Fimcawnnak Le Training Program Ah Japan Nih SAC Ralhrang Nawl Ngeitu Minung Pa 4 A Cohlang Hna
Vawleicung Human rights phu hna nih zumhlonak tampi lakah Japan cozah nih tu kum chungah fimcawnnak lei le Training program caah SAC ralhrang lei in nawl ngeitu tu minung pa 4 a cohlang hlang hna tiah theih a si. SAC ralhrang lein nawl ngeitu minung pa 3 hna cu Japan National Defense Academy ah cohlan an si i, minung pakhat cu cunglei raldoh cawnnak ah kai dingin cohlan an si tiah Japan hmunhimnak vuanci Nobuokishi nih April ni 26 ah tuah mi Japan Pyitu Hluttaw Security Committee ton biaruahnak ah a chim tiah theih a si.
A luancia mi kum Myanmar ram chungah ramkhel thlennak a chuak hnu ah SAC ralhrang ralkap cu Japan ram i, timhlamhnak hna ah tel ding in kutkaa hun piak a si caah Japan ram cu Human Rights riantuantu hna nih zumh lonak in a khat mi a si. Mah kongkau he pehtlai in Japan ramdang vuanci lei nih a phun phun in tonbiaruahnak ceihmai nak an ngei tiah Nobuokishi nih a chim.
Mah tinta training a tuah hnga ding mi pawl cu Democracy ram pakhat ah phu pakhat nih a rian tuan ning cang kong chim hrin an si lai i Myanmar ram i hmai lei sersiam khawh nak caah bomtu a si lai tiin ruahchannak kan ngeih nak kong zong April ni 26 ah Nobuokishi nih a chim.
Fimcawn timhlamhnak hna pawl ah Myanmar SAC ralhrang lein tantan a kai hnga ding pawl cu Japan ram nih a cohlan mi hna hi ngaihchiat tuk a si nak kong cu Human Rights lei hngaktu phu an ti mi hna in tuanvo ngeitu pakhat a si mi Teppei Kasai nih ngaihchiattuk a si nak kong cu a chim phuan.
Falam Market Thar Sak Nakding Committee Dirh Mi Nih India Bawmhnak A Hal, Chin ramkulh, Falam Market sak ṭhan ding in Tualchung mi nih Market sak nakding Committee cu April 26 ah an dirh, tiah theih a si. Cu Committee cu Dr. Run Bik Taithio nih a hruai hna i India um Myanmar Embassy ah Market sak nakding bawmh hal an i tim, tiah kan theih. Ni kum November thla ah Dr.Run Bik Taithio nih Myanmar-India Ambassador pa a rak ton bal. Falam market cu kyats sing 10000(thonghra) dih in, dotthum in sak an i tim, tiah kan theih.
Dr. Run Bik Taithio aa zuamnak thawng in India ram um Falam Town Hall saknak le Cultural inn saknak zong an rak bawmh hna. Dr. Run Bik Taithio cu India ram New Delhi ah Aung San Suu Kyi nih a rak dirh mi, Prospect Burma sianginn ah kum saupi principle rian a ṭuan caah India cozah he aa thei hngal ngai mi an si.
NUG Nih SAC Ralkap Chuahtak Ding In Pyusawtee Le SAC Lei Ṭang Hriamtlai Ralrin A Pek Hna, Pyusawtee le SAC ralkap nih a hman mi hriamtlai pawl cu NUG nih, SAC ralkap kuttang sinak chuahtak ding in ralrin a pek hna. Cun PDF he i fonh ding zong nihin April 27 ah a forh hna. PDF sin ah rak i fonh ulaw nan himnak kong ah ṭuanvo ka lak lai, tiah NUG nih a kamh hna. SAC ralkap nih Pyusawtee cu training an pek hna i PDF he kahdohnak a chuah tik zong ah hmunkhat ah an ṭangṭi tiah theih a si.
“Sagaing ramṭhen, khuate cheukhat ah cun training kan pe ko u, tiah an kan ti caah training kan pek hna i bu zong kan serpiak hna,” tiah SAC ralkap chimphuannak nawlngeitu Zaw Min Thun nih a chim. SAC ralkap nih mizapi inn le lo mei in an khangh, an ngeih mi thilri an firpiak chap hna pinah an thah hna. Hi sualnak an tuah mi vialte hi record kan tuah dih, tiah NUG Ministry Of Defense nih a langhter. SAC nih uknak an lak kumkhat leng hnu ah SAC ralkap le anmah lei ṭang hriamtlai hna nih mizapi inn an khangh mi hi inn 9187 a si cang i, cu chung ah Sagaing ramṭhen in inn 5617 a kaang, tiah Data for Myanmar nih April 14 ah cathanh a rak chuah.
Leave a Reply