Kalay peng chungum dohthlenhnak chungah nunnak a liamtu pasaltha hna i thisen man cu PDF Kalay nih loh theih loin phuba kan laak lai tiah PDF Kalay nih kan in theihter hna tiah cathanh an chuah. Credit: The Federal Times

Relchih: Tinam Khua Inn 9 SAC Ralhrang nih an Khangh, Khuami 700 Hrawng an Zaam

Hakha he meng 36 a hlatnak hmun ah a ummi Tinam khua ah SAC ralhrang 100 hrawng zaan an riak i, inn 9 an khangh ta tiah ramlak ah a zaam vemi Tinam pastor nih The Chin Journal ah a chim. “Ralkap 100 hrawng an si lai dah. Kan khua Baptist biakinn le Believer biakinn ah an riak i, inn an bauhmi le an firmi zong a um len ko. Lamtuk lei an lanh lai ah inn an khangh ta i inn 9 an ciam,” tiah a chim.

Inn a kaangmi hi bomb nih a tlakmi theng si loin an khangh hramhrammi a si ko, tiah a chim a chap. “Bomb tlak ruang ah a kaangmi cu a si lai lo. Khuachung an um hnu, khua in an chuah lai ah a kaangmi a si i, an khangh hramhrammi si dawh a si ko,” tiah a chim.

Lamtuk khua pawng ah miphun ralkap le ralhrang karlak kahdohnak fak ngaiin a chuak i SAC ralhrang lei in a thimi le hliam a pumi an um len tiah kan theih nain mithi/hliampu a zat fiang in theih a si lo. Tinam khua ah inn 105 a um i, an khua ning in milu 700 hrawng cu bu 6 hrawng ah an i tthen hna i ramlak ah an zaam dih hna. SAC ralhrang pawl Lamtuk khua lei ah an kal caah Lamtuk khuami pawl zong nih an khua an chuahtak, tiah thawngpang kan theih. Credit: The Chin Journal