Tank 2 le Mawtaw 80 Hrawng He SAC Ralkap Mindat Lei Ah An Kal
SAC ralkap Tank 2 tel in mawṭaw run 80 hrawng cu nihin March 23 zingka ah Magwe ramṭhen, Kyaukthu in Chin ramkulh, Mindat lei ah an kal, tiah a tualchung mi hna sin in theih a si. Cu SAC ralkap mawṭaw run cu eidin a phortu mawṭaw a si lai, tiah ruah si i, Mindat le Matupi um SAC ralkap Battalion hna sin in eidin va chan ding le minung va thleng ding an si men lai, tiah tualching mi nih an langhter.
Mindat -Matupi mawṭaw lam ah March 19 ni thok in tlunkal lo ding, tiah thanh a si caah a tlungkal mi nih pakhat khat thil nan ton mi hna a um sual ahcun ṭuanvo kan la lai lo, tiah CDF – Mindat nih a rak thanh.
SAC ralkap mawṭaw run cu Mindat – Matupi lampi ah kum August 2021-November 2021 chung ah lampi zul in an kal i, CDF Mindat, CDF Matupi hna nih an kah hna caah SAC ralkap 100 leng an rak thi.
Kanpetlet Peng, Khihdaw Khua SAC Ralkap Nih An Khangh!
Chin ramkulh, Kanpetlet ah rallam sial in a ra mi SAC Tatmah-55 kuttang ralkap hna cu March 18 ah khan Khihdaw khua ah an lut i Inn, Facang, Sii-ai, Computer, Saikel, Solar le Generator(Mei vannak Seh) pawl an khangh hna, tiah tualchung mi hna nih an chim.
Kanpetlet peng ah hin kan hnu February 7 thok in CDF-Kanpetlet le SAC ralkap karlak kahdohnak atu tiang a chuak i, CDF- Kanpetlet zong nih an Headquarter cu caan karlak an chuahtak chung.
“Kan khua (Khihdaw) hi Kanpetlet khuapi in meng 18 hrawng lawng ai hlat i, Kyauhtaung khua a cunglei ah a um mi si i SAC ralkap pawl cu khuachung ah an lut i Facang bag poh an pumh i an khangh, Inn ah an bunhmi Solar le Betterry, Generator, Saikel, Chainshow pawl zong an khangh dih,” tiah khua mi pakhat nih a chim.
Nihin zong ah Kanpalet pengchung ah SAC ralkap le CDF- Kanpetlet, CDF- Mindat, Yaw Peng Runvengtu (The Youth Force) karlak kahdohnak a chuak cuahmah, tiah theih a si.
SAC Nih Uknak An Laak Hnu Ni 415 Chung Ah Thah A Thong Mi 1697 An Si Cang: AAPP nih March 22 tiang thawng a thanh ning ah Myanmar ram pumpi SAC nih uknak a laak hnu, ni 415 chung ah SAC ralkap kut in civil mi 1697 thah an tong cang. Tlaih a tong mi 12,875 an si cang i, Tlaih ding in nawl chuah mi 1973 an si.
SAC ralkap kut in a thi mi hna hi Yangon ah a tambik an si. A luancia ni tlawmpal ah khan minung 200 leng an thlah ṭhan cang hna.
Cu kahdohnak ruang ah Mindat khuachung hmunkhuar mi SAC Khah-Lah-Yah -274 le Kyauhthuh SAC ralkap camp in ralkap bawmhtu an thlah caah a pawngkam khua mi hna cu a himnak hmun ah an zaam hna.
Ukraine Ram Donbas Ah Hngakchia Minung 2000 Leng Russia Ralkap Hna Nih An I Kal Pi Hna
Donbas ah hngakchia pawl cu Russia ralkap hna nih an tlaih hna tiah Ukraine nih March hla ni 22 ah a chim. Ukraine Ramkhel vuanci zung i langhter ning ah cun Donbas ah hngakchia minung 2389 cu phungning loin Russia ralkap hna nih Russia ram ah an kuat hna tiah theih a si.
2014 Russia le Ukraine kahdohnak a chuah hnu ah Ukraine ram ah a um mi Donbas cu Russia nih a herh mi Ukraine in chuah a duh mi an si. Cun Donetsk and Luhanz hna zong luannak a hmu mi an si nak kong cu Putin nih a chim hnu ah mah hna khua hna cu a tu ah bitak tein buaipi mi an si.
Mah ka hmun cu Russia uknak tangah an um mi Putin nih sakhan sernak nawl zong a pek hna tiah theih a si. Russia nih Ukraine kahdohnak chungah Russia ahmutinh cu hngakchia pawl hi an ti tiah theih a si. A luancia mi chung ah khan hngakchia pawl an i dor nak hmun Theater zung cu Russia nih hriamnam ngan in a kah tiah Ukraine nih a rak chim. Nain Russia nih Ukraine hi ka doh mi si loin Special Operations ka tuah mi a si tiah a chim i,
Russia nih Khuami le rammi pawl hmuitinh in ka do hna lo tiah a chim. A sinain Kyiv khuapi ah a um mi thilcawknak centre pakhat ah hriamnam an thuh caah Dungci in ka kah tiah a rak ti. Mariupol khuapi cu nan thlah a si ah cun mah khuapi ah a um mi khuami pawl cu an himnak hmun ah thialnak nawl kan pek hna lai tiah a ti ko nain Ukraine nih a duh lo tiah theih a si.
Leave a Reply