CBCUSA An Biathli A Leng (Photo-CBCUSA Hruaitu Thar Pa 2)
====================================
Hi biathli hi nan theih cia le nan hngalh cia zong a si cang ko lai nain biathli a si caah a voikhat nak bik ah Kawlca in tial piak lo dingin nawl kan duh hmasa hna, Cun a chung ca a rel mi lawnglawng bak nih theih ding, copy laak in mah lei account ah thlah lo ding.Mi pakhat le pakhat sinah pemhter lo ding. CBCUSB nih U.S cozah sinah FBI (Federal Bureau of Investigation) minung pa 2 cu CNA Camp (Camp Victoria) ah thlah piak dingin an nawl hna tiah theih a si.
Cu FBI minung pa 2 hna cu Camp Victoria ah kum 1 chung bak um ding an si tiah theih a si. Cu kumkhat chungah cun CNA kan ralkap hna nih an hmai lei caah ah an mah tein dir kho ve hna seh, an mah teiin hriamnam i chuah kho ve hna seh timi ruahchanhnak he timhlamhnak ngeih hi a si tiah kan theih. CBCUSA zong nih kan Chin ram dohthlennak a tuah tu hna hi, a tu hnu kum 5-10 ah cun a tubantuk in an zohkhenh kho ti hna lai lo timi thawngpang zong a leng.
Cu an nawl nak hna kong he pehtlaiin ” FBI nih Camp Victoria ah va kal in, raltuknak caah hmanmi thilri tibantuk, hriamnam tibantuk, meithal ser tibantuk, bomb ser tibantuk in raltuknak caah hman dingmi thilri pawl cu, a phunphun in kum khat chungah FBI minung pa 2 hna nih cun chimh hna dingin CBCUSA nih U.S cozah sinah an nawl hi a si.
An hmai lei caah an mah tein dir kho ve hna seh. An mah tein hriamnam zong an serchuah kho ve hna seh. An mah kutkee tein dirin an mah kut chuak te hmang kho ve hna seh timi ruahchanhnak he timhlamhnak ngeih hi a si. A tu hnu kum 5 leng in cun CBCUSA zong nih an duh ningin an zohkhenh kho ti hna lai lo” tiah min langhter duh lomi pakhat nih a chim.
Cu pinah FBI minung pa 2 hna cu, Pakhat cu Visa a ngah cang i, Pakhat cu Visa a sungh caah an tang rih lo tiah kan theih. A rauh hlan ah Chin ramkulh, Camp Victoria an phan cang lai ti zongin thawngpang a leng. A tu bantuk mi vawleicung hmanh ah a lar bikmi FBI lei nih an cohlan mi hna zong hi Pathian khuakhan a si.
Cu hna pa 2 cu India ram, Mirozam in kan Chin ramkulh, Camp Victoria lei ah a thli tein a luh ding an si tiah theih a si. Cu thawngpang an thuhnak kong he pehtlaiin, tuan deuh ah khan ramdang lei nih CNA kan ralkap hna cu hriamnam sernak kan rak in cawk piak hna lai tiah an rak ti hna i, kan pa le nih an rak ngamh lo, an rak khirh hna tiah theih a si.
A ruang cu SAC ralhrang pawl nih cu thawngpang an theih sual a si ah cun, Camp Victoria kulh dihin cung lei he tang lei he an phomh lai ti cu theih cia a si bantukin kan Camp an lak sual lai tiah an phan caah a si timi thawngpang zong a leng. Cu bantuk thiamthiam in a tu zongah CBCUSA nih timhlamhnak a ngeih mi hi, SAC ralhrang nih an theih sual a si ah cun a poi ngaingai hnga mi a si.
