Pu Zo Thang Nih CDF Pawl Hi Sahrang An Si, NUG he vawlei hmunhma kong kau ah lungtlinh mi an ngeih ko buin Chin ram kilvengtu phu hna nih an kan kah hmasa caah buaibainak a chuah nak kong cu Zomi Revolution Army (ZRA) nichuah lei Headquarters in chimnawl ngeitu Pu Zo Thang nih CNI thawngzamh ah a chim.
Chin ram ah colcangh nak angei mi Chin dohlennak a tuah tu pakhat a si ve mi ZRO/ZRA kawl ralhrang pawl he an i fonh hna i CDF an kahdoh hna caah CJDC nih sahrang an si tiah theihternak a rak tuah cang. ” Chin kilvengtu phu hna nih ZRA an kah hmasa nak kong, A tu ah Chin ram kilvaengtu hna nih cathanh an chuah mi pawl cu hrampi a ngei mi a si lonak kong cu ZRA nichuah lei Headquarters in chimnawl ngeitu Pu Zo Thang nih CNI thawngzamh ah a chim.
Pu Zo Thang nih ” kan mah sinah kan vawlei cu kan mah tein sersiamkhawh nak aruang cu kum 2021 April thla hrawngah kan mah lei in runvengtu vuanci U Ye Mon he rak i ceih cia mi a si cang i, nan mah le nan vawlei cu tlangcungmi hriamtlai phu hna nih kilveng uh. PDF training a um zongah a si loah bomhnak nan pek khawh hna cun pee hna uh tiin U Ye Mon nih a ram chim cia mi a si cang.
Kan nih cu kan mah i kan vawlei kilven sersiam pah in rian kan tuan cuah mah lio ah an mah lei nih an kan kah doh hmasa mi a si. An nih cu kan mah nak hmanh in sahrang deuh an si. Cu ruangah mah cathanh kha phung ning loin thanh mi a si” tiah a chim. Cu leng ah ZRA nih Mipi kilveng tu CDF an tlaih hna , an kah hna tiin cathanh chuah mi zong kan mah lei nih kan cohlang lo i PDF, CDF lei nih thazaang tampi in an kan kah hmasa ti zong in a chim.
Pu Zo Thang nih ” December 17 lio ah kan vawlei kilven hlethlainak kan tuah lio ah an mah lei nih ralkap thazaang 70 hrawng in kan mah lei minung 30 hrawng cu khuate pakhat ah kan ih lio, kan i din lio ah an kan kahhmasa, thisen chuah ding in an kan tuah cu, an mah PDF,CDF pawl an si. Cu ruang ah kan mah nak in an mah hi Sahrang an si timi hi ka chim duh mi a si” tiah a chim. ZRO/ZRA phu hi Chimram Tidim, Tuannzang telin Myanmar-India ramri Manipur ah aa colcang mi hriamnam a tlai mi an si.
Kanpalet Le Mindat Pengkomh Hotel CheuKhat Cu SAC Ralkap Nih An Hrawh, Chin ramkulh, khualtlawng mi an tam biknak Kanpalet le Mindat pengkomh ah Hotel cheukhat, mi an um lonak Hotel cu SAC ralkap nih an hrawh hna, tiah Hotel ngeitu he aa naihniam mi sinin theih a si.
Cun, Chin ramkulh chung khualtlawnnak(tourism) lei pehtlai rian hna cu Covid 19 ruangah an i din tiah theih a si. “Kanpalet le Mindat ah cun zeibantuk tangka kawlnak hmanh a um lo i, khualtlawnnak rian lei cu a bik in an ṭuan hna. Keimah Ka hawi le zong hi Kanpalet ah Hotel rian an ṭuan hna i, Covid ruangah an i din. Khual riak an um lo caah cheukhat rianṭuantu pawl cu an dinhter hna.
“SAC ralkap nih uknak an laak hlan ah Covid zulhphung ning in an hun ṭhan. An i dinh a sau cang caah tangka cawi in a Hotel hi a hun. Uknak an laak hnu cun Kanpalet ah ahohmanh an um ngam ti lo tikah hiti an bauh le an hrawh hi a si,” tiah Kanpetlet i Hotel ngeitu he aa theihngal mi pakhat nih a chim. Cu bantukin Mindat um Hotel hna zong SAC ralkap nih an hrawh hna. Chin ramkulh Kanpalet ah Hotel 8 a um i Mindat ah 3 an um, tiah tualchung mi sin in theih a si.
Leave a Reply