Sagaing Ramțhen Ah SAC Ralkap Thah Mi Tualchung Mi Ruak 12 Char A Si
=======================
Sagaing ramțhen, Kanhbaloe le Khin Oo khua karlak khuate 2 ah SAC ralkap nih rallam an sial pah in inn an duah pin ah tualchung mi an thahnawn hna. Nihin, July 20 zing ah PDF nih hmunhma zohfelnak an tuah Tawaddy khuami 3 le GyiSuh khuami 9 (Azapi ruak 12) an char.
” Tawaddy khuami hna cu ralzaam pawl an va auh hna lio ah an rak tlaih hna i faktuk in an hrem hna hnu ah an ruak cu an phum i a thaizing ah ruah fak nawn in a sur caah an ruak alang i an hmuh hna, Gyisuh khua hi an khangh pin ah ruak hmuh khawh rih lomi zong an um tiah PDF ralkap pakhat nih a chim.
GyiSuh khuami tamdeuh cu vanlawng in khua an kah lio ah ertonh in tlaihmi an si hna, thih le nun hngalhlo a tlaumi an tam caah an kawl cuahmah hna. ” Tu zong ah khua kam hna ah rallam 3 in kan i țhen i hmunhma thianhnak zong țha tein kan tuah kho rih lo ” tiah PDF pakhat nih a chim chap.
KyaukHtu In Mindat Lei Ah SAC Ralkap Motor An Kai, Cacawnnak Thilri An Phorh, SAC ralkap motor hna cu nihin July 20 zinglei ah KyaukkHtu in Mindat lei ah an kai, tiah tualchung mi hna nih an chim. Kyauk tlang lamṭhen ah a ummi SAC ralkap nih meithal duh paoh in an kah pinah hriamngan zong an kah thluahmah, tiah tiah theiih a si.
Motor chungah KyaukHtu No.1 sianginn chungin caṭialnak cabuai le Whiteboard hna an hmuh. Cu ca cawnnak thilri hna cu SAC ralkap an fale cachimhnak ca ah an hman lai, tiah an zumh. SAC ralkap motor 105 cu Magway ramṭhen, Pakokko khua in Chin ramkulh Mindat-Matupi lei ah July 17 zing sml 9:00 hrawng in an chuak, tiah theih a si.
Matupi Ah Ralbawi Thah A Ton Hnu In Tlaih A Tongmi Khuami Hna Cu Thlah An Si Rih Lo! Matupi Ah Ralbawi Thah A Ton Hnu In Tlaih A Tongmi Khuami Hna Cu Thlah An Si Rih Lo!: Chin ramkulh Matupi khah-lah-yiah 140 in ralbawi pakhat cu khualeng i thah a ton hnu ah Matupi khuami 6 cu SAC ralkap nih an tlaih hna. Tlaih a tongmi 6 chung in pahnih cu an thlah ṭhan cang hna nain minung 4 cu an thlah rih hna lo, tiah tualchung mi nih an chim.
Khah-lah-yiah 140 in ralbawi Tan Naing Win cu a luancia July 15, zinglei suimilam 11:00 hrawng ahkhan CDF-Matupi nih khualeng ah an rak kahthah. July 16 ah ralbawi an thahnak hmunhma pawnghrawng ah ummi Matupi khuami 6 cu SAC ralkap nih an rak tlaih hna. Tlaih a tongmi 6 chung in, pahnih cu kum 70 hrawng an si i, kum khua upa mi nu pakhat le pa pakhat cu an thlah ṭhan hna nain, a dang 4 pa pahnih le nu pahnih tu cu an thlah rih hna lo, tiah khuami pakhat nih RFA ah a chim.
Cu ralbawi nih cun CDM cawlcanghnak a tuahtu hna le, Matupi pengchung hriamtlai phu hna cawlcanghnak cu hlathlainak tuah in thawng langhternak a tuah caah khualeng ah lem in kahthah a ton hi a si, tiah CDF-Matupi chungtel nih an chim.
Muslim Biaknak A zultu Hna Khua Kyisu Ah Inn 400 Fai SAC Ralkap Nih An Khangh! PDF 17 An Thi!: Sagaing ramṭhen Kanbalu peng Kyisu(ကျီစု) khua cu July 18 zing ah SAC nih vanlawng 2 in an kah hna caah PDF lei in ralkap 8 an thi, tiah tualchung mi sin in theih a si. SAC ralkap hna cu hmun 3 ah rallam sial in Thawathi(သာဝတ္တိ) khuami 3 le Shiataw(ရှားတော) khuami 3 zong an thah hna, tiah theih a si.
SAC ralkap hna nih cun Kyisu khua cu an luhhnawh i tualchung mi 150 tluk an tlaih hna. Cupinah Muslim biaknak a zultu innlo 300 tluk an khangh i, phungki sianginn ah umhmun an khuar. July 19 ah an tlaih mi hna cu an thlah ṭhan hna hnu ah inn 100 fai an khangh ṭhan i, Kyisu khua cu an chuahtak, tiah tualchung mi nih an chim.
SAC ralkap an chuah dih hnu ah zohfelnak an tuah i PDF 4 ruak an khangh chih mi le kuan hliamhnak in a thi mi, tualchungmi 3 ruak hmuh a si. Cupinah thawngpang theih khawh lo in a tlau mi minung 10 an um rih, tiah theih a si. Kyisu khua hi Buddhist le Muslim biaknak a zultu hna an umṭinak khua a si i, inn 1000 leng umnak khua a si. Kyisu khua cu i thuhnawhnak fing le tlang a um lo caah a um chun mi hor hme tete ah khuami hna cu an i thup, tiah theih a si.
