Breaking News, Hrimnam Khat Lo Ruangah Maw Vakok Sakhan Cu Nan Chuah Tak Ruangmang Ko Lai E!!!

Chinram chak lei Kanpalet khuapi pengkulh ah a um mi June thla ni 9 le ni 10 ah CDF-kanpalet tayin (2) Vakok sakhan SAC ralhrang hna nih ralkap thazaang tampi in an luhhnawh ii hriamnam khat lo ruangah mah Vakok sakhan cu kan chuah tak cang tiah CDF-Kanpalet nih cathanh an chuah. Mah cathanh ah June thla ni 9 ah a cang mi,

kahdohnak SAC ralhrang phu nih June thla ni 10 ah CDF-Kanpalet tatyin (2) Vakok sakhan ah ralkap thazaang tampiin zing lei suimilam 7:00-9:00 ah voikhat, Zaan lei suimilam 1:00-4:00 tiang voihnih tiang CDF-Kanpalet phu fonh le SAC ralhrang karah kahdohnak a chuak ii SAC ralhrang lei in minung 15 an nunnak a liam ii minung 30 hrawng nih hliam an tuar ii, CDF-Kanpalet lei in minung 2 nih hliam an tuar nak kong zong cathanh ah an lamghter chih.

Cu pinah cathanh an chuah ningah SAC ralhrang hna nih 120 mama le tatma (khah-Mah-Yah) 274 in 120 mama in CDF-Kanpalet tatyin (2) sakhan cu voi tampi an kah ii, CDF-Kanpalet le phu fonh hna nih hraimnam khat lo ruangah CDF-kanpalet tatyin (2) sakhan cu kan chuah tak cang tiah cathanh ah an langhter chih.

Hello NUG, D-Day na thanh bak khan kan nih Chin mi zong kan lung a tho, a bikin Thantlang mipi le a velchum khua pawl zong nih kawl ralkap cu kan doh kan ti ciammam le nihhin dirhmun hi kan phan. Kawl ram zalonak lak ri thok in nihin tiang Chin mi hi kan itel zungzal. Kan pipu hna nih kawlram caah nunnak tampi an pek. Sihmanhsehlaw tuanbia nih a kan hmuhsakmi cu Chin mi kan caah kan ihlawk pimi zeihmanh hmuh awk a um lo tluk asi. Afawinak in chim ahcun Chin mi hi forh khawh lengmangmi miphun ah nan kan hman rua.

Tutan dohthlennak zong ah D-Day na thanh le Kawl ram chung vialte Myo ( Mioh ) hi zeizat lengluang dek a va um hnga. Cu hna vialte lakah Myo ( Town ) ning pi in ralkut tuar in chuah takmi cu Thantlang khua lawng hi nihintiang ahcun theih asi. Thantlang khua inn le lo a kangmi vialte hi nangmah NUG nih maw tuanvo na lak lai Kawl ralkap nih dah? Biahah duhmi pakhat cu forh ziakmi phun kan si maw? Forh nuam miphun kan si maw? Kawl ram tuanbia zoh tikah Chin mi hi ralsa a nam pengtu ding ah maw na kan ruah? By Chan Khar

Myaung peng le Yesagyo peng kar ah rallam sialtu SAC ralkap hna cu tualchung hriamtlai phu hna nih June 9, zinglei ah a thli in an kah hna i, bomb zong an puahhnawh hna caah SAC ralkap 15 an thi, tiah Myaung peng CDSOM phu sin in theih a si.

SAC ralkap hna cu Yesagyo peng in Myaung peng an kal ah tualchung hriamtlai phu nih zinglei suimilam 6:00 hrawng ah a thli in an kah hna i, cu kahdohnak ah cun SAC ralkap 10 leng an thi tiah theih a si. Lampi i kah an ton caah SAC ralkap hna cu vaivuan in an tlizaam hna i, cuti an tlikzaam lio ah cun bomb puahhnawh an tong chap i SAC ralkap 5 hrawng an thi ṭhan tiah theih a si.

SAC ralkap lei nih hriamngan 60mm le 40mm cu pehtlai in an puah caah tualchung hriamtlai phu lei pakhat nih hliamhma a tuar, tiah theih a si. Cu kahdohnak ah cun PDF Taloke, MGN Ranger, MGN Tiger, MGN 35, MGN 21,Shwe Oh (CDSOM) le Bu Gya Tit hna i fonh in, kahdohnak an tuah tiah theih a si. SAC ralkap hna nih cun Zayat Ni khuachung ah inn 2 an khangh i, Myaung peng Minhlah khuami pa 3 cu an tlaih hna, tiah theih a si.

Chin ramkulh chung June 7 tiang ah mah pumpak lungtlinnak in SAC kuttang ah rian a lut ṭhan mi cu siangcachimtu 223 an si cang, tiah Chin ramkulh fimcawnak zung in ṭuanvo ngeitu pakhat nih a chim. “Tuan ah cun June 7 tiang ti a si nain rian luh ṭhan a duhmi hna caah June 14 tiang an sauhpiak hna. June 7 tiangah rian kir ṭhan mi minung 223 an si i, a hnu ah zeizat dik an i chap ṭhan te lai theih a si rih lo,” tiah ramkulh fimcawnak zung in ṭuanvo ngeitu pakhat nih a chim.