Cu caah ah a tubantuk in CBCUSA nih timhlamhnak an ngeih mi hi, a tak ah tlam a tlin khawh nak hnga ding caah le ralhrang pawl nih an theih sual nak hnga lo thawngpang thuh i zuam in, CBCUSA riantuantu le tuanvo ngeitu hna ca zongah thlacaam bom cio ko hna usih. Hi bantuk thawngpang theih hi, Chinmi nih kan chunmang le kan zaanmang hmanh ah kan i manh bal lo mi a si i, CBCUSA riantuntu an cungah thlacaam bom ko hna usihlaw,
Kan ti khawh tawk in an damnak hnga ding caah le thlachuah an hmuhnak hnga ding caah Pathian sin tuah thlacaam bom zungzal ko hna usih .CBCUSA, ramdang um Chin miphun vailte le mipi lo cun dohthlennak tuah kan Pasaltha le, an mah lawngin cun a dir kho hnga ding an si lo caah, an ca tuah thlacaam bom ko hna usih.
Tlam a tlin khawh nak hnga ding caah a lamkip in Chinmi mipi vialte nih bomhnak peekin thlacaam bom ko hna usih. Hi thawngpang biathli a lengmi hi a dikmi le a hman mi taktak si hram ko sehlaw, Hi timhlamhnak thawngin kan pasaltha le an mah kutkee tein an dir kho i, an mah serchuah hriamnam te a hmang kho ve mi an si nak hnga thlacaam bom cio ko hna usih.
Note;SAC ralhrang sinah mah bia hi pemhter lo ding!. Khah ti a si le, CBCUSA sinah lomhnak bia a chim duh mi le, hi thawngpang kongah comments peek a duh mi na um sual a si ah cun a tang teah ruahnak le comments peek khawh a si. Na lung a tlin a si ah cun Share te zong rak tuah ve. (FBI kong le an sining cu ka tial ti lai.)
Relchap-Thawngpang Fonh; Zahnak Area Chung Ah Ramvaihnak Scope Hmang In Ramvaih/Vakah Le Lenkhang In Va Rapchiah Kham A Si Cang!
CDF-Thantlang control Area pakhat a si mi Zahnak Area chung ah Zahnak Youth Association le Khuabawi hna hnatlaknak in Area chung ah scope bunh mi zen/kuan meithal phun he ramvaih le vakah siseh, lenkhang zar in varap chiah (lochung riit khamnak telh lo) khap a si cang, tiah theih a si.
“Cu hlan cu ZYA le Bawitlang nih an khap nain hmalaknak ai ruan lo ruang ah Police sin ah ap a si cang caah, Police nih hma an lak cang lai. Scope bunh mi meithal/air-gun cu hmuhnak poh ah chuh an si lai i, lenkhang varap tarh cu hrawhpiak an si lai,” tiah Department of Information Director- PATZA (PATZA- Public Administration Thantlang-Zahnak Area) nih The Chin Post ah a chim.
“Hi bantuk kan tuahnak a ruang hi atu lio Lai khuate lei ah lenkhang zam in va rapchiah ruang ah siseh, airgun scope bunh in vakah hman tuk ruangah sa-va an an har ngaingai cang i, mipi lei duhsaknak ruang ah a si” tiah a chimchap.
Thailand Ram Motor i Lehnak Ah Chin Mi Pakhat Le Myanmar mi 2 An Nunnak A Liam! Thailand ram ah tanglei lam in a lut mi Myanmar mi hna nih an i citmi motor pakhat cu nihin August 17 ah aa let i, Chin mipa pakhat telh in minung 3 an thi, tiah theih a si.
Cu motor chung ah cun phung ning lo in a lutmi Myanmar mi 33 an i tel i, cu an i citmi motor nih cun thingkung pakhat a suk sual caah minung 3 an nunnak a liam i, 4 hliamhma an tuar, tiah theih a si.
