Breaking News; Hakha thawngpang vun theih cu dah!!

Hakha Khua Chungah Meihol Tun Khat Ah 18,000 A Phan, Cawk Ding A Um Ti Lo!!
===========================
Chin ramkulh, Hakha khua chungah mei a rawhnak ni 8 a si cang i mi tam deuh cu meihol in rawl an chuang hna, tiah theih a si.
Hakha ummi pakhat nih, “October 21 zing sml 6:30 in mei a mit i ni 3 chung a mih hnu October 23 zan ah zankhat te a ra. Cu hnu ah ruah a sur tuk i meitung a kiak dih an ti i nihin October 28 tiang ah mei a ra rih lo,” tiah The Chin Post ah a chim.

Hakha khua chungah mei a mihnak hi ni 8 a si cang i meihol deuh lawngte hman a si. Khuasak ṭha deuhmi cu gas in rawl an chuang. Zapi zaran cu meihol in rawl kan chuan pinah khuasik thla a si bantukin meihol in mei kan to. Nikhat hnih lawng rawl chuannak kan ngei cang, meihol a dih ahcun lung rethei kan si ko, tiah a chim chap.

Hakha mei a mit hlan ah khan cun meihol tun khat ah 12,000 in 15,000 kar lawng a si. Cu hmanh cu cawk ding a um ti lo. Atu hi tun khat ah 18,000 a phan cang nain Hakha khua chungah meihol cawk ding a um ti lo, tiah meihol cawtu pakhat nih The Chin Post ah a chim.

Voidang ah cun Hakha ah meihol tun khat ah 9,000-10,000 lawng a rak si nain mei a mih le cangka hi bantukin meihol man an kaimi hi cu thil poi ngai a si ko. Khua caan har lio a si caah khat le khat kan ngeihmi kan i bawmh khawh lo hmanh ah thil kan zuarmi a tangmi hi cu a man kan kai ding a si lo, tiah tualchung mi pakhat nih a chim. Meitung a rawh caah mei rianṭuantu hna nih zeitik dah a rat ṭhan lai ti an chim kho lo, tiah theih a si.

Hakha Peng Ah Ngafuan Ruh An Khap, A Rutmi Tangka Kyats Sing Tam Ngai Dan An Tat Hna, Chin ramkulh, Senthang peng ah October thla chung ngafuan ruh an khap, a rutmi cu tangka tam ngai dan an tat hna, tiah theih a si. Senthang peng khuate upa pakhat nih, “October thla cu nga an tit lio a si pinah an keuh i a runrun in nga an fuan thla a si.

Cucaah kum fatin ngafuan ruh kan khap tawn. Chimh a ngai lomi hna nih a thli tein ngafuan a rutmi zong cu an um ve. Asinain a ruttu kan hngalh hna ah cun dan kan tat hna,” tiah The Chin Post ah a chim.

Nga an fuan thla ah cun ṭuanvo kan i phaw i ngafuan a rutmi an um le um lo tiva in kan bawh hna, kan ngiat hna. A bik in October thla chung hi kan khap, facang hleh a zaat November zarhhnihnak hrawng ah hin ngatlaih kan onh ṭhan te lai, tiah senthang peng khuami pakhat nih a chim.

Nga an fuan thla ah khuami lawng si loin khualdang mi zong nih Bawinu tiva ah ngatlaih a ngah lo i, ngatlaitu le ngafuan a ruttu an hngalh hna ahcun tangka kyats sing 1-3 tiang dan an tat hna caah a liam duh lomi an um ahcun CDF sinah khua upa nih an phuan hna i, CDF nih ṭuanvo an lak hna, tiah theih a si. Crd-The Chin Post

RELchap, Butitaung Peng Ah Ralhrial In Khuasa Mi 2600 Leng Cu Mah Umnak Hmun Kir Ding Ah SAC Nih A Hnek Hna, Rakhine ramkulh, Butitaung peng ah ummi ralhrial camp pakhat ah aa dormi minung 2600 leng cu a ra laimi October 31 a hnu bik chia in mah umnak hmun cio kir ding ah SAC ralkap, palik le pengkulh uktu hna nih auh in ralrinnak an pek hna tiah ralhrial camp ummi hna nih an chim.

