Breaking News; CDF kan pasaltha an thawngpang vun theih cu!!

Gangaw Peng Kahdohnak Ah SAC Ralkap 26 Hliamh An Tong!!
=======================
Magway ramṭhen, Gangaw peng khah-lah-yiah 50 in a chuakmi SAC ralkap minung thazaang 60 hrawng le Gangaw pengkomh no.7 battalion, battalion 11, CDF-KKG battalion 6 phufonh kar ah October 26 ah kahdohnak a chuak, cu kahdohnak ah cun SAC ralkap 26 cu fakngai in hliamh an tong tiah fehternak he PDF-Gangaw thlanglei tualchung hriamtlai phu nih an thanh.

Union Election Commission Chairman Hla Thein Le Chungtel Myint Naing Cu SAC Nih An Thlah Ṭhan Hna, Rampi thimnak ah lih le hrokhrol in mee nan tuah tiin thong kum 3 veve thlak ding in bia khiahpiak mi Union Election Commission(UEC) Chairman Hla Thein le chungtel Myint Naing cu SAC nih nizan October 26 ah an thlah ṭhan cang hna, tiah theih a si.

A luancia July thla thawk ah thong kum 3 veve thlak ding in biaceih zung nih bia an rak khiahpiak hna hnu thla 3 leng a rauh ah Yametin(ရမည်းသင်း) thonginn in an chuak ṭhan hna hi a si. Hla Thein le Myint Naing cu ASEAN nih Myanmar ram kong ah lakhruak in meeting an tuah lai nikhat ah an thlah ṭhan hna, tiin SAC kuttang lobby cheukhat hna nih social media ah an langhter. UEC Chairman Hla Thein le Myint Naing cu SAC nih an thlah ṭhannak hna a ruang zeihmanh an thanh lo. UEC Chairman Hla Thein le Myint Naing cu SAC nih an thlah ṭhan ko hna nain chungtel a si vemi Than Htay cu an thlah lo, tiah theih a si.

KNU Brigade 5 Hmunram Ni 5 Chung Kahdohnak Ah SAC Ralkap 8 An Thi, Karen ramkulh, Brigade 5 hmunram ah KNLA le SAC ralkap cu a luancia October 22 in 26 tiang ni 5 chung kahdohnak a chuak i SAC ralkap 8 an thi, 4 hliamhma an pu, tiah theih a si. October 22 zing sml 2:00 ah KNLA le SAC ralkap kahdohnak a chuak i SAC ralkap 2 an thi. October 23 zing sml 10:45 ah Nukhawde(နိုခေါးဒေး) hmunram ah kahdohnak a chuak ṭhan i, SAC ralkap 1 a thi chap, 1 hliamhma a pu, tiah theih a si.

October 24 ah Kataingdi(ကတိုင်တိ) le Bawgyulay(ဘောကျို့လယ်) khua karah kahdohnak a chuak ṭhan i SAC ralkap 4 an thi, 3 hliamhma an pu. Cun October 25 ah KNLA le SAC ralkap kahdohnak voihnih a chuak ṭhan, tiah KNLA Brigade 5 nih cathanh an chuah. October 26 ah Salawgyu(ဆာလော်ကျိုး) Brigade 5 um SAC ralkap sakhan cu KNLA Brigade 5 ralkap hna nih an kah ṭhan hna caah SAC ralkap 1 a thi.

Dwelu peng Nyaungpin khua cu SAC ralkap nih zanlei sml 1:47 ah hriamngan in voi 11 an kah caah tualchung mi inn pakhat a rawk, tiah theih a si. KNU Brigade 5 hmunram Mutraw pengkomh ah SAC ralkap le KNLA kahdohnak a zual ngaingai, tiah Mutraw News nih cathanh an chuah.

SAC Ralkap Hna Nih Rithaisi An Hman Hnu Lawng Ah Raltuknak Ah An Kal – NUG, SAC ralkap hna cu rithaisi an hman hnu lawngah raltuknak hmaiah an kal ti kan theih i tat-te zong tha tein kan ngei tiah NUG runvennak vuanci U Ye Mon nih a chim. A luancia October 26 lio PDF hna sin bia chimnak a ngeihlio ah a tubantuk in a chim hi a si.

“SAC ralkap hna hi tlaih an si tik ah an takpum ah sitlang an i ken i, an mah pumpak zong nih sii kan hman hnu lawng ah hmaikal ah kan chuak ngam tiah an chim. Reng ngeilo ralkap lawng si lo in ralbawi le hruaitu tampi zong nih sii an hmannak tat-te kan ngeih” tiah NUG runvennak vuanci U Ye mon nih cun a chim. Cu caah sii a hmangmi SAC ralkap pakhat nih minung thil tuah a tuah lomi kong ah khuaruahhar ding a umlo tiah a chim chap.

Myanmar Ram Buainak Kong He Pehtlaiin ASEAN’S Foreign Minister s’ Hna Cu Jarkata, Indonesia Ah Tonnak An Ngei, ASEAN’S Foreign Ministers’ hna cu Jarkata, Indonesia ah Myanmar ram buaibainak kong he pehtlaiin meeting an ngei tiah theih a si. Meeting ah cun, Myanmar ram buainak kong he pehtliain hnatlaknak a ngeihmi phun 5 (5 point consensus) cu biatak tein kalpi dingin ceihhmainak an ngei, cun American zong nih biatak tein tuanchuah dingah ASEAN hruaitu hna cu a tu le tu theihternak a tuah hna tiah theih a si.

SAC nih mipi cungah thahnawnnak, sualnak an tuahmi vialte cu ngol dingin le mipi hna bawmnak pek ding le thil dang phun 3 fonh in 5 point consensus cu nikum 2021 ah SAC le ASEAN cu hnatlaknak an rak ngei cang tiah theih a si. Crd-The Chin Post

Be the first to comment

Leave a Reply

Your email address will not be published.


*