SAC Ralkap In CDM A Tuahmi Hna Lak Ah SAC Ralkap Lutlai Nih Fialmi An I Tel
============================
Atu hnuah SAC ralkap in CDM a tuahmi hna cu ṭha tein chekhlatnak tuah hnu lawngah cohlan ding a si tiin ram a buaika in CDM a rak tuahmi ralbawi hna nih KNU sinah ralrin peknak an ngeih hna tiah theih a si.
CDM a tuahmi sen hnih (Corporal) Than Naing Oo nih “Atu hi thawng kan theih ningah meithal zun 1 an pek hna i CDM va tuah tiah an fial hna ti a si. Cu bantuk pawl cu cohlan awk an ṭha lo. An thluak chungah thilṭhalo an rawnh cia hna. An hnulei tuanbia ṭha tein hlathlai le hal a hau. Captain pa bantukin an um than ahcun zeitindah kan tuah hna lai” tiah a chim.
Hi zawn ah Captian pa a timi hi Major Myo Min Thun a si. Anih hi CDM a tuah in Thailand lei ah a zam i a hnuah Non-CDM ah a kir ṭhanmi a si. Corporal Than Naing Oo cu SAC ralkap khah-lah-yiah 54 in meithal zun 2 le kuanfang zeimawzat he KNU sinah CDM a tuahmi a si i a chungkhar he ramri ah an um.
October 7 ah khan CDM in Non-CDM ah a kir ṭhanmi hna kongah CDM tuah a duhmi a bawmtu bu hna nih cathanh an chuah cang i cu an cathanh chungah cun a CMD tuah a duhmi hna cu ralring tein hlathlai hnu lawngah cohlan an si lai tiah an langhter.
CDM a tuahmi a bawmtu bu hna nih CDM ralkap le an chungkhar 80 hrawng cu rian an hmuh khawhnak ding kong, an fimcawnnak kong, pawcawmnak kong, umnak, din-ei le ngandamnak kongah an bawmh cuahmah lio hna tiah theih a si.
RELCHAP, Fa 7 Ngei Hringtu Pa Pakhat Amah Le Mah Hri Awh In A Nunnak Ai La, Mandalay ramṭhen, Meiktila(မိတ္ထီလာ) peng khua pakhat ah October 13, zinglei ah pa pakhat cu amah le mah hri awh in a nunnak ai la tiah Pyitaya(ပြည်သာယာ) mino mi bawmtu phu nih an chim.
Meiktila(မိတ္ထီလာ) peng Htamunekan(ထမုန်ကန်) khuakomh, Ngyuangpinta(ညောင်ပင်သာ) khua ummi kum 50 tluk pa pakhat cu a mah le mah hri awh in a nunnak ai lak caah a thi tiah Pyitaya(ပြည်သာယာ) mino mi bawmtu phu in ṭuanvo ngeitu pakhat nih an chim. “An inn hmai thingkung ah hri in ai awk, kum 50 hrawng a si lai tiah zumh a si, fa 7 a ngeimi hringtu pa pakhat a si. A fa upabik hi kum 15 hrawnglawng a si rih, a nupi zong a nung dammi a si ko, amah cu midang Caw inn hngaktu a si tiin kan theih” tiah a chim.
Htilin Ni Tlaklei Khua Ah Sualnak Ngeilo Tualchung Mi 4 An Kut Hnu Lei Hri Ṭem In Mei Khangh An Tong, Magway ramṭhen, Hṭilin nitlak lei khua ah sualnak ngeilo tualchung mi minung 4 cu an kut hnulei hri ṭem in SAC ralkap nih mei khangh in an thah hna tiah tualchung hriamtlai phu nih an chim.
September 19, Htilin pengchung ah SAC ralkap le pyusawhṭi phufonh minung thazaang 100 hrawng cu rallam sial in an lut i, Angyiadaw(အညာတော) khua mi hna umnak inn 42 cu an khangh, an kir lei ah an khangh cianak inn pakhat chungah a kut hnulei hri ṭem bu in mei khangh a tongmi tualchung mi minung 4 ruak kan hmuh tiah Yaw- YDF nih nihin October 13 ah cathanh an chuah.
SAC ralkap nih an khanghmi khua hna cu, Angyiadaw(အညာတော) khua, Kanta(ကံသာ), Ponna(ပုဏ္ဏား), Aungtaung(အောင်းတောင်) khua telhin Htilin ni tlaklei he khua 6 an khangh cang. Ni tlaklei khua in a tlaumi hna cu Hein Htet (kum 18), Aung Phyo (kum 14), Ngyo Min (kum 17), Zin Min (kum 28), Zin Htun(kum 33), Maung Aye (kum 57) hna an si tiah an cathanh ah an langhter.
Gwa Peng Ah Pengkulh Sakhan-hmu Motor A Khalh Lio Ah A Motor Kaang, Rakhine ramkulh, Gwa peng October 12, zinglei suimilam 11:00 luan hrawng ah pengkulh sakhan-hmu nih ai citmi motor cu a kaang tiah tualchung mi nih an chim. Gwa peng Kyeintali(ကျိန္တလီ) khuachuah Aung Tu Hein petrol zuarnak dawr lawnh a phanh ah a khalh liomi motor cu kangh hram ai thawk i, a motor ning in a kaang tiah tualchung mi pakhat nih a chim.
