LCMC(Siizung) Lawngtlai Nih Kahdohnak Ruangah Hliamtuarmi Hna Cu Dawtnak He Zohkhenh An Si Lai, Tiah Cathanh An Chuah
================================
Myanmar ramchung buainak ruangah Mizoram, LADC (Lawngtlai District) chung ah nunhimnak kawl in aa dor hna nih damlo zawtfahnak an ton le dohthlennak ah hliamhma tuarmi hna an um i Lairam Christian Medical Center & Hospital, Lawngtlai an phanh tikah harsatnak nan ngeih ahcun kan in tuaktan piak hna lai, tiah Medical Superintendent nih cathanh an chuah.
“Kan theih cio bantukin Myanmar ram buainak ruangah Mizoram hmunkip ah ralzaam in an hawng phan hna i, Lawngtlai District chung zongah tampi an um. Cu lio ahcun ralzaam hna lakah zawtfahnak ngeimi sii-inn i zohter hau mi hna le sii-inn chung um ( Admit hau) mi hna, tangka lei harnak ngeimi tampi an um ti theih a si hi poi kan ti ngai.
Ralzaam hi lei i harnak ngeimi siizung ah i zohter man le siizung umnak man (Medical bill) pek ding ngeilo mi hna le siizung an um chung i harnak ngeimi (sii cawknak ngeilo mi tbk..) kan um ahcun a tang i min tialtu hna sinah hin i theihter(report) ding a si lai. Anmah le an dirhmun cio zoh in bawmhnak (Poor Fund) pek pinah siizung um man tiang zong dawt khawh an si lai. “Hi pin ahhin kahdohnak ruang i hliamhma pumi, siizung a rak lutmi hna an um ahcun dawtnak in zohkhenh ding an si lai.” tiah Medical Superintendent Dr. B. Zonunsanga nih September 5 ah khan cathanh a chuah.
Hi kong he pehtlai in LCMC rianṭuantu pakhat nih cun LCMC, Lawngtlai Siizing hi Lawngtlai peng chung mizaw hna nih an fuhpanh bikmi siizung a si i, atu lio ah cun ralzam tam lio a si caah ralzam mizaw zong nih an fuhpanh tawn, tiah a chim. LCMC ahhin Doctor 5 an um i, nurse 34 lengah rianṭuantu dangdang he an dihlak in rianṭuantu 97 an um, tiah The Chin Post ah a chim.
Sagaing Ramṭhen, Gangaw Peng, Myinza Khua Cu SAC Ralkap Nih An Khangh!, Sagaing ramthen, Gangaw khua chaklei ah ummi inn 350 hrawng umnak Myinza(မြင်းဇာ) khua cu SAC ralkap nih nizaan September 9 zinglei sml 7 hrawng ah an khangh, tiah theih a si. SAC ralkap 150 hrawng nih Myinza khua ah hriamngan an thlak i cu hnu ah khuachung ah cun lut in, Khua cu an khangh tiah khuami pakhat nih a chim.
Khuachung ummi mizapi cu khuachung ah um ngam loin, a himnak ah kan zaam hna. Inn an khanghnak mei cu atu tiang a mit rih lo meikhu a tam tuk rih, tiah khuami hna nih an chim. Gangaw peng ahhin SAC ralkap nih rallam an sial caah Myinza, Lapu(လာပို့), Kyaw (ကျော်) Mauk(မောက်), Mauklin(မောက်လင်း) Laypan(လက်ပံ), Muzu, (မိုးဇို), Htehlaw(ထယ်လှော်) Kyuntat(ကျွန်းတပ်), Shwebo, Yuahaung(ရွာဟောင်း), Tintaw(သင်တော) le San(ဆန်း) khua in minung 8,000 hrawng cu a himnak hmun ah an zaam hna, tiah theih a si.
Uknak Lak Hnu In SAC Ralkap le KNU Kar Kahdohnak Ruangah Tualchungmi 130 Leng Nunnak A Liam, SAC ralkap nih uknak an lak hnu ah SAC ralkap le KNU kar kahdohnak ruangah tualchung minung 131 nunnak a liam i, minung 283 hliamhma an tuar, tiah KNU nih an thanh. SAC ralkap nih uknak an lak thla 19 chung ah SAC ralkap le KNU kar kahdohnak voi 6,359 a chuak. Cu kahdohnak chung ah cun KNU lei in minung 142 nunnak a liam i, 329 hliamhma an tuar, tiah KNU nih cun an langhter.