Hakha khuachung Covid zawtnak checkmi lakah zawtnak ngeimi hmuh an si lo nain, sianginn hon a si cang caah June 7 ah khan, Hakha siangsangrun no. 1 ah kum 5 in kum 12 kar siangngakchia hna cu Covid 19 raikhamsii chunh an si tiah MRTV nih a thanh.

RELCHAP- Thantlang Baptist Church(TBC) Biakinn A Kaang!: Chin ramkulh, Thantlang Baptist Church(TBC) Biakinn cu nihin June 9 zanlei sml 4:30 hrawng ah a kaang, tiah theih a si. Thantlang upa pakhat nih cun, “Tuzanlei sml 4:30 hrawng ah Biakinn pi cu a kaang, Vuichip tlang lei zong in hmuh khawh a si. Inn dang a kaangmi um le um lo tu cu kan hngal kho rih lo,” tiah The Chin Post ah a chim.

“TBC cu Thantlang biakinn vialte lakah a hlun bikmi biakinn a si i, 1965 hrawng Thantlang khua rak i ṭhial lio ah Rev. Hei Mang nih a rak kan hruai i, TBC hmun hi a ṭha bik, a rem bik a rak ti caah hi hmun hi kan rak thim,” tiah a chimchap.

TBC chungtel pakhat nih, “Tuan piin a kaang te lai tiah kan ruahcia mi a si ko. Asinain kan biakinn pi a vun kangh taktak tikah cun kan ngaih a chia tuk hringhran. Biakinn hlun bik le pupa ro bantuk in kan ruahmi a si caah kan ngaih a chia khun,” tiah The Chin Post ah a chim. TBC cu milu 3000 leng le chungkhar 600 hrawng an i pumhnak biakinn a si. Thantlang khuachung ah TBC Quarter 6 telh in Biakinn 10 a kaang cang.

Thailand ah cun Marijuana(Kawl holh in ဆေးခြောက်) cu cozah nih ritsii phihkhamnak an tuahmi cazin chungin a hlonh cang caah ramchung mipi hna nih anmahle innhmun cio ah cinthlak khawh a si cang. Ritsii renghnak zulhphung tuahtu Nichuahlei Asia ram hna lak ah Thailand ram cu Marijuana zalong tein cinthlak khawhnak nawl petu ram hmasabik a si. Asinain ritnak le nuamhnak tibantuk ah hman lo ding in phihkhamnak phung cu an ngei ṭhiamṭhiam.

Marijuana he pehtlaiin zalong tein cinthlaknak nawl an pek hnuin ramchung ah a zuartu le cawtu an hung karh ngai caah cinthlaknak lei le khualtlawnnak lei ah biatak tein a ṭhangcho lai tiah Thailand cozah nih ruahchannak an ngei. Marijuana hmang in phaisa hmuhkhawhnak cu mipi le ram caah caan ṭha tuk a si tiah Thai Deputy Prime Minister le Ngandamnak lei minister Anutin Chaviraku nih an chim.

Ramchung mipi hna nih June 9 thawk in cun nawlngeitu hna sinah report pek in mahle inn cio ah Marijuana kung 6 tiang cinthlak khawh a si cang i, company zong nih cozah sinah report pek in dum kaupi ah cin khawh a si cang lai. Rawldawr hna zong ah Marijuana telhmi tirawl hna cu eidin khawh a si cang lai.

Ukraine Ram Buainak Ruangah Vawlei Cung Hnunkip Ah Eidin Tirawl Harsatnak A Zual Kho- WTO: Ukraine ram buai ruangah vawlei cung hmunkip ah eidin tirawl harsatnak cu caan saupi tiang a nguh kho, tiah World Trade Organisation in ṭuanvo ngeitu lutlaibik nih June 8 ah a chim. A bikin Wheat le Fertilizer herhbau ruangah Africa lei ah hin a zual chin lai, tiah Ngozi Okonjo-Iweala
Director general of the World Trade Organization nih a chim.

Ukraine kahdohnak ruangah cinthlakmi tirawl hna cu zuar khawh loin chiah sawhsawh an si i, Ukraine tilawng lam in khuazei ram hmanh ah kuat khawh a si ti lo. Hi bantuk caan lio ah hin cinthlaklei tirawl man hi biatak tein a kai tiah a chim. Ukraine hi wheat tambik a chuahnak ram a si i, vawlei cung(global) market ah 9% a phan. Nihoici cu 42% a chuak, Kawm (meize) zong 16% a chuak.

Cinthlakmi eidin tirawl man a kai lio ah rili lam hna cu Russia nih a phihkham dih caah wheat ton 20-25 millions tluk cu Ukraine ram ah a taap. Nikum he tahchunh ahcun Wheat man cu 59% in a kai i, nihoici ti man cu 30% in a kai, kawm man zong 23% in a kai dih, tiah WTO Director general nih cun a chim.

Post Views: 12

Breaking News, Hrimnam Khat Lo Ruangah Maw Vakok Sakhan Cu Nan Chuah Tak Ruangmang Ko Lai E!!!

Be the first to comment

Leave a Reply Cancel reply