Aluancia April thla chung ah Facebook ah biachiakha in CDF pawl a zuamcawhtu SAC ralhrang pa Yel Lin Aung cu July 30 ah a cangmi Mindat-Matupi karlak kahdohnak ah a thi, tiah CDM a tuahmi Myanmar ralbawi fanu nih a chim.
Yel Lin Aung hi Sagaing ramtthen, Katha ah hmun a khuarmi Kha Ma Ya (304) ah ralkap a ttuanmi a si i, Matupi ah a phanmi SAC ralhrang bu ah aa telmi a si.
Yel Lin Aung nih July 17 ah a donghnak bik Facebook ah a ca ttial. Cu a ca ah cun, “Kawlram chung kaa ziak bikmi khua pakhat lak ah Matupi zong aa tel cang,” tiah a ttial.
Mah hlan April thla ah khan Facebook Commend pakhat ah, “Nan Lai meithal he cun rak chuak uh. Ka z**g he nan i do lai,” tiah biachakha ngaiin CDF pawl a zuamcawh hna.
July 30 ah a cangmi Mindat-Matupi karlak mengtung no. 73 zawn i kahdohnak ah SAC ralhrang bawi Leut. Col. Zaw Zaw Soe telh in ralhrang 10 an thi, tiah CDF nih thawngpang an chuah.
Hi a thimi lak ah hin a cunglei i Yel Lin Aung zong hi aa tel. CDM a tuahmi ralbawi fanu lawng si loin Mindat mipi group pakhat zong nih Yel Lin Aung a thihnak kong cu an fehter.
Mindat group pakhat nih, “Matupi khua kaa ziak ngai cang a timi Yel Lin Aung cu Mindat le Matupi karlak ah non ah aa chuah cang,” tiah an ttial.
The Chin Journal
Leave a Reply