American Cu China Nih A Zohchia Taktak Bakin A Tuah!!

China Nih American Ralring A Peek
=================
Taiwan nih Luat-Lat-Yi (Independent) a khel a si bak ah cun kahdohnak thawk dingah hnu lei ah kan kir hrimhrim lai lo, kahdohnak kan thawk colh cang lai tiah June thla ni 10 ah China humhimntu vuanci nih an ral a si mi American cu ralring a peek tiah CNA thawngzamh nih a tial.

Minister Wifang Hee nih Singapore ah tuah mi Shangri-La Dialogue humhimnak ceihmai tonbiaruahnak chungah American humhimtu vuanci Alloy Austin he a voikhat nak bik hmaitonhin tonbiaruahnak an ngeih nak ah hmaitonh bakin ralringnak a peek hi a si tiah theih a si. Hmaiton bakin ramthawng pakhat a si ve mi ralring peek hi cu a zohchia ngai ngai.

A tu lio ah ASEAN chairman a ttuan mi Cambodia Prime Minister Hun Sen nih nai te ah thihdan an pek mi mino 4 hna kong ah nawlnak a tuah tiah theih a si. Democracy duhruang ah a cawlcang ngai mi mino 4 hna cu bia an ceih hna hnu ah SAC biaceih bawi nih cun thihdan a pek hna. Cu hna 4 cungah chiah mi thihdan cu ttha tein ruah piak tthan ding in le thihdan pe lo ding in n Hun Sen nih cun Min Aung Hlaing sin ah nawlnak a tuah.

Ralkap uknak duh lo tu pawl Thihdan peknak nih hin ASEAN member ram hna lak lawngah siloin ASEAN hawikomh ram hna karlak zongah thinphan thlalau nak fakpi a chuah ter tiah Hun Sen nih cun a langhter. Hi bantuk in uknak a fir tu SAC ralkap nih an thah hna ahcun vawlei cung ram hna lehrulhnak fak a tong kho i,

Myanmar ram buainak kongah i zuam cuahmah mi remdaihnak timi tiang in a hnursuan lai tiah a langhter chap. Nikum October thla lio ah SAC ralkap nih an rak tlaih mi Pa Phyo Ze Yar Thaw le Pa Jimmy telh in mino 4 cu tukum January thla ah khan thihdan an rak pek hna. Cu kong cu SAC ralkap chimnak nawl ngeitu Zaw Min Tun nih TV thawngthanhnak in a rak chim.

Nizaan Pur 10 ni ah Demoso peng Daw Se khua ah kum 50 mi pakhat cu ral an zaam nak hmun in khua ah thilri lak ah a va kal i mine bomb ai lamh sual caah a nunnak liam tiah theih a si. “Zaanlei sang ah phone an rak kan chawnh, khua chung ah mi pakhat mine lamh sual ruangah Loikaw sizung ah an kal pi ko nain Sizung ah anunnak a liam tiin. Thilri lak i an rat tikah an inn kam bak mine bomb ai lam sual ee” tiah KNDF B-06 ttuanvo ngeitu pakhat nih a chim.

Tutiangah Daw Se khua mi cheukhat an rak kir ko nain a cheu cu ramtang ah an i dor rih ko i khuachung ahhin SAC ralkap zong an um pah rih tiah an langhter. Nizaan tthiamtthiam ah hi hmun hrawng ah aum mi khuate cheukhat ah SAC ralkap nih an do ta mi Mine bomb cu KNDF B-06 nih an hmuh hna i an lak piak dih hna, nain a dang hmuh lo mi zong um kho a si tiah a langhter chap.

India ram, Meghalaya ramkulh Khualipi, Shillong khuapi ah Lai mi/Laifa cacawng lio mi hna umnak ding “Lai Students’ Hostel” cu nihin pur 11 zinglei suimilam 11:30 ahkhan Community Hall, Lapalang, Shillong ah Lai Autonomous District Council, Chief Executive Member Pu V. Zirsang nih honnak caan a ngeih.

Hi caan ah hin Rev. A. Khawlrimawi LIKBK, Shillong pastor nih thlacamnak a ngeih i LADC cozah lei in upatmi Executive Member Pu Andrew Laltlanzar, Middle School Education lutlai le upatmi Executive Member Pu L. Danial, Primary School Education lutlai hna nih an telpi. Cu pinah LSA General Headquarters: Lawngtlai in Pu F. Vanlalruatpui,

President le MC. Vanlalrova Lai, General Secretary hna an i tel fawn. Cun, Shillong lei in Dorbar Shnong (VCP), Lapalang, LSA Sub-Headquarters: Shillong hruaitu, Lai Christian Fellowship hruaitu le Shillong ummi nu le pa lengah riantuanmi hna le lai mi siangngakchia tampi an i tel fawn.

