BREAKING; A Lar Tukmi Hakha Le Falam Karlak Kahdohnak Video Pa 3 Bak Kan Pasaltha Le Nih An Phoizar!

Ramthlo Le Dokṭhek Karah SAC Ralkap 35 An Thi, (A Tang Bikah Video Um Lai

=================

Chin ramkulh, Falam peng Falam le Hakha kar a nithumnak kahdohnak ah SAC ralkap 35 an thi, tiah CNF/CNA chimphuannak nawlngeitu Salai Htet Ni nih a chim. “SAC ralkap pawl cu zan an riahnak khua in an i thawh ṭhan i, kan kah hna. Hmailei an lanh khawh lo caah hnu an kir ṭhan. An kir lioah khua chungah kan i kap ṭhan. Karceh in kan kah hna caah SAC ralkap 35 an thi. Drone zong in bomb kan thlak hna,” tiah a chimchap.

Nizan July 11 ah Ramthlo khua ah a riakmi SAC ralkap pawl cu zing sml 9:00 hrawng ah CNA,CNDF le CDF nih an kah hna caah hmai an lan kho lo i, hnu an kir ṭhan. A hnu he hmai he karceh in an kah hna, tiah theih a si. Cu kahdohnak ah SAC ralkap 35 an thi i, hliamhma pumi zong an tam. CDF Matupi in ralkap zong ram le miphun ca ah a nunak pek ve. Chin miphun hriamtlai lei in ralkap 7 hrawng hliamhma an pu i, 3 cu an hliamhma fak ngai, tiah theih a si.
Cu pinah SAC ralkap pawl nih khuami Caw pakhat cu a phei a hleh i an lak. A dang cu an hlonh ta. SAC ralkap pawl nih Ṭaal khua inn 29, Thlanrawn khua Khrihfa biakinn, Tlangzar khua inn 6 hna cu an hrawh i an khangh. CNA, CNDF le CDF nih SAC ralkap motor 4 an chuh hna i hman awk ngaingai cun a ṭha ti lo, tiah theih a si. Falam in Hakha kar kahdohnak ah SAC ralkap 60 leng an thi cang.
Falam Peng Chung Kahdohnak Ah SAC Ralkap 30 Leng An Thi Cang! Chin ramkulh, Falam pengchung ah, July 10 ahkhan kahdohnak a chuak i cu kahdohnak ah cun SAC ralkap 11 an thi, tiah CNA in chimphuannak nawlngeitu Salai Hṭet Ni nih Mizzima ah a chim. July 10 ah khan Falam peng, Ramthlo khua le Tlangzar khua kar ah kahdohnak a chuak i, cu kahdohnak ah cun SAC ralkap 11 an thi, tualchung hriamtlai phu lei in ralkap 4 hliamhma an tuar ve nain an hliamhma kong ah thinphan ding a um lo, tiah theih a si.
July 9 zong ahkhan Falam-Hakha lampi Tlangrawn le Ṭaal khua pawng ah kahdohnak voithum a chuak i, cu kahdohnak ah cun SAC ralkap 21 an thi, tiah theih a si. Cu ni ṭhiam ah cun SAC ralkap nih Ṭaal khua inn 29 an khanghpiak hna leng ah inn 5 cu baoh in thilri an soksam dih, tiah CNO nih cathanh an chuah.
SAC ralkap hna cu motor 28 in an kai i, motor 4 nih cun inn saknak thilri an phorh i, ralkap 40 hrawng cu ke in an kal. SAC ralkap cu an dihlak in 120 hrawng an si lai, tiah zumh a si. July 11 zinglei suimilam 4:00 hrawng ah Ramthlo khuachung ah umhmun khuarmi SAC ralkap hna cu CNA le Tualchung ralkap pawl nih an kah hna i, a thimi le hliamtuar kong tu cu ah fiang in theih khawh a si rih lo.
Hakha ah SAC ralkap 30 hrawng nih cawlcanghnak an tuah i, kahdohnak a chuahnak Falam peng lei ah kal an i timh zong a si kho, Thantlang lei ah minung thazaang chap an timh zong a si kho, tiah Chin ralkap pakhat nih cun a chim. SAC ralkap hriamngan kahnak ruangah Tlangrawn khuachung Biakinn le sii sayamah nu umnak inn cu an rawk, tiah theih a si. July 10, chunhnu zong ah Tlangzar khua cu SAC ralkap nih an khanghpiak hna caah inn 6 an kaang, tiah CNO nih cun an langhter chih.
Tayatchawng Peng Ah SAC Ralkap Motor Run Bomb Puah An Tong I, 7 An Thi!: Tanintharyi ramṭhen Tayatchawng(သရက်ချောင်း) peng, PadaukKyi(ပိတောက်ကြီး) khua pawng ah SAC ralkap motor 5 cu, nihin July 12 zaanlei ah bomb puahhnawh an ton caah SAC ralkap 7 an thi i, minung 11 hliamhma an tuar, tiah TheinHngait(သိန်းငှက်) hriamtlai phu Folcon PDF-TYC sin in theih a si.

