Hakha Thar Lungphun Tlang Ah Mifir Nih Inn An Bauh I Phone 2 Le Tangka Kyats 70,000 Hrawng An Fir!!
=====================
Chin ramkulh Hakha thar lungphun tlang ah khuasa mi Ngalang khuami inn pakhat cu nihin October 2 an i pumh karah mifir nih an inn an buahpiak hna tiah theih a si. Inn ngeitu nih, “Nihin kan i pumh karah kan inn cu mifir nih an bauh i Oppo phone 1, iphone 1 le tangka kyats 70,000 hrawng an fir,” tiah The Chin Post ah a chim.
Atu bantuk ram a har lio caan theng ah kan inn an bauh i, thil an kan firpiakmi hi cu sifak santlai lo kan ca ah cun a har hringhrang ko. Asinain khattelei kam in kan zoh ṭhan tikah kan thilri an kan firpiak duhmi hmanh hi kan i lawm ko. A ngei lomi thil va pek/ṭhenh can ah kan ruat i kan lung a nuam ko, tiah a chim chap.
Inn ngeitu hna cu a luancia kum 2015 lio in Hakha thar lungphun tlang ah umhmun a rak khuarmi an si i fanu 3 le fapa 3 he khuasa mi an si, a pasal nih 2018 May thla lioah a rak liam tak hna. A luancia September 20 zaan zong ah Hakha dawrthar sang Matupi lam ah a ummi dawr khan pahnih cu mifir nih an rak bauh i, tangka kyats sing 18 hrawng an rak fir cang. Crd-The Chin Post
Relchap, Nihin zarhpi October 2 zaanlei sml 3:00 hrawngah Hakha sii-inn lampial in SAC ralkap le palik i bawm in mi chawkvai paoh cu checkhlatnak an tuah hna, tiah theih a si. Hakha ummi pakhat nih, “Nihin cu nikhua a chia ngai ko nain ralkap le palik cu sii-inn lamṭhen in mi an bawh hna i an check len hna.
Motor le cycle in aa chawkmi paoh cu liesen le phone an kan check dih. Ka liesen a dih cangmi(သက်တမ်း) a si i sau tuk an kan hren hnuah an ka thlah ṭhan,” tiah The Chin Post ah a chim. Pa pathum hna cu an liesen an check hna hnuah an phone an checkpiak hna i, an kalter ti hna lo. October thla in liesen biatak tein kan check cang lai i ralring u tiin SAC ralkap nih an ka ti, tiah a chim chap.
Mindat khuachung hmunhnih ah kahdohnak a chuak, SAC ralkap nih hriamngan an duhnak hmun paoh ah an thlah, Chin ramkulh, Mindat Gayuna(ဂရုဏာ) zung le Shukhintar(ရှုခင်းသာ) riahbuk pawng hrawng ah October 1, zaan ah SAC ralkap nih an duhnak hmun paoh meithal an thlah tiah theih a si.
Cun khuate lei ah hriamngan voi 5 tiang an thlah caah, khuami hna cu ruahsur lak ah an tli zaam hna tiah theih a si.
Khuachung ah hriamthil tling he aa chawkmi SAC ralkap hna nih, sangchung mipi an dumhau ah an cinthlakmi Maien, Mai le Anthor hna cu an fir i an I lawipi pah tiah theih a si.
Indonesia pumpululh chuihnak ah buainak a chuak minung 129 an thi, Indonesia ram nizaan October ni 1 zaan pumpululh chuih lio ah mipi buainak a chuak tiah theih a si. A tubantuk in buainak a chuah hi Arema FC le Persebaya Surabaya an chuih lio ah a si i Persebaya Surabaya lei nih an 3:2 in Arema FC cu an tei hna caah Arema FC a ṭanhtu mipi nih buainak an chuahpi hi a si.
Cu buainak ruangah palek nih mitthli tlaknak bomb an puah, mipi le palik kar zongah buainak a fah ngai palik 2 zong an thi. A thi mi dih lak hi palik pahnih telh in 129 an si i 180 nih hliamhma an tuar tiah East Java palik bawi Nico Afinta nih a chim. Arema FC le Persebaya Surabaya FC an chuih lio ah hin Persebaya Surabaya FC nih Arema FC cu 3:2 in an tei hna caah mipi cu pumpululh tualchung ah lut in buainak cu a chuak, palik nih an ṭhen khawh ti hna lo caah mitthli tlaknak bomb an puah, kaphnih kar buainak ruangah pumpululh tualchung ah hin minung 34 cu an thi i a dang 95 hi sii-inn ah an thi tiah palik pakhat nih a chim.
Lungrual In Nam Caan A Cu (SAC Ralkap Dirhmun Cuanhnak) : Salai CP Lian, Atulio SAC ralkap dirhmun cuanh (Review) tikah “lungrual in nam caan a cu” ti a fiang ngaingai. Lai lei i “khaan hawt” timi kha kan theih cio ko lai. Sazuk/sakhi kha mizapi nih khatlei in an hawt i meithal aa putmi nih khatlei in an bawh. Cuticun a bawhtu nih zaangdam tein sa an kah khawh tawn.
