Kawlram mipi ngandam in an um khawh nak hnga ding ah ngamdam nak zung, riantuantu vuanci zung le kuatnak le pehtlainak zung ah tuanvo laak dingah sii lei in buaih a ngah mi doctor pawl cu auh an si cang tiah Pyidaungsu Thu-Wan phu sinin theih a si. Ngandamnak vuanci zung i, mi zohklhen thlopnak zung ah sii lei fimcawnnak in buaih ngah doctor minung 985 le Ha lei in pehtlai in sii lei in buaih ngah mi minung 82 hna cu mipi zohkhenh dingah SAC ralhrang nih an uah cang hna tiah theih a si.
Cu pinah ngamdamnak minung thazaang in a chuahnak zung in fimcawnnak lei tuanvo laak ding caah sii lei fimcawnpiak tu doctor 107, တိုင်းရင်းဆေး Universty in fimchimnak lei in tuanvo laak ding in sii lei in buaih ngah minung 13 zong SAC ralhrang nih a auh cang hna tiah theih a si. Cu bantuk thiamthiam in Social Security in sii fimcawnnak buaih ngah kuttang riantuan ding ah Doctor 12 le,
Myanmar tlanglawng sii lei fimcaawnnak buaih ngah kuttang riantuan dingah doctor minung 4 hna zong SAC ralhrang nih an auh hna tiah theih a si. Cun min peek a duh mi zongah online in June thla ni 21 tiang peek a ngah tiah SAC ralhrang nih theih ternak a tuah tiah theih a si.
Thla hnih thum chung Mariupol i Avostal thirchuahnak sehzung an helh hnu ah Russia nih an lak khawh cang i, Donbas pengkulh lak ai timhmi cu karkhat in a vun naih deuh cang, tinak a si. A gas man peknak kongah Western ram pawl he an i hmuhthiamlo ruangah Finland zong a gas kuat a duh ti lo, tiah theih a si. Ukraine nih a nehhnungbik an humhaakmi Luhansk zong cu lak lawlaw dingin biatak thlakin Russia nih raltuknak a kalpi than cang. Hi hmunhma chungah hin Donbas pengkulh le Russia a tanhtu pawl an umnak hmunhma an i tel, tiah theih a si. Mariupol Azovstal sehzung ah teima ngaiin hmunhma a khuarmi Ukraine ralkap pawl cu Friday in khan cun a sungh an khan ruangmang cang i, tutan ral kan tuk chung i tuksa a purbikmi raltuknak pi cu a dih ruangmang ve cang, tiah Russia defense ministry nih a chim. “Azovstal sehzung cu a ningpiin chanhchuah a si cang.
A donghnakbik tiang Sehzung humzualtu Ukraine ralkap 531 telhchih in an ralkap 2,439 zong a liamcia ni tlawmpal chungah khan a sungh an khan ve cang hna,” tiin a chim. Cu ti a sungh an khan hlan nazi tlawmpal ah khan ‘nan nunnak hnga sehzung hi hun chuahtak ko cang u,’ tiin kan Ukraine ralkap nih an chimh hna, tiah Ukraine President Zelensky nih a chim. Azovstal i a sungh a khanmi ralkap a zat belte Ukriane lei nih a chim rih lo. Saturday zingka i cu ti i Russia nih thawng an thanhmi kongah Ukraine General staff of armed forces lei nih zei hmanh an chim rih lo. Nihin tiang i Russia nih an lakmi khua vialte lakah Mariupol hi a nganbikmi a si i, Donbas caah a biapibikmi rilikap khua a si fawn. A tu bantuk i an lak khawhmi cu thla 3 chung i sungh lawng a rianmi Putin caah cun a sunglawi ngaimi teinak pakhat a si.
“Ukraine nih ralkap ai ngeih nakhnga lo le, Russia a huatu a rami pawl hloh ka duh hna caah a tu bantuk in ‘special military operation’ timi min bunh in ka luhhnawh hi a si. Western ram pawl nih cun sualtuk bia i dohmi ral ah an kan chiahpiak,” tiin Putin nih a chim.
