Falam-Hakha Kahnak in Siizung Phan Ralhrang Hliamhma Faak Tuar, Thi Ding An Tam
==================================
Aluan ciami July 8 in July 17 tiang, nihra (10) fai Falam le Hakha kar ah CNA, CJDC (Special Force), CDF, CNDF le Kawl ralhrang kahnak ah ralhrang in hliamtuar siizung a phan mi hi (20) tluk an si i cu chung ah a zual hmami an tam ngai tiah achung lei ummi sin in thawng kan theih.
Hliamhma a tuarmi ralkap hna cu nihin (July 20) ah ralhrang an bawi le nih Hakha siizung pi ah an va zoh hna tiah kan theih. “Minung 5 asiloah 6 hrawng hi kut le ke aa tan mi, a bul mi an si. An dihlak fonh in minung 14 hi cu an zual hma ngai,” tiah a chunglei a ummi nih The Chinland Post ah a chim. July 19 ah CNF nih thawngthanhnak a tuah mi ah Kalay in ralhrang a rak kaimi hi motor 27 in an si i minung thazaang 200 fai an si tiin kan ruah damh tiah an chim.
Tutan kah dohnak ah ralhrang in minung 60 renglo an thi i minung 17 hliam an tar. Chin ralkap i minung pahnih nih miphun le ram caah an nunnak an pek tiah CNF nih thawng an thanh chih. Kalaymyo in ralhrang le a rak kaimi Kawl ralhrang hna hi Pha-aan ah headquarters a chiah mi Kawl ralhrang LID 22 in an si i ralkap thazaang 200 fai in Chin ramkulh chaklei ah ralkap din-ei, hriam, kuang le thilri a rak ngalh tu an si tiah CHRO nih an thanh.
Kawl ralkap in a chuak mi Captain pakhat nih, “Ral um lio ah ralhrang nih thil an i chan (Military Supply) tikah LID in an kal ahcun a tlawmbik Batallion pakhat thazaang hman a si tawn. Cucaah tutan Hakha lei kaimi hi LID 22 an si ahcun Batallion pakhat in minung 130 or 140 tal an si lai. Cu pin ah Chin rakulh pengkulh pakhat cio cio ah a tang ding ralhrang thazaang tlawmpal te an chap lai. Cucaah a tlawmbik in ahlei in minung 50 le 60 kar cu an si kho. Cucaah tutan Hakha lei rak kai mi hi Kalay in an i thawh ah minung 200 cu a tlawmbik an si ko lai” tiah The Chinland Post ah a chim.
A peh i, “ral um lio cu ralhrang ralkap sawhsawh hi an buk ah aho hmanh zungzal in an chiah sawh hna lo. Cucu tat-hloh (တပ်လှုပ်) ti a si. Cucaah Chin ramkulh ah buk ah sau deuh a ummi cheukhat an kirter hna lai i cun anmah ai-ah atu a phan mi khi an tanter hna lai. Cucu ralhrang nih tuah tawn mi a si” tiah a ti.
CHRO nih a thanhning ah Chin ramkulh ahhin thlanglei (Southern Chin State) Chin ram ah LIB 140, LIB 274, IB 304, IB 512 le IB 216 tiah Batallion panga a um i Byuha (Tactical Operation Command) pahnih a um. Matupi le nikum July thla in an chap mi TOC Mindat tiin pahnih an um. Cun IB 512 le 216 hi LID 55 tang in Mindat Byuha nih zohkhenh ding in rak chiah mi an si.
Chaklei Chin ram (Northen Chin State) LIB 266, LIB 268, LIB, 269, LIB 222 le LIB 11 tiah Batallion panga an um ve. LIB 222 le LIB 11 hi Thantlang ah aluancia kum August ah rak thlah mi an si i, hi vialte hi Hakha ummi Byuha (Tactical Command) kuttang ah an um dih tiah CHRO nih a thanh.
Zarhhnih chungah Chin hriamtlai phufonh le SAC ralkap karlak ah kahdohnak voi 10 a chuak, SAC ralkap 70 hrawng an thi, Chin National Front (CNF/CNA) aa telmi Chin hriamtlai phufonh le SAC ralkap cu July 6 thok in thlanglei Laitlang le chaklei Laitlang ah kahdohnak a chuak i SAC ralkap a thimi an tam tiah Chin National Front (CNF) nih a thanh.
July 6 ah CDF-Matupi le SAC ralkap karlak ah kahdohnak voihnih a chuak i SAC ralkap 5 an thi. July 7 ah CNA, CDF-Zotung le CDF-Matupi aa telmi Chin hriamtlai phufonh le SAC ralkap karkak ah kahdohnak a chuak i SAC ralkap 2 nak tlawm lo an thi i 6 an i hliam tiah a thanh. Falam-Hakha lamcung ah July 8-16 tiang Chin hriamtlai phufonh le SAC ralkap karlak ah kahdohnak voi 8 a chuak i SAC ralkap 60 nak tlawm lo an thi, a tlawmbik 17 an i hliam tiah CNF nih a thanh.
Kahdohnak hi Kalay-Falam-Hakha lamcung khuate a simi tlangrawn, Taal, Tlangzaar, Dokthek, Chuncung hna ah a cang i Kalay in ralkap mawṭaw 27 le ralkap 200 hrawng in an raa i Chin hriamtlai phufonh nih an kah hna hi a si.
Kahdohnak chungah Chin hriamtlai phufonh in 2 an nunnak a liam tiah a langhter.
SAC ralkap nih Valung khuami pakhat an thah lengah Taal khuate inn 29, Tlangzaar khua inn 6 le Chuncung khua inn 15 an khangh tak. Chin hriamtlai phufonh nih July 13 ah Hakha palik sakhaan le SAC ralkap gate an kah hna i SAC ralkap a thimi an tam tiah Chin National Front thawngthanhnak in theih a si.
Relchap, (photo Dang) Japan Hluttaw Palai 7 July Thla Dongh ah Taiwan An Tlawng Lai, Japan Hluttaw palai 7 cu tu thla(july) dongh ah Taiwan ah an ra lai, tiah Taiwan ramdang Minister zung nih cathanh an chuah. Japan Hluttaw 2 in palai 7 cu July thla dongh ah Taiwan an kal lai, tiah Japan-Taiwan ram aiawhtu Francis nih a thanhmi cu ramdang Minister zung nih July 12 ah fehternak an tuah.
Japan Prime Minister hlun Shinzo Abe a thih hnu in Taiwan ah Japan ram aiawhtu an tlawn ding cu sullam ngei ngaimi a si. Shinzo Abe a um ti lo zongah Taiwan cungah Japan Hluttaw 2 nih kan dirkamhnak a tlau hlei lo, tiah Francis nih a chim. Japan Palai cazin le Taiwan tlawn ding timh lamhnak cu caan rem a um tikah thanhnak kan tuah te lai ,Cun, Taiwan-Japan cu kum tampi chung hawikom kan rak si cang, tiah ramdang Minister zung nih an thanh.
July 8 lioah ah Abe cu Nara khua ah bia a chim lioah kah thah a rak tong. Tetsuya Yamagami(kum41) nih Abe cu a hnu meter 10 hlatnak in meithal zun hnih in a rak kah thah. Japan cozah nih Shinzo Abe cu a sang bik upatnak pek ding in an fehter i, Chrysanthemum minṭhatnak a co lai, tiah Kyodo News nih a langhter. Japan ram Prime Minister rian sau bik a ṭuanmi Abe cu phung ning tein ral a dih kum thawk in minṭhatnak a comi a 4 nak Prime Minister a si lai.
Leave a Reply