A liamcia thla 19 chung kahdohnak ah SAC ralkap 5,117 an thi i, minung 4,134 cu hliamhma an tuar, tiah KNU nih cun an langhter chih. SAC ralkap lei ralbawi hlun U Thein Htun nih cun KNU nih SAC ralkap lei an thihnak kong he pehtlai in cathanh an chuahmi cu a dik lo, tiah a chim. UNOCHA nih cathanh an chuahning ah SAC ralkap nih nawlngeihnak an lak hnu in SAC ralkap le KNU kar kahdohnak ruang ah tualchung mi 86,800 hrawng cu umnak hmun ngei lo in ralzaam dirhmun an phan, tiah September 5 ah cathanh an rak chuah.
Chaung-U ah Copper Phurmi SAC Motor Cu Myaung T.G.R Nih Bomb An Thlak Hna i, SAC Ralkap 8 An Thi, Sagaing ramthen, Chaung-U peng, Natyekan(နတ်ရေကန်) khua pawng ah copper a phurmi SAC ralkap motor pakhat cu a rawk i an remh lio ah, Myaung T.G.R drone tlaitu phu nih drone in bomb an thlak hna i SAC ralkap 8 an thi, tiah theih a si.
SAC ralkap 20 hrawng cu nizaan September 9 zinglei sml 10 hrawng ah copper an phur. Cu copper phurmi motor cu a rawh caah an remh i, cu lio ah cun drone in bomb kan thlakhnawh hna, ralkap 6 cu kan mithmuh ah an thi i, minung 7 cu hliam an tuar. A thimi 6 ruak le hliamtuarmi 7 hna cu, Myinmu sii-inn ah an kalpi hna i, sii-inn ah ralkap 2 cu an thi ṭhan, tiah T.G.R hruaitu Bo Teih ka(ဗိုလ်တိုက်ဂါး) nih a chim.
Myaung T.G.R drone tlaitu phu nih cun September 8 lio zong ah khan Chaung U le Guaipintaw(ဂွေးပင်တော) khua kar ah drone in SAC ralkap bomb an rak puah cang hna. Atu bomb an puahhnawh mi hna he cun a voi 4 nak a si cang, tiah Bo Teik Ka nih cun a chim chap. Myawaddy Ah Rallam Sialmi SAC Ralkap 2 Cu KNU Sinah CDM An Tuah: KNU Bataillon 6 nih an uknak Myawaddy peng, Tungthatguih(သုံထပ်ကွေ့) pawng ah rallam a sialmi Tat-Mah 44, Khah-Lah-Yah 8 in SAC ralkap 2 cu nizaan September 9 ah KNU sinah CDM an tuah, tiah theih a si.
SAC kuttang um, Tat-Mah 44, Khah-Lah-Yah 8, Tat-Khuai 1 in ralkap So Aung le Zaw Htun hna cu Myawaddy-Waylay lampi i rallam an sial lio ah kanmah sinah an rak zaam, tiah KNU in hruaitu pakhat nih a chim. SAC ralkap nih myawaddy-Waylay lampi cu uk khawh an i zuam peng caah ralkap thazaang tampi hmang in thlathum chung an kan doh cang, sinain atu tiang a la kho rih lo. SAC ralkap hna cu cuka hmun ah cun a thimi an tam ngai cang i KNLA sinah CDM tuah in aa fonhmi zong an tam pinah, nizaan September 9 zong ah khan Tat-Mah 44, Khah-Lah-Yah 102 in ralkap pakhat zong KNLA nih an tlaih, tiah theih a si.
Monywa Thonginn Zohkhenhtu Phu In Officer Pakhat Cu PDF Nih An Tlaih, Sagaing ramṭhen, Monywa thonginn in palik bawi(officer) pakhat kan tlaih, tiah Fight For People F.F.P nih cathanh an chuah.Nizan September 9 ah Monywa thonginn zohkhenhtu phu in bohnih pa Myo Ngunt Aung, pumpak No. A-3386 cu Tharse(သာစည်) khua thonginn thar sakmi in a chuak i, Tharse lam ah Monywa pengkomh Battalion 2, Company(4) Fight For People F.F.P nih kan tlaih, tiah an langhter. Fight For People F.F.P nih an tlaihmi Monywa thonginn zohkhenhtu phu in palik officer pa hi, zei tin dah dantatnak an tuah lai ti cu an cathanh ah an langhter lo.
