Hrithlai In Thah A Tong Mi Kongah Hin Hlennak A Si Kho, A Ruang Cu Zaw Min Htun
==========================
SAC Ralkap Nih Hrithlai Thahnak An Tuahmi Kong Ah ULA Nih Cathanh Chuah!, Ko Jimmy le Ko Phyo Zayar Thaw le midang 2 SAC ralkap kut in thah an tonnak kong ah chungkhar, rualchan le Myanmar mizapi hna nih an tuar bantuk in kan tuarpi ve hna i, kan ngaihchia tuk hringhran, tiah United League of Arakan(ULA) nih nihin July 25 ah cathanh an chuah.
SAC ralkap thil tuahmi nihhin ramkip, ram innpa le ASEAN ram hna nih ramchung buainak daihter ding i an rak tawlrelcia mi vialte cu tam tuk a hrawh, tiah United League of Arakan- (ULA) nih an langhter chih. SAC ralkap nih mizapi lungthin le thinhunnak cu tuar khawh lo ding tiang a khoih caah Myanmar ram mizapi nih lehrulhnak an tuah dingmi kong ah thinphang a si, tiah AA nih thanh.
Ko Jimmy le Ko Phyo Zayar Thaw le midang 2 SAC kut in thah an tonnak kong he pehtlai in SAC ralkap lei chimphuannak nawl ngeitu General Zaw Min Htun cu RFA nih pehtlaihnak an tuah nain, zaanlei suimilam 3:00 leng tiangah pehtlaihnak kan tuah kho rih lo, tiah theih. Hi kongah hin hlennak a si kho tiah a zum mi zong an um len. An ruak zong laak khawh le zohter duh an si rih lo. SAC ralhrang leiin zeitin dah khua an khan hnga timi zong hi ruahawk a tam ngai.
Myanmar Ram Ah Thong Thlak Ding Biaceih Mi Journalist An Karh, Myanmar ram ah SAC nih uknak an laak hnu in nihin(July 25) tiang ah thawnglatu(journalist) 55 an tlaih cang hna i cu chung ah minung 20 cu phunrelnak cang kip in thong tla ding in bia ceih an si, tiah Detained Journalists Information Myanmar nih an langhter.
July tha chung ah journalist 2 bia an ceih hna i, DVB media ah journalish ṭuan mi U Aung San Lin(ဦးအောင်စံလင်း) cu July 7 ah khan Sagaing ramṭhen Wetlet peng biaceihzung ah phungrelnak 505(A), 52 in rianhrang ṭuan buin kum 6 thong tla ding in bia an ceih. July 14 ah khan Mizzima ah journalist,
Ma Nging Nging Aye(မညိမ်းညိမ်းအေး) cu Innsein thonginn ah phungrelnak 505(A) ṭhiam in rianhrang ṭuan bu kum thum thong thla ding in biaceih a si. A chungkhar nih an pehtlaih khawh ti lo caah a ngandamnak kong ah lungre thei ngai in kan um, tiah RFA ah an chim.A luancia June thla chung zong ah khan journalist cheukhat cu tazacuai an tong hna.
June 11 ahkhan Sagaing ah journalist Ko Ye Naing Swe(ကိုရဲနိုင်ဆွေ) cu SAC ralkap nih a inn ah an tlaih. June 29 ah Mandalay ah Ayeyawady Tines journalist le camera man a si mi Ko Zaw Zaw cu Obu(အိုးဘို) thonginn ah phungrelnak 505(A) in taza an cuai hna. Ram chung Jounalist hna cu thawng an laknak hmun ah ruahlopi in tlaih an tong tawn, tiah Shan ram hrambumh Shwe Phe Mya(ရွှေဖီမြေ) i Journalist Mine Aning(မိုင်းအနိုင်) nih a chim.
Thawng laak lio ah tlaih a tong i a thi mi zong an um. Journalist Ko Soe Naing cu December 10, 2021 ahkhan duhlonak a langhtertu hna hman a thlak lio ah Yangon ah tlaih a tong i, a hmun ah an rak thah. Federal Journal ah editor a ṭuan mi Saing Win Aung (စိုငးဝင်းအောင်) cu December 25, 2021 ah Kachin ramkulh Laykekaw kahdohnak kong thawngpang a laak lio ah kuan hma in a nunnak a rak liam fawn.
