Breaking; Falam kan unau an thawngpang vun theih cudah!!

CNDF Nih Tender Tuah An Onh I 10% An Lak Hna!
==================
Chin National Defense Force (CNDF) nih Chin ramkulh Falam peng chungah Tender tuahnak nawl an pek hna, tiah theih a si.
“SAC nih kawhmi Tender tuahnak nawl an pek hna i tender hmumi Company hna nih CNDF sinah zatuak ah 10% an pekter hna,” tiah Company rianṭuannak ah aa telmi pakhat nih The Chin Post ah a chim. CDF-Mindat zong nih Tender tuah an onhnak kong an rak thanh bal ve cang. CNDF cu nai teah CJDC chungtel sinak in kan chuak tiah a timi phu pakhat an si. Crd-The Chin Post

CJDC Member ah CNA Khawh in a ṭhawngbik mi le A fit bik mi CNO / CNDF nih an I phuak caah Chin Mi Pumkhat sinak ah thazang tampi a zawr. Ral kan sung ko lai, mah ti hin cun. CJDC Bylaw ah Member pakhat nih ka duh lo a ti ahcun cu biatung cu a thi ti asi. UNO ah Veto power ahmang khawh mi cu: ram 5 lawng ansi. CJDC ahcun, an phu 18 ning in Veto hmang khawh asi. CDF Hualngoram CJDC member silo ding in CNO / CNDF nih aduh lo ahcun asi khawh lo.

CDF Senthang cu CDF Hakha (B.2 Senthang) nih CJDC member si awk ah aduh lo. MDF cu CDF Mara nih CJDC Member si awk ah a duhlo. Veto in an hnawn. Midang puh ti hlah uh. CJDC nih Lakhruak Chin Cozah dirh awk ah timhnak aum lio ah Mindat le Tedim an ra lo. Mang Hen Dal le Isacc Khen, Aung Thant, Ni Lin Aung te nih disturb an tuah caah. Democracy right ahcun 94% in vote nih a tei caah tuah ding asi. A kai lomi hi 6% lawng an si. MPs le ICNCC cu Kan Pengtlang CDF ah kan I hrawm tiah hnatlak biachah nak aum cang caah an kai lo zong ah apoi nak aum lo.

CNO / CNDF nih veto hmang in a kai lo mi kan sizung ta hna lai, an kai hnu ah Chin Cozah cu dirh siseh ti asi caah, CHIN ah pumkhat sinak ruahchan nak he adang nih YES an ti hna. Cucaah nihin tiang Lakhruak CHIN Cozah kan ngeih khawh lo nak asi. Salai Isacc Khen le MPs rual nih Lule an tuah I, anmah lawng nih PM le Vuanci tlaih dih ding an ti caah, a rawk chin, a thih chinchin. Thih lan dawh asi. CDF tuahcia mi Cozah hi I rinh ah a ṭha cang ko lai dah.

Mah tein khuakhan Lairelnak le Tlukruannak aum cikcek mi Ramkhel kan ti lio kan LAITLAI Falam cu Hakha in Falam ah Khualipi ṭhial ṭhan ding, LAIZO caholh cu Tlangholh ah sersiam ding ti lawng lawng. Hihin varal an pet ve duh ti lo. An chunmang phenh tu hi Hakha le Thantlang asi tiah kan I cawn piak. Kan thisa, thahri le nunnak ah fek tukin khua asa ve. Zeizei tiloin Hakha le Thantlang kha kan huat colh. CNF / CNA cu Hk Ttl ta asi tiah Gospel team kan vak pi.

Krifa le zumhnak ah kal sual mi bang in Ramkhel ah kan kal sual. Krifa kal sual cu thlarau an ri an ti. Kannih Falam cu Khualipi le Laizo holh kan rit ve. Falam Politicians nih Chin Tlang holh cu Mirang (or) Mizo kan ti mi khi Laizo holh asi khawh lo caah kan ti mi tu asi. Chinmi nih Kawl mi sin ah kan hal mi cu Tlukruannak asi. Palai le Uktu, Cozah rian, Sipuazi, Fimthiamnak, Ngandamnak, Zatlang nun, Caholh le nunphung, tbk in a zeilei poah ah Kawl miphun he fangkhat cio co ding kha kan hal mi le kan duh mi cu asi.

Miphun thleidannak (Maha Lumioci Vuadah) thih seh, um ti hlahseh, Kawl le Kachin, Chin tbk kan I ruang dih, Fangkhat cio lawng kan si timi hi Federal amuru cu asi. CNO / CNDF nih Hualngo le Zangiat nan cohlan khawh lo mi cu Anasin nan si caah asi. Ngawn le Zahau zong dir rih seh nan ti awk tu khi asi deuh, Federal aduh ngaingai mi nan si ahcun.

