Breaking News; Kalay Myo thawngpang vun theih cu e!!

SAC Ralkap Nih Hriamngan An Kah Ruangah Tahan Sangum Minung 6 Hliamhma An Pu!!
==============================
Sagaing ramṭhen, Kalaymyo Tahan sang ah November 26 zinglei le zanlei ah SAC ralkap nih hriamngan an kah mi hriamngan kuan cu inn cungah a tlak caah sangmi minung 6 hliamhma an pu, tiah tualchung mi hna nih an chim.

“A voikhatnak hriamngan kuan hi inn cungah a tla i tarnu pakhat le ngakchia pakhat an ke ah a khen hna pinah uico pakhat zong a khen caah a thi. Cu zan ah cun hliamhma pumi hna cu sang mino nih sii-inn ah an kalpi hna,” tiah Tahan sang ummi pakhat nih a chim.

Sang chungah a voikhatnak an kahmi hriamngan kuan a tla hnu caan tlawmpal ah Yahthahsone(ရသာစုံ) dawr le private sianginn karah a tlak ṭhan caah tualchung minung pathum hliamhma an pu chap, tiah theih a si.

Hliamhma pumi hna cu an inn he ai naihnak sii-inn ah an kalpi hna. Atu kar hrawng hi Kalaymyo nitlaklei le chaklei ah kahdohnak a zual ngaingai caah tualchung mi hna zong ai chawkhlat mi an tlawm ngangai, tiah theih a si.

Sagaing ramṭhen, Khin U peng, Monhla khua pawng ah a chuak mi kahdohnak chung ah SAC ralkap 40 deng an thi i SAC nih Helicopter in a kah hna caah PDF 6 nih ram le miphun caah an nunnak an pek tiah thawng theih a si. November 23 ah Pinsein khua a rak lut mi SAC ralkap pawl cu PDF phufonh nih bom an puah hnawh hna i SAC ralkap 40 hrawng an thi,

cu hnu ah Helicopter nih a rak kah hna i PDF 6 an nunnak a liam, caw a cawng lio mi kum 7 hngakchia hriamngan nih a khen i a thi, November 23 ah mipi 4 an nunnak a liam tiah PDF sin in thawng theih a si. “Monhla khua ah vanlei in kahdohnak kan ton ruang ah PDF 6 an nunnak a liam. Caw a cawng lio mi kum 7 hngakchia hriamngan nih a khen i a thi. Nizaan ah mipi 4 an thi” tiah Khin U PDF nih Khit Thit ah a chim.

Helicopter nih kah ruang ah a nunnak a liam mi PDF hna cu, 1) Toe Toe, 2) Wine Chit, 3) A Naing, 4) Aung Aung U, 5) Chit Toe, 6)HW hna an si i PDF tampi an i hliam tiah theih a si. Bawmh ding in a raa mi SAC ralkap pawl nih Khin U peng thlanglei an rak khangh thluahmah hnu ah PDF 1 zong a hnawng an cik i taang 5 hngakchia pakhat zong an kah i a thi tiah theih a si.

Karen ram, Myawaddy pengkomh, Myawaddy peng ah a um mi Thaebawbu sakhaan la kho than ding in SAC nih thazang tampi in a dohnak hi thla 5 a rau cang.

Kum 30 leng SAC nih an tlaih mi Thaebawbu sakhaan cu KNLA le PDF phufonh nih a luancia May thla chung ah a rak lak khawh. Cu Thaebawbu sakhaan lak khawh than ding in SAC Brigade 44 battalion a zapi le adang battalion 2 hrawng in kahdohnak a tuah tiah theih a si.

Myanmar ram pumpi ah a luancia kum February 1 thok in atu kum November 15 tiang hramhram in uknak lak caan thla 21 chung ah kahdohnak voi 7,855 nak tlawm lo a chuak tiah ISP Myanmar nih November 23 ah a thanh. Karen ram ah kahdohnak voi 4,394, Sagaing ramṭhen ah voi 919,

Kayah ram ah voi 339, Shan ram ah voi 281, Magway ramṭhen ah voi 341, Kachin ram ah voi 213, Mon ram ah voi 244, Bago ramṭhen ah voi 259, Chin ramkulh ah voi 588, Taninthary ramṭhen ah voi 107, Mandalay ramṭhen ah voi 73, Rakhine ram ah voi 48, Yangon ramṭhen ah voi 30, Irrawaddy ramṭhen ah voi 8 le Naypyitaw ah voi 1 a chuak a tiah cathanh ah a langhter.

Kahdoh a tam bik nak hmun a si mi Karen ram ahcun SAC ralkap nih vanlei le vawlei lei he kahdohnak a tuah tiah theih a si.
Hramhram in uknak lak caan thla 21 leng caan chung ah Myanmar ram pumpi peng 191 ah kahdohnak a chuak i cu chung ah kahdohnak 3,997 cu KNU Brigade 5 hmunhma ah a cang tiah ISP Myanmar nih a thanh.

Be the first to comment

Leave a Reply

Your email address will not be published.


*