Motor i leh ruangah nunnak a liammi Chin pa cu Kalaymyo, Indaikung(အင်ဒိုင်းကုန်း) sang ah a ummi Pu Hu Lian, kum 20 a si. Pu Hu Lian nih cun a nupi le kum khat tluk fanu pakhat a taantak hna. A ruak cu a chungkhar nih an umnak hmunram ah kirpi ding in an tawlrel lio, tiah theih a si. Aa khongmi hna cu Thailand ram ṭuanvo ngeitu hna nih thlopbul ding in sizung ah an kalpi hna, tiah theih a si. Aa khong lo mi cheukhat le motor khaltu cu an zaam caah Thailand palik nih an kawl hna, tiah theih a si.
Facebook Kan Phih Lai i Social Media Platform Thar Kan Ser Lai – SAC, Myanmar ramchung mizapi nih kan hmancem mi Facebook cu kan phih lai i Social Media Platform pakhat a aiawh ah kan ser lai, tiah SAC chimphuannak nawlngeitu General Zaw Min Htun nih nihin thawngfianhnak ah a chim. SAC nih thawng an thanhnak MRTV, MWD hna le ralkap nih mizapi lungtuaitamnak ah an hman mi page le account hna cu facebook nih a rak phih dih hna caah atu bantuk in SAC nih social media platform thar ser ding in timhlamhnak an ngei, tiah ruah a si.
Social Media Platform thar ser nakding ah thiamsang pawl le SAC ministry pathum i fonh in kan ser lai, tiah General Zaw Min Thun nih cun a chim chap. SAC nih Social Media Network thar ser an timhmi cu sullam um lo tuk mi a si, ser kho hmanh hna seh law mizapi nih an hmang duh lai lo. Facebook an phih khawh le phih khawh lo cu phundang, Platform dang a tamtuk. Ralkap sermi Platform hman kan herh lo, tiah min langhter a duh lo mi pakhat nih cun a chim.
Social Media kong ah SAC nih Facebook cu kan phih ko nain kan hlawh a tling lo. SAC ralkap video le an thawngpang cheukhat cu facebook nih a rak hnawhpiak caah General Zaw Min Thun nih cun Facebook a mawhchiatnak a rak chim bal. SAC nih cun uknak an lak hnu in Cyber Security Upadi ser in Phone ah VPN(Virtual Private Network) aa chiah mi pah cu kum 3 thong thlak ding in nawl an rak chuah. Tukum January thla thawk in VPN Application cu chek hram an thawk fawn. Myanmar rampi dirhmun in Facebook hmangtu milu hi 19.25 Million an si, tiah Data Reportal Website nih February (15) ah a tarlangh.
“Vanlawng In Kan In Kah Hna Lai” tiah SAC ralkap Nih CDF-Matupi An Tlerh Hna!, Vanlawng thazaang aa bochan ngaimi SAC ralkap hna nih ramchung ah vanlei kahdohnak cu tu chung hrawng ah fak ngai in an tuah. Nai tan ah Falam peng le Mindat peng ah helicopter le raltuknak vanlawng aa hel len, tiah theih a si. CDF-Matupi chungtel pakhat nih cun, “Ral kan si nain, kaphnih i chawnhbiaknak kan ngei peng i, atu hnu ah cun vanlawng in kan in kahdoh cang hna lai tiah an kan tlerhkhonh” tiah a chim.
Cu hlan zong ah Matupi peng ah SAC lei nih vanlawng in ralvennak an tuah i, ralkap motor run hna cu helicopter nih a ven tawn hna, tiah an chim. A luancia zarh ah khan Matupi ah SAC ralkap 2 cu an zaam ṭhan i, cu a zaammi ralkap 2 hna cu SAC ralkap nih Matupi khua pawnghrawng ah an kawl hna, tiah theih a si. SAC ralkap 2 an zaamnak kong he pehtlai in CDF Matupi nih cathanh an chuahmi a um rih lo.
Rohingya Ralzam Hna Cu Pehtlai In Bawmhnak Kan Pek Hna Lai – Michelle Bachelet, Bangladesh ram Rohingya ralzam sin ah a phanmi United Nations High Commissioner for Human Rights, Michelle Bachelet nih cun tu lio thilman kai tuk ruang ah harnak a tong cuahmah mi Rohingya ralzam hna cu vawlei cung ramkip hna nih bawmhnak pek cio ding in nawlnak a tuah.