Khaan hawt ahhin a bawhtu an biapit tuk bantukin an hawttu mizapi lei zong an i biapi tuk ve. Mizapi nih lungrual tein an au lo ahcun a bawhtu lei ah sa kal loin a hawttu lei ah an i zukphiak lengmang. Cheukhat au, cheukhat au lo ahcun sa kah loin an kir tawn. SAC ralkap dirhmun cu cuan tuah usih.
Ramchung dihlak ah Regional Military Command-RMC (စစ်တိုင်းဌာနချုပ်) 14 a um. RMC tangah Base Military Strategy-BMS (အခြေချ စစ်ဗျူဟာ) le Military Strategy-MS (စစ်ဗျူဟာ) tampi in an ṭhen. Hmunhma a kau i kahdohnak a um lengmang nak Regional Military Command 6 chungah BMS, MS pin ah Regional Operations Commands-ROC (ဒေသကွပ်ကဲမှု စစ်ဌာနချုပ်) an chiah fawn. RMC 14 tangah Light Infantry Division (ခြေမြန်တပ်မ) battalion 200 renglo an um.
Cu pinah Commander-in-Chief nih dairek in a tlaihmi Military Operations Commands-MOC (စစ်ဆင်ရေးကွပ်ကဲမှုဌာနချုပ်) 20 le Light Infantry Division-LID battalion 10 an um i cu tangah battalion 300 an um. RMC tang ralkap an i nguhdeih lonak hmun ah CC nih dairek in a tlaihmi MOC le LID chungin ralkap an thlah hna. Cu an thlahmi hna cu Artillery Battalion (အမြောက်တပ်ရင်း) 100 renglo nih an bawmh hna. Cucaah tanglei kahdohnak ahhin Light Infantry Division-LID le Artillery Battalion-AB hi SAC i a kengruh an si.
September, 2022 tiangah CC nih dairek in a tlaihmi MOC le LID tang ralkap hna cu a tanglei bantukin hmunkip ah an chiah hna. RMC tang ralkap cu an um cia cang. Kachin ah MOC 3, MOC 21, LID 33, LID 88, a dihlak LID/MOC 4 an chiah. Chin ah MOC 19 an chiah. Rakhine ah MOC 5, 9, 15, LID 11, 22, 55, 77 an chiah. Kaya ah LID 66 an chiah. Kayin le Mon ah LID 44, MOC 6, 8, 13, 20 an chiah hna. Shan ram chaklei ah MOC 1, 2, 7, 12, 16, 17, LID 99 an chiah. Cun Shan ram thlanglei le nichuahlei ah MOC 14, 18 an chiah. Sagaing ah MOC 4, 10 le Magwe ah LID 101 an chiah hna.
Tutan khuapau dohthlennak ah Regional Military Command (RMC) 14 tang i ralkap lawng an i deih lo caah MAH nih dairek in a tlaihmi Military Operations Commands-MOC (စစ်ဆင်ရေးကွပ်ကဲမှုဌာနချုပ်) 20 le Light Infantry Division-LID battalion 10 tang i ralkap dihlak zong hmunkip ah an ṭhenṭhek hna ti kha a fiang ngaingai. Cucaah thilphawrh, pehtlaihnak, ralram engineer, sakremhnak, mawṭaw mawng le seh thilri lei tlaitu ralkap hna zong meithal an pek hna. Cu pinah misualphu Pyusawhtee an ser i hriamnam an pek fawn hna.
Kahdohnak a fahnak hmun ah ralkap thazang tampi an thlah kho ti lo. A tambik LID le MOC in battalion pakhat, asiloah pahnih hrawng lawng an thlah khawh cang. Cucu atu i SAC ralkap dirhmun a si. Kahdohnak a um huaha lonak Ayeyarwady ramṭhen in ralkap thazang zeimawzat a lak khawh. Cu lawng cu a si. Hmundang i a ralkap cu lak le zuh awk an ṭha lo. Cucaah SAC nih ram a buaika bantuk khan hmun khat ah thazang tampi he kahdohnak (Offensive) an tuah kho ti lo.
Khuapi, lam le a biapimi hmunhma kilven ding tu kha an tuah khawh cang. A sullam cu mah nih namnak (Offensive) in i runvennak (Defensive) lei ah an i thleng deuhdeuh cang tinak a si. MAH nih dairek in a tlaihmi MOC le LID tang ralkap vialte an hman buin an i nguhdeih ti lo. Tlangcung hriamtlaibu le tualchung hriamtlaibu nih an lakmi SAC ralkap sakhan hna zong an tam chin lengmang.
Ralkap thar lak dingin an i zuam len nain ahohmanh nih mithat lainawng SAC tangah ralkap luh an duh lo. Minung pakhat ah tangka sing 20 in sing 30 tiang pek dingin an sawm hna, asinain minung an hmu lo. Atu hi lungrual tein khaan hawt caan cu a si. Hmunkip in kan au cio ahcun sa cu kan kah ko lai. Lungrual tein kanmah le hmunhma cioah kan doh ahcun SAC cu kan tei ko lai.
Biafang tawi fianternak
SAC : State Administration Council, RMC : Regional Military Command, BMS : Base Military Strategy, MS : Military Strategy, ROC :, Regional Operations Commands, LID : Light Infantry Division, MOC : Military Operations Commands, AB : Artillery Battalion. Crd-The Chin Post
Leave a Reply