Breaking, Aung San Suu Kyi Caah Thawngpangtha!!

ASEAN Special Palai Nih Daw Aung San Suu Kyi A Umnak Inn Thingah Ah Chiat Than Dingin a Nawl
==============================
Daw Aung San Suu Kyi cu a inn ah chiah than dingin ASEAN Special palai pawl nih SAC ralhrang sinah an nawl tiah theih a si. SAC ralhrang nih Daw Aung San Suu Kyi cu Nay Pyi Daw thonginn ;ei ah an thial mi cungah vawleicung rampi hna nih duhlonak an langhler lio ah ASEAN Special palai pawl zong nih nawl naknak caa an kuat ve tiah theih a si.

Daw Aung San Suu Kyi cu vawleicung ram pi hna nih hnatlak pimi a si bantuk in Kawlram sersiam khawhnak ding caah a biapi bikmi pakhat a si ve ca zongah ASEAN Special Palai Cambodia ramdang vuanci Prak Sokhonn nih Kawlram ramkhel vaunci U Wunna Maung Lwin sinah cakuat a tial tiah theih a si. SAC ralhrang nih Daw Aung San Suu Kyi taza an cuai mi he pehtlai in a umnak inn an fimtawl hnu ah June thla ni 22 ah Nay Pyi Daw thonginn ah an thial tiah theih a si.

Kachin ram Mitkyina khuapi ah SAC ralkap thawngpang petu Dalan tiah ceihmi ralkap hlun pakhat cu tuzing ah meithal in an kah caah a nunnak liam tiah theih a si.Tuzing Pur 27 zinglei sml 8:00am hrawng ah Mitkyina khuapi chung bak ah meithal in an kah. Amah hi ralkap pension a la cang mi a si i, SAC ralkap thawngpawng petu tiah mi nih ceih mi a si.

Meithal kah a tong mi hi kum upa Pu Hngunh Way timi a si i, minung pahnih nih an i fuh i meithal in an kah colh ko tiah mit in a hmu tu hna nih an chim. Ram pumpi huap in SAC ralkap nih cun PDF he ai pehtlai mi pawl an tlaih hnai an hrem hna, an thah mi hna zong an um. Cu hnu ah a tu cu PDF lei zong nih SAC ralkap leittang Dalan pawl cu an tlaih ve hna, an thah mi hna zong an um len cang.

Karen ram ah KNLA he ni hnih chung kahdohnak ah SAC ralhrang minung 19 nih an lu an hloh tiah KNU nih tuchun ah a langhter. Pur 25 ni Nga Biat In khua kiangkap ah KNLA le SAC ralkap karlka kadohnak ah SAC ralkap Major pakhat le khua bawi pakhat telh in minung 14 an thi tiah an langhter.

Cun hi hlan ah zinglei sml 5 hrawng ah Hmone khuapi peng Naung Kone khua ah kahdohnak a chuak tthan i SAC ralkap 2 an thi tiah an langhter. Kyauk Gyi peng ah nizaam Pur 26 ni zing sml 7 hrawng ah kahdohnak a chuak i SAC ralkap minung 3 an thi tiah theih a si. Kahdohnak a chuahnak kiangkap khua tampi cu SAC ralkap nih mei in an khangh dih hna tiah an langhter chap.

Shan ram thlanglei ah Taunggyi khuapi ah a kal mi Vice Senior General Soe Win mawtaw thluan cu a hmun um PDF nih bomb he an rak doh caah SAC palik minung 2 an thi i hliam a tuar mi an um tiah nizaan Pur 26 ni ah thawng an thanh. A liamcia Pur 24 lio ah khan uknak firtu SAC ralkap Vice Senior General Soe Win le a zultu mawtaw thluan cu hmunram mizapi ralkap SYM UGPDF nih bomb he an rak doh hna caah SAC palik minung 2 an thi i traffic police minung 2 hliam an tuar tiah nizaan Pur 26 ni ah SYM UGPDF nih thawng an thanh.

