Hakha-Thantlang Kar Kahdohnak Ah CDF Commando Pakhat A Nunnak Liam!!
=================
October 19, Hakha le Thantlang kar kahdohnak ah CDF-Thantlang commando in Salai Biak Than Sang(kum 18) a nunnak a liam tiah CDF-Thantlang nih an thanh.
Ram le miphun caah nunnak a petu Salai Biak Tha Sang nih a taantak mi chungkhar nan ngaihchiatnak kan in hrawmpi hna. Salai Biak Tha Sang nih lungtli na tummi ralhrang tei khawhnak ding ca le federal democracy kan ngahkhawhnak ding caah na ṭuanhawi CDF-Thantlang nih kan rak pehzulh lai. Dohthlennak caan chung ah ram le miphun caah nai pumpeknak le na rianṭuanmi vialte cung ah CDF-Thantlang nih a sangbik upatnak kan in pek tiah CDF-Thantlang nih cathanh an chuah. Crd-The Chin Post
SAC Ralkap He I Kahdohnak Ah MSRO Hruaitu Pakhat A Nunnak Liam, Mon ramkulh, Yee khuapi, Yephyutaung khua um palik sakhan pakhat kah dingin an kal hnu an kir lei ah SAC ralkap nih an rak bawh hna i MSRO le SAC ralkap kar kahdohnak a chuak i MSRO hruaitu pakhat a nunnak a liam tiah theih a si.
October 17 ni kahdohnak ah MSRO hruaitu Ko Thi Ha Soe a nunnak a liam mi he pehtlaiin Ko Ma Ka nih “palik sakhan kan va kah i tlamtling tein hnu kan pil, asinain kan pil pah ah ruah loin SAC ralkap nih a kan erhtonh i kaphnih kar kahdohnak a chuak than, cu kahdohnak ahcun kan hruaitu nih a kan liam tak hi a si” tiah a chim tiah theih a si.
“Cycle a ngei mi minung bawmh kan hal hna, a hlan in nan sian lo hmanh ah a cawk in kan in cawk hna lai tiah kan ti leen ko hna nain zeirel loin a kan um caah kan hawipa a nun kan chanh manh lo mi a si” tiah a chim chap. Tutan kahdohnak ah SAC ralkap leiin Bohmu pakhat le ralkap pakhat an i hliam tiah theih a si.
Monywa Ah Mino I Sikvuaknak In Meithal Kahnak Tiang A Chuak, Minung 3 An Thi, Sagaing ramthen, Monywa khuapi chung lakphak dawr pakhat ah October 19 ni zaanlei sangha mino pakhat le pakhat biaelnak in i sikvuaknak tiang a chuah lengah meithal kahnak tiang a chuah caah minung 3 an nunnak a liam tiah theih a si.
“Nihin zaaneli suimilam 3 hrawngah a si, lakphak dawr ah cycle pali in minung 6 an rak phan, lakphak an din pah ah anmah le anmah biaelnak a chuak, cu hnuah i sikvuaknak a chuak i mino pakhat pa nih meithal a hun i chuah i a kah hna caah minung 3 an thi, midang cu cycle an i cit i an kal” tiah thil sining cang a hmutu pakhat nih a chim tiah theih a si. Minung 3 an thihnak ah cun SAC ralkap pawl an rak phan i checkhlatnak an tuah, cun a thimi minung 3 ruak cu an laak i an i kapi tiah theih a si.
Chin ramkulh, Hakha peng Timit tiva pawnghrawng ah October 13 in October 18 tiang CNA/CDF le SAC ralkap kar, ni 6 chung kahdohnak a chuak. Cu kahdohnak ah cun SAC ralkap 25 nak tlawmlo an thi tiah CNA nih cathanh an chuah.
Ni 6 chung kaphnih kar i kahdohnak ah tualchung hriamtlai CNA in ralkap minung 3 le CDF-Hakha in ralkap 1 tiin minung 4 an nunnak a liam tiah theih a si.
Tutan kahdohnak ah ai tel mi hna cu Chin National Army(CNA), Chinland Joint Defence Committee- Special Force (CJDC), Chinland Defence Force- Thantlang, Chinland Defence Force – Lautu, Chinland Defence Force-Zophei, Chinland Defence Force-Mara le Chinland Defence Force- Hakha hna an si tiah theih a si. Crd-The Chin Post
Kyaukkyi Pengah Rallam Sialmi SAC Ralkap Bomb Puahhnawh An Tong, Minung 4 An Thi, Pegu ramthen, kyaukkyi pnegah rallam sialin a kalmi SAC ralkap hna cu bomb puahhnawh an ton caah minung 4 an thi tiah theih a si. October 18 zinglei suimilam 6 hrawngah Nyaungpintha khua ah umhmun khuarmi SAC ralkap 100 tluk cu Deikpung tiva kam an phanh ah bomb puahhnawh an ton hi a si i minung 4 an thih hlei ah minung 3 fak ngaiin an i hliam tiah tualchung hriamtlai phu hna an thanh tiah theih a si.