“A motor a lu lei in kangh hram ai thawk i motor chung ah cun pengkulh sakhan-hmu telhin minung 5 hrawng an i tel. Cu motor cu sakhan-hmu nih a khalh nain, thawngdik hi thuhnawh an i zuam, sakhan-hmu cu cuka hmun a phanhnak a sau rihlo caah a min zong kan thei lo” tiah a chim chap. Motor a kaangmi hmih ding ah Kyeintali(ကျိန္တလီ) mei that phu hna cu an phan na in, an phanh ah cun motor cu vutcaam ah a cang dih cang tiah tualchung mi nih an chim.
Ngakchia Tampi Nunnak A Liamter Tu Maiden Sii Company Nih Chuahmi Khuhsi Chauhtilo Ding In India Nih Nawl A Chuah, Africa, Gambia ah ngakchia tampi nunnak a liam kong he pehtlaiin khuhsi a chuahtu India ram sii company nih an chuahmi ngakchia khuhsi cu chuahtilo ding in India ram ngandamnak lei in ṭuanvo ngeitu hna nih October 13 ah nawl an chuah tiah theih a si.
India hrambunh Maiden sii lei company nih a chuahmi khuhsi phun khat hi Gambia ram ah a luancia thla chung ah ngakchia tampi Kal a hrawh i, ngakchia 70 tluk hrawng an nunnak a rak liam mi kongah pehtlaihnak a ngei tiah WHO nih ralrin peknak a tuah hnu ah, a tubantuk in India ram nih nawl an chuah hi a si.
WHO nih ralrin peknak an thanhmi chung ah ai telmi khuhsi hna cu Promethazine Oral Solution, Kofexmalin Baby Cough Syrup, Makoff Baby Cough Syrup and Magrip N Cold Syrup hna an si. Maiden sii lei company nih an chuahning le testnak an tuahmi ah dingrep phung an buarnak hmuh a si tiah India ngandamnak lei nawl ngeitu hna nih an chim. Cu ngakchia khuhsi hna cu Gambia ram lawngah silo in hmundang le ramdamg zong ah phungninglo in an zuar tiah WHO nih ralrinnak an pek hna.
Myait-Htawai Lampi Ah SAC Ralkap Motor Kahdoh An Tong, 7 An Thi, Myait-Htawai lampi Boat(ဘုတ်) tlang ah SAC ralkap motor ruun cu kahdoh an tong i SAC ralkap 7 an thi tiah theih a si. SAC ralkap motor ruun 9 cu October 12, zaanlei suimilam 5:45 hrawng ah tualchung hriamtlai phu nih hriamngan, hriamhme hmang in an kahdoh hna caah SAC ralkap motor 2 hrawhpiak an tong i ralkap 7 an thi, cun 4 nih hliamhma an tuar tiah tualchung hriamtlai phu hna sin in theih a si.
“Kahdohnak ruang ah SAC ralkap lei a thimi zat cu fiang te in theih ding ah a har ngai, tualchung mi hna nih an chim ning ah SAC ralkap 7 an thi i 4 nak tam nih hliamhma an tuar tiah an chim” tiin tualchung hriamtlai phu chungtel pakhat nih a chim.
Myanmar Ram Ni Khat Chungah Covid Zawtnak Hmuhthar Mi 340 Leng An Phan, Pakhat A Nunnak A Liam, Myanmar ramchung, nikhat chungah Covid-19 zawtnak a ngei tiah fehter mi mizaw thar minung 340 leng an phan i minung pakhat a nunnak a liam tiah SAC ralkap kuttang um ngandamnak lei vuanci zung nih October 12, zaan ah thawng thanhnak an tuah.
A luancia suimilam 24 chung ah Covid-19 zawtnak an ngeih le ngeihlo minung 11,350 cu checknak an tuah hna, cu chung ah cun Covid-19 zawtnak hmuh thar mi mizaw 346 an si caah zatuak in 3.05% nih Covid zawtnak an ngei tiah SAC ralkap kuttang um ngandamnak lei vuanci zung nih cathanh an chuah.
Nattalin Kahdohnak Ah PDF Nih SAC Ralkap 2 An Thah Hna, Pago ramṭhen, Nattalin(နတ်တလင်း) peng ah SAC ralkap le PDF kahdohnak a chuak i SAC ralkap 2 an thi, tiah theih a si.
Nattalin peng Karen Sinshwe(ကရင်ဆင်ဆွဲ) khua in Kyetmanet(ကြက်မနက်) khua lei ah a kalmi SAC ralkap cu, October 11 zinglei sml 8:40 hrawng ah khuate 2 karah PDF nih an kah hna caah zanlei sml 2:00 hrawng ah kaphnih kar kahdohnak faak a chuak i SAC ralkap 2 an thi, tiah theih a si.
Cu ni zanlei ah SAC ralkap lei bawmtu tam tuk an rat hleiah, hriamnam an i thlau tuk caah PDF cu hnu an kir ṭhan. Zan sml 10:30 hrawngah Karen Shinshwe khua ah umhmun a khuarmi SAC ralkap le PDF kar kahdohnak a chuak ṭhan, tiah theih a si. Cu kahdohnak cu Tharyarwaddy pengkomh Battalion 3801 Companny 2 Phoenix DF le Companny 4 Phoenix DF hna i bawm in an tuahmi a si tiah theih a si. Crd-The Chin Post
Leave a Reply