Breaking News; Hakha ah mei kaangnak a chuak than e!!

Chin Ramkulh Cazin Checknak Zung A Kaang!!
=================
Chin ramkulh, Hakha khua um ramkulh cazin checknak zung cu zahan October 22 ah a kaang, tiah theih a si. Tualchung mi pakhat nih, “Zahan October 22 zan sml 10:30 hrawng ah ramkulh cazin checknak zung a kaang. A kangh ning tu cu kan hngal lo,” tiah The Chin Post ah a chim,

Chin ramkulh, cazin checknak zung cu Hakha dawrhlun sang palik sakhan thlang, Vom Thu Maung certual a hnu ah a ummi a si.
A luancia August 31 zan deilei ah sakremhnak zung a rak kaang cang. Cun a luancia October 3 zan sml 1:00 hrawngah Chin ramkulh USDP zung zong a kangh caah zung chung thilri vialte cu a rak ciam dih. Chin ramkulh USDP zung a kangh hnu, ni 19 a rauh ah Chin ramkulh cazin checknak zung a kangh hi a si. Crd-The Chin Post

Relchap, Myaing Peng Linkadaw Khua Khanghpiak An Ton Caah Khuami 3000 Renglo An Zaam, Magway ramṭhen, Myaing peng Linkadaw khua cu SAC ralkap nih October 22 ah an lut i khua mi inn le lo an khanghpiak hna caah tualchung mi 3000 leng mah umnak kaltak in ralhrial dirhmun an phan tiah tualchung mi nih an chim tiah theih a si.

Pathein-Monywa motor lampi kam ah ummi Linkadaw khua cu SAC ralkap nih October 22 ah khan an lut i October 23 zinglei ah khuachung mei kangh kan hmuh hi a si tiah Linkadaw khuami nih an chim. Linkadaw khua cu inn 1000 hrawng an umnak khua pakhat a si i, inn zeizat an khangh ti bel fiang tein theih a si rihlo, khuami 3000 leng an zaam tiah a chimchap. UNOCHA nih October 1 ah cathanh an rak chuahning ah Magway ramṭhen chung buaibainak ruang ah tualchung mi 101,300 nih mah umnak hmun kaltak in ralhrial dirhmun an phan tiah an langhter.

Myawaddy Khuachung Ah BGF 100 Hrawng An Hriamtling He An I Chawk, Kayin ramkulh, Myawaddy khuachung ah October 23, zinglei in BGF hriamtlai phu hna cu an hriamtling he khuachung hmunkip ah an i chawk tiah Myawaddy khuachung ummi pakhat nih a chim tiah theih a si. “Khuachung ah BGF phu hna cu Myattamon sizung in kee in an ra, an tam taktak i minung 100 hrawng an si lai. Hriamthil an i put leng ah ruksai khat in thil an i phorh, khuachung ah a hlan bantuk in thawngpang a tamlo, a dai ngai ko, motor in aa chawkmi zong an um ko” tiah a chim.

October 21, zinglei in Kawkareik ah SAC ralkap sakhan le zung cheukhat kahdoh an ton hnu in Myawaddy khuachung zong ah zung le lam cheukhat phih khamnak le checkhlatnak an tuah tiah tualchung mi nih an chim. Kawkareik ah kahdohnak a chuah thok zaan lei in BGF phu hna cu Kawkareik, Myawaddy, Hpaan ah an umter hna hleiah raltuk ding ah timh cia tein an um ter hna tiah hriamtlai phu hna he naihniam in a ummi Kayin khuami pakhat nih a chim.

Myawaddy thlanglei ah ummi Laykaekaw zong ah October 22, zaan suimilam 12:00 ah SAC ralkap nih vanlei in bomb an rak thlak tiah Myawaddy khuami pakhat nih a chim. Crd-The Chin Post

Be the first to comment

Leave a Reply

Your email address will not be published.


*