Breaking! Kan Lai Pa Thawng Ṭial Cung Thang A Rak Chuak Than Cang Lai!!

Ṭial Cung Thang Cu Philipines MMA Arfi Jeremy Pacatiw He December 3 Ah An I Thong Lai!
==========================
Chin pasalṭha Ṭial “The Dragon Leg” Thang cu caan saupi MMA aa celh ti lo hnuin a ra lai mi December 3, ONE 164 ah aa celh ṭhan cang lai i Jeremy Pacatiw he an i thong lai tiah theih a si. Ṭial Thang he aa celh dingmi pa hi Jeremy Pacatiw a si i, Phinlipines MMA aa celhmi hna lak ah an zohthla ngai mi a si. Jeremy hi One Championship a luhnak a sau lo nain Bantamweight division ah a rank sang ngai mi, Tuluk ṭhuatthiam Chen Rui a tei hnu in ONE zohtu pawl nih an hun theih ngai mi a si.

Ṭial “The Dragon Leg” Thang hi atu kum February 11 i Indonesian MMA celhthiam Sunoto he an i ton hnu in ONE ah a lang ti lo. Sunoto he an rak i celh lio ah ruah lo ning piin an puai a rak dong i, vawleicung pumpi ONE championship zohtu hna nih an rak chimceih ngaingai. Hi puai ahhin Ṭial Cung Thang nih Sunoto cu a khup in a paw a suk nain, referee nih a paw tang deuh a si tiah Warning a rak pek. Tlawmpal ah Ṭial Cung Thang nih a khup in a suk ṭhan i, Sunoto cu a thawh khawh ti lo caah “relh lo” in an puai a rak dong.

Hi lio ahhin vawleicung hmunkip in ONE zohtu hna nih cun “A paw tang ah siloin a paw bak ah a si ko” tiah chimceih a rak tam ngai i, referee mawhchiatnak caṭial zong a rak tam ngai. Sunoto he an i celh hlan ahhin Ṭial Cung Thang cu Korea pa Song Min Jong nih a rak tei cang caah teinak he kir a duh hringhran kha a cawlcanghnak ah hmuh khawh a si.

Tutan ONE 164 hi Philipines ah celh ding a si i, puai donghnak bik ah Strawweight Championship a um lai. Ṭial “The Dragon Leg” Thang le Jeremy “The Juggernaut” Pacatiw cu main event puai hnihnak ah an i celh lai. A ra lai mi November 19, ONE 163 zong ahhin Myanmar MMA arfi Aungla N Sang cu Japanese MMA ṭhuatthiam Yushin Okami he an i celh lai. Tutan Ṭial Cung Thang aa celhnak ding kongkau hi ONE Championship lei nih phungning tein an langhter rih lo nain ONE Championship chungtel hna nih anmah official page ah an langhter mi a si tiah theih a si. Crd-The Chin Post

Relchap, SAC Ralkap Nih Mei An Hrawh Caah Hakha Khua Chungah Nithum Chung Mei A Mit, Chin ramkulh, Hakha khua chungah a luancia October 21 zingka sml 6:30 hrawng in mei a mit i, nithum chung a mih hnu ah a ra than, tiah theih a si. Tualchung mi pakhat nih, “October 21 zingka te ah Cawbuk sang um SAC ralkap check gate cu CDF Hakha Battalion 2 nih an kah hna caah SAC ralkap nih hriamngan in an kah i, meihri(Mahar dataa line) a cah caah Hakha khua chung mei a mit dih,” tiah a chim.

Loklung khuami pakhat zong nih, “SAC ralkap nih hriamngan an kahmi cu kan khua chung ummi meihri a tlak caah a rawk dih ve” tiah a chim. October 21 zingka sml 6:30 hrawng in Hakha khua chungah mei a mit i, nihnih chung an remh hnu October 23 zan sml 6:00 hrawng ah a ra ṭhan, tiah theih a si. SAC ralkap nih Hakha khua, Dawrthar sang cu mei pek caan ri an khiahpiak hna caah caan tling in mei an pek hna lonak a sau ngai cang. Hakha sii-inn sang le dawrhlun sang lei tu cu mei a mit bal lo, tiah Hakha ummi pakhat nih The Chin Post ah a chim.

SAC Ralkap Le CDF CDM Siyin Kar Kahdohnak Ah SAC Ralkap 3 An Thi, A luancia October 13 ah Kalaymyo le Taingen khua karlak SAC ralkap sakhan, khur cawhmi hmun ah umhmun hmunhma kan la i zing sml 8:00 hrawngah SAC ralkap nih khualtlawng mi hna cu tangka hal ding an rak chuak, cu lioah pe 10 hlat in bomb in kan puahhnawh hna, tiah CDF CDM Siyin nih cathanh an chuah tiah theih a si.

Hmai a kalmi SAC ralkap pathum cu an titsa aa ṭhenṭhek dih. Cuka ahcun minutes 10 tluk hrawng kaphnih kar kahdohnak a chuak, CDF CDM Siyin lei in a thimi le aa hliammi an um lo, tiah theih a si. Cu hnuah Taingen khua um SAC ralkap sakhan in bawmh dingah a kalmi ralkap motor 3 cu Heinzing khua le Leisan Mual karah October 14 zing sml 4:48 ah minutes 8 tluk kan kah ṭhan hna, tiah CDF CDM Siyin nih an langhter. Cu motor 1 chungah SAC ralkap 20 leng an i cit i, Taingen khua an phanh ahcun SAC ralkap 30 leng hrawng lawng an taang cang, tiah CDF CDM Siyin nih an langhter tiah theih a si.