CNO / CNDF le ICNCC cu kawl tuahpiak mi nan I ziak tuk. Chin Pine ah Myone 9 aum ti mi cu Kawl tuahpiak mi asi. Chin Federal Cozah ah cun Chin Miphun ṭenge vialte nih Palai (Kusale) ngeih dih asi lai. Kawl tuahpiak cia mi Myone 9 in nan kal lengmang ahcun Chinram adam khawh lai lo. Kawlte nih Chin ah Miphun Ṭenge 53 aum ti hi asilo. 30 leng lawng asi, biatak tein cazin tuak ahcun: Falam cu miphun min zong asi lo, Falam aiawh in Chin ah lut khawh asi lo. Tlaisun nih ral lio an fa le an thuh nak hmun kha, Fa hlam an ti. A hnu ah Falam ah aa chuah mi asi.

Falam peng, Hakha Peng, Thantlang peng, Matupi peng cu LAI lawngte kan si. Senthang khi miphun min asi lo. Minung min asi. LAI kan si ko tiah, Thianhlun Ramuk bawi nih an ti mi asi. Zophei, Zotung, Mara, Lautu, Matu tbk vialte khi LAI an si ko. Hitlukin Pumkhat, awkhat, thinkhat, lungkhat, si a biapit lio ah CJDC in Falam hi kan chuak awk asi lo. Ahlan ahcun Ramkhel ah TB le Cancer kan rak si.

CJDC kir duh ti loin, kanmah lawng tein kan um ahcun: Ramkhel ah Virus kan si cang lai. Kan virus hi Covid (Omicron) HIV nakin ṭihnung dueh asi te lai. CJDC ah rakir in, CHIN Ralkapbu he pumkhat si cang uh. A Unau a huat biktu Esau cu ram le power ngeih loin nihin tiang a tlau. Bible ah cun Filistin an si. Chanthar ahcun Israel ral ngan bik Palestine an si zong khi CNO/ CNDF nih Kan philh awk asi lo. Crd-Joseph R. Thang

Falam Palik Sakhan In Palik Pakhat CDF CDM Siyin Sinah A Zam, Chin ramkulh, Falam palik sakhan in palik pakhat cu CDF CDM Siyin sinah a zam, tiah November 3 ah theih a si. Kum 4 chung palik rian a ṭuanmi Mang Suan(Kum 25) cu a luancia November 1 ah CDF CDM Siyin sinah a zam hi a si. Anih hi tuan tein CDM tuah aa tim ko nain SAC ralkap nih a chungkhar an tlerhkhawn lengmang hna caah tuan tein CDM a tuah khawh lonak a si, tiah theih a si.

“CDM tuah a duhmi paoh cu lunglawm tein kan don peng hna i kan cohlan peng ko hna. A luancia lio caan zong ah CDM ralkap officer pakhat zong SAC ralkap sinah a rak luh ṭhan caah ṭha tein checkhlatnak kan tuah hna,” tiah Chinland Joint Defense Committee ṭuanvo ngeitu pakhat nih a chim. Major Myo Min Htun cu SAC ralkap he ai fonh ṭhan caah lung thawhnak men in CDM an tuah le tuah lo ṭha tein kan hlathlai hna lai, tiah a luancia October 7 lioah CDM ralkap hna nih cathanh an rak chuah. SAC nih nawlngeihnak an lak hnu in CDM tuahmi ralkap 8,000 nak tlawm lo an phan cang, tiah theih a si.

Paletwa Pengchung Kahdohnak Ruang Ah Tualchung Mi 500 Leng Ral An Zaam, Chin ramkulh, thlanglei Paletwa peng Tayakone, Kyaukpalin(ကျောက်ပလ္လင်) le Sattalawa(ဆတ္တလာဝ) khua thum i a um mi tualchung mi 500 leng cu SAC ralkap le AA kar kahdohnak a chuak lai ti an phan caah, October 30 in Paletwa peng Miza khua ah ralhrial dirhmun an phan tiah tualchung mi hna nih an chim tiah theih a si.