Mah umnak hmun nan kir lo a si ah cun, hmunhma rilonh in khuasaknak, zaan chuahlo ding nawl chuahmi poh-mah 144 he tazacuai nan si lai tiah tlerh khonhnak an tuah tiah min langhter a duhlo mi ralhrial bawmtu pakhat nih a chim. “SAC ralkap hna le, pengkulh uktu hna nih ralhrial camp in chuah ding ah voi li an kan chimh cang. Ton biaruahnak voi hnih an kan tuah, cun ralhrial camp ah ra voihnih an kan chimh” tiah a chim.

Butitaung peng ah ralhrial camp hmun li a um i minung 2600 leng an i dor tiah theih a si. Rakhine ramkulh le Chin ramkulh thlanglei ah SAC ralkap le AA kar kahdohnak a chuah ruang ah mah umnak hmun kaltak in ralhrial dirhmun a phanmi 90000 leng an si tiah UNOCHA nih October 19 ah an thanh tiah theih a si.

Nikhat Chung Ah SAC Ralkap 50 An Thi, 26 Nih Hliamhma An Tuar Tiah NUG Nih A Thanh, October 27, nikhat chung a cangmi kahdohnak ah SAC ralkap chungtel 50 hrawng an thi tiah National Unity Government NUG nih cathanh an chuah. Atu ah SAC ralkap a thimi zat langhtermi nak in a leng ah a thimi an tamdeuh kho i, October 27 nikhat chung ah SAC ralkap 26 nih hliamhma an tuar tiah an langhter.

NUG nih mah tein i runvennak ding ca thawngthanhnak a tuah kum khat chungah SAC ralkap chungtel 20,150 leng an thi cang i, 7,000 leng nih hliamhma an tuar tiah an thanhmi ah an langhter. PDF le tualchung hriamtlai phu lei in minung 1,500 luan hrawng an nunnak a liam, SAC ralkap nih rampi huap in a hipkhawhnak hmunhma hi zat ceo hmanh a si tilo tiah NUG caan karlak president Duwa Lashi La nih a chim.

Myanmar ramchung ah a cangmi SAC ralkap le PDF, tualchung hriamtlai, hriamtlai phu dihlak kar a cangmi kahdohnak ah SAC ralkap lei a thimi hna kong he pehtlai in SAC lei nih cathanh chuah in an langhtermi a umlo.

PDF-Kalay Chungtel Pahnih SAC Ralkap Nih An Thah Hna, PDF-Kalay battalion 6 in ralkap Lal Biak Tluang le Lal Chan Him cu October 10, Kalaymyo Tahan sang Naygyatait hmai hna security hngakmi 228 battalion nih tlaih in an thah hna tiah theih a si. Tlaihkhih an ton zaan ah pakhat cu an thah i, zaan ah an phum, a dang pakhat cu a thaizing ah faktuk in an hrem hnu ah an thah. Thawng kan theih a tlai deuh tiah PDF-Kalay battalion 6 in ṭuanvo ngeitu pakhat nih a chim.

Pale Peng Nithum Chung Kahdohnak Ah SAC Ralkap 30 Nak Tlawm Lo An Thi, PDF Ralkap 4 An Nunnak A Liam Ve, Sagaing ramṭhen, Pale peng ah nithum chung kahdohnak a chuak i, SAC ralkap 30 nak tlawm lo an thi, tiah theih a si. A luancia Octobber 25 in Pale peng Pah Kah Phah an zung bik(Headquarter) cu SAC ralkap Helicopter 5 in an kah caah nizan October 27 tiang kahdohnak a chuak i, SAC ralkap 30 nak tlawm lo an thi. Cu hnuah SAC ralkap pawl cu Monywa Nah Mah Khah ah an kir ṭhan, tiah theih a si.

SAC ralkap an kir hnu in PDF nih hmunhma thianhhlimnak an tuah i Pah Kah Phah zung ah an rak tlaihmi thongtla minung 12 cu SAC ralkap nih an thah hna pinah an ruak cu Teypingye(သဲပြင်ကျယ်) khua inn 6 he an khangh chih dih hna, tiah PDF sinin theih a si. Kahdohnak hmun hnih ah a chuak i SAC ralkap 30 nak tlawm lo an thi, kanmah lei in PDF ralkap 4 an nunnak a liam ve i, ralkap 2 hliamhma an pu, tiah hriamtlai phu hruaitu nih an chim tiah theih a si. Crd-The Chin Post

Be the first to comment

Leave a Reply

Your email address will not be published.


*