Malaysia Riantuantu Auhnak Nawl Cu Kham Chung A Si!!
===================================
Malaysia hrambunh Kawlram mi bomchantu phu in U Soe Win nih Maylaysia ramah Kawlram mi riantuantu telin riantuan soknak nawl cu August ni 15 in ni 30 tiang kham a si tiah a chim. Maylaysia ram ah Kawlram riantuantu thlahnak cu kum 2020, March thla thawkin Covid ruangah kham a si i, A tu ah kum 2020, March thla ni 18 hlan ah auh mi riantuantu hlun pawl lawng hi usa peek an si.
Zeiruangah ti a si ah cun Malaysia zongah ramkhel sining aa ning cang lo. A tu lio cu phung ning loin a lut mi riantuantu an tlaih cuahmah hna lio zong a si. Phung ning loin riantuantu an um lo tikah, Zeitluk in dah riantuantu pawl an zawr cang timi theih a si tikah riantuantu auhnak nawl peek a si te lai. Tlaih a si hnu ah riantuantu pawl cu buaktlak in an tuak lai i a tu ah minung pa zeizat dah an um.
Riantuantu a zawr mi minung pa zeizatdah an si. A tu zatuak in riantuantu a tang mi minung pa zeizat dah an si. Zei ram in dah a ra mi an si. Zeibantuk sector dah a biapi bikin chiah a herh. Kha bantukin tuanvo an laak hnu ah reituantu cu auh khawhnak nawl peek a si te lai tiah theih a si. Malaysia cozah lei nih rianngeitu hna caah riantuantu thar auh khawhnak nawl (riantuan soknak nawl) cu zeitik caan ah dah nawl peek a si than te lai timi theih a si rih lo.
Cu tin cun Malaysia ah riantuannak nawl soknak cu cozah zung lei ah a thapthap in chuahpi a si lai caah riantuantu auh than khawhnak (soknak) cu kum 2023 tiang a phan kho mi a si. A tu ah Kawlram mino hna cu Thailand le Malyasia ah phung ning lawng in si loin phung ning loin a phan mi zong tampi an um. Malaysia ram ah tu lio ah tlaihkhih a tam ngaingai i tanglam in a lut mi lawng si loin Malyasia ram a phan cia mi phung ning sinak a ngei lomi zong an tlaih cuahmah hna lio pi a si tiah kan theih.
Cu ruangah a tubantukin riantuantu thar auh ding soknak cu kham a si caah Malaysia ram ah phung ning loin le tanglam in a lut mi an tam deuh kho tiah kan theih. A fawi nakin cun mah tiin chim khawh a si. A tu lio ah kan Kawlram sining tih a nung chinchin cang. Cu bantukin cun tih a nun chinchin cang caah mipi harnak tampi a phunphun in kan tuar ruangah voi dang nakin tanglam in Malaysia ah riantuan dingin aa thawh mi kan tam deuh chinchin te lai.
A si nain pakhat khat a si sual ah cun UN bomhhal an ngah. A sinain cu bantukin tanglam in a phan mi pawl cu UN nih tuanvo a laa theng hna lo tiah an chim. Cu pinah Malaysia nih ramdang mi riantuantu auh nak nawl thar cu a ra lai mi ah thlen in hman an i timh tiah theih a si.
A tu hi cozah lei nih ceihhmainak an ngeih cuahmah lio a si caah hnatlaknak an chuahpi rih lo tiah theih a si. “Malaysia ram ah Cinthlaknak le culture ah rian atuan mi riantuantu minung thazaang hi an tlawm ngaingai. An tlawm tik ah oil palm, rubber tibantukin riantuanak thazaang a der ngaingai te. An kuat ton ning bantuk in ramdang sinah an kuat khawh lomi pawl tampi a um. Thilchuahnak a tlak caah ramdang ah kuat mi thil a tlawm.
Cu tin cun minung thazaang a der i riantuantu an tlawm tikah a bik in khan bantuk riantuan dingah ramdang mi auh an si te lai. Cinthlak lei a si ah inn sak nak lei zongin riantuantu auh an si te lai. Cu ka ah rian a tuan mi ramdang mi hna zong phung ning loin a lut mi an si te lai. Cu tiin phung ning loin a lut mi pawl kha phung ning in an tuan ko lai. Malaysia ah Kawlram mi raintuantu hna hi tam bik cu Rawleinak dawr le sehzung tbk; hna ah a tuan mi an tam i kha bantuk ah a tuan mi cu an tlawm te tiah theih a si.