Rohingya ralzam hna nih him tein an umnak ṭhing an kir khawh ṭhan nakding ah kan i zuam lai. Rohingya ralzam hna nih cun an umnak hmun kir an duh tuk hna nain Myanmar ram mi sinak(identity) an pek hna hnu le nuhrin covo an ngeih hnu lawng ah an umnak hmun ah cun an kir lai. UN zong nih pehtlai in bawmhnak kan pek rih hna lai, tiah Michelle Bachelet nih cun a chim. Rohingya ralzam hna cu dinei ah a bik in harnak an tong, ramdang hna zong nih Rohingya ralzam hna cu pehtlai in bawmhnak pek an herh, tiah Michelle Bachelet nih cun a chim chap.
Myanmar Ralzam Ṭhawl Kan Tim Hna Lo – CM Zoramthanga, SAC nih uknak a laak hnu in Myanmar rammi, a bik in Chin mi hna cu Mizoram ah ralzam in an rak phan. Cu ralzam hna cu an ram ah kirter kan tim hna lo, tiah Mizoram Chief Minister Pu Zoramthanga nih cun a chim. A luancia August 5 lio ah SAC ramleng minister U Wana Maung Lwin nih Mizoram ralzam hna cu Myanmar kirter ding in ca a kuat mi social media ah a langh hnu in Mizoram ralzam cheukhat hna cu thinphang in an um, tiah theih a si.
SAC cakuat mi kong ah Chin MP hna nih CM Pu Zoramthanga cu an va ton colh i, Myanmar ralzam hna cu a hlan zong ah nan ram ah kan in kirter hna lo, kirter ding in kan in tim fawn hna lo, tiah Pu Zoramthanga nih cun a rak leh hna. Kolkata um SAC Office cu “Ralzam hna hi an ram i kirter ding an si ahcun an nunhimnak ca ah ṭuanvo nan la kho hna lai maw” ti mi biahalnak lawng kan leh hna, tiah CM nih cun a chim chap. Myanmar Ralzam hna cu kan si khawh chung in kan zohkhenh hna lai, tiah Mizoram Home Minister Pu Lalchamliana zong nih a chim ve.
Myanmar ralzam hna cu a bik in Mizoram ramri khuate hna ah an um hna i, Mizoram cozah lawng siloin YMA, MZP, NGO le Biaknak Bu hna zong nih a si khawh chung in bawmhnak an pek hna. NUG zong nih, Mizoram ralzam hna an nunhimnak kong ah India cozah he zong naihniam tein kan i ceihruah ko. Mizoram cozah le Chin MP hna zong tonnak an ngei kho lengmang ko, tiah an chim ve. SAC nih uknak a laak hnu in Chin mi 40,000 reng lo cu Mizoram ah ral an zam hna.
Kum Khat Leng Ah Mindat Peng Ralhrial 9500 Leng Cu Anmah Le An Khua Cio An Kir Kho Rih Lo, Chin ramkulh, Mindat peng kahdohnak ruangah ralhrial 9500 leng cu kum khat leng a rau cang nain anmah le an khua cio ah an kir kho rih lo, tiah theih a si. 2021 May thla in Mindat peng ah SAC ralkap le CDF Mindat kahdohnak ruangah tualchung mi 20,000 hrawng ralhrial in an um, tiah Mindat peng ralhrial zohkhenhtu phu in ṭuanvo ngeitu nih a chim.
“Ral kan hrial chung ah sii-ai le eidin kan har tuk. Fur caan ahcun facang kan chiahnak zong a cin dih i, kan facang a rawk dih. Ral kan hrial ka ah cun ramchung he ramleng he a kan bawmtu an tam ngai. A hnu cun SAC ralkap nih an kham hna caah bawmtu zong an zor tuk cang. Sii-ai le eidin a har tuk caah nau pawimi aa rawkmi an tam,” tiah a chim chap.