Kyisu khua ah cun kahdohnak a chuak lo nain PDF an um ṭheo lai timi lunghrinhnak he SAC ralkap nih an luhhnawh hna nak hi a si, tiah tualchung mi nih an chim. Hi kong he pehtlai in SAC nih thawng an thanh mi a um rih lo.
SAC Ralkap Nih Ṭaal Khua Cu Voithum Tiang An Duah Caah Inn 7 Lawng A Taang Cang! Chin ramkulh, Falam peng um mi Ṭaal khua cu SAC ralkap nih voi 3 tiang an duah caah inn 7 lawng a taang cang, tiah theih a si. Cu a tangmi inn 7 ah cun khuami hna inn 4, Biakinn 1, Sianginn 1 le Cazi inn 1 an si.
Falam in Hakha lei kalnak lamkam ah a ummi Ṭaal khua cu SAC ralkap nih October 18, 2021 ah inn 3, October thla ṭhiam ni 25 ahkhan inn 9, July 9, 2022 ah inn 29 an khanghpiak hna. Ṭaal khuachung innlo vutcaam ah a cang mi hna cu Ṭaal khuami hna le a ka pawnghrawng um khua minung 300 hrawng nih nihin July 20 ah thianhhlimhnak an tuah, tiah theih a si.
Chinland Joint Defense Committee(CJDC) Special Force Batch-1 Training Dihnak Puai Tuah A Si! Chindland Joint Defense Committee (CJDC) Special Force Batch-1 training dihnak puai cu July 19 tuah a si, tiah kan theih. Cu training cu thlakhat chung tuah a si i, minung 123 an kai. Training kai caan cu ni 15 a si i, practical tuah caan cu ni 15 a si.
July thla zarhkhatnak ahkhan Falam-Hakha kar kahdohnak ah CDF-Matupi in CJDC Special Force training a kai lio mi pakhat a nunnak liam. CJDC chungtel hi phu 18 an um i Batch-2 training zong an tuah rih lai, tiah theih a si. CJDC secretary Salai Timmy nih, “CJDC Special Force training a dih mi hna cu tat-khuai(တပ်ခွဲ)-2 ah ṭhen in a herhnak hmun ah mibawmtu ding in kan hman hna lai. Atu training a dih kho lo mi pawl zong a Batch-2 ah an dih kho lai,” tiah a chim.
Pyay Ah Siangngakchia 4 Tlaih An Tong! + KNU Hmunram Kahdohnak Kong, Pyay Ah Siangngakchia 4 Tlaih An Tong!: Pago ramṭhen Pyay(ပြည်) ah kumtlinglo siangngakchia pa 4 cu July 19 ah SAC ralkap nih an tlaih hna, tiah Pyay khuami nih an chim. Pyay khuapi Sinsuh(ဆင်စု) sang ah siangngakchia pakhat le Pyont Hla Theinkone(ပွင့်လှသိမ်ကုန်း) sang siangngakchia 3 cu ni 19 zaanlei sang ah, SAC ralkap thazaang tampi an ra i an tlaih hna, tiah khuami pakhat nih RFA ah a chim.
Taang 7 tiang Sianginn a kai i aa din mi an si i kum 15,16 hrawng an si. An 4 in “Kaung For You” private sianginn i a kai mi an si caah SAC ralkap nih an tlaih hna. Cupinah Pyay khuachung i General Aung San statue pawng rawl dawr pakhat ah siangngakchia pakhat zong zaan ah an tlaih, tiah tualchung mi sin in theih a si.
Hi kong he pehtlai in SAC lei nih thawng an thanh mi a um rih lo. July 13 in 18 tiang (ni ruk chung) ah “Kuang For You” sianginn a dirhtu saya U Kaung Theih Soe(ဦးကောင်းသိုက်စိုး) le cachimtu minung 15 cu SAC ralkap nih an tlaih hna, tiah All Myanmar Federation of Teachers in chungtel pakhat nih RFA ah a chim.
KNU Hmunram Taungoo Pengkomh Ah Kahdohnak Ruangah Tualchung Mi 2,600 Leng An Zaam!: KNU brigade 2 hmunram Taungoo pengkomh Than Taunggyi(သံတောင်ကြီး) peng, Tapu(တာပူ) region chung i a ummi khuate 9 in tualchung mi 2,600 leng cu Tapu Kasho(တပူကရူ), Thide Kasho(ထီးဒေးကရူ), le Shanlaypin Kasho(ရှမ်းလယ်ပြင်ကရူ) ah an zaam hna, tiah KNU nih an thanh.
Tapu hmunram Min Lan Taung(မင်းလမ်းတောင်) khua, Si An Taung(ဆင်အံတောင်), Mi Ei Gyi(မိအိကြီး), Mi Ei Gyi Thitkone Suhsi(မိအိကြီးသစ်ကုန်းစုစည်း) khua, Kywekyaw(ကျွဲကျ) khua chak le khua thlang, Bawdikone(ဘောဓိကုန်း), Laytha(လယ်သာ), le Gwaytha(ဂွေးသဲ) lamṭhen hna ah SAC ralkap le KNLA cu July 15 in 18 tiang an i kap. SAC ralkap kah-lah-yiah 85(ခလရ ၈၅) le kah-mah-yiah 307(ခမရ ၃၀၇) nih khuate pawl cu hriamngan in an kah pinah inn zong an khangh hna, tiah KNU nih an langhter.
SAC ralkap nih khua an khangh ruang ah a zaam mi mizapi hna cu fur caan a si caah ṭhutdirnak kong ah siseh, eidin kong ah harsa ngai in an um, tiah KNU nih thawng an thanh.
Leave a Reply