Russia Hawikom Belarus Vanlawng Pakhat Nih Naypyidaw Ah Hriamnam A Vun Pek
Russia hawikom ṭha simi ram, Belarus ngeihmi thil phur vanlawng pakhat cu Febuary 27 ah khan Naypyidaw ah a ṭum i nizaan March 3 ah khan a kir ṭhan, tiah theih a si. Cu Belarus vanlawng cu ‘Boeing 737-8ZM’ a si i Belarus khualipi Minsk Airport in a vun i thawh i Dubai ah ai dinh khawh in Naypyidaw ah a rak ṭum, tiah Irrawady nih a langhter.
Cu Belarus vanlawng cu Naypyidaw ah SAC nih phaisa phar sernak ding ah an hman ding mi catlap le seh thilri le hriamnam a van chantu si, tiah theih a si. Belarus vanlawng cu Naypyidaw ah ni 5 chung ai dinh hnu in Nizaan March 3 ah Naypyidaw in Saudi Arabia khualipi Riyadh khaupi ah a ṭum i, cuka cun Belarus khualipi Minsk lei ah ai thawh, tiah Vawleicung hmunkip vanlawng Khualtlawnnak zohfeltu Flightradar 24 nih a langhter.
Russia Ralkap 7,000 Leng An Thi Cang!
Febuary 24 in March 2 tiang kahdohnak ah Russia ralkap 7000 leng an thi cang i za reng lo kan tlaih hna, tiah Ukraine President i ralkap ruahnak petu pakhat nih a chim. Russia nihcun kan ralkap 498 lawng Ukraine ramchung ah a thi i minung 1597 hliam an tuar, tiah a voikhatnak bik an ralkap thi le hliam cazin ah cun an langhter ve i Ukraine ralkap 2870 leng an thi i 3700 leng hliam an tuar, tiah Russia Defense Ministry nih chim ve.
Russia President Vladimir Putin nih Ukraine nichuah lei ah raltuknak tuah dingin February 24 ah nawl a pek bak in Russia ralkap pawl cu Ukraine thlanglei tiva kam ah an kai i Ukraine khua tampi cu hriamngan (missile) in an kah colh. Russia le Ukraine tuknak ruangah Ukraine mipi sing 8 leng nih an ram an chuahtak cang i a tam deuh cu Poland ram le Romenia ram hna ah an i dor hna. Ukraine mipi ralzaam pawl cu EU nih kum 3 chung i dornak nawl a pek hna.
Thailand Mino 2000 Leng Nih Ukraine Bomh Dingah Min An Pek
Russia le Ukraine an i doh lio pi ah Thailand mino 2000 leng nih cun Democracy duhnak langhter in Ukraine bomh in Russia ralkap pawl doh pi dingah Bangkok um Ukraine Embassy ah an min an i pee tiah theih a si.
Ukraine bomh dingin Thailand miralttha pawl hna lak ah Thailand ram cung lei ralkap hlun minung pakhat aa tel ve tiah theih a si. Cheukhat nih online in an min an i pee tiah theih a si i, cheukhat cu Ukraine Embassy ah va kal in hmaitonh in an min an i pe tiah theih a si. Hmaitonh in a min aa pee mi hna lak ah Thailand cunglei ralbawi hlun Hanaphong Phongpai zong aa tel ve tiah theih a si.
Hanaphong Phongpai ” Ukraine nih cun Russia an do. Doh dingah Ukraine mipi cu zalonnak Democracy a duh tu an si. Kan nih Thiland mi zong Democracy duhtu kan si bangin Ukraine ram caah zei dah ka tuah kho timi hi ka ruat theu ton.
Cu ruangah cun Democracy duhnak langhter nak caah raldo bawmh khawh dingah min ka pek. Russia nih Ukraine a doh mi hi a dik lo tiin ka hmuh. Aa thawk kaa in ralkap hmunhma lawngah doh dingin an chim nain, a tu ah cun Russia nih Ukraine mipi zawn ruat ti lo in,
Sii-inn le sianginn hna zong bom in an kah. Hi ruangah hin Ukraine bomh dingin bomhduh chanhnak ka ngeih hi a si. Thih na tih lo maw tiin an kan ti a sinain thih hi ka tih ve ko. Decemoracy a khel ding kan si.
Ukraine mipi sinah Chim ka duh mi cu nan mah lawng si lo in mi tampi nan lei ah kan um. Vawleipi hna nih kan i philh hna lai lo i Nan mah bomh duh ah mi tampi kan um. Kan mah cu super power ngei kan si lo nain Kan i bomh hna i tangrualti nak kan ngei hna lai.
Nan mah bomh dingin kan i zuam cio cio hna lai i, rak kan hngak rih hram ko uh” tiah a chim. Bangkok hrambunh Ukraine Embassy palai nih ” Ukraine bomh duh ah min a pe mi pawl cu raltuk cawnnak ngei le ngeih lo ding timi cu thawngfiang tein theih nak dingah Email in chawnhbaik khawh a si ” tiah a chim.
Leave a Reply