Khuapau dohthlennak, April 3 lio ah Monywa thonginn chung in thongtla mi nih, hramhram uknak duhlonak an rak langhter caah palik nih an rak kham hna i a thimi zong an rak um, tiah theih a si. Bomb Fimhlawm Ding In A Kalmi SAC Ralkap Cu Bomb Puahhnawh An Ton Caah Ralkap 3 An Thi, 2 Hliamhma An Pu: Monywa-Chaung U lampi ah bomb hmanhmi fimhlawm ding in a kalmi SAC ralkap motor Jammer pakhat le ralkap 5 cu bomb kan puahhnawh hna, tiah Brave Heart Army – BHA in Bo Saney Maung Maung nih a chim.
“Monywa lei in a rami SAC ralkap pawl cu bomb lung 3 in kan puahhnawh caah 3 an thi i, 2 cu hliamhma faak ngai an pu. An motor zong a rawh dih caah thil cawinak seh(Crane) in an cawi i, motor nganmi cung ah an khin i an kalpi,” tiah Bo Saney Maung Maung nih cun a chim. September 4 lio zong ah Monywa in Sagaing lei ah a kalmi SAC ralkap motor Jammer pakhat le ke ralkap hna cu, Brave Heart Army – BHA nih bomb an rak puahhnawh hna caah ralkap 2 an thi i, 1 hliamhma a rak pu cang.
Russia Ralkap Lak Cangmi Hmunhma 30 Leng Kan Lak Ṭhan – Zalenskyy, Russia ralkap nih an rak lak cangmi Ukraine hmunhma 30 reng lo cu kan lak khawh ṭhan tiah, President Zelensky nih september 9 ah a chim. Ukraine ralkap pawl nih hmunhma tampi ah kahdohnak hlawhtling ngai in an tuah khawh, tiah president nih TV in bia a chimnak ah cun a chim.
Ukraine ralkap pawl cu khulrang ngai hmunhma tampi ah an rak lut i Russia ralkap nih an rak lak cangmi hmunhma hna cu an rak lak dih, tiah cu ka hmun ah Russia lei in tuanvo ngeitu pakhat nih september 9 ah a chim. Russia lei zong nih Ukraine Kharkiv khuapi nichuah thlang lei a ralkap pawl cu Ukraine ralkap pawl nih an tei ngai hna, tiah a fehter ve.
September 9 ah khan Russia hriamngan kahnak ruang ah ukraine nichuah chaklei Sumy hmunhma um siizung pakhat cu hriamngan nih a khen i mipi hliamtuarmi an tam, tiah Ukraine lei tuanvo ngeitu hna nih an chim. Russia nih cun mipi pawl hmuitinh in ka kahmi an si lo, tiah a chim ve.
India-Japan Kar Pehtlaihnak A Ṭhat Deuh Khawh Nakhnga Raltuk Cawntinak Tam Deuh Kan Ngei Lai, Tiah Ramhnih Nih An Thanh, India Defense Minister le Japan Defense Minister tonnak an ngeih hnu in ramhnih kar runvennak lei ah pehtlaihnak ṭha kan ngeih khawh nakhnga raltuk cawntinak tam deuh in kan ngei lai tiah, september ni 8 ah ramhnih nih an thanh.
India Defense Minister Rajnath Singh le Japan Defense Minister Yasukazu Hamada Tokyo tonnak an ngeih hnu ah tu bantuk in ramhnih kar pehtlaihnak ṭha ser ding in cathanh an vun chuah. India runvennak ramchung ah rian rak tuan cio ding in Japanese industries pawl cu kan sawm hna, tiah India Defense Minister nih a cathanh chung ah cun a langhter. India le Japan cu China tlerhkhonhnak kan ton cuahmah lio a si bantuk in ralkap thazang kan ṭhawnter zong a herh i runvennak budget zong kan kaiter deuh a herh, tiah an cathanh chung ah cun an langhter.
Sagaing Ramṭhen, Ayartaw Le Khin U Peng Kahdohnak Ah PDF Nih SAC Ralkap 7 An Thah Hna, Sagaing Ramṭhen, Sagaing ramṭhen, Ayartaw peng Naungkyi Ai(နောင်ကြီးအိုင်) lei kap ah rallam a sialmi SAC ralkap pawl cu Ayartaw Pah Kah Pha le NBARS-North Brothers phu nih bomb an puah hna caah SAC ralkap 1 a thi, midang 3 zong hliamhma faak ngai an pu. SAC ralkap hliamhma pumi hna cu ram lakah an thlopbul hna lio ah Monywa pengkomh Battalion 6 i bawm in hriamngan in an kah chap hna, tiah theih a si.
