SAC ralkap nih Hakha – Thantlang kar Timit lei ah helicopter hmang in vanlei kahdohnak an tuah tiah teih a si.
==================================
“Nihin November 21, zingka in zaanlei suimilam 3:00 tiang ah SAC ralkap nih helicopter hmang in Timit lei ah vanlei kahdohnak a tuah, nihin chung lawng ah a thawngpang kan theih ning in cun voi 8 hrawng a kah cang hna.
.
Timit lei ah vanlei kahnak a tuah khawh tlawmpal ah khuachung lei ah a kir i vanlei ah ai hel, cu hnu tlawmpal ah Timit lei ah a va kah than hna.” tiah Hakha khuachung ummi nih an chim. Kan ralkap hna an humhimnak caah thlacamnak in bawmcio hna usih.
.
SAC ralkap vanlawng nih nihin November 21 zing sml 11:40 hrawng in Hakha khua a hel hnuah Timit lei ah kahdohnak a tuah. Cung sang ngai in a zuang, cun seh meithal thawng zong pehtlai in a than hleiah bomb thawng zong a thang chih tiah theih a si. SAC ralkap vanlawng nih voithum tiang bomb a thlak cang tiah theih a si. Crd-The Chin Post
.
SAC ralkap nih minung ruahnak ngeilo in thahnawnnak le van lei kahdohnak, bomb thlaknak a tuah caah ngakchia 242 an nunnak a liam i, ngakchia thong tampi nih fahnak an ton tiah NUG nih cathanh an chuah.
.
SAC ralkap nih ngakchia 372 cu phungninglo le hramhram in tlaihkhihnak a tuah i, nihin tiang ah ngakchia 303 hrawng hi thonginn ah harsatnak tampi he an hren hna tiah NUG nih cun a langhter.
.
International Children’s Day ah ngakchia dihlak nih chungkhar le nu le pa sin ah him tein thutdir, nuam tein ca cawn khawhnak ding ah ngakchia kip nih nuhrin covo an tinco khawh cionak ding caah UN telh in ngakchia lei zohkhenhnak tuahtu dihlak nih lungrual tein i zuam cio ding ah NUG nih forhfialnak zong a tuah.
.
Cun NUG nih ngakchia hna caah him tein a rauh hlan ah ca an cawn khawhnak ding caah mipi he i bawm in kan i zuam ti lai tiah an thanhmi ah cun an langhter
.
Magway ramṭhen, Htilin peng ah SAC ralkap hmual ngei deuh in le fak deuh in doh khawhnak ding ca ah Asia Defence Force (ADF) he kan i fonh cang, tiah Yaw Revolution Army (YRA) chimphuannak nawlngeitu nih nihin November 21 ah a chim. Htilin peng ah fek tein kan dir lai i SAC ralkap fak piin kan doh hna lai timi kan hmuitinh an cohlan ve hnuah Asia Defence Force (ADF) nih an ralkap phu cu an hrawh i hmun khat ah kan i fonh cang, tiah a chim chap.
.
Asia Defence Force (ADF) cu 2022 Febuary 14 ah rak dirhmi SAC ralkap a dotu phu pakhat a si. Asia Defence Force (ADF) nih Yaw Revolution Army he hmunkhat ah i fonh ding in an cohlanmi hi lunglawmh awk ngaingai a si. SAC ralkap kan dohnak lamthluan ah hmual ngei deuh in kahdohnak tuah kan i zuam lai, tiah YRF chimphuannak nawlngeitu nih cun a chim. Atu kar hrawng hi Yaw hmunram Htilin peng ah SAC ralkap 100 hrawng nih Htilin khua nichuahlei ah rallam an sial, tiah theih a si.
.
Indonesia Ram Li Hninh Ruang Ah Minung 50 Leng An Nunnak A Liam, 700 Tluk Nih Hliam An Tuar, ASEAN ram chungtel pakhat simi Indonesia ram ah (5.6) tluk a thawngmi Li hninhnak a chuah caah minung tampi an nunnak a liam i, za renglo nih hliamhma an tuar tiah theih a si.
.
Li hninh lio ah thil rawk tang ah ai thup i a him mi hna nunnak chanhchuah dingah bawmchantu hna an i zuam cuahmah tiah theih a si.
Li hninhnak cu Indonesia khualipi Jakarta ni chuah thlanglei meng 45 tluk ai hlatnak Cianjur zawn a laifang ah chia in fak tukin ai hnin.
.
Cu Li hninhnak ruang ah minung 700 hrawng nih hliamhma an tuar i, inn 300 leng a rawk tiah Indonesia ram Department of Natural Disaster nih cathanh an chuah.
.
SAC Ralkap Nih Khin U Le Shwe Bo Peng Khuate 5 An Khangh Caah Inn 200 Deng A Ciam, Sagaing ramṭhen, Khin U peng le Shwe Bo peng ah a ummi Paunglaykone(ပေါင်းလဲကုန်း), Latpankyi, Hnedwin, Sisonelay(ဆီဆုံလေး) le Leikyakone(လိပ်ရကုန်း) khua hna cu SAC ralkap nih an khangh caah inn 200 deng a ciam, tiah theih a si.
November 18 le 19 ah SAC ralkap nih Khin U peng Paunglaykone khua ah inn 100 leng an khangh pinah November 19 ah Hnedwin khua inn 1 an khangh chap, cun nihin November 20 ah Latpankyi khua inn 50 leng, Sisonelay khua inn 8 le Shwe Bo peng Leikyakone khua inn 30 leng an khangh ṭhan, tiah theih a si. SAC nih nawlngeihnak an lak hnu in Khin U peng ah 2022 October thla tiang khuate 47 an khangh i inn 1,856 a ciam. Cu pinah tualchung mi le PDF 218 an thah hna i, 143 tlaih an tong, tiah theih a si.