China le Thailand Sin Gas Zuarnak In SAC Nih US Dollor 800 Million A Hmuh!, A luancia April -July thla tiang ah Myanmar ram chung chuak Gas cu SAC nih China le Thailand sin a zuarnak in US Dollar 800 million a hmuh, tiah August 25 ah SAC ngeihmi Myanmar Alin media nih a langhter.
SAC nih a bik in phaisa a hmuhnak Myanmar Oil And Gas Enterprise(MOGE) cu phihkharnak tuah ding in Myanmar Democracy lei cawlcanghnak a tuahtu phu hna nih nawlnak a tuah cuahmah lio ah atu bantuk in SAC nih an phaisa hmuh zat media ah a vun thanh.
SAC nih tukum a hmuhmi phaisa hi nikum a hmuhmi nakin US Dollor 60 million in a tam deuh. Myanmar ramchung Gas chuahnak hmun a si mi Yar-Tta-Na, Yee-Tta-Khun, Shwe le Zaw-Tih in an chuahmi a si i, a bik in China le Thailand sin ah a zuar.
US cozah zong nih uknak latu SAC phaisa hmuhnak bik a si mi MOGE rianṭuannak cu phihkharnak tuahpiak ding in SAC phaisa hmuhnak a tarlanghtu Justice For Myanmar nih nizan August 26 ah nawlnak an tuah. Cun ramchung ramleng zatlangbu 500 renglo zong nih MOGE cu phihkharnak tuahpiak ding in US President Biden sin ah ca an rak kuat.
Yar-Tta-Na, Yee-Tta-Khun, Shwe le Zaw-Tih hna ah Thailand cozah ngeihmi PTTEP Company nih Gas cu a chuah i Thailand le China nih an herhmi Gas zatuak ah 14 % a hmuh piak hna, tiah Reuters nih cun a tarlangh.
Russia Ralkap Thazaang Minung Singkhat Leng Kan Chap Lai – Putin!: Russia Ralkap thazaang cu minung singkhat leng in kan chap lai, tiah president Putin nih nawl a chuah. Ukraine tukdohnak ruang ah Russia ralkap cu an thih ngai ca ah a ra lai mi kum chung ah Russia ralkap thazaang minung 137,000 leng kan chap lai, tiah August 25 ah Putin nih minthutnak a tuahmi cu Russia cozah media hna nih an thanh.
Atu bantuk in Putin nih ralkap thazaang chap ding in nawl a chuahmi hi, thla 6 a rau cangmi ukraine tukdohnak ah a thi mi ralkap hna ai-awhter duh ah a si lai, tiah hlathlaitu hna nih cun an chim. Ukraine ram tuknak ah Russia ralkap a thimi le aa hliammi minung 80000 renglo an um cang, tiah US nih cun a thanh.
Yangon Khuapi Chung Myo U Kalar Sang Khuabawi Zung Bomb Puahnak Ah Minung 4 An Thi + Thawngpang Dang, Yangon khuapi, Myo U Kalar(မြောက်ဥက္ကလာ) peng No.12(ဌ) sang khuabawi zung cu nizan August 26 zan sml 9:09 ah Guerrilla phu hna nih lam hlat kut hmehmi bomb in kan puahhnawh hna, tiah Union Myanmar Civil Defense – UMCD sinin theih a si.
Cu bomb an puahnak khuabawi zung cu Waybaki le Hninsi(ဝေဘာဂီနှင့် နှင်းဆီ) lam palik sakhan pawng ah a ummi a si. Khuabawi zung chung ah thawngpang hlathlaitu, tiah ruahmi cilvil thuam in an um lio ah bomb puahhnawh an tong, tiah theih a si.
Cu bomb puahnak ah cun Union Myanmar Civil Defense – UMCD le anmah he ṭangṭi mi Rawt Malan HpyenLa – RMH hna he kan i bawm, tiah UMCD nih cathanh an chuah. Khuabawi zung bomb an puahhnawh dih in mizaw phortu motor le SAC ralkap cu khuabawi zung lei ah an kal i, Waybaki lam hrawng vialte cu an kham dih. Mi chokvai hna zong check hlatnak an tuah hna, tiah theih a si.
Wundwin Peng Ah SAC Ralkap Motor Bomb Puahhnawh Ruangah Ralkap 4 An Thi: Mandalay ramṭhen, Wundwin peng Hlawpin khua pawng ah nizan August 26 zing sml 9:00 hrawng ah SAC ralkap motor cu, bomb puahhnawh a ton caah ralkap 4 an thi, tiah PDF nih an langhter. August 26 ah Meikhtilar(မိတ်ထီလာ) pengkomh Wundwin peng Hlawpin khua pawng ah SAC ralkap motor bomb puahhnawh a ton caah ralkap 3 an thi, 4 hliamhma an pu i, sii-inn ah an kalpi hna.
