Kawkareik Peng Ah SAC Kuttang BGF Sakhan Pakhat An Lak+Thawngpang Tha Dang
=================
Karenni ramkulh Kawkareik peng SAC kuttang BGF sakhan pakhat kan lak kawh, hriamnam zong kan lak tiah Lion Battalion Commando nih October ni 23 ah cathanh an chuah tiah theih a si. October ni 21, Kawkareik ah zing suimilam 6 in kahdohnak a chuak i SAC kuttang BGF sakhan pakhat cu zaanlei suimilam 7 hrawngah kan lak khawh tiah an langhter.
An hriamhna an lak pinah BGF ralkap pakhat cu a nungin an tlaih tiah theih a si. Cu kahdohnak cu KawThoolay Army Lion Battalion Commando, Eagle Brigade, Justice Soldiers le tualchung hriamtlai phu fonh hna nih an tuahmi si tiah theih a si.
Kayin ramkulh, Myawaddy thlanglei KNU brigade 6 hmunram chung ah hmunhma rilonh in a lutmi SAC ralkap le Kobra column phufonh karah October 22, zinglei 9 30 hrawngah kaphnih kar kahdoh a chuak tiah theih a si. Hmunhma rilonhnak a tuahtu SAC ralkap hna nih cun zinglei in zaanlei tiang hriamngan hmang in kahdohnak an tuah caah KNLA battalion 27, Cobra column, brigade ṭatkhuai 2 nih lehrulhnak tuah in kahdohnak an tuah ve. Kaphnih kar i kahdohnak ah SAC ralkap chungtel 4 an thi, Cobra column phufonh lei hliamhma tuarnak umlo in hnu kan tolhkho tiah Cobra Volumn nih an thanh tiah theih a si.
Mandalay khua Thonebo Mingalar hlei pawngah SAC ralkap zulhmi Faw motor pakhat cu October 23 zing ah Padeta bomb kan puah hnawh hna tiah Generation Z Power-GZP (Mandalay) nih cathanh an chuah tiah theih a si. SAC ralkap 15 nih zulhmi Faw motor pakhat cu GZP Mandalay le Patheingyi peng tualchung hriamtlai phu hna i bawm in padeta bomb puahhnawh dingah an tawlrel mi a si tiah an cathanh ah an langhter. Cu bomb puahhnawh nak in SAC ralkap 15 chungah hliamtuarmi an tam pinah minung 4 cu motor cungin an tla i an thi tiah theih a si.
SAC ralkap kuttang um khah-lah-yiah 1 in ralkap pakhat nih CDM cawlcanghnak a tuah tiah Pekhon peng tualchung hriamtlai phu battalion 2 nih October 23 ah cathanh an chuah tiah theih a si. CDM cawlcanghnak a tuahtu ralkap cu Pekhon peng tualchung hriamtlai phu, battalion 2 nih bawmhchanhnak an pek tiah theih a si.
“Nizaan in a rak zaam, hriamthil cu a putlo, a mah himnak ding in a rak zaam mi a si, tualchung hriamtlai phu lei nih bia halnak le checkhlatnak zong an tuah” tiah theih a si. A luancia October 17 lio ah tatmah 66 kuttang um khah-lah-yiah 14 in SAC ralkap minung 2 zong Pekhon peng tualchung hriamtlai phu battalion 2 sin ah CDM cawlcanghnak an rak tuah bal cang.
SAC ralkap kuttang riantuan duhlo mi hna nih hriamthil he CDM cawlcanghnak nan tuah a si ah cun sing 50 kan in pek hna lai tiah Pekhon PDF nih an thanhmi ah an langhter chih tiah theih a si. Crd-The Chin Post
Relchap, Myaing Peng Linkadaw Khua Khanghpiak An Ton Caah Khuami 3000 Renglo An Zaam, Magway ramṭhen, Myaing peng Linkadaw khua cu SAC ralkap nih October 22 ah an lut i khua mi inn le lo an khanghpiak hna caah tualchung mi 3000 leng mah umnak kaltak in ralhrial dirhmun an phan tiah tualchung mi nih an chim tiah theih a si.
Pathein-Monywa motor lampi kam ah ummi Linkadaw khua cu SAC ralkap nih October 22 ah khan an lut i October 23 zinglei ah khuachung mei kangh kan hmuh hi a si tiah Linkadaw khuami nih an chim. Linkadaw khua cu inn 1000 hrawng an umnak khua pakhat a si i, inn zeizat an khangh ti bel fiang tein theih a si rihlo, khuami 3000 leng an zaam tiah a chimchap. UNOCHA nih October 1 ah cathanh an rak chuahning ah Magway ramṭhen chung buaibainak ruang ah tualchung mi 101,300 nih mah umnak hmun kaltak in ralhrial dirhmun an phan tiah an langhter.
Myawaddy Khuachung Ah BGF 100 Hrawng An Hriamtling He An I Chawk, Kayin ramkulh, Myawaddy khuachung ah October 23, zinglei in BGF hriamtlai phu hna cu an hriamtling he khuachung hmunkip ah an i chawk tiah Myawaddy khuachung ummi pakhat nih a chim tiah theih a si. “Khuachung ah BGF phu hna cu Myattamon sizung in kee in an ra, an tam taktak i minung 100 hrawng an si lai. Hriamthil an i put leng ah ruksai khat in thil an i phorh, khuachung ah a hlan bantuk in thawngpang a tamlo, a dai ngai ko, motor in aa chawkmi zong an um ko” tiah a chim.
October 21, zinglei in Kawkareik ah SAC ralkap sakhan le zung cheukhat kahdoh an ton hnu in Myawaddy khuachung zong ah zung le lam cheukhat phih khamnak le checkhlatnak an tuah tiah tualchung mi nih an chim. Kawkareik ah kahdohnak a chuah thok zaan lei in BGF phu hna cu Kawkareik, Myawaddy, Hpaan ah an umter hna hleiah raltuk ding ah timh cia tein an um ter hna tiah hriamtlai phu hna he naihniam in a ummi Kayin khuami pakhat nih a chim.
Myawaddy thlanglei ah ummi Laykaekaw zong ah October 22, zaan suimilam 12:00 ah SAC ralkap nih vanlei in bomb an rak thlak tiah Myawaddy khuami pakhat nih a chim. Crd-The Chin Post
Leave a Reply