Chin ramkulh hrambunh Khonumthung journalist Salai Tui Dim zong January 8, 2022 ahkhan Matupi peng, Matupi-Hakha lam ah tualchung mi 10 he SAC ralkal nih an rak tlaih hna i, an rak thah hna. SAC nih uknak an laak hnu in 7 Days News, Delta News Agency, DVB, Kamayut Media, Khit Thit, Mizzima, Myanmar Now,
Myitkyina News Journal, Tachileik News Agency, The 74 Media le Zayar Times, an dihlak media 11 cu SAC nih rianṭuannak nawl licence an chuh hna. France ram hrambunh Reporters Sans Frontieres (RSF) nih May 3, 2022 ah media zalonnak hmun a langhter mi vawlei cung ram 180 lak ah Myanmar ram cu No. 176 nak a si. Credit: The Chin Post.
SAC Nih Hrithlai In A Thah Mi 4 Hna Kong Ah UNA Nih Cathanh A Chuah!: SAC nih U Phyo Zeyar Thaw(ဦးဖြိုးဇေယိာသော်), U Jimmy, U Hla Myo Aung le U Aung Thura Zaw(ဦးအောင်သူရဇော်) hrithlai in an thah mi hna cu phunglam he aa kalh mi le minung cung zaangfah ngeihlonak a si, tiah Tlangcung Party 13 nih faak ngai in sual a phawtnak kong cu United Nationalites Alliance (UNA) nih cathanh a chuah.
“Nay Win chan lio zong ah Salai Tin Maung Oo kha hri an rak thai. Atu zong ah cu bantuk ṭhiam. Kan ram tuanbia hi vawlei cung ah ningzak a si. Lungthin khat tein i ceihmaiṭi ṭhan ding a fawi ti lo. Hi nakin a zual chin lai,” tiah UNA in chimphuannak nawlngeitu le Arakan League for Democracy secretary a tuan mi U Myo Kyaw(ဦးမျိုးကျော်) nih a chim.
SAC nih hrithlai in dantatnak an pek mi cu a dik lo mi biachahnak a si i, uknak latu SAC nih mizapi cung ah phung a buar mi pakhat bantuk in cinken a si lai, tiah an cathanh ah an langhter.
UNA ahhin Shan National League for Democracy( SNLD), Arakan League for Democracy (ALD), Zomi Congress for Democracy(ZCD), Shan State Kokang Democratic Party(SSKDP), Kayan National Party(KNP), Kachin National Congress party(KNC), Shan-Ni Solidairty Party(SNSP), Danu National Democracy Party(DNDP), Khumi(Khumi) National Party(KNP), Mro(မြို) National Democracy Party(MNDP) le Dinet People’s Development Party(DPDP) hna an i tel.
Insein Thonginn Gate Cu YGRF Hriamtlai Phu Nih An Kah!: Yangon ramṭhen, Insein thonginn gate cu nihin July 25, zaan suimilam 7:00 hrawng ah kan kah tiah Yangon Ghost Ranger Force (Y.G.R.F.) phu in ṭuanvo ngeitu Sanay nih a chim.
“Insein thonginn gate cu Yangon Ghost Ranger Foce (Y.G.R.F) nih kan kah i, SAC ralkap nih thih-dan pek in thah a tongmi hna kong ah lung tlinlonak langhter in kan tuahmi a si. Hliam tuarmi an um le um lo cu fiang in theih a si rih lo, kanmah lei cu hliam tuar um lo in hnu kan tolh kho,” tiah tualchung hriamtlai phu in ṭuanvo ngeitu Sanay nih a chim.
Japan Ram, Tokyo Khuapi Mizapi Chuak Khawm Mi Nih Duhlonak An Langhter: Japan ram ah um mi Myanmar mi hna nih, Tokyo khuapi i ummi International Committee of the Red Cross(ICRC) zung hmai ah Ko Jimmy, Ko Zeyar Thaw, Ko Aung Thura Zaw le Ko Hla Myo hna hrithlai in thah an ton mi kong ah an lungfahnak langhter in, SAC ralkap cung ah dantatnak pek an duhnak cu nihin July 25 ah an langhter.
SAC nih ramkhel kong ah thongtla mi pawl cu phung ning lo in dan an tat hna ruangah SAC cu dantatnak tuah piqk ve in, nuhrin covo an buar mi vialte cung zong ah dantatnak tuah i, ramkhel thongtla pawl faak tuk in an hrem hna ruangah a rannak in hmalak tuah ding in ICRC cu an hal, tiah theih a si.
Leave a Reply