Demoso Kahdohnak A Fah Tuk Caah SAC Ralhrang Leiin Minung 30 Nakin Tlawmlo An Nunnak A Liam I, Kareni Phufonh Lei In Minung Pa 7 An Nunnak A Liam Ve
Kareni ram, Demoso pengkulh Oo Khuri hmun ram lei ah KNDF, Ka, KPDF phu fonh hna cu SAC ralhrang pawl he kahdohnak a fak tuk caah SAC ralhrang lei nih Vanlawng pahnih in a kahdohhna caah Kareni phu fong mipi ralkap lei in minung pa 7 an nunnak a liam i SAC ralhrang lei in minung 30 nak tlawmlo an nunnak a liam ve tiah khuami pakhat nih a chim.
Kahdohnak cu April ni 11 ah a chuak i tuni zaan lei tiang kahdohnak fak piin a chuah tiah theih a si. Kahdohnak chungah mi phun le ram caah a nunnak a pee mi ah KNDF in minung pa 5, KA in pakhat le KPDF in minung pakhat an si tiah theih a si.
Ralhrang Uico A Thi Mi An Tamtuk Ngamsam Le Ralhrangbawi Nih An Zum Kho Ti Lo, Pinlebu, Ni 12 Chung Kahdohnak Ah Kaphnih In A Thimi An Tam! Sagaing ramṭhen, Pinlebu ah SAC ralkap le PDF ni 12 chung kahdohnak ah SAC leiin Major rank pakhat telh in minung 40 leng an thi, tiah RFA nih a ṭial. SAC lei nih kahdohnak cu an thok hmasa i, March 29 in April 9 tiang kahdohnak ah SAC ralkap nih Vanlawng zong voi tampi an hman, tiah PDF in chimphuannak nawlngeitu pakhat nih RFA ah a chim.
“Anmah(SAC) lei in Major pakhat, Lieutenant pakhat, sergeant pahnih le a dang ralkap 40 leng an thi. Hi kahdohnak hi ni 12 a rau i Pinlebu khua chung tiang kan i kap. Helicopter in voi 12 le Jet in voi 2 an kan kah caah hnu kan tolh ṭhan. March 29 lio ah Pinlebu peng Kat Pan Ṭa(ကပ်ပန်တာ) khua in kahdohnak an thok i Helicopter in voi 2 an kan kah caah kan sakhan chikhatte an laak nain zanlei ah kan laak khawh ṭhan,” tiah PDF chimphuan nawlngeitu nih cun a chim. April 8 ah Administration zung, Setikung, bank le khual dinhnak hmun tiang kan laak i palik sakhan zong kan laak lai kan ti ah Vanlawng in an kan kah caah hnu kan tolh ṭhan, tiah a chim chap.
“Pinlebu in meng 8 hrawng ah KIA le PDF ṭangṭi in sakhan an sak ti thawng kan theih caah humhimnak kan va tuah mi a si,” tiah SAC chimphuannak nawlngeitu Zaw Min Thun nih RFA a chim ve.
SAC ralkap lei nih cun KIA le PDF lei in an ruak 8, M-22 zun 5, AK-47 zun hnih, KIA chuak 40 mahmah zun 1, 7.62 mahmah sniper zun 1, M-22 kuan bawm 22, M-22 kuan 1345, 7.62 sniper kuan 115, 40 mahmah bomb 9, KIA bomb 19, 60 mahmah bomb 17 le kutcheh bomb 1 kan laak, tiah an langhter.
Cu pinah rithaisii zong kan laak, tiah kaphnih nih an chim veve. Cu kahdohnak ah cun Pinlebu peng khua 10 hrawng in minung 2000 leng cu a himnak hmun ah an zaam, tiah khua mi hna nih an chim.
Kat Pan Ṭa(ကပ်ပန်တာ) khua ah nu pakhat nam hma in a thi mi kan hmuh i hlathlainak kan tuah lio a si, tiah PDF chimphuannak nawlngeitu pa nih cun a chim.
Yangon-Mandalay Motor Lampi Ah SAC Ralkap Bomb Puah An Tong. Yangon-Mandalay motor lampi ah SAC ralkap motor 2 cu Bago ramṭhen PDF nih bomb an puah hna, cu bomb puahnak ah cun SAC ralkap 3 an thi, tiah Bago ramṭhen PDF ṭuanvongeitu sin in theih a si.
Tongmangno(bu-hmu) nih zulhmi SAC ralkap motor cu Yangon-Mandalay lampi mengtung 50/2 ah Yangon lei in a ra mi SAC ralkap motor 2 cu Bago pengkomh PDF battalion 1, tat-khuai 2 nih nihin April 12 zinglei suimilam 5:00 hrawng ah bomb puahhnawh in an doh hna, tiah ramṭhen ṭuanvolatu PDF nih a chim.
“Kanmah lei nih a hlankan tein kan bawh hna i kan doh hna i, a hmaisa mi motor cu bomh nih a khen caah minung 2 an thi i, midang pakhat cu fak ngai in hliamh a si lengah hliam tlawmpal a tuar mi zong an um,” tiah a chim chap.
Nihin April 12 chunhnu suimilam 3:30 hrawng ah Bago ramṭhen PDF battalion 1 nih DaitOo(ဒိုက်ဦး) peng Myomah dawr hmai ah tuah mi SAC ralkap titoih puai tuahnak ah bomb an puah, tiah a chim chap.
“Kan umkal tikah SAC ralkap motor ruun hna he i hlat in um ding a si,” tiah mipi sinah Bogo ramṭhen PDF nih cun nawlnak an tuah i, mipi hliamh an si sual lai phan ruangah kahdohnak an hrial tawn mi zong a um, tiah PDF chimphuannak nawlngeitu nih a chim.
Leave a Reply