Mawtaw thluan cu chun hnu sm; 1:15pm hrawng ah mine bomb in an rak doh hna. Ralhrang Vice Senior General Soe Win cit mi mawtaw bak bomb puah an duh ko nain a ruang phunphun ruangah minute tlawmpal te ai duh bak ah mawtaw dang tu bomb an puah hnawh hna hi a si. Hi hnu pin lei zong ah SYM UGPDF nih mission dangdang zong kan tuah lai caah mizapi dirkamhnak le thapeknak kan herh ko tiah SYM UGPDF nih theihternak an tuah.

KNU hmunram chung ah ni hnih chung SAC ralkap he kahdohnak a chuak i SAC ralkap minung 9 an thi tiah KNU in ttuanvo ngeitu pakhat nih a chim. Pur 25 ni ah KNU brigade 2 le SAC ralkap karlah ah voi hnih bak kahdohnak a chuak a voi khatnka ah SAC ralkap minung 1 hliam a tuar. Cu tlawmpal ah SAC ralkap mawtaw 3 cu mine bomb an puah hnawh i kahdohnak a chuak tthan SAC ralkap minung 6 an thi i 6 tluk hliam an tuar tiah an langhter.

Cun nizaan Pur 26 ni ah khan nih KNU brigade 2 pasalttha hna nih cun SAC ralkap camp 3 bak an va kah tthan hna i Sniper pakhat telh in minung 3 an nawn hna. Ni hnih chung kahdohnak ah SAC ralkap minung 9 an thi i KNU lei in aho hmanh hliam le thi an um lo tiah theih a si. Pur 23, 2022 ni ah Thantlang khua chung ah CNA le CDF-Thantlang fonh nih SAC ralkap pawl an va kah hna caah SAC ralkap minung 2 an thi, hliam tuar mi an tam tiah tuchun ah an langhter.

23 Pur 2022 ni ah Thantlang khua chung ah CNA le CDF-Thantlang fonh nih SAC ralkap cu an va kah hna. Hi kahdohnak ah CNA le CDF lei in aho hmanh thi le hliam um lo tein hnu an pil kho tthan. A thaizing ah kahdohnak hmun ah hlathlainak an tuah tikah SAC ralhrang hna thi le an hnai ceilka te an va hmuh. Cu hnu ah SAC ralhrang minung 2 an thi i hliam tuar mi an tam nak kong kan theih tiah CDF-Thantlang nih thawng an thanh.

June thla chung ah Rakhine ramkulh, Sittwe le Punarkyawn(စစ်တွေမြို့နှင့် ပုဏ္ဏားကျွန်း) khua in tualchung mi 29 cu, SAC ralkap nih an tlaih hna, tiah AA nih cathanh an chuah. A luancia June 23 ah Sittwe khua ah SAC ralkap nih, tualchung mi 21 an tlaih hna, cu chung ah kum 18 tling rih lomi minung 3 an i tel, tiah June 25 ah AA nih an langhter.

June 16-26 tiang ah Punakyawn khua in tualchung mi 8 cu SAC ralkap nih an tlaih hna i, kum tling lo pakhat aa tel. Cu pinah Kyauktaw le MyoOo(ကျောက်တော်နှင့် မြောက်ဦး) khua in tualchung mi 20 leng SAC ralkap nih an tlaih hna, tiah tualchung mi hna nih an chim. June thla thawk in Rakhine ram chung peng 4 AA nih, SAC ralkap le palik an tlaihmi hna hi 18 an phan cang. AA sinah aa zammi SAC ralkap le palik hi a thong leng an si cang, tiah June 4 thawng fianternak tuah lioah AA in chimphuannak nawlngeitu Khine Tuh Khah nih a chim.

A luancia June 23 zanlei ah Chin ramkulh Thangtlang khuachung ah Chin ralkap CDF- Thantlang – CNA ṭangṭi le SAC ralkap kahdohnak a chuak. Cu kahdohnak ah SAC ralkap 2 an thi i, CDF-CNA lei in a thimi le aa hliammi kan um lo, CDF Thantlang nih cathanh an chuah.
Kahdohnak a dih a thaizing ah CDF Thantlang nih hmunhma zohfelnak kan tuah i hmun kip kakip ah thisen kan hmuh. Thawng kan theih ning ahcun SAC ralkap 2 an thi i, tam ngai hliamhma an pu, tiah an langhter.

