Breaking New ; Chinland Defense Force- Hakha Nih Mipi Zulh Ding ah Ralrin Thawngthanhnak An Tuah

RALRIN THAWNGTHANHNAK

========

Hakha khuapi kiangkap ah mine chiahmi a um caah khua kiangkap lengchuah le umkal i ralrin dingin CDF Hakha nih mipi sinah thawngthanhnak tuahmi a si.

Ṭhal a chuak cang, ramlak i a ummi tisik anhnah hrawn, tiva kal, ram lengchuah le umkal i ralrin ding a si lai. Inn zuat saṭil a ngeimi chungkhar zong nih nan saṭial inn tlunpi nan timh hna tikah siseh, ramlak i kawl nan timh hna tiah siseh, ralring tein umkal ding a si lai.

Hi ralrin thawngthanhnak hi kan mipi humhimnak caah thanhmi a si. Hakha khuapi chung i a ṭhudirmi le a kiangkap i a ummi nih cun CDF-Hakha theihpinak in luhchuah ah a ṭha bik.

Chinland Defense Force-Hakha

Zualko; Ka nau, Tum Kio Cung na thawngpang theih cu ka lungsi hrim tung lo

Ngakchia zei theilo ding ah kan ruah i nanu nih na ruahnak le na dirpimi kongkhan a ka chimh tikah, ka lung na rak ka lawmh ter tuk hringhran. “Kanau, dothlennak kan luh hi thih ruah ah asilo, nun ruah ah asi “ kan ti tung! Nung bu tein kan i ton than tikcu na hmai ah ka kun te lai ee kan ti tung! Khah! Kanau Tum Kio, nangcu na ram caah na nunnak na pek cang. Na thisen man hi a lak asi lai lo. Na dawtmi Chinland par tertu na si ka nau. By Salai Johny Sangte Zaathang

Ṭah Hla, Lunun ngan dam um seh tiin. Chuah sempi le sunghno nu le pa .Chungkhat sahlawh cingla khuami nih. Thlaza campiak in zingnu sin . An rak nawl len riangmang tawn kha. Pasal ram cah cun tiin thloh khawh lo. Nunnak siang in ral ṭhat cuh. Hawi cio bang khua le veng ah. No lio lawmh le caan rel kha. Na tum tah len ve ko lai kha Ṭa Hniang. Thaizing ah zei maw can lai hngalh lo.

Thihnak thlan khur pawng dir in. Thir thir phang phang in e mi fa hniang. Ram ca tiin kam seh len tawn lai mu. Lairawn khua zung dawh ah e. Senri par dawh te bang par in. Cuanh len zoh lenmi pasal ṭha. Dur khuai le dar khuai bang khuai hna. Thinlung mei hma bang linh hi. A dai kho te hnga maw ṭa hniang. Dai tein i din kun tiin biazai hloi in.

Na liam lungsia a herh tuk lai ruahah. Dai dam in naa din kho hnga maw. Tuarnak biafang tel hun chim ta law. Lungsak a um deuh hnga maw fa dawt. By- Nunu Biazai

A thihnak A Kong Lam, SAC Ralkap Sniper Kut In CDF- Thantlang Ralkap Salai Tum Kio Cung A Nunnak Liam, Tuni, April 12 zaanlei slm 6:30 hrawng ah CDF- Thantlang ralkap Salai Tum Kio Cung (kum 18) cu SAC ralkap Sniper kut in a nunnak liam tiah kan theih.

Chunhnu slm 2:30 hrawng ah security a la liomi CDF- Thantlang, Zahnak Battalion ralkap Salai Biak Peng (kum 16) Sihhmuh khuami cu SAC ralkap nih Sniper in an kah i a khup ah an khen nain a nunnak tu cu a him i,kuan zong nih a ruh a khen lo caah a kuan an chuah piak khawh cang.

A nunnak liammi Salai Tum Kio Cung hi Tlangkhua khuami Thantlang ummi asi i ,Thantlang ah High School cachimtu Sayamah Ngun Thim i a fapa a si, Zaanlei slm 6:30 hrawng ah JMBC Biakinn hmai ah SAC ralkap sniper kut in a nunnak a liam hi asi.

Tuni ah Thantlang khuachung ah kaphnih kahdohnak ngaingai cu achuak lo nain SAC ralkap nih a thli in Sniper in an kahmi hna si tiah kan theih.

Myanmar Hrambunh A Si Mi Lisu Party Le Chinese Communist Party Ton Biaruahnak An Ngei, Lisu National Development Party ( Duu Lay Party) president U Shwe Min cu tuni chun lai ah Central Committee of the Communist Party of China, Department of International Affairs, Director of Southeast Asian Affairs a si mi Mr. Zhao Qiang  a phu pawl hna he online in biairuahnak an ngeih nak kong cu Lisu Party in theihternak an tuah.

Mah ton biaruahnak ah Lisu National Development Party le Chinese Communist Party  kar ah pehtlaih nak a that khawh nak hnga , China-Myanmar pehtlainak lei , China ram ah tlaih a tong mi Myanmar ram mi kong kau , ram chung daihnak kong kau, Ramri a that lonak kong kau kong le chawleh harnak kong kau ah ton biaruah nak an ngei tiah theih a si.