Khin U Ah PDF Nih Drone In An Kah Hna Caah SAC Ralkap 6 An Thi : Sagaing ramṭhen, Shwe Bo pengkomh Khin U peng ah SAC ralkap sakhan pakhat cu nizan September 9 zinglei ah drone in bomb an thlak i, SAC ralkap 6 an thi, tiah theih a si. September 9 zing sml 7:00 hrawng ah Muting(မူးတိမ်) tiva hlei pawng ah umhmun khuarmi SAC ralkap pawl cu, drone in PDF nih an kah hna caah ralkap 5 an thi i, 3 nak tlawm lo hliamhma an pu. A thimi ralkap 5 le hliamhma pumi hna cu i ralkap motor nih a laak hna, tiah theih a si.
Nizan September 9 chun sml 12:00 hrawng ah Myindaung(မြင်းဒေါင်း) lam in umhmun an khuarnak lei ah cycle in a ṭinmi SAC ralkap 5 cu, bomb kan puahhnawh ṭhan hna caah ralkap 1 a hmun ah a thi colh. September 9 zanlei tiang a ruak cu an la rih lo, tiah PDF lei nih an chim. Thanphyo Zayet Peng Ah Palik Nih Sentari An Cawnghnak Hmun Cu PDF Nih An Kah Caah Palik Pahnih An Thi: Mon ramkulh, Thanphyo Zayet(သံဖြူဇရပ်) Waykali khua pawng Ye-Thanphyo Zayet motor lam um sentari cawnghnak gate cu nizan September 9 zing sml 2:00 ah PDF nih an kah caah palik 2 an thi, tiah tualchung mi hna nih a chim.
Khualtlawng mi le mi lutchuak hna cu sentari cawnghnak gate in palik nih an dirter hna i, checkhlatnak an tuah hna. An duh paoh in tangka an hal lengmang hna caah PDF nih an kah hna, tiah theih a si. Mizei phu nih dah an kah hna ti belte hngalh a si rih lo, tiah theih a si. Nizan September 9 zing sml 11:00 hrawng ah Ye khua, Yankhi Aung sang ummi pengkomh biaceih zung cu Ye Bilu(ရေးဘီးလူး) phu nih 40mm in an kah.
Peng biaceih zung kah a ton hnu in SAC ralkap nih Ye khua chung cu humhimnak ṭha tein an laak dih. Cycle in aa chawkmi mino 2 zong an tlaih hna, tiah tualchung mi pakhat nih a chim. A luancia August 3 ah Ye khua um Lah Wa Kah(လဝက) zung cu PDF nih an rak kah caah zung rianṭuan telh in 3 an rak thih caah SAC ralkap nih khua chung cu humhimnak ṭha tein an tuah i, lam cheukhat zong an rak kham.
Pakokku Pengkomh Myaing Peng Ah PDF Sakhan Pakhat Cu SAC Ralkap Nih An Laak, Magway ramṭhen, Pakokku pengkomh Myaing peng ah umhmun a khuarmi PDF sakhan pakhat cu SAC ralkap nih an luhhnawh caah hriamnam le zen-kuan an laak, tiah theih a si. Nizan September 9 zing sml 5:30 hrawng ah Myaing peng ah umhmun khuarmi King Fighter PDF sakhan cu, SAC ralkap nih hriamngan he hriamhme he an kah i an laak khawh, tiah Pakokku City & University News nih a langhter.
SAC ralkap 70 hrawng nih kan sakhan an rak fuh i, G3, MA 30, 40mm, 60mm le hriamhme in an kan kah, tiah King Fighter phu in ṭuanvo ngeitu nih a chim. SAC ralkap nih meithal kuan 90 hrawng, kutser meithal zun 10, kedan thar tuah 40, angki le bag(ruksai) tam ngai cu an khangh dih. A dihlak ah kyats sing 80 hrawng man a si, tiah a chim chap. “Ruahlopi in an kan kah caah meithal, phone le a dangdang thilri hriamnam zeihmanh kan laa manh lo. Minung tu cu kan him dih. Ralkap nih khuami meheh pakhat an thah pinah suiṭhi le a dangdang thil mansung zong an fir,” tiah King Fighter phu in ṭuanvo ngeitu nih cun a chim. Crd-The Chin Post
Leave a Reply