Kuanfang I Zat Lo Ruangah Siseh, Hriamnam I Tluk Lo Ruangah Siseh CDF-Kanpalet Brigate Sakhan Cu An Chuahtak!
Chin ramkulh Kanpalet peng chung hrambunh CDF-Kanpalet le SAC ralhrang ralkap karlak ah kum 2022 Febuary 7 in March 16 tiang kahdohnak a fak ngaingai i, kuanfang i zat lo ruangah Brigate sakhan cu kan chuahtak ruangmang cang tiah nihin ah cathanh an chuah.
CDF Kanpalet nih cathanh an chuahmi ahcun kum 2022 March 11 ah Kanpalet khuapi in ralhrang ralkap thazaang 200 in CDF Kanpalet sakhan umnak leiah kahdohnak an tuah caah CDF Kanpalet he Ye Laung Pan khua cunglei Pan Taung Kyaw ah an i kap i, SAC ralhrang ralkap (3) an thi i, CDF Kanpalet leikap ah hliam tuartu an um lo.
Cuhnuah ni 13 ah khan Ngung Laung khua chaklei Am Pung khua cunglei ah a ummi SAC ralhrang ralkap cu CDF Kanpalet, CDF Mindat, The Youth Force le Saw PDF hna nih ramtang ah luhhnawh in an kawl hna tikah kaphnih kahdohnak a chuak than i, ralhrang ralkap (2) an thih i, CDF Kanpalet (2) hliam an tuar. March 14 zongah khan fak taktakin kahdohnak a chuak nain ralhrang ralkap leikap ah a thimi le hliammi an um le um lo theih an si lo.
March 15 ah CDF Mindat, CDF Kanpalet, The Youth Force le Saw PDF fonhmi phu le SAC ralhrang ralkap karlak ah zinglei sml 8:00-zanlei sml 3:00 tiang kaphnih kahdohnak a fak ngaingai i, CDF Kanpalet (1) nunnak a liam i, a dang (2) nih hliam an tuar. SAC ralhrang ralkap leikap ah a thimi le hliammi zat theih a si lo. Cu kahdohnak ah Mindat hrambunh ခလရ ၂၇၄ Battalion le Kyaukhtu lamhlat kahnak sakhan in hriamngan in an kah ruangah Damahtha Khua Hlun inn (9) cu hriamngan kahmi nih a khenh caah mei nih an kaang.
CDF Kanpalet leikap ah kuanfang i zat lo ruangah siseh hriamnam i zat lo ruangah siseh khuami nih an ton dingmi harsatnak tibantuk hna ruahpiak in siseh ralhrang ralkap nih a hleihluat tukin an kan kah ruangah siseh CDF Kanpalet Brigate sakhan cu caan karlak chuahtak a si.
Cucaah ramchung ramleng nulepa hna le bawmhnak petu hna nih hriamnam thazaang, kuanfang thazaang tam deuh in nan kan bawmh/tuaktan piak nakhnga zaangfah kan in nawl hna nak cathanh kan chuah.
ASEAN Special Palai He Ton Biaruah Ding Kahdohnak Daihter Ding Cah SAC Ralhrang Nih Tlangcung Hriamtlai Phu Caa A Kuat
March thla ni 20 ah Myanmar a rak phan hnga ding Myanmar kongkau he pehtlai in ASEAN Special palai a si mi Cambodia a pahnih nak vuanci le ramkhel vuanci a si mi Prak Sokhonn le kahdoh daihter, tlang cung hriamtlai phu kar ah ton biaruah nak tuah ding ah SAC ralhrang lei nih tlangcung mi ca an kuat hna tiah theih a si.
Kahdoh daihnak min athu mi tlangcung hriamtlai phu i ram daihnak nak lam hruai mi phu (PPST) in sam mi a si tiah sawmnak caa ahmu mi phu nih a chim. Kawlram chungah kahdoh daih tlangcung hriamtlai phu 10 an um.
” ASEAN Special Palai he ton biaruah ding ah sawm mi a si” tiah sawmnak ca ahmu tu phu khat sin in theih a si. Myanmar ram ah a voikhat nak bik in a rak phan hnga ding ASEAN palai zong nih Myanmar ram chung ah a um mi phu fonh dih lak he ton biaruah nak ngeih dingah in timhlamh nak a ngei.
SAC ralhrang lei nih NLD tel in ramkhel party phu pawl he tonnak nawl kan pek hna lai tiah an chim i thawng chungah a um mi le, Sahrang tiah ruahmi pawl he ton nak nawk kan pek hna lai tiah SAC ralhrang lei nih an chim.
Leave a Reply