Bangladesh Nih Rohingya Hna Cu Kirter Zawkzawk An Duh

Bangladesh Nih Rohingya Hna Cu Kirter Zawkzawk A Duh: Rohingya hna cu anmahle umnak hmun cio ah an kir khawh nakhnga Myanmar lei nih khua an khanmi cu thil ṭha tuk a si, tiah Bangladesh ramdang palai AK Abdul Momen nih a chim.

Rakhine ramkulh in a zaammi hna cu anmah umnak hmun cio ah an kir ṭhan khawh nakhnga tiah June 14, ahkhan Bangladesh-Myanmar rianṭuanṭu committee nih a vawinganak tonbiaruahnak an ngeih lio ah Myanmar nih biatak tein an cawlcangh a herh tiin kan chimh hna, tiah Abdul Momen nih cun a chim.

Bangladesh nih Rohingya mipi 8,30,000 konglam cu Myanmar tuanvo ngeitu hna sinah an tlunh cang nain minung 58,000 lawng zohfelnak an tuah khawh rih. Myanmar nih Rohingya kong cu tuan deuhpi in a rak tuaktan cang ding a si, tiah a chim chap.

Kum 2017 August 25 ahkhan Myanmar ralkap hna nih mibu thahnawnnak an tuah ruangah Rakhine ramkulh chung in Rohingya mipi 1.2 millions leng cu Bangladesh ah an zaam.

Rohingya mipi hna cu anmah umnak hmun ah an kir ṭhan khawh nakhnga Myanmar-Bangladesh fonhmi committee cu Kum 2017 Dec 19 ahkhan an rak dirh. Asinain kum 5 chung ah Myanmar nih Rohingya pakhat hmanh an au rih hna lo, tiah Bangladesh ramdang palai nih cun a chim. Cred : The Chin Post