Hi kong he pehtlai in Lai Students’ Association General Headquarters nih lunglawmhnak cathanh an chuah i, LADC cozah hruaitu Pu. V Zirsang le Department dangdang hna cung ah lunglawmhnak bia cathanh in langhter. Hostel ah hin minung 35, Superintendent umnak, LSA Zung lengah, Dining Hall le Garrage a um lai. Hostel phunglam le poiherh theih awk dangdang cu Advisory Board biakhiah ning in a kal te lai. “Zahkaimi Pu V. Zirsang Cozah LADC cung ah kannih siangngakchia hna cu a kan dawtnak a tak i a langhter caah kan lungthin dihlak in kan i lawm.

“Cun, LADC cozah nih siangngakchia lawng siloin riankawl lio mi hna ca ah a hlei in, Education Department nih Cawnpiaktu (Teacher) rian hna zong cozah phunglam tein theihternak fakthanh (Notification), Exam le Interview tuah in rian laak timhnak ngei in, cubantuk lam cu a hrawng cuahmah lio ti kan theih i kan hmuh tikah kan lung aa lawm tuk. Hram an thok cang mi hi a dongh tiang dik le fel (Free and fair) tein an kalpi lengmang kan duh fawn. Cun, Department dang hna zong nih cozah phunglam tein rian an laak kan duh fawn. Lairam le Miphun sersiamnak ca ahcun Cawnnak (Education) hi a biapi cem a si.” tiah LSA General Headquarters: Lawngtlai nih cathanh an chuah.

Monywa PDF (MPDF ) kut in thlahnih chungah SAC ralkap 80 leng an thi i 32 leng hliam an tuar tiah MPDF nih nihin, June 11 ah cathanh a chuah. Monywa pengkomh No.1 Battalion MPDF nih April le May thlachung kahdohnak hna cu khawmhsuat in an langhter mi a si. Dothlennak tuah caan a sau deuhdeuh i mizapi vengtu ralkap hna le SAC ralkap karlak ah hmaitonh kahdohnak a tam chin ve.

Kan hriamnam hmanmi a dang tuk ko nain a donghnak ah cun teinak kan hmu hrimhrim lai tiah kan zumh i SAC ralkap hi an ci kan hmih lai , a dik mi Zauk phung kan hmuh khawh nak hnga kahdohnak ah MPDF cu mizapi hmaiah kan dir lai i dothlennak kan tuah lai tiah biakamnak he cathanh an chuah. Thlahnih chung ah MPDF nih Minkin peng, Monywa peng, Pale peng, Kani peng hna chungah SAC ralkap hna rallam cu kan kahdoh hna. Cu kahdohnak hna ahcun tualchung mipi ralkap vialte i bawm in kan tuah mi kahdohnak a si tiah an langhter.

US ram. Maryland factory pakhat ah June 9 ah khan meithal kahnak a chuah than ruangah minung 3 nunnak a liam tiah theih a si.
Mi pakhat nih a rianttuanyti hawile hna cu a kah thah hna hnu ah motor in zaam aa timh lio ah palek he an i kap. Kum 23 lawng a simi meithal tlaitupa cu palek he an i kah hnu ah motor cungin a zuang i zaam aa timh lio ah hliam a tuar tiah Washington ah tuanvo ngeitu Douglas Mullendore nih thawng latu hna sinah a chim.

Meithal kahnak a chuahnak konglam he pehtlaiin fiang tein hngalh fian a si rih lo nain meithal tlaitupa le kah thah a tongtu hna cu Maryland State, Morthern Smitland, Columbia Mission Company ah riantuanmi an si. Company nih atu bantukin meithal kahthahnak kong he pehtlaiin nawlngeitu hna he hmunkhat ah riantuannak le cawlcanghnak a ngei nain i kah thahnak a chuahnak aruang bik chim cu a duh lo.

Cu company nih ram 100 leng i wholesales hna sinah Concret seh thilri he aa pehtlaimi paoh cu wholesales in a pek hna tiah theih a si. A liamcia kan hnu zarh ah khan US ramchung ah meithal hmangin mibu thahnawnnak a chuah hnuin meithal cawknak le zuarnak, hmannak phung cu fak piin phihkhamnak tuah cang dingin US Congress nih aa zuam cuahmah lio tiah theih a si.

Post Views: 42

American Cu China Nih A Zohchia Taktak Bakin A Tuah!!

Be the first to comment

Leave a Reply Cancel reply