Rallam a sialmi SAC ralkap bomb puahnawh an si ca ah a bawmtu ralkap zong an rat khawh bantukin kaphnih kar kahdohnak a chuah khawh than caah mipi umkal i ralring dingin mipi sinah theihternak zong an tuah tiah theih a si.
Yinmapyin Peng Ah SAC Ralkap Nih Helicopter In Hriamngan An Thlah Caah Naupawi Lio Nu Pakhat Telhin Minung A Nunnak Liam, Sagaing ramthen, Yinmapyin pengah October 19 zinglei ah SAC ralkap helicopter 6 nih khuate kip ah kahdohnak um loin an duh poah in hriam a thlah caah naupawi nu pakhat telhin nu pahnih an nunnak liam tiah theih a si.
Nu pahnih an thah hna pinah khuachung um mi pa 100 hrawng an tlaih hna i an kalpi hna tiah min langhter duh lomi pakhat nih a chim. Zingka ah an tlaih mi pa cheukhat cu zaanlei ah an thlah than hna tiah theih a si. SAC ralkap helicopter nih a kahnak khua han cu Yinpaungtaing, Pyaoo, Pahtotha, Nuitan, Ngaungtan khua hna an si tiah theih a si.
SAC Ralkap Nih Drone In Bomb An Thlak Caah Buanlung Khuami Ngakchia Pahnih An Nunnak A Liam, Chin ramkulh, Hakha peng, Buanlung khua chungah nihin October 19 zanlei sml 3:00 hrawngah SAC ralkap nih drone in bomb an thlak caah Buanlung khuami Henry Bawi Za Lian(kum 6) le James Siang Za Uk (kum 7) an nunnak a liam, tiah theih a si.
Hi ngakchia pannih hi KG 2 an si i, sianginn in hawi hlan an tlung chung. An tlun lei ah SAC ralkap nih bomb an thlakhnawh hna caah Henry Bawi Za Lian le a upa James Siang Za Uk cu an nunnak a liam. Ngakchia nu pakhat hliamhma a pu, tiah theih a si.
Buanlung khuami pakhat nih, “Bomb a puah lai ah kan inn chanpheo ah pakhat khat a tlami a lo, ngakchia nih maw lung in an cheh hnga ka ti i, innleng ka chuak i ka zoh lai ka ti ah bomb cu a puak ko,” tiah a chim.
A nunnak a liammi Henry Bawi Za Lian nih SAC ralkap nih an thlahmi drone a nakmi a hmuhnak kong nizan ah a ka chimh i, nihin ah bomb puahnak in an nunnak a liam ti thawng kan theih cu ka ngaih a chia tuk, tiah pitar pakhat nih a lung fahnak a chim.
Voidang zong ah SAC ralkap nih Buanlung khua chungah voithum li hrawng drone an rak thlah cang, tiah khuami pakhat nih a chim.
Bomb puahnak in a nunnak a liammi Henry Bawi Za Lian le James Siang Za Uk hi uanau te an si. An nule unau an si, tiah theih a si. Crd-The Chin Post
Muse Ah SAC Ralbawi Lieutenant Colonel Pakhat An Kah I A Thi, SAC Ralkap Nih Checkhlatnak An Tuah, Shan ramkulh, Muse khua ah nizan October 18 zanlei sang ah SAC ralkap Battalion commander, Lieutenant Colonel pakhat cu hmuahchih in an kah i a thih caah SAC ralkap nih Muse khua chungah mi chawkvai checkhkatnak an tuah, tiah tualchung mi hna sinin theih a si.
Nizan October 18 zanlei sml 3:35 ah Shan ramkulh, chaklei Muse peng meng 105 a hlatnak Tungkhan(တုန်ခန်) khua ah SAC ralbawi Lt. Colonel cu, motor a remh lioah hmuahchih in kah a ton hi a si, tiah theih a si. “Anih hi Battalion Commander Lt. Colonel a si. Shan ramkulh, Hluttaw Palai pakhat zong a si i a min cu fiang in hngalh a si lo,” tiah Muse khuami pakhat nih a chim. Muse peng ah a luancia October 6 zanlei ah peng biaceih bawi Yarzar Min Soe zong an kah i a rak thi, tiah theih a si.
SAC Ralkap Nih Ngazun Peng Ah Tualchung Mi 5 An Thahmi Hna Ruak Cu Anmah Lila Nih An Char Ṭhan, Mandalay ramṭhen, Myingyan pengkomh Ngazun peng Kula khua chak ah SAC ralkap nih tualchung mi 5 an thahmi hna ruak cu, motor 3 in October 17 zanlei ah an hlonh hna hnu, nizan October 18 zinglei ah SAC ralkap nih an motor nih an char ṭhan hna, tiah theih a si.
