Breaking News; Hakha kan khualipi a hnu bik thawngpang dik!!

SAC Ralkap Helicopter Pakhat Hakha A Phan!!
=================================
Chin ramkulh, khualipi Hakha ah SAC ralkap Helicopter pakhat cu nihin November 27 ah a phan, tiah theih a si.Nihin chun sml 12:00 hrawngah SAC ralkap Helicopter pakhat Hakha a phan.

Raltuknak Helicopter cu a si lo, voidang a rak phan tawnmi a si ko. Raltuknak Helicopter a zuan tawn ning nak niam deuh in a zuang, tiah tualchung mi pakhat nih The Chin Post ah a chim.

“Caan sau ngai aa dinh hnu zanlei sml 2:42 ah Helicopter cu Hakha in a kir ṭhan. Zei dah a phurh ti tu cu hngalh a si lo nain hriamnam le zen-kuan a phurh men lai,” tiah tualchung mi pakhat nih cun a ruah damhnak a chim.

Sikpar ni 26, zing lei sangah Hakha khualipi hauleng , Cawkbuk sang, Senthang lei kalnak lam ah a um mi SAC ralhrang Gate cu kan pasaltha CDF phu fonh hna nih an va kahdoh hna, tiah theih a si. Cu kahdohnak ahcun SAC ralhrang lei in minung pa 2 an thi, tiah kan theih.

Sikapar ni 26 thiamthiam ah Hakha le Thantlang kar, Timit kiangkap hrawng zongah Kan pasaltha hna le SAC ralhrang kar ah kahdohnak a chuak ii, SAC ralhrang nih Timit lei ah hriamnam ngan zong an thlah len, tiah theih a si.

Cu kap hnih kahdohnak kong he pehtlai in thawngpang fiang theih a si rih lo. A luancia caan chung ah khan Hakha le Thantlang kar ah SAC ralhrang lei nih hriamnam ngan he, raltuknak vanlawng he, Helicopter he an hmang ngai ngai hna.Falam peng Tikual kahdohnak zong ni 5 chung pehzulh in cung leiin kahdohnak an tuah.

Tu kar hrawngah SAC ralhrang nih Hakha lei ah Helicopter in ralkap minung zong an chap ngaingai hna hlei ah hriamnam zong an rak chanh ngaingai hna, tiah theih a si.

A tu lio ah SAC ralhrang nih Helicopter in ralkap thazaang an rak chap nak hnga kong he pehtlai in, Ralkap thazaang an rak chap mi hna pawl hi Commando ralkap pawl deuh lawngte an si, tiah theih a si. A fawi nak in kan Chim a siahcun Special Forces pawl khi an si ii an zapiin a tlawm bikah Commando ralkap minung 100 hrawng an si, tiah theih a si ii a tam deuh cu Timit kiangkap lei ah an um tiah, kan theih.

Kalaymyo ah nihin november 26 zaan Sml 6:38 pm hrawng ah hriamngan tlaknak in Tar pakhat le ngakchia pahnih hliam an tuar i puahkeh thawng aum pah len tiah theih a si. Cu lawng si lo in nihin zing Sml-10:15 am hrawng ah Duwinchawng um inn pakhat cung ah hriamngan tla in a puah caah mipi(2) hliam an tuar tiah theih chih a si.

Karin ram ,Ba-ann peng Tantaungkyi myonay Taungngu – Tantaung motor lampi cung um SAC Tamoe tlang tat sakhan cu nihin nov -26 zing ah mipi ralkap hna nih an kah i ralhrang lei an fah caah Vanlawng an hmanthan pin ah ralkap thazaang an chap len ko tiah theih a si..

Hi SAC sakhan hi mizapi ralkap lei in Tantaung pengkulh Special B-3 / Taungngu pengkulh PDF B-3501 tatkhuai (4-3) phu hna nih Sml -2 chung tukdohnak an ngeih hna hnu ah ralhrang (15) naktam an thih leng ah hliamtuar an tam nakkong Bago Region PDF nih an thanh.
SAC lei nih an fah caah Jetfighter (2) in Sml-1 khat nak tam vanlei tukdohnak in an bawmh hna na in mipi ralkap hna him te in an tolhkho than .

Mahbel te SAC nih Tamoe tlang khuate cu vanlei in bomb thlaknak a tuah caah tualchung mi thi le hliam an um tiah theih a si.
Cu pin ah SAC nih Tamoe tlang khuate cu mei in kankhangh lai tiah an hrocer hna i,Taungngu – Tantaungmotorlam meng (7) i ralkap hna cu an motor in thazaang an i chap len ko tiah theih a si.

Minywa – Sagaing lampi cung ah SAC motor thluan hna cu bomb ( မိုင်း) voi -5 puah an si i ,ralhrang (11) anthih nak peoples Army to Fight Dictatorship nih nihin ah an thanh. Dar aphor mi motor relchih in SAC motor (10) aizulmi cu nizan november 25 zing Sml-11:54 ah Monywa in Sagaing lei hoih i an kal ah a voikhat nak puahhnawh an si hnu in, ​Sagaing in Monywa lei i a kal mi SAC motor(15) cu Sml 1:44 ah puahhnawh an si than pin ah Alapakah le Wanpyih khuakar an phanh ah voi (3) puahchap an si tiah theih a si.

Puahkehnak chung ah SAC motor (15) aizul mi chung in pakhat cu tinh mi zawn ah khen in ailet i ralhrang (6) an thi tiah an tarlangh.
Motor ai let mi i athi mi le aihliammi venhim nak a neih piaktu hna Myinmu Kee ralkap hna cu november -25 zanlei Sml 4:18 pm ah bomb puahchap an si than i ralhrang (5) an thichap tiah theih a si.

