Non-CDM Hna Cu Hmalaknak Tuah An Si Canglai Tiah CDF-Matupi Nih A Thanh
====================
SAC ralkap kuttang um in SAC ṭhithruainak ah rianṭuan cuahmah mi Non-CDM hna cu a tak in hmalaknak tuah an si cang lai tiah CDF-Matupi nih ralrin peknak cathanh an chuah tiah theih a si.
“Theihter kan in duhmi hna cu mizapi lei ah a rannak in dir ve ding hi a si, Non-CDM hna ruang ah kanmah lei cawlcanghnak kan tuahmi kongah thawngpang a chuah tawnnak caah kanmah lei himnak a umlo” tiah CDF-Matupi in chim phuannak nawl ngeitu nih a chim.
SAC ralkap kuttang ah rianṭuan in an tianṭuannak a bawm chantu department kip in Non-CDM hna nih mah pumpak sining lawng i zoh in SAC kuttang ah rian an ṭuan. SAC ralkap kuttang ah rian a ṭuanmi Non-CDM hna cu CDF-Matupi nih voi tampi theihternak le ralrin pek nan si cang nain CDM tuah duhlo in, phungninglo rianṭuantu SAC ralkap rianṭuan hlawhtlinnak ding caah rian nan ṭuan tiah an thanh mi ah an langhter.
SAC ralkap kuttang ah rianṭuantu Non-CDM hna nih a rannak in CDM tuah ding ah Matupi CDM nih forh fialnak an tuah. Cun Non-CDM hna nih CDM cawlcanghnak nan tuahlo a si ah cun CDF-Matupi nih a tak in hmalaknak kan in tuah cang hna lai tiah an thanh. Crd-The Chin Post
Relchap, Myaing Peng Linkadaw Khua Khanghpiak An Ton Caah Khuami 3000 Renglo An Zaam, Magway ramṭhen, Myaing peng Linkadaw khua cu SAC ralkap nih October 22 ah an lut i khua mi inn le lo an khanghpiak hna caah tualchung mi 3000 leng mah umnak kaltak in ralhrial dirhmun an phan tiah tualchung mi nih an chim tiah theih a si.
Pathein-Monywa motor lampi kam ah ummi Linkadaw khua cu SAC ralkap nih October 22 ah khan an lut i October 23 zinglei ah khuachung mei kangh kan hmuh hi a si tiah Linkadaw khuami nih an chim. Linkadaw khua cu inn 1000 hrawng an umnak khua pakhat a si i, inn zeizat an khangh ti bel fiang tein theih a si rihlo, khuami 3000 leng an zaam tiah a chimchap. UNOCHA nih October 1 ah cathanh an rak chuahning ah Magway ramṭhen chung buaibainak ruang ah tualchung mi 101,300 nih mah umnak hmun kaltak in ralhrial dirhmun an phan tiah an langhter.
Myawaddy Khuachung Ah BGF 100 Hrawng An Hriamtling He An I Chawk, Kayin ramkulh, Myawaddy khuachung ah October 23, zinglei in BGF hriamtlai phu hna cu an hriamtling he khuachung hmunkip ah an i chawk tiah Myawaddy khuachung ummi pakhat nih a chim tiah theih a si. “Khuachung ah BGF phu hna cu Myattamon sizung in kee in an ra, an tam taktak i minung 100 hrawng an si lai. Hriamthil an i put leng ah ruksai khat in thil an i phorh, khuachung ah a hlan bantuk in thawngpang a tamlo, a dai ngai ko, motor in aa chawkmi zong an um ko” tiah a chim.
October 21, zinglei in Kawkareik ah SAC ralkap sakhan le zung cheukhat kahdoh an ton hnu in Myawaddy khuachung zong ah zung le lam cheukhat phih khamnak le checkhlatnak an tuah tiah tualchung mi nih an chim. Kawkareik ah kahdohnak a chuah thok zaan lei in BGF phu hna cu Kawkareik, Myawaddy, Hpaan ah an umter hna hleiah raltuk ding ah timh cia tein an um ter hna tiah hriamtlai phu hna he naihniam in a ummi Kayin khuami pakhat nih a chim.
Myawaddy thlanglei ah ummi Laykaekaw zong ah October 22, zaan suimilam 12:00 ah SAC ralkap nih vanlei in bomb an rak thlak tiah Myawaddy khuami pakhat nih a chim. Crd-The Chin Post
Leave a Reply