Tayakone, Kyaukpalin(ကျောက်ပလ္လင်) le Sattalawa(ဆတ္တလာဝ) khua khatlei ral ah Rakhine ralkap AA nih hmunhma an lak, cun khuachung zong ah SAC ralkap an um caah kan zaamnak a si tiah tualchung mi hna nih an chim. Miza khua ah a zaam mi ralhrial hartong hna caah eiding le um ṭhutdirnak kongah harnak an tong ngai tiah bawmhnak petu hna nih an chim. Paletwa ah ralhrial dirhmun phanmi 20,000 leng an si i, mi tamdeuh cu Paletwa khuachung le Sami khuachung ralhrial sakhan ah an i dor hna, a cheukhat cu India, Mizoram ramkulh chung ah aa dormi zong an um tiah ralzaam bawmhnak a tuahtu hna nih an chim.

Dik Tein Cazin Khumhnak A Tuahlo Mi Phone Simcard Paoh Kan Phih Lai Tiah SAC Nih Thanh, Phone simcard hman tik ah telh dingmi min, hmat-pung-tin number dik tein a hmanglo mi phone sim card paoh kan phih lai tiah SAC ralkap kuttang um department pakhat nih cathanh an chuah tiah theih a si. Kan hmanmi phone sim card hna cu min, hmat-pung-tin number a dik le diklo tha tein zohfelnak tuah hnu ah remh duhmi paoh nih 2023, January thla dih tiang a hnu bik chia in remh cio ding ah an thanhmi ah cun an langhter chih tiah theih a si.

Kalaymyo Ah Kahdohnak Umlo In SAC Ralkap Nih Hriamngan An Kah Caah Rawlruk Pakhat A Rawk, Kalaymyo ah kahdohnak a chuak lo buin SAC ralkap nih November 3 ah tualchung mi umnak hmun hriamngan in an kah caah tualchung mi pakhat ngeih mi rawlruk a tlak i a rawk tiah Kalaymyo peng tualchung hriamtlai phu nih cathanh an chuah tiah theih a si.

Kalaymyo peng thlanglei Htaukkyant(ထောက်ကြန့်) khua cu nihin chunhnu suimilam 11:20 hrawng ah SAC ralkap nih hriamngan in an kah hi a si. Voi thum an kah i voi khat cu khuachung ah a tla” tiah tualchung mi pakhat nih a chim. November 3 zinglei ah SAC ralkap minung thazaang 150 hrawng cu Kalaymyo GTI sianginn ah umhmun an khuar tiah an thanhmi ah an langhter chih.

Philipine Ram Ah Thlichia Nalgae A Hran Ruangah Minung 100 Leng An Thi, Philipine ram laifang ah a luancia October 28 in thlichia Nalgae a hrang i min a cimh pinah ti a lianh caah minung 100 an nunnak a liam i 33 an tlau, tiah Department of Disaster Management nih November 1 ah an langhter tiah theih a si.

Nalgae thlichia cu Tuluk ram thlanglei ah aa ṭhial cang. Aa ṭhial lai ah Philipine ram khualipi Manila zong a pal pah tiah theih a si. Philipine President Ferdinand Jr. Marcos nih, an ram thlanglei i thlichia nih a denmi Maguindanao ramkulh cu November 1 ah vanlawng in a va vehvat hna. Tikulh 76,000 a umnak Philipine ram cu kum khat ah thlichia voi 20 tluk a hrang i, Nalgae thlichia hi a voi 14 nak a si. Khua caan a dik lo chin lengmang caah vawleipi a lum chin lengmang i thlichia hrannak a karh chinchin, tiah Seintist hna nih an langhter.

Myinkin Ah PDF Nih SAC Ralkap Sakhan An Kah Caah 5 An thi, Meithal zun 3 An Lak, Sagaing ramṭhen, Myinkin peng Taymatauh(သေမသောက်) khua luhnak SAC ralkap sakhan cu, Student’s Revolutionary Force(SRF) nih an kah caah SAC ralkap 5 an thi, meithal zun 3 an lak, tiah theih a si. November 1 zing sml 5:00 hrawngah an va kah hna i, sml a cheu chung hrawng kahdohnak a chuak. Teymatauh khua ah SAC ralkap le pyusawhti 50 hrawng an um nain sakhan tu ahcun 15 hrawng an um, tiah theih a si.

“SAC ralkap an sakhan hi lak ding in kan i tim ko nain hliamhma pumi kan um caah meithal zun 3 lawng kan lak i hnu kan kir ṭhan,” tiah SRF ralkap pakhat nih a chim. Cu kahdohnak ah SAC ralkap 5 a hmun ah an thi colh i 7 hliamhma an pu, cun SAC ralkap 2 hi an hliamhma a fak ngai, tiah a chim chap. Cu kahdohnak cu Student’s Revolutionary Force Battalion 1 le 4 hna i bawm in an kah hna, tiah theih a si. Crd-The Chin Post

Be the first to comment

Leave a Reply

Your email address will not be published.


*