“Tualchung mi 5 cu an ban an leh hna hnuah an thah hna. Hmundang ah an thah hna i kan khua chak ah an hlonh hna. An ruak pawng ah thi le hnai tu cu kan hmu lo i kan khuami cu an si lo. Ngazun khua lei ah SAC ralkap nih October 18 zinglei ah an kalpi ṭhan hna,” tiah Ngazun peng Kula khuami pakhat nih a chim.
Thah a tongmi hna cu mino lawngte an si i cu chungah pa 4 le nu 1 an si. Thah a tongmi hna hi mizeidah an si ti cu hngalh a si rih lo, an hlathlai cuahmah lio a si, tiah theih a si. SAC ralkap nih an thahmi hna nino 5 ruak cu motor 3 in an hlonh hna lioah meithal zong an puah len, tiah Simikhun News nih an langhter.
Bilin Toll Gate Hlun Kahdohnak Ah Palik Bawi Pakhat A Thi, Mon ramkulh, Bilin peng Daukyet(ဒေါက်ရပ်) khua um Shwe Thanlwin toll gate hlun pawngah a ummi SAC ralkap check gate kah an ton caah palik bawi pakhat a thi, tiah tualchung mi hna nih an chim.
SAC ralkap check gate cu a luancia October 17 zanlei sml 9:00 hrawngah KNLA ṭangṭi phu hna nih naih tein an kah hna, tiah theih a si. Suimilam a cheu chung kaphnih kar kahdohnak a chuak i, Bilin peng palik bawi Aung Myint Sein a thih hi a si.
Palik bawi Aung Myint Sein ruak cu Bilin sii-inn ah an kalpi i, nizan October 18 chun ah SAC ralkap nih Bilin palik sakhan ah an ṭhial ṭhan, tiah theih a si.
Matupi Ah Fimcawnnak Zung Lutlai Thah A Ton Hnu In Sianginn An Khar Lai, Chin ramkulh, Matupi ah fimdawnnak zung lutlai U Tin Luai cu October 16, zaan suimilam 8:00 hrawng ah a umnak inn ah meithal kah in thah a thon hnu in Matupi ah zarh khat chung sianginn an khar lai tiah theih a si.
Matupi ah U Tin Luai ruak vuinak an tuahni cacawn nikhat ni ah sianginn an khar, a thaizing ni hnih ni zong sianginn an khar ṭhan. Cun a ra lai mi zarh khat chung sianginn an khar lai tiah theih a si. Matupi khuachung ah cun sianginn dihlak an ong lo na in, Laungvang sang no.1 siangsangrun le Sanpiah sang ummi no.2 siangsangrun tiin sianginn 2 lawng an on khawh tiah theih a si.
Fimdawnnak zung lutlai thah a ton hnu ah phungning tein sianginn kan khar tiah thawng thanhnak an tuahlo na in, nu le pa zong nih an fa le sianginn ah an kalter hna lo tiah tualchung mi nih an chim.
Kawlram buaibainak ruangah India ram Mizoram ah a luancia September thla zarhkhat chung teah i dor dingin a phan mi hi minung 1800 renglo an si i nihin tiangah ralzaam dihlak minung 48000 renglo an um cang tiah UNHCR nih a langhter tiah theih a si. “SAC ralkap le CDF kar kahdohnak ruangah Chin ram le India ram ramri zawn ummi Mizoram chungah nifatin in ralzaam dingah a phan mi an karh” tiah Mizoram a phan mi ralzaam bawmhnak tawlreltu pakhat nih a chim tiah theih a si.
Mizoram chungah ralzaam sak mi hi a dih lak 30 hrawng a um cang. “Hika kan phanh tikah zing zaan pawcawmnak kongah kan lungre a thei, cun sii ai kan i zalh khawh lo ca ah le kan fale sianginn kainak a harsat deuhnak kongah kan lungre a thei ko” tiah ralzaam pakhat nih a chim.
Sagaing ramṭhen, Kalay peng Kalay-Tamu lampi ah SAC ralkap motor le ke in rallam a sialmi SAC ralkap pawl cu, bomb kan puahhnawh hna caah ralkap 3 an thi, tiah Kalay-PDF nih an langhter.
October 17 zinglei sml 7:30 ah Kalay-Tamu lam meng 55 aa hlatnak ah SAC ralkap motor 2 le ke in rallam a sialmi ralkap pawl cu, Kanhla khua chaklei hlei pawng an phanh ah PDF nih minutes 20 chung hrawng an kah hna, tiah theih a si. Zing sml 10:00 hrawng ah Myalay Taung pura pawngah SAC ralkap cu Kalay PDF Battalion 3, Zomi PDF Battalion 8 le 12 hna nih bomb an puahhnawh hna caah SAC ralkap 3 an thi, tiah Kalay-PDF nih cun an langhter.
