Thantlang khuapi chung inn 70 in inn 100 kar a kaang, CNA/CDF nih ralhraang pakhat an thah i meithal zun khat an laa

Thantlang khuapi chung inn 70 in inn 100 kar a kaang, CNA/CDF nih ralhraang pakhat an thah i meithal zun khat an laak Kahdohnak chuah lengmang ruang ah zaam taak dih a si mi Chin Ramkulh Thantlang khuapi chung cu hramhram in uknak chuttu Ralhraang Council ralkap pawl nih 2021 October 29 zing in an khangh i tuzaan suimilaam 6:20 tiang ah inn 70 in inn 100 kar cu a kaang cang,

CNA/CDF nih ralhraang pakhat hmun ril in an kah i a meithal zong an laak tiah thawng kan theih. Hi kong he pehtlai in himnak ca ah min langhter duh lo pakhat nih, “Nihin zinglei sang khan an khangh thluahmah. Atu tiang mei a dai rih lo. Chunhlan tiang ahkhan cun inn kuahra lawng a kangh kan theih. Zaanlei sang ah tam tuk mei a lawn. Kanmah ruahdamhnak ah inn 70 in inn 100 kar cu a kaang hrimhrim lai.

Cun, inn kangh hram aa thok hlan deuh zong ahkhan meithal le bomb thawng kan theih,” tiah The Hakha Post ah a chim. Nihin October 29 Thantlang khuapi chung thil a cang mi chung ah CNA/CDF ralkap nih SAC ralkap chung in minung pakhat an thah lawng si loin meithal zuun khat zong an laak khawh tiah kan theih.

Meithal an laak mi kong he pehtlai in The Hakha Post nih kan theih ning ah, “Nihin zinglei sang ahkhan Council ralhraang pakhat nih a thli tein inn a bouh. A bouh lio ah CNA/CDF nih an kah i a hmun ah a nunnak a liam. Cu lawng si loin kah thah a tongmi SAC ralkap pa i a meithal zong laak a si.

Thah mi le meithal laak mi thawng an theih le cangka atu bantuk in inn an khangh hi a si,” tiah kan theih. Thantlang khuapi chung hi khuataw in khualu tiang hmun ruk sarih hrawng ah bomb mei in an khangh i atu suimilaam 6:20 PM tiang a kaang cuahmah rih ko tiah kan theih. Photo: Credit

Aliam Cia Na Palhnak Kha, Hmailei Caan Ah Cawnpiak Tu Thabik A Si Ko. Vawlei cungah hin minung phunhnih lawng kan um petu le chuttu , chuttu cu an ei lai nain, petu cu a mitkuh thaw deuh lai . Minung cu nangmah na zumh bantuk in zum dih hna hlah, cheukhat cu an tuahmi hi chunglei tel lo lenglei lawngte an si. Cheukhat nihcun na chiatnak lawngte anhmuh lai, an cung i zeitluk na that ko zongah , an in hmuhnak ah zeitluk tha hmanh law na tling kho hlei lai lo. Na cungah thinhun nak le lungfah nak,

ngeihchiat nak an tuah tik ah, va lehrulh hna hlah, anmah he nan i lo sual lai. A lenglei na hmuhnak lawngin va zumhdih hna hlah, va ruahchih hna hlah, na caah an tha dih lo kho. Midang kha na dawt hna tikah, a ka daw ve te lai ti ruahchan nak va ngei hlah, cheukhat cu an mah lei dawtnak lawng kha an i cinken i a luancia caan kha an philh theo tawn cucaah, nangmah tu na thinlung ba lai. By. Fľôweřy Par(Journalist of the Chin Post)