Mindat peng hi milu 30,000 leng an si i, a luancia 2021 May thla 15 le 25 kahdohnak ruangah ral a hrialmi 20,000(zatuak 90) an rak phan i, atu cu 9,500 an taang, tiah theih a si. Mindat peng kahdohnak ruangah hliamhma faak a pumi hi 5 an um i, kut ke a bulmi zong an tam. Ralhrial mi chung in sii-ai chambau ruangah 50 hrawng an nunnak a liam.
Mindat peng ah SAC ralkap nih mi check hlatnak an tuah i, CDF he pehtlaihnak nan ngei, tiah an tlaihmi hna hi 65 an si i, hremnak ah an thahmi hna hi 10 an si. Atu tiang SAC ralkap nih check hlatnak an tuah peng rih, tiah theih a si. Mindat peng ah SAC ralkap nih inn 17 an khangh pinah inn 100 leng an hrawh, tiah ṭuanvo ngeitu nih cun a chim.
Pale Le Taze Kahdohnak Ah SAC Ralkap 6 Le Pyusawhti 5 Nak Tlawm Lo An Thi, Sagaing ramṭhen, Pale peng Inpinhti(အင်ပင်ထီး) khua um Pyusawhti sakhan cu, nizan August 16 zan sml 6:00-7:00 tiang M.R.D.A. Battalion 4 nih hriamngan lung 35 in kan kah hna caah Pyusawhti 5 nak tlawm lo an thi, tiah cathanh an chuah.
Cu kahdohnak ah cun M.R.D.A. Battalion 4, Yinmarbin pengkomh No. 6 M.R.D.A. Battalion nih an kah hna i, anmah lei in a thimi le aa hliammi an um lo. Bo Naga hruaimi M.R.D.A. kuttang ah Yinmarbin pengkomh Battalion No.3, 4, 5, le 6 cu NUG runvennak zung in COC he rian ṭuanṭinak an ngei, tiah theih a si. Sagaing ramṭhen, Taze peng Kanpauk khua pawng ah nihin August 17 zing sml 10:00 hrawng ah SAC ralkap le PLA kahdohnak a chuak i, SAC ralkap 6 an thi, tiah PLA sin in theih a si. Taze, Kanpauk khua pawng kahdohnak ah PLA le Taze PDF hna i bawm in an kah hna.
Kum Khat Chung Ah SAC Ralkap Le An Ṭuanpi Hawi Hna Nih Nu 37 An Tlaihhrem Cang Hna, July 1, 2021 in July 31, 2022 tiang ah SAC ralkap le an ṭuanpi hawi hna nih Myanmar ram chung ah nu 37 an tlaihhrem hna i, cu chung ah Sagaing ramṭhen cu tlaihhrem a tong mi nu an tambiknak a si. Kumkhat chung ah nu 23 an tlaihhrem hna. A pahnihnak cu Mandalay ramṭhen in a si i, kumkhat ah nu 5 an tlaihhrem hna, tiah Burma Human Right Network nih cathanh a chuah. Cazin kan khawmhsuat mi chung ah aa tel lomi zong um khawh a si caah hi nakin a tam deuh kho, tiah Burma Human Right Network nih a ṭial.
Hpapun Pengkomh Thlacheu Chung Kahdohnak Ah SAC Ralkap 40 Leng An Thi, KNU brigade 5 hmunram, Hpapun pengkomh chung in August thlacheu tiang ah kahdohnak voi 53 a chuak i, cu kahdohnak chung ah cun SAC ralkap le BGF 43 an thi, 17 hliamhma an tuar, tiah KNU brigade 5 nih cathanh an chuah.
