Min Aung Hlaing Nih Tlangcung Hriamtlaiphu Sawmnak Daihnak A Tuah Mi Phenah Theihter Nak
Hramhram in uknak a la tu SAC ralhrang Min Aung Hlaing nih ram piumpi daihnak caah tlangcung hriamtlai phu pawl i, hruaitu pawl he tonbiaruah sawmnak bia a chim hnu ah Tlangcungmi hriamtlai phu hna ralkap sakhan pawl kahdoh ti lo ding in April ni 22 ah SAC ralhrang nih cathanh an chuah.
SAC ralhrang Min Aung nih tonbiaruahnak sawmnak a tuah lio caan le ram daihnak kong tonbiaruahnak ngeih lo caan, caan kar lak ah SAC ralhrang ralkap sakhan, headquarters pawl cu kahdoh ti lo dingin SAC ralhrang nih theihter ralring peknak cathanh an chuah tiah theih a si. Nan kah doh a si ah cun a herh ning in dantat lehrulh nak kan i pek hna ti zong in cathanh ah an tial chih tiah theih a si. Crd-Khit Thit Media
Uknak lak Hnu in Nu le Ngakchia 290 An Thi Cang! SAC nih uknak an lak hnu kumkhat reng lo chung ah SAC Ralkap kut in minung 1,673 an nunnak a liam cang i, cu chung ah nu le ngakchia 290 an i tel, tiah NUG Ministry of Women, Youths and Children Affairs nih a thanh. Uknak lak hnu in April 11 tiang ah nu 156 le ngakchia 133 an nunnak a liam cang i, SAC ralkap kut in a nunnak a liam mi dihlak chung ah zatuak in 17 (17%) a si. SAC ralkap kut in a nunnak a liam mi chung ah hin mino a tam cem an si.
A nunnak a liam mi an tam cemnak hmun hi Sagain ramṭhen ah a si i, Chin ramkulh le Kaya ramkulh chung zong ah a nunnak a liam mi an tam ngai, tiah nuhrin covo lei a cawlcangtu phu hna nih an chim. SAC in chimphuannak nawlngei Zaw Min Thun nih cun NUG nih a thanh mi cazin hi a dik mi a si lo, anmah duh poh in an thanh mi a si, tiah a chim ve.
Muangtaw Ah AA Ralkap Ah Ruah Mi Pahnih Kum 10 Thongthlak Ding In Nawl Chuah, Rakhine ramkulh Muangtaw khuapi ah ‘Arakan Army ralkap he an i pehtlai’ tiah lunghrinh in tlaih a tong mi pahnih cu April 21 ah Muangtaw pengkomh SAC biaceihzung ah kum 10 thong thlak ding in nawl an chuah, tiah an chim. Muangtaw khuapi ah Ko Ngi Ngi Niang le Muangtaw peng Ngwe Tuang khua mi U Aung Hla Ting hna cu phunrelnak 50 (အကြမ်းဖက်မှု တိုက်ဖျက်ရေးဥပဒေပုဒ်မ- 50) in dantatnak pek an si, tiah Ko Ngi Ngi Niang Sihni U Oo Khin Win nih a chim.
Atu hi anmah pahnih cu Bo Thi Tuang thonginn ah an chiah hna tiah a chim chap. Ko Ngi Ngi Niang cu a luancia March 2020 chung ah Muangtaw – Bo Thi Tuang mawṭaw lampi ah bomb a hmanh, tiah lunghrinh in tlaih mi a si. A phone cu SAC ralkap nih an checkpiak i amah he hmunkhat ah U Aung Hla Ting zong, AA meithal tlaih mi hna he hman ai thlak mi an hmuh caah tazacuai ve a si. Ko Ngi Ngi Niang(ညီညီနိုင်) i a Upa Ko Ko Niang (ကိုကိုနိုင်) nih cun ka naupa hi AA he pehtlaihnak a ngeih lo caah biaceihzung nih nawl an chuah mi cu ka cohlang kho lo, tiah a chim.
“Ka naupa cu sui sernak ah rian a ṭuan i a chungkhar a zohkhenh hna. AA ralkap chungtel zong a si lo. Hmantlak an hmuh mi zong hi Photoshop in anmah tuah chom mi a si kho ko. Atu bantuk in nawl an chuah mi cu kan cohlang kho hrim lo, biaceihzung sang deuh ah( အယူခံ) court zong kan ong ti lai lo. Zeihmanh zong a hlei ti lai lo,” tiah a chim. Rakhine ramkulh ah SAC ralkap le AA kahdohnak pehtlai in tlaih a tong mi minung 100 leng cu SAC ralkap nih uknak lak hnu in an thlah cang hna nain minung 20 hrawng cu atu tiang an thlah rih hna lo, tiah tualchung thawnglatu hna sin in theih a si.
Leave a Reply