KNU brigade 5 hmunhma Phapun Mutaw pengkulh chungah nizaan December 20 ah ralhrang phu hna le KNLA kar kahdohnak voi 2 a chuak, cu kahdohnak ah cun ralhrang phu lei in minung 9 an thi i minung 4 nih hliamhma an tuar tiah Mutaw thawngzamhnak nih cathanh a chuah.
Nizaan zinglei suimilam 9:40 ah Thibaaye khua ah kahdohnak voi 1 a chuak i, Cu kahdohnak ah cun ralhrang minung 3 an thi minung 2 nih hliamhma an tuar. Cun zinglei suimilam 10:10 ah Tamiloe khua ah kahdohnak voi 1 a chuak than. Cu kahdohnak ah cun ralhrang phu minung 6 an thi i minung 2 nih hliamhma an tuar.
Ralhrang phu le KNLA kar kahdohnak ah KNLA lei a thi le hliamtuar um lo in hnu an tolh kho tiah theih a si. A tu lio Kayin ramkulh chungah ralhrang phu hna le KNLA, PDF phufonh kar kahdohnak a fak kho a si caah mizapi nih ralrinnak ngeihcio ding in KNU Mutraw thawngzamhnak nih a langhter. Khit Thit Media
December 18 , zan suimilam 8 hrawng ah khan Champhai Deputy Commisioner(DC) Pi Maria CT Zuali le a riantuan hawi hna cu Farkawn lei in an kir lei ah Myanmar lei in kuva thei phurtu motor 9 an hmuh i, an lak i pahnih cu an zaam manh. A zaam manh lo mi motor 7 cu an dirter hna i ramdang in a lut tiah ruahmi kuva thei bag 180 an tlaih.
Kuva thei an tlaih mi dihlak man ah hin India phaisa sing 42 man hrawng a si lai, tiah an tuak. Hi kongkau ah hin Lalhruaitluangi, Chaltlang Lily Veng, Aizawl um mi nih cun Champhai palik sin ah First Information Report(FIR) a pek. FIR i a langhning ah cun Champhai DC Pi Maria CT Zuali le a naule hna nih a kuva thei phurtu motor pali cu an tlaih i,
A kuva thei quintal 120 hrawng cu ram leng theitlai a si le silo fianh ta hmasa loin an duah piak, tiah a tial. Hi leng ah hin a motor mawngtu driver mobile phone le motor tawh a laakpiak hna, kuva thei hi aho ta a si zong an fianh hmasahlan ah an duah caah le tuavo a ngeitu Champhai DC le a Naule cung ah a herhning in dantatnak pe ding in cozah a hal hna.
Ho lio ah Mizoram party dangdang ZPM le Congress hna nih Champhai DC Pi Maria riantuan ning an fak. Tlaih manh lo in a zaam mi motor an hlatnak kong ah palik duty hna nih Pi Maria le a tuanpi hna thawng fiang an thanh duh lo cu Party hruaitu hna nih an theihthiam lo kong an chim.
Mizoram cozah nih phungning loin chawlehnak kong ah nawlngeitu Mizoram palik hna cu an kut a tempiak hna, tiah cozah an puh ve. Tuhtla ni 12 ah khan environment and social activist Ruatfela Nu ti mi nih Chief Minister Zoramthanga le Prime Minister Narendra Modi sin ah memorandum a rak pek fawn cang. The Chin Post
Leave a Reply