Hliam a tuar mi le a thi mi SAC hna cu nihin november 26 zing Sml 7:20 ah Monywa lei in thirphaw in kham mi motor (2) le ralhrang thazaang (100)hrawng nih an ra lak hna tiah cathanh ah cun an langhter chih. Hi ralsernak hi peoples Army to Fight Dictatorship ၊ PKDF-MMU ၊ TTAPDF၊ D.B.B.F -MMU tangtii phu hna nih an tuah mi a si tiah kan theih.

Demoso Kahdohnak Ah SAC Ralkap 10 An Thi, Kaya ramkulh, Demoso ah SAC ralkap le tualchung hriamtlai phu kar kahdohnak ah SAC ralkap lei in minung 10 an thi tiah theih a si. November 25, zaanlei Demoso ni chuahlei ah SAC ralkap le tualchung hriamtlai battalion 1101 central special force karah kahdohnak a chuak i SAC ralkap lei in minung 10 an thih a si.

Kaphnih kar i kahdohnak chung ah SAC ralkap lei nih Loikaw khuachung in hriamngan he pehtlai in kah an bawmh hna na in, tualchung hriamtlai phu lei hliamhma tuarnak umlo in hnu an tolh kho tiah battalion 1101 central special force headquarter nih cathanh an chuah tiah theih a si.

Kanbalu Peng Khua 7 In Tualchung Mi A Thong Renglo An Zaam, Sagaing ramṭhen, Kanbalu pengchung ah SAC ralkap nih rallam an sial caah khua 7 in khuami a thong renglo hna cu nihin November 26, zinglei ah an zaam tiah Kyunhla, Kanbalu peng ah cawlcanghnak a tutu phu hna nih an thanh.

Kanbalu peng Kotaungbo(ကိုးတောင်ဘို) kha-mah-yiah 363 in minung thazaang 53 cu nihin November 26 zinglei suimilam 8:30 ah rallam sial in khuachung ah checkhlatnak an tuah tiah theih a si. Rallam sialtu SAC ralkap hna ruangah Chatkone, Kaimah, Shiasaung, Mitalinkone, Hnawkone, Zikana le Shawphyukone khua tiin khua 7 ah khuami a thong renglo cu an umnak inn kaltak in an zaamnak a si.

Myanmar Ram Pumpi Huap In Nikhat Chung Ah SAC Ralkap 21 An Thi, Myanmar ram pumpi huap in November 25, nikhat chung kahdohnak ah SAC ralkap 21 an thi tiah tualchung hriamtlai phu hna nih an thanhmi cazin ning in theih a si. SAC ralkap le tualchung hriamtlai PDF kar i kahdohnak ah tualchung hriamtlai PDF lei in minung 4 an nunnak a liam ve tiah theih a si.

Launglon Ah Pyusawhti Hruaitu Telh In Pyusawhti 4 Fimhlawm An Tong, Taningtharyi ramṭhen Launhlon peng Kyawnimaw khua kalnak lam ah pyusawhti hruaitu nu le pyusawhti phu chungtel 3 hna cu November 23 ah kan fimhlawm hna tiah Launglon tualchung hriamtlai pah-kah-phah LLPDF in tuanvo ngeitu nih a chim.

Pyusawhti hruaitu Daw Win Khine Kyaw cu ti lei ralbawi pakhat i a nu a si i, mipi hramhram in a thattu pakhat a si tiah LLPDF in tuanvo ngeitu nih cun a chim. Pyusawhti phu hna cu tilawng cung ah fimhlawm an si hnu ah palik phu hna nih mipi sin ah an firmi thilri zong kan chuh khawh hna tiah LLPDF nih cun theihternak an tuah tiah theih a si.

An sin in lakmi thilri hna cu sui thi 2, platinum thi 3, kutdong hrolh 8, hnatonh 2, ban hrolh 2, phaisa 3,138,000mmk, walkie talkie 1, nam a saumi le a tawimi he tiin 3, phaisa bawm 1, phone card 5, memory card 2, phone tunnak hri 2 le khual cazin min lakmi catlap 2 kan lak tiah Lawnglung PDF nih cathanh an chuah.

SAC Ralhrang nih Uknak An Chuh hnu Tlaihhrem le Meikhangh in Nu An Thahmi Hna Minung 300 Leng An Phan Cang, Myanmar Ram uknak pi cu SAC ralhrang nih an chuh hnu in, nu minung 17 cu an tlaihhrem hna hnu in an thah hna. Cun, a nungin nu 20 mei in an khangh hna tiah theih a si. A tutiang ah tlaihhrem le meikhangh mi hi, nu lawngte minung 300 leng an phan cang tiah FEM nih a langhter. Hi bantuk in nu thah a tongmi hna chungah, Kum 12 tang nu minung 30 an si tiah langhter chih a si.

Kangaw ခလရ ၅၀ ralhrang chung in Sikpar 24 ah thazaang 100 hrawng a chuakmi ral-lamsial pawl cu Sikpar 25, zaanlei sml 5:30 hrawng ah Chin ramkulh, Tilaak – Bungzung kar Zahaw tiva pawng Watchaungwa an phan tiah theih a si. A tu hi Bungzung lei panh in an i thawn cuahmah tiah thiltheitu pakhat nih CCN ah a chim.

Be the first to comment

Leave a Reply

Your email address will not be published.


*