Kayin Hriamtlai Phu I Fonh Ding In Kawthoolei Army Nih Thanhca Chuah, Kayin ramkulh chung ummi hriamtlai phu dihlak ifonh lawng ah SAC ralkap hi ṭha tein kan dohkhawh hna lai caah, hmunkhat ah ifonh cio ding in Kawthoolei ralkap hruaitu Saw Nay Daa Miah nih cathanh an chuah tiah theih a si. Kawthoolei ralkap nih khuapi laknak ding a hram thawk a si cang caah Kayin hriamtlai phu dihlak ifuntom caan a si cang tiah a chim.

Tulio ramkhel sining ah SAC ralkap hna nih mizapi cungah phungninglo in an tuahmi vialte cu khuapi chung lawng silo in khuate lei tiang an tuah caah mizapi cu ṭih launak an tong, cucaah hmunkhat ah ifuntom in ralkap uknak a hramchanh a herh tiah an thanhmi ah cun an langhter chih. A luancia 2022, January thla in Bochoh Saw Nay Daa Miah cu KNO Commander in Chief ṭuanvo in KNU nih a dinhter hnu ah July 16 in Kawthoolay ralkap a dirh i, cu a dirhmi cu kan theipilo tiah KNU nih an rak thanh ve.

Dohthlennak Ah Ramchung Ramleng Kan Ṭuanvo Thleidan Thiam A Herh, Tutan khuapau dohthlennak ah ramchung ramleng in mipi kan tho dih. Phundang cun dohthlennak ah aa tel lomi kan um lo ti khawh a si. Kan i telnak zawn tu aa dang cio. Tutan dohthlennak ah ramchung ramleng kan ṭuanvo hi thleidan thiam a herh tuk tiah ka ruah. Ṭuanvo cu kan ngei dih, asinain kei ka ṭuanvo zeidah a si ti thleidan thiam lo ahcun a poi tuk lai. A tlangpi in ramleng kan ṭuanvo hi pali a um.

Pakhatnak: Tangka thawh, tangka hawl! Nifatin in meithal le bomb puak lakah tangka kawlhawl awk a ṭha lo. Cucaah ramleng nih tangka kan thawh, kan kawlhawl a herh. Asinain tangka a thawhtu kan si ruangah duhpaoh in a aukhuang ding kan si lo. Duhmi paoh chim i aukhuan len kha kan ṭuanvo a si lo.

Pahnihnak: Fimthiamnak in bawmh! Ramleng nih kan tangka lawng thawh a za lo. Kan fimthiamnak zong kan thawh rih a herh. IT chan a si bantukin tutan dohthlennak ah IT fimthiamnak hi hmual a ngei tuk. Seh lei thiamnak (mechanic) zong a herh tuk fawn. Ramleng ah mifimthiam tampi kan ngei cang hna. Cu hna nih an fimthiamnak kha dohthlennak ah an hman ve hrimhrim a hau, tampi an hman cangmi zong a um.

SAC nih Russia le China in IT thiamnak tampi aa lak caah Drone zong duh ningin kan hmang kho rih lo. Phone ah kan hlonh (deleted) cangmi zong an hmuh khawh caah tlaih a tongmi an tlawm ti lo. Cucaah IT lei, hriamnam sernak le seh lei fimthiamnak ah ramleng nih biatak tein kan i tel a biapi.

Pathumnak: Thazang pek! Ramchung cu thinphang le thlalau in nifatin caan an hmang. Khatlei ah lungretheih le vansannak aa phua! Hriam a tlaimi si hna seh a tlai lomi si hna seh an taksa le thinlung a ba. Cu caah ramleng lei thazang peknak an herh tuk. Cu ee, kha ee tiah kan vuivai tawnmi khi cu an lungretheihnak a zualtertu an si. Ramchung a ummi hna, a bik in hriam a tlaimi hna caah thazang pek khawh tu i zuam cio a herh.

Palinak: Khuakhan lairelnak ah bawmh! Dohthlennak ah ramchung lei khuakhan lairelnak lawngin tlamtlin a har caah ramleng in biaknak le zatlangbu hruaitu, mifimthiam kan pa/nu le hna nih khuakhan lairelnak ah a si khawh chungin bawmh an herh. Amahbelte a bawmtu kan si ti kha theih peng a hau, bia a khiaktu ah kan i ruah sual lo ding a biapi! Tangka a thawhtu pei kan si cu tiin nawlngeih i timh hi China lungput a si. China nih cun ram sifak hna kha tangka tampi a pek/cawih a hna i a hnuah sal bantukin a duhmi paoh a tuahter tawn hna. Cu lungput cu kan hrial a herh.

Ramchung lei ṭuanvo hna cu chim len hmanh a hau lem lo. A biapi tuk tiah ka ruahmi pahnih bel a um. Pakhatnak cu ramleng in thawhmi tangka hna hi a herhnak zawn ah felfai tein hman ding! Atu tiangah ramleng lei thawhmi tangka a vaivuanmi le a zawn a si lomi ah hmanmi a um len.

A zawn teah hmualngei tein kan hman ahcun ramleng lei zong an tha a bat ko hmanh ah an i hne kho lai. Pahnihnak cu ram le miphun caah nunthap in aa thawhmi le retheih a tuarmi na si ruangah upatnak le thangṭhatnak bia na hmuhmi kha i porhlawtnak le uahnak ah hman hrimhrim lo ding. Zuam chinchin nak tu ah hman ding a si. Crd-The Chin Post

Be the first to comment

Leave a Reply

Your email address will not be published.


*