Cun Sagaing ramṭhen Hticheik peng ah SAC ralkap pawl cu voli tiang bomb puahhnawh an ton caah ralkap 15 hrawng an thi, tiah Special.9-HPDF in ṭuanvo ngeitu pakhat nih a chim. October 17 zing ah SAC ralkap cu Takaung lei ah humhimnak lak ding in an kal i zanlei sml 3:00 hrawngah ke ruk ngei motor in an tlun lei ah bomb puahhnawh an ton hi a si.
Cun Mandalay ramṭhen, Matayar(မတ္တရာ) peng Gyianikan(ကြာနီကန်) khua le Htitawmoe(ထီးတော်မိုး) khua karah SAC ralkap motor cu nizan October 18 zing sml 11:20 hrawngah bomb puahhnawh an tong, ralkap 3 a thih hleiah 5 hliamhma an pu tiah theih a si.
Mon ramkulh, Kyeikhtu(ကျိုက်ထို) peng hrambunh No. 441 Nah Bah Hah 441 in beohahmu(ဗျူဟာမှူး) tuan mi SAC ralbawi Colonel Win Min Oo cu, nihin October 19 zinglei kahdohnak ah a thi, tiah theih a si. “Colonel Win Min Oo cu nihin October 19 zing sml 9:00 hrawngah sniper kut in Shwe Nyaung pin pura tlang ah a thi. A chungkhar cu nihin zinglei ah thawng an thanh hna. Win Min Oo cu ralkap sianghleirun in cawnnak a dihmi a si i, sianginn a dihnak hi thlahnih hrawng lawng a si rih,” tiah a chungkhar he aa naihniam mi hna sinin theih a si.
“SAC ralkap nih Brigade 5 hmunram chungah rallam an sial caah October 18 zan in nihin tiang kahdohnak a chuak,” tiah KNLA he aa naihniam mi pakhat nih a chim. SAC ralkap chung in Battalion Commander le Second Battalion Commander lawng kahdohnak chungah an thi i, Colonel a simi ralbawi a thimi an um bal rih lo, tiah CDM ralkap pakhat nih a chim.
Yangon ramṭhen, Insein peng, Insein thonginn ah thiltom pakhat chungin bomb a puah caah thonginn hngak ralkap 3 an thi, 7 hliamhma an pu, tiah ralkap thawngthanhnak News of Myanmar nih cathanh an chuah. October 19 zinglei sml 9:33 ah bomb voihnih a puak i, thonginn hngaktu SAC ralkap Kyaw Zin Oo, ralkap Khin Moe Way le ralkap Pu Ih Zan an thi, cun 7 hliamhma an pu, tiah theih a si.
Thonginn gate hngaktu SAC ralkap nih, meithal duh paoh in an kah caah thonginn hmai inn cheukhat cu meithal kuan nih a khen pinah tualchung mi zong meithal kuan nih a khen hna. Insein thonginn chumtual vialte cu SAC ralkap nih an kham dih, tiah theih a si.
Chin ramkulh, Kanpetlet khua chungah umhmun khuarmi SAC ralkap nih, lungthin hawi tluk lomi(lungthin tlamtling thlu lo) CDF-Kanpetlet ralkap pakhat cu October 17 zanlei sml 2:00 hrawngah an tlaih, tiah CDF-Kanpetlet sinin theih a si.
Tlaih a tongmi CDF-Kanpetlet ralkap pa hi an inn ah a tlung i, a caam chungah SAC ralkap nih an tlaih i an hrem tiah CDF-Kanpetlet nih an langhter. “SAC Helicopter kan kah caah khua chungah checkhlatnak fak ngai in an tuah. Atu an tlaihmi zong hi lungthin lei in hawi tluk lomi a si. SAC ralkap nih hremnak phunphun an tuah khawhmi a si caah khur chungah nan um lai, tiin mipi sinah CDF-Kanpetlet ṭuanvo ngeitu pakhat nih ralrin a pek hna.
CDF-Kanpetlet nih SAC Helicopter an kah hnu in Kanpetlet khua chungah SAC ralkap nih checkhlatnak ṭha tein an tuah, tiah tualchung mi hna nih an chim. CDF-Kanpetlet ralkap pakhat cu SAC ralkap nih an tlaih caah tualchung mi an thin a phang ngaingai. SAC ralkap nih Kanpetlet khua chung in meng 6 a hlatnak ah hriamngan kan kah lai an ti, tiin thawngpang a len caah tualchung mi hna cu a himnak hmun ah an zam hna, tiah theih a si. Crd-The Chin Post
Leave a Reply