August 1 in August 15 tiang KNLA le SAC ralkap/BGF kar a chuakmi kahdohnak kong cu KNU nih nihin August 17 ah an langhter i, kahdohnak chung ah KNLA chungtel pakhat a nunnak a liam, tiah an langhter. Kahdohnak chung ah hmunhma rilonh in cawlcanghnak a tuahtu SAC ralkap le BGF hna nih khuate lei; Lei le dum chung hna cu tinhchih in kahdohnak an tuah caah tualchung mi 2 hliamhma an tuar, tiah KNU nih an thanh.
Ngatahmio Khua Cu SAC Ralkap Nih An Khangh Caah A Khua Ning In A Kaang!: Magway ramṭhen, Yezagyo peng Ngatahmio(ငတမျှော်) khua cu nihin August ni 17, zing suimilam 10 hrawng ah SAC ralkap le Pyosawhti i bawm in an khangh caah a khua ning in a ciam dih, tiah khuami pakhat nih a chim.
Khuami pakhat nih cun, “Nihin tiang ah kan khua ah kahdohnak zong a chuak bal lo, a ruang um loin an khangh, atu hi an khangh cuahmah lio a si caah khuachung kan lut ngam rih lo. A thimi le hliamtuarmi an um le um lo zong kan thei rih lo, tualchung hriamtlai phu nih an kalhnawh lio a si,” tiah a chimchap.
Ngatahmio khua cu inn 600 hrawng umnak khua a si i, khuami pawl cu an khua ning in a himnak ah an zaam, tiah theih a si. A luancia August ni 11 zong ah SAC ralkap pawl cu khuachung ah an lut i, thilri zeimawzat an fir pin ah cycle 11 zong an rak khangh, tiah theih a si.
Magway Ramṭhen, Yesagyo Peng Kahdohnak Ah SAC Ralkap 8 An Thi, Magway ramṭhen, Yesagyo peng, Yeshia(ရေယှား) khua in Ngatayaw(ငတရော်) khua lei ah rallam sialtu SAC ralkap hna cu tualchung hriamtlai phu nih nihin August 17, zinglei suimilam 9:00 hrawng ah an kahdoh hna. Cu kahdohnak ah cun SAC ralkap 8 nak tlawm lo an thi lai, tiah Yesakyo tualchung hriamtlai phu nih an thanh.
Minung thazaang 60 leng he rallam sialtu hna cu tualchung hriamtlai phu Yesagyo peng pah-kah-phah le Theih Hngait pah-kah-phah, Ngyi Naung pah-kah-phah phufonh hna nih Ngatayaw(ငတရော်) khua pawng ah an kahdoh hna, tiah theih a si.
Yaw Tualchung Hriamtlai phu Nih Minzua(မင်းရွာ) Palik Sakhan An Kah!: Gangaw peng Minzua khua um palik sakhan cu nihin August 17 zaanlei suimilam 5:30 hrawng ah Htilin(ထီးလင်း) PDF, YRPA, KKG battalion 5, Gangaw PDF, YDF battalion 6, 7, 8, 14 le Gangaw pah-kah-phah 1 phu hna i bawm in an kah hna, tiah theih a si. Htilin PDF nih hriamngan le hriamhme he an kah hna i, KKG phu nih Drone in an bawmh hna, kahdohnak cu suimilam 1:30 hrawng a rau, tiah theih a si.
August ni 16 zong ah Yaw tualchung hriamtlai phu hna nih Minzua palik sakhan cu cawnnak ah an rak kah hna, tiah theih a si. Gangaw peng thlanglei tiva hrawng ah SAC ralkap hna nih pehtlai in rallam an sial peng, tiah theih a si.
Mandalay FEA Hriamtlai Phufonh In Minung 4 An Hriamthil He An Tlau! Shan ram chaklei Naungcho(နောင်ချို) lei ah hriamthil a cawtu FEA phufonh chungtel 4 cu hriamthil an cawknak in an kir lei, Mandalay khuapi ah August 16, zaanlei suimilam 3:00 khan an hriamthil he an tlau, tiah Anonymous Force Mandalay (AFM) nih cathanh an chuah.