Mariupol an lak khawh ruangah Sea of Azov a ningpiin Russia kuttang a phan colh i, Ukraine ram i nichuahlei le chaklei hmunhma vialte tiangin an kut a phan ah a cang. Mariupol i a sungh a khanmi ralkap minung thong cu “prisoners of war” ah namhneh an si colh i, kan tlaihmi Russia ralkap pawl he kan i thleng hna lai, tiin Kyiv nih a hal hna. Ukraine ralkap pawl hi thatein kan zohkhenh hna lai, tiah Moscow nih a ti lo nain, a cheukhat Russia politicians pawl an chim ve ningah cun, a cheu hi cu an hrem, hneksak ta hna lai i, a thah zong thah an si te kho men, tiah theih a si.
Ukraine mipi a thongthong in thah an tong, khuapi vangkau deuh cu ral ruangah an ciam dih ngawn cang hna. Ukraine mipi lakin cheuthum ah cheukhat tluk deng hi cu an inn le an lo an chuahtak dih cang hna, cu hna lakah cun an ram a chuahtakmi million 6 zong an i tel. GAS Kong i Buaibainak, A tu hi gas le zinan kongkau ah Russia nih Western ram pawl biatak tein a hrocer hna lio pi a si. Ukraine a luhhnawh ruang i Western ram pawl nih Russia cungah phihkharnak an tuah ruangah Finland zong nih a sinin gas a cawkmi anmah Russia phaisa in a man pek a duh lo caah, a tu hi Russia company Gaszprom nih a gas zorh a duh ve ti lo, tiah theih a si. Russia nih Ukraine a tuk ruangah Finland le Sweden nih NATO ah lut dingin biachahnak an tuah. Cu ruangah cun a tu bantukin Russia nih an chungah lehrulhnak a tuah hi a si.
“Imatra entry point in Gas luhpi ti lo dingin an kan kham,” tiah Gasgrid Finland nih Saturday ah khan a chim. Kan pipe in Russia gas a luang ti lo, tiin Gasum le Gazprom nih fehternak an tuah. Russia gas a dih te lai, ti kan theih caah kan i timlam diam cang. Amah gas tel lo in kan ram hi ai tawlrel kho tuk lai, tiin Gasum, Finland cozah le pumpak gas a hmangmi hna nih an chim. European ram nih Russia he gas cawk dingin min an thut lio ah euros asiloah dollars in i pek dingin bia an hren. Asinain, kanmah Russia tangka tein nan kan pek cang lai, tiin Russia nih policy a thlen mi cu Bulgaria le Poland nih an al caah, kan hnung thla in khan Russia nih a gas a zorh duh ti hna lo, tiah theih a si.
Luhhansk ah Biataktein an i Kap, Ukraine nih a nehhnungbik i an i humhakmi Luhansk pengkulh cu biatak thlakin Russia nih a kah than cang hna. Russia nih Sievierodonetsk khuapi hi lak a duh caah, a tu hi a kiangkap khuate pawl heh tiah a kah cang hna, tiah Saturday ah khan Luhansk pengkulh governor Serhiy Gaidai nih a chim. “Zing in zanlei tiang bomb in an kan kah. Zan khuadei an kan kah rih,” tiin a chim. Russia ralkap pawl hi kan hnung zarh chung kha cu an sunghnak a um pah len na in, Luhansk belte ah cun an hlawh a tling ngaingai cang. ‘A tu cu Donbas hi kan i hmaithlak cang lai’ tiin March 25 i thawng an thanh bantuk in khan, Luhansk le Donetsk pengkulh an lak khawh ah cun teinak an ngei chap than lai, tinak a si.
April laifang hrawng i Kyiv an lak khawh ti lo hnu khan, Siverskiy Donets River siseh, Lysychansk le Sievierodonetsk hna te lawng hi Ukraine nih ai humhak pengmi nichuah lei pengkulh umchun te an si cang hna hna. Zhytomyr pengkulh i Western ram pawl bomhnak hriamnaam Ukraine nih an chiahnak hmun nganpi zong kan thawhpiak cang hna, tiah Saturday ah khan Russia ralkap nih an thanh. Rili in kahmi Kalibr cruise missiles in an kan hrawhmi a si, tiin an chim. Cu an chimmi cu asi tak le tak lo theih fian asi rih lo. Black Sea kap ah a ummi Odesa pawng i Ukraine nih zinan an khonnak inn zong Russia missile nih a hrawhpiak hna, cun Ukraine Su-25 vanlawng le an drone 14 zong an kahtlak paik hna, tiah Reutuers nih a chim.
Leave a Reply