SAC ralkap a thi mi lak ah cun SAC ralbawi zong an i tel. Hliam a pu mi hna cu mizaw phorhnak motor nih a rannak in a thiar hna, tiah tualchung media nih an thanh. Tualchung hriamtlai phu lei cu hliamhma tuar um lo in hnu kan tolh kho, tiah Falcon PDF-TYC phu nih an thanh.

Palauk Ah SAC Ralkap Motor Le Khualtlawng Motor An i Pah Caah SAC Ralkap 3 An Thi!: Nihin July 12, chun suimilam 12:00 ah Tanintharyi ramṭhen Myaik pengkomh Palaw peng Palauk khua ah SAC ralkap motor le khualtlawng motor an i pah caah SAC ralkap 3 an thi, tiah tualchung mi nih an chim. Khualtlawng motor le SAC ralkap motor an i pahnak hmun cu Palauk ralkap an umnak hmun ah a si, tiah tualchung mi pakhat nih a chim.

Palauk khuami pakhat nih cun, “SAC ralkap motor cu ramṭhen in ralveng ding ah a ra mi SAC ralkap an si i, an pahmi khualtlawng motor cu ‘Nay & Lah’ motor a si” tiah a chim. SAC ralkap motor nih cun ralkap tampi a phorh hna i, cu chung ah cun minung 3 an thi, hliamtuar zong an um. Khualtlawng motor chung ah a cuangmi hna chung in aa khawngmi an um lo,” tiah khuami nih an chim.

Motor i pahnak ruangah aa khawngmi ralkap cheukhat cu Palauk sii-inn ah an thlopbul hna, tiah theih a si. SAC ralkap motor le khualtlawng motor an i pah caah Palauk si-inn le Palauk palik sakhan cu SAC ralkap hna nih hmunhma laak in an cawngh hna, tiah theih a si.

Myanmar Ram Ah Omicron Virus BA.4 A Ngei Mi Pakhat Le. BA.5 A Ngei Mi An Hmuh Hna!: Myanmar ram ah Omicron variant aa thleng mi virus BA.4 a ngei mi pakhat le BA.5 a ngei mi minung 5 hmuh an si, tiah Ministry of Health nih an thanh. Cu Omicron virus BA.4 le BA.5 an hmuh mi hna minung 6 cu ramdang in Myanmar ram ah a rak kir mi Myanmar mi an si, tiah theih a si.

 

“Ramdang in a rak kir mi minung 16 chek an si i, cu chung ah minung 6 sin in zawtnak kan hmuh. An dihlak in an ngandamnak a ṭha. Rikhiah mi ni a tlin tiang a dang tein chiah i cawnghhramh an si,” tiah ngandamnak lei rianngeitu pakhat nih a chim.