Anonymous Force Mandalay (AFM) hruaitu Bu Tiger nih cun, “Nizaan zaanlei ah leng kan chuak lai tiah an chim i, atu tiang pehtlaih khawh an si ti lo. Hriamthil cu Naungcho(နောင်ချို) in Mandalay tiang phorh a si cang, zaanlei an chuah hnu ah pehtlaihnak kan tuah kho ti hna lo,” tiah a chim.
Hriamtlai phu chungtel 4 hna sin ah cun pistol 2, Ak 47 pakhat le phu dang hriamthil zong aa tel. Local PDF le Anonymous Force Mandalay-AFM phu hna hriamthil man he cun sing 200mmk man a si, tiah AFM phu hruaitu Bu Tiger nih a chim. A tlaumi 4 hna he pehtlaihnak a ngeimi hna cu i ralring cio ding in FEA phufonh nih an theihter hna. Mandalay UG phufonh FEA cu Freeland Attack Force (FLA), Emerald Girls Army (EGA) le Anonymous Force Mandalay (AFM) phukomh hna an si.
Myaing Peng Nihnih Chung Kahdohnak Ah SAC Ralkap 8 An Thi, Magway ramṭhen, Myaing peng tualchung hriamtlai phu nih SAC ralkap hna cu nihnih chung pehtlai in an kahdoh hna caah SAC ralkap 8 an thi. Kuan, bomb le an hriamthil zeimawzat zong kan lak khawh, tiah Myaing hriamtlai phu nih nihin August 17 ah cathanh an chuah.
Myaing peng, Taekyi(တဲကြီး) khua le Naytat(နယ်သတ်) khua kar ah August 15 le August 16 ah SAC ralkap hna cu Myaing hriamtlai phu nih bomb puahhnawh in an doh hna, tiah theih a si. August 15 ah riahcaw a phortu SAC ralkap motor 2 cu bomb an puahhnawh hna i, SAC ralkap 1 a thi, 3 hliamhma an tuar. Ralvengtu SAC ralkap 4 zong an kah hna i SAC ralkap 3 an thi, pakhat hliam a tuar, tiah Myaing hriamtlai phu nih cun an thanh.
August 16 ni zong ah, tualchung hriamtlai phu hna nih, August 15 ah SAC ralkap nih ralvennak an tuahnak hmun cu an kahdoh ṭhan hna. Cu kahdohnak ah cun SAC ralkap 3 an thi i, 2 hliamhma an tuar, tiah an langhter. Nihin August 17, Myaing tualchung hriamtlai phu nih cathanh an chuah ning ah, nihnih chung kahdohnak ah SAC ralkap lei ruak 8 le hliamhma tuarmi 2 cu SAC ralkap nih motor in an thiar hna, tiah an langhter.
Taiwan Ramkhel Hruaitu Hna Cu China Nih Phihkharnak A Tuah Hna! China nih Taiwan ramkhel hruaitu pawl cu China ramchung luhnak nawl a phih hna, tiah theih a si. US House of Representatives Palai hna Taiwan an phak hnu nizan august 16 ah Taiwan pawngkam ah raltuk cawnnak pehtlai in ka tuah than lai, tiah China nih a thanh hnu in atu bantuk in ramkhel hruaitu hna cung ah phihkharnak a hun tuah ṭhan.
US House of Representative palai hna zalong tein Taiwan an tlawnmi kong ah a herh lo mi lehrulhnak tuah lo ding in US nih China cu ralrin a rak pek. Edward Markey nih hruaimi US palai hna cu Taiwan President Tsai Ing-wen he tonnak an ngei i tutan an khualtlawnnak cu US Party ngan pahnih caan saupi rak i ceih cangmi phungphai ning tein a kalmi an si tiah US nih cun a chim. China nih phihkharnak a tuahmi hna cu US um Taiwan Ambassador Bi-khim Hsiao tel in Taiwan Parliament palai cheukhat hna an i tel.
