Russia Kahdohnak Ruangah Ukraine Mipi Cheuli Chungah Cheukhat Deng Nih An Ram An Chuah Tak Cang
Russia nih kahdoh ruangah Ukraine ram mipi 6.48 Million hna nih an ram in mi ramdang ah an chuah tak tiah UN nih a langhter. Kahdohnak ruangah Poland ramri lei ah an zam mi zat kong cu March ni 18 ah cathanh an chuah hi a si.
An ram chungin Mi ramdang ah a zam i aa dor mi Ukraine mipi zatuak cu 3.27 Million tiang an karhnak kong UN in tuanvo ngeitu hna nih March thla ni 18 ah a langhter. Mah zatuak in Ukraine miluu cheuli ah cheukhat deng cu ramdang ah an i dor tiah theih a si.
Hmunhimnak lei le a dang sining ning cang lo ruangah mi tampi hna cu an ram chung in an chuah kho rih lo mi an tampi ti zongin a langhter chih. Russia nih Ukraine kadohnak zarhli nak thawngzamh ning in cun,
Ukraine ram chung khuapi hna ah kahdohnak a daihter chung rih tiin theih a si i, China nih Russia hriamnam lei in a bomh khawh nak kong he pehtlaiin thinphan a si nak kong cu March thla ni 17 ah American nih a chim.
Apoi Tuk E, Mino Tamtuk Cu Thih Hlanlo Thongthlak Dingin Ralhrang Biachahnak An Tuah Piak Hna
Yangon Mino 15 Hna Cu Nunchung Thong Thlak Ding In SAC Nih Bia An Ceih Hna! Yangon ramṭhen, North Okkalapa peng Hlaingtaya le Dagon Myotit Seikkan peng in Mino 15 hna cu SAC ralkap biaceihzung nih thihdan le thih hlan lo thong thlak ding in March 17 ah biakhiahnak an tuahpiak hna.
Thih tiang thong thlak ding in biakhiahnak tuahpiak a tong mi mino hna cu Hlaingtaya in minung 8, Dagon Myotit Seikkan in minung 3 le North Okkalapa in minung 4 an si i, cu chung ah cun nu pakhat aa tel.
Cu mino hna cu, North Okkalapa ah high school siangcachimtu nu pakhat meithal in kahthah a tonnak kong le Hlaingtaya pengchung ah inn zakhat uktu kahthah a tonnak kong ah ‘pehtlaihnak an ngei’ ti in thihdan an pek hna hi a si, tiah SAC ralkap phu nih an cathanh ah an langhter ve.
Yangon khuachung SAC ralkap uknak lei nih cathanh an chuah mi sualphawtnak phun 23 chung in SAC ralkap biaceihzung nih chekhlatnak an tuah i, a sangbik sualphawtnak in biakhiahnak an tuahpiak hna, tiah theih a si.
Natchaung Khua inn Khanghnak Ruangah Minung 10,000 Leng Emergency In Bawmh An Herh.
Sagaing ramṭhen, Kalay pengchung Natchaung khua cu SAC ralkap nih hriamngan he an kah leng ah khuachung inn hna cu an khangh caah khua mi minung 10,000 leng cu a himnak hmun ah an zaam i atu hi emergency in bawmhchanh an herh, tiah theih a si.
Kalaymyo he meng 15 tluk aa hlatnak ah a ummi Natchaung khua cu inn 2000 leng a umnak khua pakhat a si i, SAC ralkap nih March 15 ah hriamngan he an kah lengah khuachung inn le innzuat saṭil hna cu an khangh hna, tiah cuka khua um mi Mawng Gan Kawng nih a chim.
A chim ning ah cun, “March 15 ah kan khua lei ah rallam sial in an ra i, a hlatnak in kahmi hriamngan he kan khuachung cu an kan kah, PDF zong nih khuachung an luhkhawh lo nak ding ah bomb an puahhnawh hna. SAC ralkap nih hriamngan tamtuk an hman caah PDF cu hnu an tolh, cu lecangka in khuachung cu an khangh i, inn 100 leng a kangh lengah innzuat saṭil hna zong mei nih a kangh chih hna,” tiah a chim.
SAC ralkap nih atu bantuk in Natchaung khuachung inn an khangh caah cuka pawnghrawng um mi khua mipi hna zong a himnak hmun ah an zaam hna caah eiding le sii-ai emergency in bawmhchanh kan herh ko, tiah khua mi nih an chim.
Cheukhat khua mi hna cu SAC ralkap an kir March 18 ah khuachung ah cun an kir hna i, an umnak inn hna cu an kangh, an rawh dih lengah, an innzuat saṭil hna zong mei hma in an thih cu hmuh a si, tiah khua mi nih cun an chim
Leave a Reply