Vawlei pumpi ah dothlatnak tuah in an hmuh ning ah, Covid-19 raikhamsii tlamtling in aa chun cang mi hna sinah cun Omicron zawtnak hmual cu a faak lo i, a thi mi zong an tlawm, tiah theih a si. Ministry of Health nih cun Covid-19 aa thleng mi virus cu zohfelnak an tuah i, Covid-19 zawtnak i thlopbulnak kong le Commercial Flight, Relief Flight le ramri gate in a lutchuak mi hna cu zohfelnak an ngeih hna, tiah theih a si.

Monywa Ah Mifir 11 Tlaih An Si! + Mon Ramkulh Ah Kum 10 Hrawng Ngakchia Nu 3 Ti Ah An Paam! Monywa Ah Mifir 11 Tlaih An Si!: Sagaing ramṭhen, Monywa Thasi(သာစည်) lam i mi choklet sin in meithal deu he mizapi thil a chuttu minung 11 cu nihin (July 12) chun Sml 2 hrawng ah civil thuam aa hruk mi palik nih an tlaih hna, tiah mit hmutu pakhat sin in theih a si.

Mit hmutu tualchungmi pakhat nih cun, “Full Moon lio a si caah sui le ngun he pura(pagoda) lei ah a kal mi an tam i, cu hna sin in an fir mi phaisa bawm, phone, cycle le sui zeimawzat he tlaih an si,” tiah a chim. Tlaih a tong mi hna cu pa 9 le nu 2 an si, an chekhlatnak a tuak cuahmah lio a si, tiah theih a si.

Nihin zinglei zong ah Monywa Thasi lam, ti liaunak lam le Thapyipyin(သပြေပြင်) lam ah (phungki sianginn) ah rawl ulhnak in a rak ṭin mi hna cu misual nih an thil an chuhpiak hna, tiah theih a si. July 11 zaanlei zong ah khan Monywa Yankin(ရန်ကင်း) sang ah inn pakhat chung ah cycle 5 an fir, tiah theih a si.

Atu i Mifir 11 tlaih an si nak Thasi lam ah hin dawr pakhat a suamtu minung 7 cu tualchung mi hna nih an rak tlaih bal cang hna.Mon Ramkulh, Paung Peng Ah Kum 10 Hrawng Ngakchia Nu 3 Ti Ah An Paam!: Mon ramkulh, Paung peng PhaLayWatKyi(ဖလပ်ဝတ်ကြီး) k hua ah nihin July 12, zinglei suimilam 9:00 hrawng ah kum 10 hrawng ngakchia nu 3 cu ti ah an paam, tiah tualchung mi nih an chim. Cu ngakchia nu 3 hna cu phungki sianginn ah thla a cammi, ngakchia nu pakhat i a pa rawl an chanh hnu, an kirlei ah tidil chung ah an tla, tiah theih a si.

Cu ngakchia nu 3 cu rawlchanh an kal nak in an kir ti lo caah khuami nih an kawl hna i, tidil pawng ah chuncaw dur le kedanh an hmuh caah cu tidil chung ah cun an kawl hna. Tidil laifang i lung umnak kam ah an 3 in an ruak an hmuh hna, tiah theih a si. Ngakchia nu 3 hna cu Ma Phyu Tirih(kum 9), Ma Soe Pyih Pyih San(kum 12) le Ma Khine Da Thein(kum 12) an si i, an pathum in Zayatchawng (ဇရစ်ချောင်) sianginn ah a kai lio mi an si. An ruak cu Paung peng sii-inn ah chek an si, tiah theih a si.

Video Zohnak-https://fb.watch/edwcgNSE7s/

Video Zohnak-https://fb.watch/edwgM3vdRe/

Video-https://fb.watch/edwoW_v3ct/

Video Zohnak-https://fb.watch/edwcgNSE7s/

Video Zohnak-https://fb.watch/edwgM3vdRe/

Video-https://fb.watch/edwoW_v3ct/

Be the first to comment

Leave a Reply

Your email address will not be published.


*