Phiapung peng Jungkyait Khuabawi Fimtawl A Si Hnu Ah Sualnak Ngeilo Mipi Tlaihkhih An Nih Tong
=========
Ayarwady ramtthen , Phiapung peng Jungkyait khuabawi fimhlawm a si hnu ah ralhrang ralkap hna nih khua chung um mi sualnak ngeilo mipi hna cu phungning lo le hramhram in an tlaih hna tiah Phiapung Ayabeda phu nih nihin April 27 ah an thanh.
” Nizaan in Jungkyait lei tlaihmi an tam, nihin ah chekhlatnak tuahding in an auhthan hna Jungkyait khuami lawng hmanh a tlawmbik minung 6 an si, dalaan hna nih NLD lei ah thazaang chuahtu hna cu kutdong sawh in an tlaihter hna. Minung 40 tiang tlaihkhih an si lai tiin thawngpang a leng, a tutiang tlaihkhih a tongmi hna hi NLD ttanhtu lawngte an si tiah theih a si.
Phungninglo le hramhram tlaih a tongmi mipi hna cu tazacuai an si lai tiah kan theih” tiin Phiapung Ayabeda phu nih an chim. April 24, zaan suimilam 9:10 ah Jungkyait khuabawi U Aye cu tualchung hriamtlai phu nih an fimhlawm hnu ah pyusawthi le tualchung hriamtlai phu kaphnihkar kahdohnak a rak chuak i pyusawthi 2 nih hliamhma an rak tuar tiah theih a si.
Thawngdamg ; Sagaing ramtthen, Minkin peng Zin Kalay khua pawng ah ralhrang ralkap khah-lah-yiah 87 in ralkap thazaang 150 tluk cu nizaan April 26 zing ah tualchung mipi vengtu phu 6 i bawm in an kah hna i SAC ralkap 21 an thih pin ah hliamtuar an tam tiah Anti- Dictatorship People Revolution Army( DRPA) nih thawng an thanh.
SAC ralkap nih cun khuate pawl an khangh i mipi hnahnawhnak an pek hna ruang ah PDF hna nih an kah hna nak hi a si.Nizaan zing Sml 8 hrawng khan kah an si i kahdohnak cu minutes 15 tluk a rau, SAC ralkap hliamtuar an tam, PDF an cycle 2 a rawk i hliam tuar um lo tein hnu an tolh kho than tiah DRPA nih a langhter.
Cu SAC ralkap hna cu DRPA, FRF, GALAXY FORCE DEPEYIN – pah-kah-phah, Sagaing PDF batallion 3, MDF le Tan Pauk tualchung mipi vengtu phufonh hna i bawm in an doh mi hna a si tiah theih a si.
Thawngdang ; Taningtarry ramtthen, Palaw peng le Dawei peng ah April 26 zaanlei in SAC ralkap le tualchung hriamtlai phu kar kahdohnak a chuak i SAC ralkap 12 an thi an motor 4 a rawk tiah tualchung hriamtlai phu hna sin in theih a si.
Myait pengkomh, Palaw peng Kadae khua pawngah nizaan April 26, zaan suimilam 8:30 hrawngah Myait in Palaw leiah a kal mi SAC ralkap motor ruun 10 cu King Cobra Force nih bomb lung 3 an puahhnawh hna caah SAC ralkap motor 7 an hliamh i cu chungin motor 2 cu a kaang i SAC ralkap 10 nak tlawmlo an thi tiah King Cobra Force nih an thanh.
Dawei peng Tabia khuakomh Maechawng khua meng 8 lamtonnak pawngah nizaan April 26 zaan suimilam 7:00 hrawngah PDF le lampi ah chekhlatnak a tuahtu SAC ralkap kar minutes 40 tluk kahdohnak a chuak, cu kahdohnak ah cun SAC ralkap lei 2 an thi hliamhma tuar an tam tiah theih a si. Cu kahdohnak ah cun SAC ralkap motor 3 chungah 2 cu a rawk i a tangmi motor pakhat cu tualchung hriamtlai phu hna nih an lak tiah tualchung hriamtlai phu hna nih an thanh.
Leave a Reply