Cimhnak Ah A Tlaumi Hna Chung In Miruak 8 Hmuh An Si Cang, Mizoram, Hnahthial peng Maudarh khua pawng Lungkhoihnak (Quarry) cimhnak raungah nunnak a liammi hna chung in miruak 8 cu nihin November 15, zinglei ah an lak khawh hna i minung 4 ruak cu hmuh an si rih lo, tiah theih a si.

Nizaan November 14, chunhnu suimilam 3:30 hrawng ah ABCI Infrastructure company nih lung an khoihnak hmun cu a cim i, cuka hmun rianṭuantu minung 12 le seh thilri hna zong vawlei nih a khuh hna caah an tlau. Nihin November 15 zinglei tiang ah ruak 8 lak khawh a si cang, tiah Mizoram tualchung news nih an ṭial. Nunnak liammi hna cu cuka rianṭuannak hmun ah aa hlawhfa mi an si hna i, Assam ramkulh(kala ram) ummi an si tiah theih a si. Ṭuanvo ngeitu hna nih bawmhchanhnak an tuah cuahmah rih ko, tiah theih a si.

Myanmar Buainak Kong Kan Tlangtlak Kho Hna Lo – UN General Secretary, Myanmar buainak kong he pehtlai in vawleicung ramkip le UN nih remhdaih khawhnak dingah kan tlangtlak kho hna lo, tiah a luancia November 13, Cambodia ram ah tuahmi ASEAN lutlai upa tonpumhnak ah UN General Secretary Antonio Guterres nih a chim.

Myanmar rammi hna cu a fak bikmi harnak nih a den hnanak kong le SAC nih thong an thlakmi hna zong a rannak in chuah ding le hramhram in SAC nih thil an tuahmi ngol ding zong UN General Secretary Antonio nih a chim. A ra laimi ASEAN Chairman a ṭuan dingmi ram cu Indonesia an si lai i anmah nih Myanmar ram kong ah biatak thlak in thil an tuah lainak kong a zumhnak zong UN General Secretary Antonio nih a chim chih.

Myanmar ram kong tawlreltu UN palai le ASEAN ram kong tawlreltu Myanmar palai he i bawm in Myanmar ram Democracy co ṭhan khawhnak ding ah fak piin kan i zuam lai, tiah UN General Secretary Antonio nih cun a langhter. US President Joe Biden zong nih Myanmar ram Democracy hmuh ṭhan khawhnak ding ca ah fak piin kaa zuam lai i, ASEAN nih biahren an chiahmi phung hi SAC nih an zulh awk a si, tiah a forhfial hna.

ASEAN nih biahren an chiahmi 5 cu SAC nih kum khat le a cheu chungah pakhat hmanh a zulh lo caah SAC nih ASEAN biahren a zulh ṭhannak ding ah caan ri khiahpiak in ASEAN hruaitu hna nih bia an chah, tiah theih a si. SAC nih cun Myanmar ram kong ah ASEAN cu zeihmanh i thlak lo ding in cathanh an chuah. Crd-The Chin Post

Be the first to comment

Leave a Reply

Your email address will not be published.


*