Monywa In Sagaing Lei Ah A Kalmi SAC Ralkap Motor Run 10 Bomb Puahhnawh An Tong, 20 An Thi, Monywa in Sagaing lei ah a kalmi Sagaing Tatma 33 in motor 10 cu, November 19 ah Alakapa khua le Wunpyi khua karah bomb in voi 5, cun Wunpyi le Myinmu khua karah voi 1 tiin bomb voi 6 kan puahhnawh hna, tiah Army To Fight Dictatorship (PAFD) in ṭuanvo ngeitu pakhat nih a chim.
Sagaing Tatma 33 in a chuakmi SAC ralkap motor 22 cu November 19 zing sml 11:00 hrawngah Sagaing in Monywa lei ah an kal. A zanlei ah Monywa in Sagaing lei ah motor 10 an kir ṭhan i cu a kir than mi hna kha bomb kan puahhnawh mi hna hi an si, tiah People’ Army To Fight Dictatorship (PAFD) in ṭuanvo ngeitu nih cun a chim chap.
Chun sml 12:00-1:00 karah Monywa in Sagaing lei ah a kir mi motor hna cu PDF nih bomh in voi 6 an puahhnawh caah ralkap 20 an thi i, an ruak cu Nyaungpinwun(ညောင်ပင်ဝန်း) sakhan ah an chiah hna, tiah theih a si.
Cu bomb puahhnawhnak ah People’s knight Defense Force Myinmu (PKDF-MMU) le People’ Army To Fight Dictatorship(PATFD), TAUNGTHA People Defense Force (TTAPDF) ၊ D.B.B.F- MMU ၊ PAFD, Companny Dog Killers People Defense Force Myinmu (DKPDF) hna an i tel, tiah theih a si.
FIFA World Cup 2022 Cu Tuzan Ah Thawk A Si Cang Lai, Caan saupi pumpululh zohtu(fan) hna nih kan i ngaih bik mi FIFA World Cup 2022 cu Qatar khuapi Doha ah thawk a si cang lai. Tutan FIFA World Cup an chuihnak hi Middle East ram lin/lum a si caah vawidang bantuk siloin nikhua a kihdaih deuh caan November-December ah chuih a si lai.
Middle East ah World Cup an chuih a vawikhatnak zong a si lai. Hi ruangah hin vawleicung ram tampi league chuih lio mi cu a hnursuan i, players zeimawzat zong hliamkhuai an ton ruangah World Cup an chuih kho lo. Cu pin ah vawleicung nihrin covo phu hna sin in tutan Qatar World Cup hi soisel a tong ngai fawn. FIFA World Cup dong ding in an i timhsaihnak ah Qatar nih nuhrin covo a buar; Qatar cozah fel lo ruangah rianṭuantu tampi nunnak a liam, ti a si.
Muslim ram a si bantuk in zu khapnak ram a si i, stadium chung ah beer zuar le din an siang lo. Cucaah sponsored zeimawzat nih an chuahtak hna, tiah thawngpang a leng. Muslim biaknak nih nudawk padawk(Gay) a cohlan lo bantuk in certual ah gay dirkamhnak langhter lo ding Qatar siangpahrang nih FIFA a rak theihter cang. Cucaah nuhrin covo a dirhkamhtu hna nih a doh ngai i tutan World Cup cu ka zoh lai lo a titu minung zong an tam.
Tutan World Cup donnak ah hin Qatar cu $229 billion bak a dih i, vawleicung tuanbia ah a dihheu bik World Cup a si. Stadium(Certual) dawhdawh cu muisam phundang ngai in an sak i, riahbuk(hotel) ṭhaṭha zong an sak. Ram hme te an si nain Oil le Gas ah a rummi ram an si caah an i timhsaihnak ah phaisa an dih hringhran.
Hramthawk puai(Openning Ceremony) cu tuah cuahmah lio a si cang i, pumpululh chuih taktak cu Myanmar caan zaan suimilam 10:30(9:30 IST) ah inn ngeitu Qatar le Ecuador nih an chuih lai. Tutan World Cup ah hin ahodah bualco lai? na ruahnak zalong tein comment ah chim khawh a si. Crd-The Chin Post
Aung La Nsang Aa Thongh Man(Dollar sing 2, kawlram phaisa in sing 5000 nak tam), One Championship nih thonghman zei zat a pek hna hi a thanh bal lo. Sinain Media pawl nih an dotthlat i an theih than tawn( dikthlir cun si kho ve lo).
Aung La Nsang nih Champion a si lio ah thonghman hi dollar sing 2 a hmuh tawn. Nain champion a si ti lo hnu cu dollar sing khat lawng a hmuh. Teinak a hmuh tu ah cun laksawng dollar sing khat chap a si tiah thawngla tu Rauf Chaudhry nih a chim.
Tutan ah Yushin Okami a tei i dollar singkhat a hmuh. Teinak a hmuh caah dollar singkhat pek chap a si. Round khatnak ah a tei caah laksawng dollar thong 50 hmuh rih ding si nain rikhiahmi nakin a rih deuh caah an pe lo. Tutan thonghnak ah a hmuhmi dihlak dollar sing 2 a si( Tulio dollar thlen in kan tuak ah cun Sing 5000 nak tam a hmuh ti khawh a si).
Leave a Reply