Bomb puahhnawh an tonnak hmun ah SAC ralkap hna an taksa pelpawi le an thisen lawngte a si ko. Ralkap motor hnu in a kalmi tualchung mi pakhat nih, motor chung ah a thimi cu an i tlar ko, tiah a chim. Hliamhma pumi 4 chung ah pakhat a thi chap, tiah PDF nih cun an langhter.
Ceikhtu Ah Humhimnak A Lami SAC Ralkap Bomb Puahhnawh An Ton Caah 3 An Thi: Mon ramkulh, Ceikhtu(ကျိုက်ထို) peng, U Sit dum pawng ah nizan August 26 zing sml 6:00 hrawng ah SAC ralkap motor humhimnak a laak piaktu SAC ralkap pawl cu, bomb puahhnawh an ton caah ralkap 3 an thi, tiah tualchung mi hna nih an chim.
SAC ralkap pawl cu Ceikhtu peng ah a cawlcangmi Ko Ngal Lay Guerrilla, KNU, KNLA le PDF hna i bawm in an doh hna i, SAC ralkap 3 a hmun ah an thi, 2 hliamhma an pu, theih a si. SAC ralkap pawl cu bomb puah an ton hnu in pawngkam khuate ah lut in minung 10 an tlaih hna i, zanlei ah an thlah ṭhan hna. “SAC ralkap nih khual tlawng mi hna cu an tlaih hna i, ralphaw ah an hman hna. Nu an tlaihmi hna cu an thlah ṭhan hna. Pa pawl cu kal an ṭihnak hmun tiang ralphaw ah an hman hna,” tiah tualchung mi pakhat nih a chim.
Ceikhtu khua le Sittaung kar ah bomb puahhnawhnak le kahdohnak atu le atu a chuak. A luancia August 24 lio zong ah Mupalin khua pawng ah SAC ralkap motor cu, voihnih bomb puahhnawh a rak tong i, ralkap 5 hliamhma an rak pu, tiah Guerrilla phu nih cathanh an chuah.
KNU Hmunram Chung Kadohnak ah SAC 7 An Thi, Tualchung Mi Pakhat A Nunnak A Liam, KNU Hmunram Chung Kadohnak ah SAC 7 An Thi, Tualchung Mi Pakhat A Nunnak A Liam: August 25 ah KNU Brigade 5 le 2 ramri Ludaw(လူသော) peng Hpalakhu(ဖလာခို) hmunram ah SAC ralkap nih hmunhma kauh chap ding in umhmun an khuar caah KNLA Brigade 5 nih an kah hna i, SAC ralkap 7 an thi, 9 hliamhma an pu, tiah Brigade 5 sinin theih a si.
KNU Brigade 5 hmunram Mutaw pengkomh ah umhmun a khuarmi SAC ralkap le an kuttang BGF hna nih khuate lei hoih in hriamngan an kah tuk caah inn pakhat cu hriamngan nih a khen i, tualchung mi pakhat a nunnak a liam, tiah theih a si.
August 23 zan sml 7:00 hrawng ah SAC ralkap le BGF nih Mekalaw khuakomh chung hriamngan in an kah caah Delawpu(ဒေးလောပူ) khua inn pakhat hriamngan nih a tlak. Kum 56 tluk nu pakhat a nunnak a liam i, a vapa zong hliamhma a pu, tiah theih a si.
Cu pinah Hpapun le Kamamaung(ဖာပွန်နှင့်ကမမောင်း) khua kar ummi SAC ralkap kuttang BGF 1014 Battalion nih, Mekalaw khuakomh ah hriamngan an kah chap, tiah theih a si.
Pakistan Tilian Ruang ah Minung 1000 Renglo An Thi!, Pakistan ram tuanbia ah rak ton tuk theng bel lo mi dongcat lo in ruah a sur ca ah tilian a chuak i minung 1000 renglo an thi cang i, minung nuai 33 renglo harsaknak an tong, tiah nizan august 26 tuanvo ngeitu hna nih cun an chim.
Ramkulh 4 chung cu tilian ruang ah inn an rawk tuk hna, cucaah ramleng lei bawmhnak halnak zong pakistan cozah nih a tuah. Pakistan Prime Minister Shahbaz Sharif zong nih state of emergency phuan a timh, tiah PM Office nih a thanh ve.
Pakistan cozah le UN i bawm in tilian ruang ah harnak a tongmi hna bawmhchanhnak cu August ni 30 ah kan tuah lai, tiah PM Sharit nih cun a chim. Tilian a tuar mi chung ah nitlak thlanglei Balochistan le Sindh ramkulh hna hi an zual bik, tiah theih a si.
Leave a Reply