Yadanabon Hlei Kahdohnak Ah PDF Ralkap 3 An Nunnak A Liam , Yandanabon hlei check gate ah nihin August 17 zing sml 8:30 ah Express motor pakhat cu SAC ralkap nih an check lio ah kahdohnak a chuak. Motor chung ah PDF ralkap 3 cu an nunnak a liam. SAC ralkap 2 zong hliamhma faak ngai an pu, tiah theih a si. “Express motor aa citmi PDF ralkap 3 cu an nunnak a liam. Gate hngak ralkap 2 zong an hliamhma faak ngai. Tualchung mi pakhat zong meithal kuan nih a khen. Ralkap cu mizaw phorhnak motor in an rak don hna,” tiah tualchung mi pakhat nih a chim.
Motor chung in khualtlawng mi 10 zong hliamhma an pu. A nunnak a liammi PDF ralkap 3 cu zei bantuk phu dah an si ti hngalh an si lo. “Khoika ummi le zei bantuk phu dah an si ti cu kan hlathlai cuahmah. A thimi PDF ralkap 3 kan ui tuk hna,” tiah Guerrilla phu in Do Lay nih a chim. Kahdohnak a dih lecangka in ralkap nih hlei an kham i, zing sml 9:45 ah an hun ṭhan, tiah theih a si.
Salay Ah Khuabawi Pa Le A Nupi Kah Thah An Tong: Magway ramṭhen, Chauk peng Wakinba khuabawi pa le a nupi cu kah thah an tong, tiah tualchung mi hna sin in theih a si. Khuabawi Soe Ngein le a nupi San San cu an inn chung i an um lio ah hngalh lomi hriamtlai phu nih an kah thah hna.
“Zingka tein meithal thawng kan theih. Zoh zong kan va zoh ngam colh lo. A hnu ah khuabawi pa le a nupi cu an rak kah thah hna,” tiah tualchung mi pakhat nih a chim. A luancia June 16 ah Chauk peng, Myanmar Economics Bank hngak ralkap pakhat an thahmi le atu khuabawi pa le a nupi thahnak kong zong ah PDF lei nih thawngthanhnak an tuahmi a um rih lo.
US le South Korea Cu Raltuk Cawnṭinak An Ngei Lai! US-South Korea Raltuk cawnṭinak cu a ralai mi zarh chung ah kan ngei lai, tiah South Korea Ralkap nih nizan August 16 ah an thanh. N. Korea nih Missile hneksaknak le Nuclear in a tlerhkhawnh lio ah atu bantuk in S. Korea ram hawi ṭha a si mi US he raltuk cawntinak an tuah lai. Kum dang ah cun raltuk cawnṭinak cu August 22 in September 1 tiang an rak tuah tawn.
‘Ulchi Freedom Shield’ tiah min pek mi raltuk cawnnak ah hin raltuknak tank, raltuknak tilawng le vanlawng hna in cawnnak an ngei lai i, ralkap thonghra reng lo an i tel lai. US nih S. Korea he a nganmi raltuk cawntinak kan ngei lai, tiah bia a rak kamh hnu in atu bantuk in timhlamhnak an hun ngeih hi a si. A luancia kum ah cun, US nih North Korea he pehtlaihnak ngeih aa zuam cuahmah lio a si caah le Covid rai ruang ah raltuk cawnnak cu nganpi in an rak tuah lo.
A luancia August 8 in 14 tiang US, S.Korea le Japan ram hna cu Missile i kham ning le Bomb kawl ning cang cawnṭinak kan rak ngei, tiah US Ministry nih an thanh. US le S. Korea nih an cawn ding mi cu ral in i kham ningcang cawn a si lai, tiah an thanh hna nain N. Korea lei nih cun “Kan ram rak tuk nak ding ah raltuk an cawng,” tiah a chim ve.
Leave a Reply