Oneness le Trinity Nawlnak, Kan hnu leiah kan rak thanh cang bantuk in tulio cu Oneness le Trinity kan vun buaituk caah Admin zong nih aho lei hmanh tanh ngeihlo, mawhchiat le kham zong kan khan ngam fawn lo caah aa dawhnak tein Admin te nih Online Live Debate kan in tuahpiak hna lai, kan ti nak asi. Phundang ah kan ruat hlah u, cun tanh hlei zong kan ngei hrimhrim lo.

Kaphnih in bia aa al mi zong nan lungtling in comment ah nan vun tuah caah kan vun peh zulh bia asi. Trinity leiin Rev. Dr. Aung Myint Thang nih keimah ka dir lai a ti, Oneness lei zong nih ready kan si ko, nan ti tikah kaphnih nan duhning le zeitiphun in kan kal lai, tiah Oneness lei kan unau pa NT Hnuna ca kan kuat len hna nain ca a ka let ti lo. Trinity leiin Dr Aung cu tuzing ah ka chawnh i kai ready ko hi a ka ti, kan unau Oneness leiin ai tim kho ding nan um ahcun thawng vun kan thanh hrimhrim te u!

Hihi i tawng reng reng hna seh, i al hna seh, i si hna seh, ti siloin Online i cabia in bia i al lengmang nak cun face ti face in a tak in bia i ruah hi nan ca, mipi ca zongah a tha deuh lai tiah ruahnak kan ngeih caah asi. Pathian Bia i ruahti cu a sual lo pi, i nehsawh ding asi lo pi, bia i ruahti bantuk ah kan ruah piak hna caah asi ko. Forh-haih bia asi hrimhrim lo, lungthian tein le tanhmi ngeilo tein a tha bik lai, tiah kan in ruahpi hna caah asi. Trinity leiin Rev. Dr. Aung Myint Thang ready tein a um cang, Oneness lei kan unau lehnak vun i tuah ulaw kan duh ko. Upatnak he, Admin. Crd-Chelsea Bawi

Covid zawtnak khamnak caah tiin hnar chungbl toih mi sii-ai cu Thailand ramchung scientists nih an serchuah. An sermi sii-ai cu hman dingin an chuah rih lo nain research an tuah ningin a tha ngai tiah an chim. Sii thazang riantuan ning cu a bikin covid zawtnak a chuahter khomi Sars-Cov 2 virus hna cu chunglei ah lut lo dingin a kham tiah an ti.

Mah sii cu Bangkok khuapi Chulalongkorn University ah siibawi hna telh in cozah le mithiam hna i bawm in an serchuah. Hneksaknak an tuah cuahmah liomi zawtnak khamnak sii cu Prototype level a phanmi cu Antiboby hmangin hnar chung toih dingin an serchuah. Research an tuahmi cu biatek tein zanghleicawi in an tuah nak ah Antibody sersiam ningcang zong a thar in an hmuhchuah. Taksa chungin covid zawtnak cu kham kho dingin minung pumsa thazang thawnter ningcang zong an hmuhchuah tiah sianghleirun i associate professor nih a chim.

An serchuah liomi sii cu hnar chungin zawtnak a lutmi virus cu kham kho dingin tuahmi a si. Covid zawtnak virus i chawnh khawhnak bik cu hnar hi a si fawn. Hnar kua chungah Antibody hmang in virus zawtnak lut kho loin a phihkham hnu ahcun zawtnak virus cu tih ding a um ti lo tiah associate professor nih a chim. Hnar chung toih mi sii cu tha tein zohfelnak an tuah dih hnuah rinhawktlakmi dirhmun a si ahcun Thai cozah department FDA sin ah nawlpeknak catlap kan laak lai i, kum dongh hlan ah zuar khawh colh dingin ruahchannak kan ngei tiah a chim chih.

Associate Professor chim ningin zawtnak virus khamnak caah mah sii pakhat lawng cu rinh awk a tha deuh lai lo tiah ralrinnak a chim chih i, zawtnak khamnak sii serchuah a rak si lio bantukin pakhat le pakhat hlat nawn deuh in i chawnh biak ding, hnar i huh ding, thiang tein kut zong i tawl ding a si tiah a chim chih.

Breaking, Aung San Suu Kyi Caah Thawngpangtha!!

Be the first to comment

Leave a Reply Cancel reply